Nvidia業績思考同教訓（下）—其實，真係唔好見好消息先買 (Patreon)

上次業績我都有寫，我估，畀你最勁，今次咪50億純利頂盡。結果呢？

街都係估緊全年200億純利

畢老林就大約估年度化175億

到下次業績，年度化純利可能近300億。11000億市值，37倍市盈率

幾多倍市盈率先合理？唔知。但增長一路勁，仲超過預期，就消化到。

不過，去到咁大間嘅公司，好似冇一間維持到咁估值。

到你增長一慢，可能市場就只會願意畀30倍，20倍市盈率

睇下大家點樣低估公司嘅盈利（包括我），低估收入定純利率？估下？

咁低估純利咁多，計市盈率又會爭好多

咁多人睇嘅公司，都會爭咁遠。然後業績咁勁，又要跌喎。股票好複雜嘅

純利一樣由30億一季跌到去6億，又上返62億—點估？都係信管理層吧

CEO就係過關斬將 迎難而上，你就唔好外行人走去判斷個行業得唔得

長期都咁貴，點買？其實係壞消息時買就最好

呢間近乎地球上最成功嘅公司，股價一樣冇乜事可以330跌到100

因為你受風險，先有高回報。唔係人人受到，你先可做受到嗰個而跑出。

公司收入倒退時買，就係最好。而家業績極強，但股價就要跌了

Nvidia業績思考同教訓，上一篇在呢度。個Excel同畢老林篇文我都Attach多次。今篇較長，但會完咗佢。之後返返去講基金，以及「貼現窗教訓」

1. 首先，我地再時光倒流返去上一次業績。留意下，當時我有計過數，計下個市盈率，睇下值唔值搏。我寫嘅嘢，cap埋圖在上面。

上次業績我都有寫，我估，畀你最勁，今次咪50億純利頂盡。結果呢？

2. 當其時我話，當你呢一季（即係剛出業績呢季）真係做到指隔引嘅110億收入，畀夠你四成純利率（史上冇見過）。即係一季50億純利，年度化一年純利200億。當時10000億市值，年度化50倍市盈率，唔抵搏。嗰時我係咁寫嘅。結果呢？今季收入係135億，純利係62億。

街都係估緊全年200億純利

3. 順帶一提，你睇Zacks，分析員估緊一年每股盈利8蚊—其實亦係估緊全年200億純利（記住，25億股）。不過留意，佢同我上面講嘅嘢有啲唔同。首先我嗰個係5月，佢呢個係現在。另外，我估嘅係今季然後再年度化，佢呢度係指今年全年。而公司已經出咗兩季業績啦。第一季20億純利，剛剛呢季62億，即係街估剩下兩季會做到118億左右—似乎好似有啲保守添。

畢老林就大約估年度化175億

4. 然後上次業績，畢老在佢篇文（attachment有），亦有做過類似嘅嘢。我就不重覆，但佢話估年度化純利175億，54倍市盈率咁計。

5. 記住，重點唔係邊個啱定錯，係睇個過程。

6. 嚟啦喎，結果，而家一季已經62億純利，年度化250億純利。我甚至未同你計任何增長，而至少下一季，既然收入會去到160億（剛剛呢季135億），咁照計個純利點都比今季會再升兩成？

到下次業績，年度化純利可能近300億。11000億市值，37倍市盈率

7. 咁如果我就用返年度化250億純利，而家市值大約11000億。計出嚟，44倍市盈率。當然都貴，但又唔係好似十分痴線地貴。你話個股價回多兩三成，就可能係值得買嘅。

8. 如果再進取啲，公司下季指引 160億收入嘛，當你好似今季咁46% 純利率，一季74億純利，年度化就300億純利。咁你11000億市值計，37倍市盈率。若果股價跌返兩成，分分鐘去到30倍邊，又好似唔係痴線地不合理。

9. 好啦，搞咗一大輪，都唔係好知想點。係咪？咁講下啲實在啲嘅嘢

幾多倍市盈率先合理？唔知。但增長一路勁，仲超過預期，就消化到。

10. 首先，「幾多倍市盈率」先合理，係永無答案嘅。咁我上面搞一大輪做乜？主要係話你知點計，又知道人地講嗰時講緊乜。但真係決定幾時買呢，呢啲東西未必完全幫到你。反而可能最傳統嘅「貪婪vs恐懼」幫到你。

11. 不過話說回頭，貪婪時估值超貴，恐懼時超平，都係成日見到嘅。Facebook舊年第三四季去到單位數市盈率添。正如之前一大堆咩SASS股，盈利都冇，睇price to sales都係超貴。所以係咪完全冇用？又唔係嘅。

