基金批判系列（以C基金為例）（五）—基金，就係將你嘅錢，轉移去基金經理手上 (Patreon)

Great Minds Discuss Ideas, Small Minds Discuss People

討論施永青？咪玩啦。你估佢真係輸一半咩。訓身家買C基金咩！

況且，C基金，咪又係用返中原嘅嘢！

名人，當然知道自己影響力，實會拎嚟搵著數

李嘉誠買Zoom，但佢幾錢買你幾錢買？佢買人造蛋你又跟？

粗略計下，到底個基金經理執咗幾錢

9位數AUM？勞蘇基金都有啦！

根本2/20，就係搵笨實

賭場門口有條友，同你講佢係專家，舖舖抽你水，贏嘅再分你，輸嘅你食晒

「基金經理點解爛仔」？梗唔同，識講英文，著套西裝咁咯

既然贏咗有得分你，輸咗唔使上身仲照收管理費，咁你話佢會點買？

1. 首先，再講一講，下星期三9月6日，又有個免費講座。平日嚟的，在中環交易廣場，夜晚1930-2100。因為夜晚，所以費事阻人收工overrun，會準時開始。

2. 照舊，大家有免費講座，當然係因為券商贊助。今次係老虎證券。所以有錢就去開個戶吧，反正有嘢送。有一定數目嘅人開，佢地就易啲同佢地老細交代，就易啲再搞下次講座。

3. 報名呢度。

4. 繼續呢個「批判基金，相信自己」系列，十分重要，應該寫多兩三篇完。第一篇文同你講咗C基金有幾廢，第二篇文話你知，多數人都係高位飛入去。第三篇同你講，唔好失焦，只係去鬧個別基金經理。因為首先成個遊戲都係搵笨，另外，亦要檢討下你自己。第四篇同你講，保持謙卑，但亦唔使自卑。根本你可以做得好過啲基金經理。佢地識打工識包裝，講投資未必叻過你。

Great Minds Discuss Ideas, Small Minds Discuss People

5. 講到呢度，可以講埋，我亦耐唔耐提嘅一樣嘢：Great Minds Discuss Ideas, Average Minds Discss Events, Small Minds Discuss People

6. 有時啲讀者嚟問我，呢個基金經理得唔得，嗰個又叻唔叻。又或者叫我鬧下邊個。講真，有乜好討論？

7. 你真係可以留意到，做大事嘅人，係冇乜興趣討論「某個人」，唔會將啲嘢迟到無限大。

8. 對，我都會講畢菲特，我在Facebook Page都講普京個廚師，「但真係唔同」，唔好話我知你唔明個分別。正如我在呢度講「廢柴KOL」，我從來唔開名，亦唔使開名，因為根本冇必要。我唔係有私怨，亦唔係要討論邊個有幾廢　—　我係話，嗰班友，全部都係垃圾。我使乜一個個去討論？

9. 你要學嘅，係現象，係世界點運作。唔係去太迷信某個人，或者鬧某個人點廢。得罪講句，廢得過信佢嗰個？

討論施永青？咪玩啦。佢會死錯人？你估佢真係輸一半咩。訓身家買C基金咩！

10. 所以，你去討論施永青，come on，真係浪費你自己時間。我都冇咁好氣。隻嘢輸一半，你估佢輸一半？你咪玩啦。學似啲窮網友咁，「all in 一注獨贏」咩，你可以估下佢放咗幾多錢落去咁大把。係喎，佢話「將中原啲閒置資金放落去」—即係，任佢講，「其實閒置資金得幾十萬」

11. 況且，施永青一把年紀，仔女又咁大，就算佢輸一半，根本對佢生活無任何影響。但你就唔同啦。所以，我係唔明啲人不停去研究人地係咪好大鑊，到底有何意義？除咗自己有種「以為」（自以為咋）有錢人仆街嘅快感外，有乜得著？冇。你睇幾多人嘅時間，就係浪費在呢啲垃圾活動上面。

況且，C基金，咪又係用返中原嘅嘢！

12. 況且啦喎，我唔100%肯定，但隻C基金，本身咪又係用返中原啲嘢。講白啲，你去幫襯買，啲開支除咗去咗基金經理度，亦有唔少去晒中原度。管理費又好表現費又好，部份咪又係返咗去佢度。你估表現費管理費，李生自己拎晒咩。

