基金批判系列（以C基金為例）（七）—點解仲有人買基金？以前啲基金點解好似好啲？ETF又係咪基金？ (Patreon)

無數咁多研究證明基金經理跑輸大市，做乜你仲去買？

「總有啲基金跑出」—六合彩都有人中添。事實係時間越長，跑輸嘅越多

升咗嘅你咪覺得佢有料，咪仆入去。

好多人都係睇套西裝，睇靚女sales，聽佢講一大輪術語，寫字樓又夠靚

如果我仲打緊工，都唔講得呢啲啦　—　所以唔好信啲返工嘅人講嘅嘢

以前啲基金，好似冇咁水皮，點解？

唔買基金，咁買乜好？自己買！

「盈富基金係咪基金？」「ETF係咪基金？」

對沖基金同普通基金，主動同被動，交易所上市定冇上市。三個唔同概念

我多數都唔鍾意啲「主題ETF」，那怕佢係追指數。因為隻指數度身訂造嘅

最好揀大盤指數嘅被動ETF，個指數 discretion越細越好

下期預告：「咁你又搞勞蘇基金」「最後又做乜唔搞」

1. 呢個系列差不多去到尾聲，都可以真係總結下。

無數咁多研究證明基金經理跑輸大市，做乜你仲去買？

2. 其實，真係寫過無數次，你知我知，無數咁多研究都證明咗，扣除收費後，基金經理平均係跑輸指數的。至於點解，之前嘅文都講過。所以個問題係，點解你仲去買？

3. 我聽過好多人講，「咁有啲跑輸，亦即係有啲跑贏啦」。係，但你抱住呢個心態，覺得「所以我應該買基金」，咁就死得人多了。六合彩都有人中添，賭場都有人贏大錢。但成個遊戲，係搵笨的嘛（而嚴格講，六合彩就好過基金同賭場，因為個回報太不對等，期期買，輸晒你都唔肉痛，但一個唔該中咗就不得了。雖然機會真係好細）

「總有啲基金跑出」—六合彩都有人中添。事實係時間越長，跑輸嘅越多

4. 即係你心存僥倖，覺得自己揀嘅係會跑贏。但講真，呢個機會有幾大？多數，都係跑輸嘅。況且以前都講過，首先時間越耐，跑輸嘅越多。另外，呢幾年跑贏嘅，往往之後就會跑輸。呢個現象證明乜？證明跑贏嘅，好可能只係因為運氣！

5. 問題就嚟啦，個個把口識講「過去表現不代表將來」，但你揀基金，99.9%你都係睇呢幾年跑贏嘅嗰啲友。因為你覺得佢係有實力，而唔係靠運。更何況，佢地會用好多方法去迷惑你，等你「覺得」係靠實力，而唔係運氣。但結果呢？上面啲學術研究已經話你知。甚至往往見到係，呢幾年跑贏嗰啲，之後跑輸嘅機會更大。

升咗嘅你咪覺得佢有料，咪仆入去。

6. 但你見真係咁架喎，李生又好，Cathie Wood又好，贏得一兩年你咪當佢神仙。然後見到佢升，人人講，人人話勁，你咪又仆入去。呢啲咪就係問題所在。

7. 所以點解要咁苦口婆心，同你講skill versus luck，但我成日懷疑到底係咪有用。因為好快你又會見到歷史再重演。

8. 仲有一樣嘢，上面都提到，佢地會用好多方法去迷惑你。都有中過伏嘅讀者同我講，啲基金經理講到自己點勁點勁　—　當然係咁架啦，唔通話自己唔掂？

9. 問題係，只要佢有一大輪理論，又有一年嘅所謂「成績」，整啲靚靚嘅圖表，著得靚靚仔仔，租個靚寫字樓，搵班靚女sales　—　你就全部迷暈晒啦。你見好多人真係受呢啲門面嘢，所以人地咪會 dup本落去。

好多人都係睇套西裝，睇靚女sales，聽佢講一大輪術語，寫字樓又夠靚

10. 然後你見，真係好多人就係睇寫字樓靚唔靚，條友講嘢係咪好有自信　—　咁所以，係咪明顯高估咗自己嘅判斷能力？

11. 有學術研究你唔信，我同你講你又唔信，咁你信人地嘅靚女sales ，怪得誰？

12. 呢度仲要講多一樣嘢，就係你平時見到嘅資訊，有幾多係真係「客觀」？打從我見識過更多金融界別，傳媒界別，或者KOL界別嘅種種黑暗操作後，我就更加唔會信網上見到嘅東西　—　特別係有份工打緊嘅人

