基金批判系列（以C基金為例）（八，大結局）—　咁到底基金有冇咩好處？都係有的。埃汾當年又做乜搞勞蘇基金？最後又做乜唔搞？ (Patreon)

即使相當多人吹捧嘅基金經理，拉長時間，多數都係跑輸

你個個月買指數ETF，就好過基金經理了　—但，你係咪做到？

買基金，就迫你stay invested，冇咁易出出入入

如果係月供基金嘅，就迫你儲錢，迫你平均成本。似強積金

「基金經理雖然廢，但可能都仲好過你」—不過，你可以提升你自己

「咁你話基金搵笨，又做乜搞勞蘇基金？」

點解搞？當然係為咗錢！但又應該好過C基金嘅

因為，我係一個唔多貪心，又比較hea嘅人

點解你要買勞蘇基金？「應該跑唔贏大市，但可能好過你自己亂嚟」

點解最後唔搞？冇信心啦，面皮薄啦，怕冇咗朋友啦，驚影響Patreon啦

但當然了，「都因為AUM唔夠大」—我收到一年幾千萬fee，就唔理咁多了

我昰一個教科書上嘅「經濟人」，Homo economicus

好，基金篇最後一篇。之後真係講返多啲大市，個股之類嘅嘢。甚至貼現窗教訓我都遲少少先再寫，唔太急。

即使相當多人吹捧嘅基金經理，拉長時間，多數都係跑輸

1. 真係總結。但你見到，即使係相當多人追捧嘅基金經理，拉長時間睇，多數都係跑輸大市。C基金固然不用講，Cathie Wood亦都係，甚至我相當尊敬嘅黃國英都好似係

2. （不過睇下你用港股比定美股比，C基金就當然計港股，Cathie Wood就計美股，黃國英啲基金好似兩度都有買，就難啲計。呢個亦係好好嘅思考題目。但你問我，可能你咪計恒指同標指平均）

你個個月買指數ETF，就好過基金經理了　—但，你係咪做到？

3. 亦係我一路講嘅，根本你自己個個月去供指數ETF，時間拉長，就往往好過基金經理　—　當然你唔會好過晒「所有」基金經理，總會有啲人係跑出。但我計普遍性，計一半。亦都換句話講，睇得五年十年，跑得贏指數嘅基金經理，可能得兩三成。

4. 但買基金係咪一無是處？都唔係完全冇嘅。如果你留意我上面講嘅嘢，大約都估到我想講乜。

5. 記住，「如果」你可以個個月有紀律咁去買指數ETF，咁就真係唔使買嗰啲基金了。

6. 咁但，呢個「如果」，都係一個問號。事實上，的確唔係咁多人咁有紀律。

買基金，就迫你stay invested，冇咁易出出入入

7. 做唔到，有好多原因。包括自己心理上嘅，總係想time the market．嘩呢排係咁跌喎，好似不停倒水落海咁，算啦，停咗佢。又或者呢排係咁升喎，加碼，倒多啲。甚至係自己儲埋一舊錢，儲幾年先一鑊飛入去。當然亦可能真係急住用錢呀，「下個月先供返」之類，好多唔同嘅理由。

8. 買基金，唯一嘅好處，你可以話就係鎖住你啲錢。我就近乎冇買過基金，唔知啲心態係點。但我估你地如果買咗基金嘅，應該你係冇咁容易「震走」，冇咁容易得閒又沽走佢得閒又飛返入去。基金點都冇股票咁方便，亦冇得day trade，一般你今日沽都要聽日或兩日後先拎到錢，係咪？而佢亦應該一日報一次價，頂多兩次。唔會好似股票咁不停跳。

9. 所以理論上，基金係可以幫你「坐得」定啲。呢度姑且唔計佢嘅其他缺點啦。即係假設有一個好有良心嘅基金經理（甚至唔使好叻，你當佢同大市同步），又唔收你管理費又唔收你表現費咁。咁你放啲錢在佢度，好可能好過你自己手痕自己買股票。

如果係月供基金嘅，就迫你儲錢，迫你平均成本。似強積金

10. 咁如果有啲人，係月供基金嘅（聽講你保險經紀或者啲理財顧問會同你搞呢啲），咁變相，其實係「迫你儲錢」，仲迫咗你平均成本法，仲迫咗你stay invested．

11. 冇錯，就同我之前講強積金一樣。呢啲，係一個壞制度入面嘅一啲好處

12. 因為人真係好奇怪，一般都係愛自由架啦，自己錢自己管。但你又的確發現，如果唔係政府扣起你舊錢，好多人根本唔會儲錢，然後老來又嚟嘈政府。所以你見真係絶大多數國家都有類似嘅制度，出糧幫你扣起舊錢做年金，等你退休有啲錢。