名人，當然知道自己影響力，實會拎嚟搵著數

13. 而之前講畢菲特索羅斯都寫過（記住要睇文！！！），名人，當然知道自己影響力，一定利用呢樣嘢嚟搵著數。施永青一出嚟站台，大把友就跟機架啦，「以為施永青自己瞓身家呀」。李嘉誠買越南地產，佢地又跟埋一份。係呀，李嘉誠買Zoom添，但佢幾錢買你幾錢買？係喎，李嘉誠投資檔乜鬼人造蛋輸晒錢添，你又跟埋一份？

14. 你見到，真係學呢啲最基本嘅嘢，而唔係同我拗到底人造蛋有幾大市場，Zoom點樣疫後都仲大把人用（so what？）

15. 之前嘅文講「信人嘅四大條件」，李嘉誠買人造蛋，至少有一個唔符合：就係佢根本買得好細，以佢身家，買乜垃圾都得。佢聽日拎1億去買恒大你又跟？

李嘉誠買Zoom，但佢幾錢買你幾錢買？佢買人造蛋你又跟？

16. 當然仲有，佢地亦冇為意啲錢最後老施一樣收返唔少（其實照計知，但選擇扮睇唔到）

17. 講得誇張啲嘅，我當施永青拎1000萬出嚟。然後昆到啲街客成億咁買落去嘅，佢收各種 fee，話咁快就拎返自己嗰舊啦。「隻嘢跌100%佢都唔使輸」，你輸身家之嘛。以上數字當然只係亂作，但明個意思啦？

18. 所以，買基金？傻的嗎？

19. 記住，自己做自己基金經理。

粗略計下，到底個基金經理執咗幾錢

20. 至於李生，一樣，你少同佢擔心。係，畀人問侯（但我又唔係好覺得好多人鬧，可能因為佢靚仔，平時個人又唔會串串貢，有分加）。但講真，你鬧多幾句佢會收少幾百蚊？唔會噃。

21. 況且，最重嘅係，啲管理費同表現費，早早袋袋平安啦！

22. 好簡單啫，計條數。隻嘢AUM（Asset under management）幾多，官網有，但我都懶查。不過佢地話9位數，「聽落好多」，其實唔係。9位數港紙咋。9位數，即係億億聲，你估好多錢咩。AUM咋，唔係佢拎晒落袋嘛。

9位數AUM？勞蘇基金都有啦！

23. 嗰時咪同你計過，勞蘇基金搞成，都真係有「9位數AUM」。當時個大計，400個讀者（或其他人啦，我原本仲會係揼啲有錢朋友或舊同事心口，雖然我最憎），母人50萬。聽落唔多，但出嚟幾錢呀？就2億架啦，「9位數AUM」

24. 但極之簡單計下數，應該唔準，但你大約有個概念，佢袋咗幾錢？咁你計2億港紙AUM，每年收1.5%管理費。但當然，條友收唔足啦我估，中原會同佢再分，我當佢分1.5%入面分大半，分到1%。2019年開波，4年就4%，800萬左右。照計唔足呢個數，因為後來啲AUM跌咗（隻嘢輸晒嘛）。

25. 另外，表現費，有收過的。2020年升咗成個開嘛。咁佢收15%，就幾和味了。當然唔知係咪收足。但呢度可能都成1000萬？

26. 即係，十分粗略地計，表現費加埋管理費，可能佢4年執咗千幾萬？我估係差不多。唔知你覺得多定少啦，一年可能200萬，「我個Patreon都有」。但consider佢隻嘢咁輸錢，照樣都袋到咁多錢，又好似幾爽

27. 以上只係粗略數，亦唔打算去判斷到底係咪「合理」「肥過肥仔」，旨在示範下，啲錢去邊。另外，都未同你計啲認購費。

28. 又，照計詳細數，官方應係有嘅，但我懶搵。你有興趣嘅搵畀我，我再跟進

根本2/20，就係搵笨實

29. 睇到呢度，你睇到，根本「基金」呢回事嘅機制，就相當有問題。例如傳統所謂「對沖基金」，2/20（讀者two and twenty，可以扮下嘢），2%管理費硬掘，然後賺嘅再抽你20%—但輸嘅就你食晒，然後輸錢時你照要畀2%管理費。（C基金收1.5/15，並非特別高，雖然而家都好少收到2/20）

