［活學活用］六十歲畀銀行經理呃2000萬，如何避免？（一）—唔好縮數因小失大，stay invested，自己嘅錢自己管，好多搵你著數嘅人 (Patreon)

廣告一則：花旗信用卡

六十歲畀銀行經理呃咗兩千萬，誰之過？

唔好縮數因小失大，stay invested，自己嘅錢自己管，好多搵你著數嘅人

唔使研究誰是誰非，重要係：你唔好做下一個

更多冇咁狼死嘅，個客冇輸咁多，鋤唔入嘅，就冇人報

無唔無良？我都唔係好care．你鬧都冇用，重點係你唔好做下一個

自己嘅錢自己管，因為你根本唔使「專業」

屋企人我都唔會信，何況係街邊跑數嘅人？

1. 首先，星期三晚中環免費講座，報名呢度。報咗名嘅到時出現吧。

廣告一則：花旗信用卡

2. 快手賣個廣告先。唔阻大家太多時間，想知詳情嘅我Facebook Post有講。但，開返張花旗卡，Top up啲電子錢包都有優惠（Payme 支付寶 微信支付咁）。

3. 呢啲東西，就冇得伏嘅，大家都知乜嘢係信用卡啦可？佢亦冇任何簽帳要求之類，況且我已經搵張年薪要求最低嘅畀你。

4. 開戶link呢度

5. 又，當然了，佢地係有得分返畀我的。不過聰明嘅你應該估到，唔會分好多。點解？就睇你有冇常識了。答埋你：因為信用卡賺你唔多（分分鐘蝕畀你），競爭又激烈，唔會出到好多錢搶一個客。

6. 留意呢度講嘅嘢，同今次系列講嘅主題都有關。

7. 嚟到9月，多謝各位新舊讀者。唔知使唔使講句唔好意思，因為之前寫咗八大篇講「基金」，原本話咗可能講返多啲「市況」嘅嘢

六十歲畀銀行經理呃咗兩千萬，誰之過？

8. 但結果有單相當花生嘅東西，正好示範咗我在之前八篇講過嘅教訓。所以即時寫兩三篇，同大家活學活用，睇下有冇學到嘢。有真實例子畀你睇，份外有用。

9. 故事係咁嘅，你可以上我Facebook Page睇簡介（留意不雅用語）。又或者睇「開電視」嘅報導。

10. 但呢度我已經可以畀第一個教訓你：啲人以為睇字「嘥時間」，實則完全錯。同一單報導，你睇文字，五分鐘乜都睇完。但你睇片就變咗十幾分鐘，甚至未計你有機會miss咗嘢又要回返幾格。所以啲人唔想睇字，只係覺得「辛苦」—但實際上你睇片更加浪費你時間（當然睇片可以做住其他嘢，但其實又吸收到幾多？我一般係唔會multi tasking嘅，跑步除外）

唔好因小失大，stay invested，自己嘅錢自己管，好多搵你著數嘅人

11. 我諗未講落去之前，你都知道幾個最大嘅教訓。首先，唔好因小失大，免費嘅最貴。第二，stay invested，唔好留咁多現金。第三，自己嘅錢自己管，唔使亦唔好信其他人。第四，金融界別，就係好多人想搵你著數搵你笨實。搵你著數冇所謂，但你要知道佢點搵。至怕你唔知。

12. （插播一句：第四點其實同我以前講投資嘅「風險」有啲似：有風險係必然嘅，問題係你知唔知在邊，你知咗然後去接受佢就OK。至怕有啲你以為冇風險嘅嘢，或者大大低估咗個風險，嗰啲嘢先會輸死你）

唔使研究誰是誰非，重要係：你唔好做下一個

13. 基本上成個故事你都唔使細睇，呢啲就真係兩句講完。個六十幾歲事主，兩千萬（香港人好有錢！！！），然後「信錯」個銀行經理，唔知幫佢點投資，輸咗九成。

14. 我想recall返講基金系列時講過嘅一樣嘢：你唔使去研究個銀行經理係咪賤人之類，根本不重要。唔好集中於「個人」。留意係成個行業，甚至成個社會都有啲問題（好似講到好憤世，但之後亦會解）。

15. 亦因為咁，我並不特別會同情個事主。但當然了，我又唔會走去覺得佢抵死之類。不過又提你一句，世界上嘅人，有幾多係講晒所有嘢？佢好可能係有啲嘢冇講，但不重要。

16. 我啲文唔係討論佢兩個誰是誰非，small minds先discuss people．講真，又唔係你又唔係我，關我鬼事。

17. 乜嘢關你同我事？就係你唔好做下一個！

18. 呢個case，我唔會話同自己去買基金啲人完全一樣，我唔會太輕率講嗰句「有冇拎支槍指住你買」。因為我往往仲加多句，係咪犯法？咁今次，我就唔敢講。表面睇，有可能涉及一啲mis selling（銀行賣嘢都係有啲規矩嘅）。咁特別如果你有睇晒成個故事，個銀行經理好似爆埋其他客嘅資料去「賣人情」，呢部份照計就明顯有問題

