基金批判系列（以C基金為例）（六）—幾時都問，How are you going to rip me off ？對家唔答或假答好正路，但你要自己諗。 (Patreon)

小廣告一則（其實唔係）：英國讀者有法律問題，可以找我朋友

幾時都問：How are you going to rip me off ？

香港地，涉及金融產品嘅嘢，差不多所有人都係搵你著數。爭在點搵

搵你著數冇問題，至怕你以為佢唔係搵你著數，或者唔知佢點搵你著數

我嘅Patreon就係收你嗰100蚊，然後做大個量。咁我Facebook呢？

券商免費Seminar，咁我賺乜？佢地又賺乜？

保險經紀，賺你嘅錢天經地義，問題你要知佢點賺，分咗幾多

「獨立理財顧問」，當然係賣最高佣嘅產品

280萬個車位，出150萬佣，咁你估個買家會點？

外國嘅理財顧問，就收flat fee，或者段鐘計。但香港人就唔制啦

小廣告一則（其實唔係）：英國讀者有法律問題，可以找我朋友

1. 呢個應唔算廣告，幫朋友兼幫英國讀者。

2. 是咁的，Sunny 是我多年朋友，皇仁仔，港大畢業，而家已經移民英國。佢在香港一路做律師，去到英國當然亦係做律師，咁所以如果各位英國讀者有乜各種法律問題，歡迎搵佢。正如佢網頁所講，講廣東話嘅同聲同氣啲，佢亦會理解到香港人嘅種種問題同想法。我對佢為人處事，專業能力，都有100%信心。

3. 但當然了，律師係要收錢的，正如我都只會係答Patreon讀者嘅問題，其他三唔識七嘅PM我，我頂多快答兩句，好公平啫。你去PM問佢兩句佢就唔會收你錢，但真係法律意見就當然要收錢了。你總不能用咗人地服務又唔畀錢，佢都要開飯的。

4. 但講真，我望落啲收費都唔係咩天價。同埋都講過，我對佢嘅能力同誠信十分有信心。總好過你搵啲表面平甚至免費，但引你入局之後先劏你—呢一點我之後講投資都會講！

5. 除咗已經英國嘅讀者外，而家在香港但會去英國又有法律問題嘅，亦可以搵佢。

6. 所以冇事就當然最好，但有事就找佢吧。至於佢咩背景，負責乜事務，收費等等，自己去網頁睇吧，或者PM佢。

幾時都問：How are you going to rip me off ？

7. 呢個批判基金系列，去到呢度我想講一個之前比較少講嘅課題，你可以話係「瑞士山區肺測試」。但唔好太表面，要睇深入啲。另一個名稱，叫做「咁你賺乜」。英文，就係 “how are you going to rip me off”，最傳神

8. 幾時都要問呢個問題！當然你未必好意思問對家，佢亦未必會答你，答你亦未必係真實答案。所以你亦都要問自己，「佢賺乜」「佢拎到乜著數」

9. 呢句”how are you going to rip me off”，唔肯定係咪exact wordings ，但大約係咁意思，「你點搵我笨先？」。我唔記得在邊本書睇返嚟，應該係The Big Short 本書，但唔係好肯定，亦不重要。

香港地，涉及金融產品嘅嘢，差不多所有人都係搵你著數。爭在點搵

10. 呢個世界上可能仲有啲好人，可能係你親人朋友，或者唔關事嘅人。但記住，在香港，涉及金融產品嘅嘢，差不多所有人都係想搵你著數。唔止，甚至唔使一定涉及產品，同金融有關嘅嘢，差不多所有人都係想搵你著數。甚至媒體都係，社交網上嘅嘢亦係。

11. 本來呢，資本主義社會，想搵著數想賺人錢，絶對冇問題　—　就係至怕你唔知佢係想搵你錢，或者唔知佢點搵咗你錢。咁先最危險

12. 再講白啲，好老土一句，冇免費午餐。啲人背後做咁多嘢，當然係想在你身上拎著數。冇錯，包括我呢篇文，包括我呢個Patreon，包括我嘅Facebook Page。

搵你著數冇問題，至怕你以為佢唔係搵你著數，或者唔知佢點搵你著數

13. 冇問題的，搵著數咪搵著數，大家等價交換。就自怕你阿Q以為咁多人真心，實情係大大力咁搵你笨。

14. 亦即係話，請你多多思考所有嘅嘢。背後，到底佢賺乜？你一定要十分清楚。最危險嘅，就係一啲你唔知佢賺乜嘅嘢。真係自己賺夠想畀人賺下咩。

我嘅Patreon就係收你嗰100蚊，然後做大個量。咁我Facebook呢？

15. 我地睇幾個例子。好簡單，我嘅Patreon，就係賺你嘅月費，呢個十分明確啦，我靠做大個量去賺錢。好偶然咁做少少廣告，但一定講明你知係廣告，亦一定唔會將你嘅資料畀人。

16. 我嘅Facebook Page，冇收錢嘅，咁賺乜？早年真係冇任何著數，就只係我自己過癮。另外，亦都係儲人數，可以叫多啲人訂呢度。當然仲有，Facebook我亦有接廣告嘅post，多啲人睇點都對我有好處。同時間，建立到我嘅名氣，亦幫到我其他嘢。例如有人會搵我講seminar，會畀錢我