30. 你唔好話我知，你唔知呢個機制（唔知你都去買，就肯定你好有問題）。

31. 我相信多數人係知嘅，不過你嘅諗法係，「小財唔出大財唔入」，亦即係「贏到錢嘅分啲畀人冇所謂」—呢個想法，本身唔係錯，但根本搞錯晒啲嘢。

32. 因為最重係：贏到錢你要分畀佢，但輸錢佢唔會同你分。而且，贏錢打和定輸，每年都再硬掘。根本佢就站於不敗之地，將你嘅財富慢慢轉移去佢度。一個唔該畀佢搏中嘅，變咗明星，更多水魚落叠。

33. 一切嘅問題，都係呢幾篇講嘅嘢：啲人愚眛同貪婪。一方面，以為基金經理有乜咁叻，特別係見佢一兩年掂，又成日上媒體，又多人講，你自然當佢係股神，忘記咗我同你講 skill versus luck．另一方面，亦因為你覺得佢可以帶到好豐厚嘅回報畀你，而冇諗過最簡單嘅問題—　係咁勁嘅，佢自己炒啦。

34. 成件事，個alignment of interest都係荒謬之極。

賭場門口有條友，同你講佢係專家，舖舖抽你水，贏嘅再分你，輸嘅你食晒

35. 唔記得邊本書嘅比喻：你諗下，你拎住舊錢想去賭場，去到賭場門口。有條友攔住你，話佢係專家，佢幫你賭。不過每舖不論輸贏要分錢畀佢。另外，輸嘅你自己食晒，贏嘅佢分你兩成　—　你當然覺得佢精神有問題

36. 但放落基金，有乜分別？只不過，基金經理著西裝讀名牌大學（有啲冇添）整幾個表搵幾個靚女租個靚寫字樓，你咪覺得「識嘢」，唔係賭場門口嘅爛仔。仲有，佢有一兩年往績，你就當佢股神。

「基金經理點解爛仔」？梗唔同，識講英文，著套西裝咁咯

37. 當然仲有，基金經理會反駁，或者你都會覺得「邊有賭錢專家」，賭場門口個爛仔點同專業基金經理比？但事實呢？基金跑輸大市，係常態，唔係只係C基金係咁。咁，其實有乜咁巴閉？

38. 我甚至都未計，有啲基金仲要有認購費，呢隻好似都有。但應該唔同人，唔同銀碼或唔同渠道會唔同。視乎你有幾水魚，視乎你網上自己按，定有靚女靚仔坐低開紅酒sell你。記住，唔好貪果盤！

39. 最後，硬掘呢部份就傳統基金，甚至指數ETF都會（但平好多）。不過，做所謂「對沖基金」經理嘅，當然唔止著眼於2%嘅管理費—嗰啲用嚟交租出糧應付基本開支。戲肉，一定係想賺你嗰20%表現費

既然贏咗有得分你，輸咗唔使上身仲照收管理費，咁你話佢會點買？

40. 你未必即時睇到個問題，但我可以話你知，咁嘅機制，當然係鼓勵咗excess risk taking，所謂嘅「道德風險」moral hazard．亦即係「得就得，唔得就返順德」—佢，就梗係同你賭大佢啦。梗係同你買啲高波幅（但未必高回報）嘅股，唔通同你去買港燈咩。梗係買美團。然後點？衰咗，咪而家咁咯，你鬧鬧鬧，但管理費佢依然袋。但掂咗嘅？咪分你20%（我知C基金係15%）．一定係咁玩，搏一舖，掂就分錢，唔掂佢又唔使上身，仲有基金管理費收。過幾年嘅，摺咗佢，改個名，用第個主題，又出嚟玩過。

41. 幾咁開心！不過，係用你啲錢去玩。

42. 亦因為咁，我就話你知，你換邊個去做，結果都差不多。制度使人腐化