13. 所以，對於一啲完全冇定力，完全唔會儲錢，或者走去亂咁炒嘅人，基金呢回事，就可能好過你自己亂買。如果加埋「月供」基金，更加係迫你平均成本法。

14. Sum up：以前都寫過，強積金＜指數。但一般嚟講，基金又＜強積金（強積金唔會有對沖基金，而且強積金有指數基金揀）。

15. 所以，基金＜強積金＜指數。但你本人在邊個位，就真係好難講。理論上你應該係等於指數，但實際上有啲人自己亂咁買，可能仲衰過基金經理

16. 亦即係話，「基金經理雖然廢，但都有機會好過你」，so sad。

「基金經理雖然廢，但可能都仲好過你」—不過，你可以提升你自己

17. 不過我再煩氣一句，你要做好自己，並唔係真係咁難。你做到大多數時間同金錢都買指數，我唔敢包你贏大錢，但應該真係好過多數基金。

18. 於是乎，帶到去一個讀者問我嘅問題。長期忠實讀者，我信佢唔係挑釁我。講真我估你地好多人都會想問，如果憎我嘅 Facebook公海人更加會問：

「咁你話基金搵笨，又做乜搞勞蘇基金？」

19. 「咁你講到基金搵笨，做乜當時又搞勞蘇基金？」

20. 的確，勞蘇基金嘅set up，同C基金相當相似。我唔知有冇同你地講，照計都某啲人知，根本原本係有機會同中原合作的。咪又係嗰班友搵我！（或者中介人搵我，唔記得，總之唔係我主動搵佢地）。

21. 我講過啦，例如C基金嘅東西，啲管理費表現費，中原都會分一份。咁你亦可以話合理嘅，人地都有提供啲各種服務，幫你宣傳呀，出啲靚女呀，畀個寫字樓你呀，畀你用電腦系統呀，做Trade呀，「到時啲客上嚟媽幫你聽電話呀」，有啲情況仲要「借個牌」畀你。

22. 你可以話，好似補習天王咁。咁佢可以同時搵幾條友嘛，時間先後我唔記得，但例如佢見C基金搞得成功，咪將呢個模式複製去其他人度咯，補習天王之嘛

23. 咁你見勞蘇基金，初步都真係諗住類似1.5/15的。梗係啦，都話都係嗰班友！

點解搞？當然係為咗錢！但又應該好過C基金嘅

24. 咁我點解搞？你話呢？考你上篇文有冇睇真。點解搞？我梗係為咗搵錢啦！唔係為咗乜。

25. 不過，我又可以好大膽講一句：如果我真係搞咗，「都唔會好似C基金咁差」

26. 固然死無對證，一切只係我假設。但我估你有理由相信我呢句嘢。我唔敢講我跑贏大市，most likely 都唔會，但照計會好過佢。

27. 原因？唔係因為我特別叻。而係有兩個。第一，「勞蘇基金應該唔會只係買港股」，咁已經講完。如果我一半港股一半美股咁，照計啲回報都唔會差。好似應該會正數？我都懶計，你幫我計下。但當然了，在呢個情況，你可以話我拎勞蘇基金同C基金比並唔公平。

28. 但第二，即使我只買港股，我估我都冇佢咁差。你可以唔信，亦都有唔信嘅理由。但我真心相信會係咁，我亦都會話畀你知點解。

因為，我係一個唔多貪心，又比較hea嘅人

29. 因為：我其實係一個唔夠貪心，又比較hea嘅人

30. 如果大家現實中識我多年，甚至係工作上識我嘅，應該都會留意到呢樣嘢。甚至你睇我寫文，都會見到。證據？我一個月都寫幾次，叫大家指數ETF做膽，個股小注怡情，係咪？最重要係，我自己嘅錢，我都係咁做。亦即係，呢個係我真心相信嘅嘢。

31. 所以？如果我搞隻勞蘇基金，我都係唔會同指數偏離太遠。再講白啲，我咪又係買騰訊匯豐蘋果微軟！頂多比重同指數爭啲，但唔會爭太遠。又或者，可能我會特登唔買內銀，或者特登唔買美團之類，同指數有啲唔同。知唔知為乜？就係為咗你唔好媽我：「嘩，你照指數執嘅，咁使鬼買勞蘇基金咩，我買盈富+SPY得啦」（而我亦可以話你知，有啲基金真係咁的！！！）。

32. 但知唔知個好處在邊？好處就係，我一定唔係嗰啲認屎認屁嘅人。我唔會走去take excessive risk，全部錢買晒快手B站，或者WeWork Snow 之類。我唔係嗰種搏一舖，贏咗就分大舊表現費，輸咗就摺埋佢，頂多畀你喪鬧嘅人。因為我面皮未夠厚（其實經過呢十幾年已經厚咗好多，「但同金融界啲老手比都仲係爭好遠」）

