［活學活用］六十歲畀銀行經理呃2000萬，如何避免？（二）—幾時都問，how are you going to rip me off。錢嘅嘢，乜人都唔好信。仲有，記得check單。同埋唔好受金融L嘅恩寭 (Patreon)

告急：星期三晚講座最後召集

人會老，到你老咗啲投資產品你就會唔明　—　但有啲基本嘢同知識無關

幾時都問，how are you going to rip me off

銀行經理又送口罩畀你，又免費同你做嘢，仲私人轉錢畀你，為乜？

我睇幾秒已經知會發生乜事，結果一早寫在牆上

仲有，啲錢唔會一夜走晒，居然有人係唔check statement的

「唔係喎，埃汾平時叫人唔好成日睇喎」—唔好聽一半唔聽一半！

香港地，做金融跑數嘅，當然係要搵你著數—問題係點搵，搵幾多

背後可以出好多佣畀人推嘅嘢，咁錢出自邊個身上？當然有伏

無數研究做過，受咗人恩惠，就之後好難拒絶人「咁你買股票夠係信人啦」

告急：星期三晚講座最後召集

1. 比較少人報名，告下急。星期三晚中環免費講座，報名呢度。報咗名嘅到時出現吧。

2. 另外，賣多次花旗信用卡廣告，因為昨日條link錯咗。想知詳情嘅我Facebook Post有講。但簡單講，開返張花旗卡，Top up啲電子錢包都有優惠（Payme 支付寶 微信支侍咁），我自己都個個月用

3. 開戶link呢度。我係有得分返少少的。

4. 繼續講呢個2000萬阿嬸畀銀行經理昆，想睇片嘅呢度（2倍速睇吧），值得你睇一次。

5. BTW，條片成20萬view—你睇有線（收費電視已死，得返開電視同OTT），真係冇乜邊啲自家片有咁勁（煉狗術啲片就好多人睇）。兩個結論：首先，呢啲「東張西望」式嘅節目真係皇牌，成本又低，求其搵兩條女棟住講陣嘢就得。第二，在成堆「一線大搜查」片中，呢條都係相當多人睇嘅　—　果然睇人PK最開心

6. 昨日寫咗第一篇，應該三篇內寫完。但真係好值得睇好值得寫，因為犯咗唔少我以前講過嘅錯誤，我亦唔想你成為下一個。

人會老，到你老咗啲投資產品你就會唔明　—　但有啲基本嘢同知識無關

7. 講真，我都45歲，敢唔敢話自己一世英明？都未必。你同我都會老，到你老嗰時，好可能啲新興嘅科技，投資產品，你係無法理解嘅，係咪？

8. 不過，我相信有啲基本常識，係同知識水平無關的。例如我上篇講嘅，自己錢自己管，根本唔使信啲中介人（我唔係中介人，我只係一個賣馬經畀你，或者同你講基本知識嘅人）

9. 講遠咗少少，但今次呢個case，我真係睇咗幾秒已經知之後會發生乜事。

幾時都問，how are you going to rip me off

10. 記住啦，舊文有提，幾時都問，how are you going to rip me off

11. 呢個故事，條銀行經理，又話免費幫佢做嘢，比較其他銀行嘅嘢，「教佢理財」。又話咩幫佢買口罩買防疫用品送埋上門，又話咩佢去買戒指半夜冇錢，銀行經理私下轉住畀佢先。

12. 你可以用下你嘅常識：你作為我多年讀者，你買戒指，半夜冇錢，我會唔會轉住7萬蚊畀你？梗係唔會啦！掉返轉，我要買戒指，叫你轉住錢畀我，你會唔會轉？梗係唔會啦！

銀行經理又送口罩畀你，又免費同你做嘢，仲私人轉錢畀你，為乜？

13. 咁你諗下，我地作為讀者作者咁close，都唔會咁做。個銀行經理咁做，仲唔係有問題？

14. 事主自己都識講啦，啲仔女都未對佢咁好。咁問題嚟啦，銀行經理係雷鋒（可能有讀者唔知邊個）？好得閒？佢自己賺夠？（瑞士山區肺測試！）

15. 更加唔好講，根據事主講，佢仲可以mon晒佢老公佢親戚啲活動，開票畀乜人都知。如果所言屬實，呢啲都係幾離譜嘅行為。問題兩個：第一，銀行經理咁冒險為乜？同你有親？第二，事主享受到呢啲咁嘅特權，真係覺得有免費午餐？