19. 不過話分兩頭，係個事主講啫，係咪事實？唔知。你問我，我傾向信係事實。但，若果「爆其他客戶資料」呢部份，事主冇真憑實證在手，其實未必鋤得入個銀行經理，係咪？口同鼻拗，經理話冇，你點證明佢講過？除非錄咗佢音（都未必完全得，因為錄音上到法庭未必係好強嘅證據，個經理話唔係佢把聲，你點「排除合理疑點下」話把聲就係佢？）

20. 但又要講，我有個做銀行賣嘢嘅朋友，以前做人阿頭亦處理過啲投訴。佢就反而話，呢單個客都未必真係咬得入。

21. 我並不是想講「佢唔畀呢個銀行經理呃，都係會畀第個呃」。但大約都係咁意思。應該話，好似呢個情況咁離譜，個客又嘈到上東張（我知唔係東張，是但啦），有機會lur到銀行和解之類（似乎銀行都有初步和解，收順啲，但個客好似唔制）

更多冇咁狼死嘅，個客冇輸咁多，鋤唔入嘅，就冇人報

22. 但，更多一啲類似嘅case，可能冇咁狼死，可能個職員小心啲，可能個客冇輸咁多，就冇人報架啦喎。

23. 我記得寫完基金文，都有人問點解冇人搞呢個咁PK嘅制度。我都好認真咁回，又唔係犯法，又唔係真係呃錢（「有啲基金經理帶挈個客賺大錢喎」），你自己去買，點「搞」？

24. 銀行賣嘢呢啲，你話「無良」，可能係。但我真係唔識判斷。無唔無良呢啲，好主觀好價值嘅嘢，正如都有人覺得我呢個Patreon無良。但，你應該重點係，犯唔犯法？咁銀行打開門做生意，一般情況，當然唔犯法（個別從業員就可能會）

無唔無良？我都唔係好care．你鬧都冇用，重點係你唔好做下一個

25. 所以我講白啲：無良，就梗架啦，或多或少都有啲無良架啦。問題係，你鬧佢無良都冇用的（small minds！），正如你鬧C基金鬧佢啲靚女sales，消消氣就好，但唔會有用嘅

26. 所以，你要學嘅係：如果中過伏嘅，下次小心啲。未中伏嘅，我教你點避開呢啲嘢。

自己嘅錢自己管，因為你根本唔使「專業」

27. 首先，第一樣嘢，自己嘅錢自己管，你真係唔使信其他人。

28. 固然你會覺得自己唔係「專業」，可能你冇讀過金融相關嘅嘢（其實唔關事），或者唔係做相關工作（也唔關事）。又或者你見身邊啲朋友網友個個講到頭頭是道，加密幣又識，印度局勢又識，低溫超導又識。總之你就覺得自己「唔係好識」

29. 呢個本身唔係壞事，有自知之明，保持謙卑，唔好唔識扮識。但，投資嘅嘢，真係唔使「識」。

30. 應該寫過多次，你拎投資嘅知識去賺錢（例如我以前返工，甚至呢一刻做緊嘅嘢），同你自己投資成績，係兩樣好唔同嘅嘢。講白啲，有個CFA嘅，投資未必叻過個超級市場收銀嘅師奶。掉返轉，人地講股票你搭唔到嘴，不等於你表現就會差過佢，呢點十分重要

屋企人我都唔會信，何況係街邊跑數嘅人？

31. 根本你自己嘅錢，就係你自己管。唔好假手於其他人。你問我嘅，老婆仔女老豆老母都唔好信。你可以話我不孝，六親不認。但我亦真係見唔少親人因財失義，咪仲衰。

32. 咁既然屋企人都係各安天命，你更加唔使走去信街外人

33. 特別係，仲要信啲明顯係跑數搵你著數嘅金融從業員？你話你親人朋友會真心幫你，我都仲信。但，基金佬保險佬銀行經理理財顧問，當然係搵你著數（本身冇問題，但你要知佢點搵你著數！搵幾多！）

34. 根本你自己去買指數ETF，甚至自己買下個股，都唔會咁樣2000萬輸左九成啦。

35. 話分兩頭，我見過有啲case，啲客係輸打贏要嘅。我唔一定係指今次呢個情況，亦不重要。但呢啲情況亦唔罕見。咩雷曼迷你債嗰啲，我到而家都覺得銀行有啲無辜（請鬧）—個別mis selling一定有，有啲個案個客八九十歲在醫院你都仲叫佢買幾千萬嘢，當然有問題兼無良

36. 但更加多嘅係，「我想無乜風險收5厘息」 —留意金融海嘯前好低息。咁啲人想鎖定高息，「咪同你地而家差不多」。咁賣雷曼債券嘅銀行，何來會覺得雷曼爆煲呢？好似真係有啲無辜。

呢篇又係講得有啲虛，下兩篇講啲實嘢。

但總之，唔好縮數因小失大，stay invested，自己嘅錢自己管，好多搵你著數嘅人