如果我仲打緊工，都唔講得呢啲啦　—　所以唔好信啲返工嘅人講嘅嘢

13. 因為好簡單，你打緊工，就身不由紀，唔會有「言論自由」。

14. 我做金融嘅年代，就當然唔方便話基金搵笨了！我做分析員時，基金經理係公司米飯班主，你可以話我份糧都係嚟自佢地（而佢啲嘅錢就嚟自你地！），點可能得罪？

15. 同樣地，我在康宏時，啲同事賣基金畀客嘛，咁你覺得我可唔可以在專欄入面，甚至在Facebook Page寫呢幾篇文嘅嘢？梗係唔得

16. 明白呢啲東西，你就真係唔使對任何任職金融機構嘅專家咁認真

17. 媒體？其實一樣，只係程度嘅分別。傳統媒體始終有個譜，網媒KOL就更多醜惡嘢。搵著數冇問題，我都搵。問題係好多時你唔知背後佢地點搵你著數。正係上一篇文我講嘅重點，how are you going to rip me off

18. 你記住，我就明碼實價硬堀你100蚊啫，Patreon甚至唔使靠贊助內容。所以我寫嘅嘢未必一定啱，但至少你可以相信冇其他古惑嘢。

以前啲基金，好似冇咁水皮，點解？

19. 最後，你可能會見到一樣嘢：以前啲基金，好似冇咁不濟。以前啲基金經理，好似冇咁搵笨。係咪真？似乎真係，雖然我冇好確切嘅數字，就算搵到數字，都好難「證明」。

20. 但點解會有咁嘅現象？都有幾個原因。首先，以前資訊冇咁流通，大戶，基金經理，分析員嘅優勢大啲，啲散戶真係乜都唔識。所以以前基金經理比較易跑贏大市，因為對手太廢，好多時有啲平到笑嘅好嘢執。況且以前消息唔流通，真係可能有啲「半內幕」嘅嘢，例如某啲產品銷量好好，你唔知，但基金經理知。但而家資訊民主化，就拉近晒呢啲嘢了。而除咗在消息層面之外，即使在知識層面，好多以前只係基金經理先識嘅嘢，而家普通人都會識。你地好多人都已經識睇咩T12市盈率，識睇聯儲局點陣圖，識睇財務報表　—　五十年前，呢啲係好有用嘅技能。

21. 另外一樣嘢，亦係係所謂嘅「劣幣驅逐良幣」。基金經理太好搵，就吸引咗更多根本未夠班嘅人入行。況且，以前投資都未咁平民化，有錢人都走去買基金。而家？自己上IB上富途都得啦

22. 仲有，隨住早年一啲基金經理嘅成功，當然就更多客會有興趣。亦都因為資訊發達，加埋社交網絡興趣，你見到成個遊戲，已經唔係鬥個基金經理，而係一個marketing嘅遊戲。咪就係我講嘅，點樣去造神，點樣利用social media，點樣將條友包裝得好。至於有冇料到？講真，你點分？

23. 指數ETF，你都反而識得去睇開支比率幾多，AUM（Asset under management）幾多。因為既然大家都指數，咁追縱嘅嘢都一樣，咁就真係只係鬥開支低，同埋AUM大（往往令到交易量大啲，買賣差價細啲）

24. 但去到呢啲勭動型基金，無論係傳統mutual fund（唔使表現費只收管理費嗰啲），定係啲2/20對沖基金—講真，你點知邊個叻？你咪又係睇之前嗰年。咁就變咗係一個包裝嘅遊戲了。

唔買基金，咁買乜好？自己買！

25. 好啦，講咗咁多，唔買基金，咁買乜好？好簡單，自己買！

26. 既然基金經理就會跑輸大市，咁你買大市，一般就好過佢。再講簡單啲，你咪買指數ETF，多數都好過基金經理。正如呢個系列最初都計過，C基金，同盈富基金比，都爭一大截啦！你要叻過佢，根本極之容易。除非你話我知你唔識買盈富基金

27. 記住，老規矩。有錢就拎晒去買股票，或者再直接啲，月供。買乜？大舊錢拎晒去買指數ETF，環球各地都買，實際比重你可以自己調教，但唔好太側埋一邊。個股嘅，拎小小錢去玩下好了