16. （BTW，我個人就係十分PK，但我懷疑呢度可能涉及啲潛在姦情。事主好想知佢老公啲錢去咗邊。另外，畀個好意見各位讀者：「唔好同老公老婆男朋友女朋友用同一間銀行！！！」）

我睇幾秒已經知會發生乜事，結果一早寫在牆上

17. 成件事，fishy到不得了，你完全知道後來會發生乜事，結局早已寫在牆上。至於後來講咩不停買賣外幣呀（即係倫敦金咁玩法），保險融資呀乜鬼，呢啲技術細節，根本唔使討論。

18. 正如我地唔使討論C基金買乜，點高追低沽，全不重要。因為請留意重點：根本結局早已註定。

19. 想講嘅係，呢啲博取信任嘅玩法，台灣一樣有。咁啱早兩個月我在台灣睇報紙睇到。原本完全一様，平時探啲長者，噓寒問暖，摶取信任。邊有無緣無故嘅愛？只係人地唔係賣呢啲產品，係賣靈骨塔。另外，台灣人邊有香港咁富貴？成個集團先呃到5000萬港紙咋！香港一單就2000萬，仲分分鐘告唔入

仲有，啲錢唔會一夜走晒，居然有人係唔check statement的

20. 呀仲有，一個幾差嘅理財習慣。

21. 雖然事主係六十幾歲，但你聽講嘢，思路好清晰丫，唔係老人痴呆嗰啲。亦唔係唔識字

22. 於是你留意到一樣嘢：佢話到銀行downgrade佢戶口，佢先知2000萬輸到200萬都冇。

23. 當中發生乜事，我都有啲奇怪　—　我唔係奇怪佢啲錢會輸晒。而係，點解佢搞咁耐先知？我當佢冇ebanking唔識用都好，月結單個個月有架喎（否則點會收到downgrade信）。至於係咪銀行經理幫佢搞埋唔收紙本，或者佢自己揀（好似慳返廿蚊），就唔知了

24. 我好奇怪，佢居然係冇check住自己啲錢

25. 仲有，慎防有人挑戰我，或者真心唔明，「但埃汾唔係平時叫人唔使成日睇咩」

「唔係喎，埃汾平時叫人唔好成日睇喎」—唔好聽一半唔聽一半！

26. 好啦，「所以話你地聽嘢唔好聽一半唔聽一半」，同埋唔好只係聽個「建議」，要諗埋個內容同原因

27. 平時我講，係你啲股票倉位啫。但你銀行戶口，係兩事，當然要睇，否則畀人盜用都唔知。正如信用卡月結單，你都一定要睇（我以為係常識）。

28. 況且，我叫你「唔使成日睇股票」啫，冇叫你全年都唔使睇唔可以睇。一個月睇一次好未？但明顯個事主係一路都唔睇。

29. 然後順手講埋，你可以噓我：但我，就成日不停睇股票的！有好多原因，一來工作需要，二來都真係有舖癮，正如我會不停咁睇Facebook Page有幾多人，一個鐘睇幾次，甚至唔止。

30. 根本股票倉位，我就成日睇—我直頭有個Excel實時計我啲股票值幾錢，Yahoo Finance 亦有。

31. 「咁你又叫我地唔好睇？」—因為你唔係我！我一日輸幾十萬（試過啦）都面不改容，唔會影響我做其他嘢，亦唔會嚇到我震走。舊年好似一個月輸過百萬，但都冇大大影響我心情。但你受唔到嘅，就睇少啲。

香港地，做金融跑數嘅，當然係要搵你著數—問題係點搵，搵幾多

32. 記住，how are you going to rip me off．政治不正確，但無事獻殷勤，非奸即盜。如果係女讀者嘅，啲男仔對你咁好，都係想追你（或者搞你）。