12. 但當然，Nvidia 可以一路維持咁貴嘅市盈率，亦係因為個盈利增長得勁，仲要上次遠超預期。冇盈利嘅，就不能長久抵抗地心吸力。所以你要睇十倍股，當然係要時間加盈利。呢個例子你見到盈利極之重要！Nvidia雖然出完業績都跌，但唔係一日跌兩三成嗰種

不過，去到咁大間嘅公司，好似冇一間維持到咁估值。

13. 雖然，到而家呢個位，我都覺得真係相當貴。上面都話，用相當進取嘅計法，都37倍市盈率。然後你睇，去到咁大間嘅公司，真係好似冇一間維持到咁高嘅估值。固然你可以話，亦真係冇乜試過一間咁大嘅公司，可以有咁爆炸嘅增長，都有道理。但，真係可以維持好耐？

到你增長一慢，可能市場就只會願意畀30倍，20倍市盈率

14. 唔好忘記嘅係，到增長一放慢落嚟，好可能出現一樣叫做De-rating嘅嘢。即係可能啲數字一路交到，但到時市場「只係」肯畀20倍市盈率。咁固然你個盈利仲係上緊去（一切順利的話），但既然　股價＝市盈率X盈利，你前半部縮一大截，就要後半部（個盈利）升好多好多先補得返了。而差不多所有公司都會面對呢一日，問題只係在de rate 之前個盈利升得夠唔夠多，夠唔夠令你嘅股價有得升。

15. 舉個例，計2023年全年，街大約估緊每股盈利係8蚊（上面Zacks個圖有），現價460蚊，大約60倍市盈率。咁假設幾年後，盈利升咗3倍，去到一股24蚊。但到時市場見到增長見頂，「競爭激烈」之類，只肯畀20倍市盈率（呢類現象常有發生，由Tesla到Netflix都係咁），到時你股價係20*24= 480，剛好打個和咋下。而當然個盈利有冇升得咁多，到時又係咪「仲肯畀」20倍市盈率，都真係冇乜人知，純粹數字示例。

睇下大家點樣低估公司嘅盈利（包括我），低估收入定純利率？估下？

16. 然後我仲想講，你將我（同埋畢老林）嗰時寫嘅嘢，同而家公司真實盤數對照返，睇下有乜分別？就真係幾大分別。但係由乜引起？低估收入定低估利錢？答案係：兩樣都有

17. 首先，我同佢都係用今季110億嘅收入去估，固然知道公司冇信心唔會輕易咁提高個指引。但當時市場係估72億左右，既然公司出得一個「震憾市場」嘅數字，照計應該就貼近現實啦。即係話，冇必要唧牙膏，應唔會明明做到150億但而家講住110億先。但結果呢？就真係畀佢做到135億。到底真係之後好景到公司都估唔到，定係精心操作，就照計冇人知。但我比較傾向相信係前者。

18. 另外，個純利率係遠超過我同畢老林估計。我當時寫，畀你做到40%好未？留意史上從來冇去到呢個水平。咁結果，出到嚟，係46%嘅純利率。雖然事後諗返，其實幾「合理」，既然收入大升，純利率應該跟住升。

咁低估純利咁多，計市盈率又會爭好多

19. 講一大堆數字，無非講一樣嘢：我地完全低估咗公司個收入，又同時低估埋個純利率。所以，出到嚟個純利，同我地最初估就爭好遠。亦即係話，最初雖然有落咗啲心機去估，但當時計嘅「市盈率」，都係相當大偏差。

20. 你見出面估嘅數，其實亦係咁上下，都係遠遠低估。我想帶出一樣嘢：就真係好難估。一間咁大嘅公司，咁多人望住，好多基金經理分析員都係行業專家，甚至有若干「內幕」，但估嘅數一樣都同現實爭好遠

咁多人睇嘅公司，都會爭咁遠。然後業績咁勁，又要跌喎。股票好複雜嘅

21. 當然最神化嘅係：出到嚟，數字遠遠好過預期啦，連嚟緊個展望都提升不少。偏偏，個股價就要跌喎

22. 無非想解一樣嘢：股價嘅dynamics，係極之複雜嘅。真係唔好以為「好消息」就升。根本好多時，只係升咗，啲人就就話好消息。例如今次嘅情況，點睇都係好消息，亦係市場意外。但就係跌。咁你唯有用「估值貴」，「獲利盤」咁去解釋。

23. 然後，上面都有講，即使去到咁大嘅公司，咁多人睇住，亦唔係金融海嘯或疫情下嗰啲非常時間。但你見啲盈利都可以大上大落。4Q21 30億純利，2Q22,得返6億幾，而家去到62億。