28. MPF嘅玩法亦都係一樣，100%股票，揀環球股票基金，或者自己揀幾個地區。MPF嘅好處，就係個個月在你份糧度扣，唔經你手，必定係分段入市。而且你唔太手痕的話，佢就做到長線。

29. 好啦，去到最後，都真係有人問我，「盈富基金係咪基金」？希望唔係玩膠。咁認真答，in this sense，盈富基金當然唔係基金。

「盈富基金係咪基金？」「ETF係咪基金？」

30. ETF係咪基金？多數唔係（留意，多數咋下！）。你話唔係喎，Exchange Traded Fund，仲唔係Fund？

31. 呢度可以最後總結少少。首先搞清楚三個概念：對沖基金同普通基金，主動同被動，以及係咪在交易所買賣。呢三個概念，可以係冇必然關係嘅。

32. 主動基金，就即係個基金經理會自己搞搞震，估下有乜股票好。一般嚟講，越主動嘅就越應該避。原因？已經講過。

33. 講你未必信，但其實「對沖基金」冇一個好簡單嘅定義，不過一般收得表現費嘅，你就可以當係對沖基金。而收得表現費嘅，應該必定係主動的了。但唔收表現費，例如你強積金見到嘅好多乜乜增長基金，都有好多係主勭型，但只收你管理費。

34. 只收管理費嘅問題，當然係「做又三十六唔做又三十六」，升跌佢都係收咁多，話知你。不過，有表現費呢，「就鼓勵excessive risk taking」—所以，兩者都係搵笨。

對沖基金同普通基金，主動同被動，交易所上市定冇上市。三個唔同概念

35. 我成個系列嘅文，批評嘅，主要就係啲「主動基金」。被動基金就係乜東西？就係「跟指數」，照單執藥嘅，基金經理可以做嘅不多，理論上你去做都差不多。呢啲一般會好啲。但一般咋下。

36. 舉幾個實例。例如C基金，冇在交易所上市，佢係隻收表現費同管理費嘅主動基金，做法已經類似對沖基金，因為收表現費。

37. 至於ARKK？ARKK就係ETF，有在交易所上市。另外，佢唔收表現費的，只收你管理費。但一樣都係一隻主動基金。

38. 至於平時我講嗰啲，由盈富基金，到SPY QQQ EMXC VB，全部都係被動基金，跟指數。呢啲東西嘅伏位應該最細，收費亦都最低。

我多數都唔鍾意啲「主題ETF」，那怕佢係追指數。因為隻指數度身訂造嘅

39. 順帶一提，你見我多數唔鍾意啲「主題ETF」—例如啲乜乜太陽能ETF，甚至有啲「通脹受惠股ETF」。呢啲ETF，有啲應該就係主動嘅，例如「通脹受惠股」，咁根本任佢講，變相咪又係主動嘢。至於例如「乜乜太陽能ETF」，理論上可能話你知「被動」，會追蹤一個「勞蘇太陽能指數」—　但扯，根本呢個指數，就係為呢隻ETF度身訂造嘅，往往呢個世界冇第二隻ETF用呢個指數！嗰啲「獨立第三方」有幾獨立，就你自己估下。記住，「佢賺乜？」。佢啲指數用乜標準，就任佢講

40. 於是帶到去最後嘅一個問題。我話避開啲主動基金（包括主動ETF），買被動嘅指數ETF。但指數都有分好多種，上面呢啲「度身訂造指數」，都幾搵笨。你個指數，最好係跟據一啲量化規則嘅，而唔係有條友去「幫你揀佢覺得最好嘅十間太陽能公司」。邊度係「量化規則」？好簡單，SPY QQQ咪係咯，跟返標普指數同納指100。咁而呢兩個指數本身，亦主要係睇市值，並冇好多discretion．你話去到IWD或者VB之類，就複雜少少，因為背後隻指數計法有啲複雜，discretion亦大啲，但還可以。

最好揀大盤指數嘅被動ETF，個指數 discretion越細越好

41. Summary：收表現費嘅最衰，就咁硬掘管理費嘅主動基金就冇咁衰，被動ETF就好啲，如果係指數嘅再好啲，當然個指數越少discretion嘅越好，係大盤指數就最簡單。

42. 而一般嚟講，「啲人越落力賣畀你嘅，就往往唔係太好」。你有冇見QQQ要賣廣告？但啲槓杆ETF就要啦。點解？當然係食水深啲。「唔係佢賺乜？」

下期預告：「咁你又搞勞蘇基金」「最後又做乜唔搞」

43. 下篇應該係最後一篇，我會同你講。講到基金咁差，但到底有冇少少好處？「其實冇乜，但勉強幫你諗下」。仲有，都有人問，咁我嗰時做乜又搞個「勞蘇基金」？最後又做乜冇搞？都會答埋。