33. 咁我寫過了，香港地，呢啲做金融嘅，仲要係跑數（無論直接定間接）嘅位，當然只係想搵你著數。

34. 呢個本身係冇問題嘅，問題係你要知佢點搵你著數，搵到幾多。

35. 正如我推介啲券商開口，銀行信用卡，咁大家都知我會有得分，我亦有話你知，甚至唔講都得，雖然你都會估到。

36. 但首先，嗰啲唔會係好多錢（但個量做得大就幾好）。咁但亦同樣地，正係因為背後金融機構唔係畀好多錢我　—　其實先係好事，因為你就知道，嗰樣嘢唔係極好賺。咁亦都知道，嗰樣嘢冇乜伏！

背後可以出好多佣畀人推嘅嘢，咁錢出自邊個身上？當然有伏

37. 相反，如果嗰樣嘢背後，可以出好多錢畀人推嘅，咪即係好好搵。咁啲錢嚟自自邊個度？你話呢？

38. 以前篇文都寫過啦，280萬個車位，可以出150萬佣—咁你話買嗰個有乜後果？

39. 我都唔阻人搵食，但輕輕講一講：上次我提過，坊間好多人推期權嘅優惠。點解咁熱心？一來迎合到讀者搵快錢心態。二來好分。咁但，點解好分？點解券商畀到咁高分成？當然係因為好賺。咁賺誰的錢？你話呢？

40. 同樣地，啲加密幣嘅情況，亦係一樣。

41. 順手講埋，你見我冇乜推呢啲嘢，但我亦唔會保證我永遠都唔會做（雖然turn down過唔少）。咁你見我做啲嘢，都係比較均真嘅。開券商戶口，開信用卡，開銀行戶口，借稅貸，都係比較正常嘅產品，你知銀行券商賺乜嘛

42. 你睇個事主呢啲情況，享受咁多免費好嘢，又送口罩又半夜轉錢畀你買戒指，連佢老公開票開畀乜人都話你知。我就當個經理好人，但，得你一個客？

43. 你見到，一定背後有大陰謀啦。開善堂咩。

44. 當然係建立信任，然後等你落搭

無數研究做過，受咗人恩惠，就之後好難拒絶人

45. 另外，慎防大家唔知。無數實驗都做過，你受咗人小小恩惠呢，之後係好難拒絶人地嘅要求的。

46. 順帶一提，上面篇文入面本書，我以前推介過。唔深亦唔長。入面好多講嘅嘢我都提過（例如「車夫的知識」），好多你都大約會知，但佢啲例子舉得幾好，亦寫得有條理。以前我推介過呢本書，但有幾多人去睇？你與其日日上網睇垃圾，不如買本嚟睇。

47. 呀仲有，貼書嗰條link唔係sponsor link。有啲書店可以做呢啲，「但分得太少，少到我搞嘅意慾都冇」。於是你睇到，賣書真係賺唔到你錢，亦即係買書係冇乜伏嘅。

48. 我並不是冷血到叫你唔好信人，但涉及錢銀嘅嘢，當然小心啲，永遠唔好畀你啲錢離你太遠。

「咁你買股票夠係信人啦」

49. 然後順手澄清一個誤解：你買股票，固然都係「信」公司同管理層。但啲錢，又真係冇直接去咗佢地袋。間公司要呃走你呢舊錢，都唔係咁易的，你舊錢都冇入到佢公司，係咪？（除非抽新股）

50. （我其實好怕啲人聽一半唔聽一半，或者自作聰明。你應該做嘅係多思考，少講，多聽）

51. 咁所以，成件事同你去買基金，甚至好似呢個事主咁，好似授權晒畀個銀行經理任玩（又或者有同佢確認但佢求其了事，甚至扮唔記得），就完全唔同。

52. 最後，都唔算自吹自擂，但再講一次：例如我個Patreon，當然都係搵讀者著數。但最壞情況，我寫嘅全部係垃圾都好，都只係一個月呃到你100蚊，一年就1000。冇得再差架啦，我唔會可以掂到你嘅錢。

53. 咁真係計到好極端，當我呃多你十年，都只係10000蚊啫！固然唔係「雞碎咁多」，但頂多你肉痛，或者鬧我　—　但真係唔會搞到你好頭痕的

54. 但，你睇呢單嘢個事主，就唔係咁情況了。

55. 免費嘅，先係最貴呀朋友！