17. 咁推而廣之，例如之前我同Home Blogger搞嘅Seminar，佢同我賺乜？Seminar收錢嘛，咪賺呢舊。

券商免費Seminar，咁我賺乜？佢地又賺乜？

18. 但如果例如好似下星期三9月6日，老虎證券嘅講座呢？免費喎。咁我賺乜？當然係因為佢地畀咗錢我。咁但，佢地又做乜咁好死？當然係想你開戶啦。咁但佢迫唔到你嘅。咁即使開唔到戶，至少佢地打工仔都叫做做咗嘢，同上面交代到（所以，記得報名，最好就去開戶）

19. 咁仲有，例如我一路講話開投資班。咁賺乜？好明顯啦，會收到相當貴，可能過10000蚊一位（但應該會有十堂八堂，甚至更多），就係賺呢個學費。但因為會係我真人面對面教，小班教學，加上你可以直接問嘢，而我付出嘅時間同心機亦多好多，所以就會貴好多。

20. 咁但你見出面好多KOL，好多時會十分鼓勵你買期權，有時免費資訊添。點解咁鼓勵？背後賺乜？你就自己諗下了。我就費事講咁明。但，做乜要咁益你？

21. 一路推落去，大家都知，例如保險經紀，當然你買一份單佢會有得分。你買之前係應該問佢分到幾多的，我唔肯定佢係咪一定要答你，但照計你問，佢地多數都會答。咁而大家都知，一啲最悶最純正嘅保險產品（例如純人壽），就佣比較少，所以保險經紀一般唔會主動不停咁叫你買（但你問到佢都會理你嘅）。佢力推畀你嘅，古靈精怪嘅又儲蓄又投資又乜，當然就係佣金高啲。最重要嘅係，點解佣金高啲？因為保險公司賺你賺得多啲。

保險經紀，賺你嘅錢天經地義，問題你要知佢點賺，分咗幾多

22. 呢度一定要講，保險經紀賺你嘅錢，天經地義，絶無問題。又要同你解，你出咗問題又要幫你搞，平時又要答你各種問題，全部都係錢。所以佢賺你錢冇問題，問題係你要知佢點賺法。

「獨立理財顧問」，當然係賣最高佣嘅產品

23. 同樣道理，我舊公司康宏，號稱所謂嘅IFA，Independent Financial Advisor．好聽啲就係佢地會賣晒所有公司嘅產品，「揀最啱個客嘅」—但實際你都知，一般當然係推最重佣金嗰隻畀你。而畀得咁重佣金嘅，往往背後有啲古惑。

280萬個車位，出150萬佣，咁你估個買家會點？

24. 我記得Facebook都有寫過，例如賣車位，啲友就畀到好高佣，「如果唔係個經紀點會出盡方法搵到人落搭」。咁但你諗下，例如280萬個車位畀150萬佣，咁你諗下件嘢其實「真係值」幾錢？買嗰個點會唔中晒伏？然後，如果你係買家，知道你畀280萬個車位，經紀拎咗150萬佣，你仲會唔會買？

外國嘅理財顧問，就收flat fee，或者段鐘計。但香港人就唔制啦

25. 可能大家都有聽過，外國嘅「理財顧問」，就興玩到好似律師咁，斷鐘計錢，但唔係賣產品收佣。不過香港人就好得意，你叫佢畀幾千蚊拎financial advise，個個都唔制。「理財顧問」同你吹個幾鐘水，「了解你嘅財務需要」，甚至請埋你飲咖啡。但，開善堂咩。表面唔收你錢，但實際上在啲怪雞產品度，佢公司同佢本人，賺多你好多錢啦。

26. 但人性就係咁得意，特別係香港。要你畀幾千蚊聽advisor你實唔制，但佢賣嘅產品從中rip off你幾萬蚊你又冇所謂。因為前者你現兜兜拎出嚟，後者在你啲產品度食咗你，你完全唔覺

27. 同樣嘅道理，甚至去到媒體都一樣。免費嘅內容農場，或者垃圾KOL，咁點搵食？可能係靠廣告，或者靠建立名氣。咁當然就會寫啲嘩眾取寵嘅嘢。同上面講嘅例子一樣，叫你幾百蚊一年訂個傳媒媒體好多人唔制，但睇埋大量嘅垃圾又好開心。

28. 咁基金呢？其實賺你乜都算透明，2/20嘛，早早講你知的。只不過你未必諗到呢個機制會鼓勵佢拎你嘅錢去大賭特賭，反正贏佢有得分，輸就你死晒，仲要贏輸都硬掘你2%管理費。當然仲有，你唔知道每年2%，一路碌上去就好係嘢。因為好多人只係著眼短期，但投資要講長期。

29. 順帶一提，你係幾時都應該諗下，「咁你賺乜」。你識多啲唔同嘅人，睇多啲唔同嘅文，自然就會知道呢個世界啲嘢點運作。

30. 後記：剛剛同Sunny 傾開計，講開呢個「平價引你入局慢慢劏」嘅玩法。佢舉咗個好好嘅例子：手機遊戲課金！我地細個年代屋企打機，開隻game都一百幾十蚊啦，正版嘅幾舊水添。但而家手機遊戲，差不多全部免費download，你收人100蚊真係冇乜人肯畀。但，入到去，先慢慢劏你。唔少人可以一個月課幾千銀，甚至成萬蚊！我都試過一個月課金超過一萬蚊。真的很瘋狂。但佢地就係利用咗人嘅心理。

31. 所以呢，真係多啲諗啲唔同嘅嘢，同啲不同有水準嘅人傾計，幾時都有得著。