點解你要買勞蘇基金？「應該跑唔贏大市，但可能好過你自己亂嚟」

33. 好啦，「瑞士山區肺測試」，「咁埃汾你賺乜？」。好簡單，我係諗住食嗰1.5%管理費架咋。「表現費」之類，睇運仔啦，有就最好，但我唔會好大期望　—　呢啲真係我私下嗰時同行家或朋友講嘅嘢。但你留意，好多其他「搞基金」嘅人唔係咁，佢地覺得個表現費先係重點。

34. 咁所以，答到你了，我良心過唔過意得去？都OK嘅。因為我真係唔係打算同你炒到得就得唔得返順德咁玩。我真係諗住「指數　加或減　少少嘢」。

35. 咁對買勞蘇基金嘅人，價值係乜？嗰時我都有寫的，你唔好期望我會好大幅跑贏個市，但我估亦唔會爭太遠。你畀個1.5%，「就其實等於我迫你儲錢，迫你平均成本，迫你stay invested」．

36. 亦係我上面講嘅嘢：你買勞蘇基金，照計會跑輸大市少少。「但你自己亂買，可能仲差」。

37. 至於點解後來唔搞？有好多原因。首先中原食水較深係一個問題。嗰1.5%我可能拎到一半都冇。咁當然，個AUM唔係好夠大又係一個問題。

38. 嗰時可能都係預400個人，每人50萬，即係2億港紙，咁你自己計數，一年300萬管理貴，但我拎一半都冇　—　講真，我個Patreon都唔止啦。而你又諗下，我搞咗個勞蘇基金，仲係咪得閒寫Patreon？仲有啲利益衝突。

點解最後唔搞？冇信心啦，面皮薄啦，怕冇咗朋友啦，驚影響Patreon啦

39. 「然後一個唔該個勞蘇基金有乜依郁，波及埋我個Patreon」。所以計落，唔係好啱數。

40. 再加上，唔好笑，但真心的：勞蘇基金好多當時講明會支持嘅人，都係我識咗多年嘅好朋友。咁你估到了，佢地咁信任我，但我自知市場嘅嘢，邊有話包生仔。講得白啲，市場真係唔掂嘅，我幾年輸咗佢一半嘅錢（C基金咪係！），你估仲有冇朋友做？固然我啲朋友都係成熟嘅人，正路唔會點鬧我，至少唔方便當面鬧。但心中總有條刺吧。即使佢地冇所謂，「你估佢地老婆有冇所謂？」。「原本買樓首期嘅錢你走去信你個十九中學同學？」。

41. 但當然了，我亦無謂太虛偽。咁如果你話個AUM有20億（而唔係2億），我一年收1000萬fee嘅，「咁我可能唔介意畀人狂鬧」。

但當然了，「都因為AUM唔夠大」—我收到一年幾千萬fee，就唔理咁多了

42. 所以，當中有良心嘅考慮，有做臭自己個名嘅考慮，有驚冇咗朋友嘅考慮，有驚影響Patreon嘅考慮。

43. 但我亦要再強調，亦都真係有個價，我一年收到幾千萬fee嘅，「我就真係未必介意呢啲嘢」。

我昰一個教科書上嘅「經濟人」，Homo economicus

44. 後記一個：如果讀過經濟嘅讀者，可以留意下。我有個讀經濟嘅朋友，覺得我就完全係教科書上面講嘅嗰種「經濟人」- 唔係話我唯利是圖。但你睇我啲決定，其實背後係「解釋到」嘅，係有小心估計過risk and reward嘅，正如我唔生仔一樣。但有啲人就唔係的。

45. 我唔係講邊樣嘢好，或者唔好。但我，就真係一個「經濟人」，economic man．你了解得我夠深，係好容易估到我啲行為嘅，係好predictable嘅。亦即係，我總唔會忽然有一日貪過癮走去生個仔的。

46. 總結：勞蘇基金嘅架構，既然同出面啲2/20差不多，所以都唔係咩「好東西」，不過首先個基金經理（即係我）比較細膽，就唔會太過偏離大市。另外，佢亦會話畀讀者聽，唔好預呢隻嘢會跑贏大市，但就往往好過你自己買咁解—因為你自己可能跑輸大市更多。

47. 當然最重要嘅係，最後基於各種原因，都係冇搞到　—　然後呢幾年嘅港股你有眼睇啦。如果只用結果嚟講返決定，我唔搞勞蘇基，真係拯救咗好多讀者！