純利一樣由30億一季跌到去6億，又上返62億—點估？都係信管理層吧

24. 除咗一再強調「難估」外，我諗更重要嘅係：你應該信間公司，或者係佢地嘅管理層。大環境係不停變，但成功嘅公司就係咁樣過關斬將，總會找到方法。正如以前嘅金句講：順境時食盡佢，逆境時輸少啲。

CEO就係過關斬將 迎難而上，你就唔好外行人走去判斷個行業得唔得

25. 相反，切戒一種心態，就係你作為外行人，然後「聽人講」個行業點點點，自己去judge．咁係比較危險嘅做法。好多時一啲你知嘅嘢，根本全世界都知，亦即係在股價反映晒。除非，你真係有啲好過人嘅insight。我舉個例：例如你可以早早估到「港片小陽春」，就係一種幾有用嘅insight（雖然呢個例子幫唔到你買股票）。因為正常地，又國安法又移民又話冇創作自由，早兩三年，係冇乜人會睇好港片創出票房奇蹟。如果當其時你估到，咁就係一種有用嘅insight．

26. 你應該相信你間公司有咁嘅能力。點知有冇？其中一個方法係睇往績。以往可以逆境輸得少嘅公司，總有原因。可能管理層好，或者個業務本身夠屈機　—　記住，業務係一回事，股價係另一回事。股價就唔係公司可以控制到嘅。

長期都咁貴，點買？其實係壞消息時買就最好

27. 然後又想探討一個好難搞嘅問題，但好多人都會問。咁呢啲長期咁貴嘅嘢，點買？當然係冇一個簡單嘅答案，但可以分享下啲思考

28. 首先，固然最好你就係之前買咗，最好2022年第三四季買。你覺得極廢，但又係嗰句：而家，就係將來嘅以前。可能未必係Nvidia，但我意思係，下次再約到「2022年第三四季」之類嘅情況，你又係咪敢買落去？又係咪坐得穩？

29. 即使係嗰個40蚊樓下買嘅讀者，一樣經濟隻嘢由330蚊跌到100蚊嘅慘烈情況。但佢忍得住唔止蝕唔止賺。我冇佢咁早買，但我都早幾年100蚊買，亦經歷咗嗰種100蚊上到330蚊打回原型嘅慘況。

呢間近乎地球上最成功嘅公司，股價一樣冇乜事可以330跌到100

30. 而記住，呢間已經係近乎地球上最成功嘅公司！都係會咁。股票就係有呢種特質，係會搞到你心驚膽顫。但亦正係因為咁，先有相當可觀嘅回報。一體兩面，永遠唔好諗縮數，又唔想受風險，又想有好回報　—　你真係受唔到嘅，好簡單，買指數，咁回報會低啲，但波動又細啲。

31. 唔好講2022年第三四季咁極端（但留意，當時已經係冇乜「大事」，冇打仗，冇全球衰退，冇疫情，冇金融危機），就當今年，人人都知Nvidia勁啦，今年美股亦都好返，科技股特別強。但你睇，你5月業績後去買Nvidia，一樣中間要受跌15%。

32. 所以我想說明嘅係：真係冇免費午餐。你要贏大錢，就要食得起呢啲波幅。即使無敵嘅蘋果，在佢升幾十倍嘅浪中，都不停有N咁多次高位跌兩三成。你兩嘢震走，甚至10%就止蝕，唔會賺到大錢。呢啲道理都講過多次。

33. 你話唔係喎，咁會唔會買中啲地雷股？會！咁點算？冇計！代價嚟。但，點解唔可以輸錢？讀者一隻贏10幾倍嘅Nvidia，夠佢輸好多隻其他嘢啦。我知最好梗係隻隻贏幾倍但冇一隻輸錢，但邊有咁著數嘅嘢？

34. 你睇多次，好多人唔係冇買過好股，但一係買得唔夠大，一係太早放，一係兩樣震走咗（順帶講，呢個10倍讀者都唔係真係買得好大，都未夠佢退休。咁當然事後一定係想「早知買多啲」）

因為你受風險，先有高回報。唔係人人受到，你先可做受到嗰個而跑出。

35. 正係因為有咁嘅風險，先有咁高嘅回報。係咪個個人受到？唔係！但正係因為咁，先有高回報。如果人人受到，何來高回報？你就去做受到嗰堆人！以前都寫過，《曹劌論戰》，何以戰？憑乜你覺得做定期得5%（以前零息添），但你可以一年賺10%？點解市場要獎勵你？往往唔係因為你有幾叻，而係因為你肯食風險。

36. 講返個40蚊讀者，有趣嘅一樣嘢係：留意，因為佢買入價係40蚊樓下。亦即係，而家隻嘢每升10%，就等於佢當初投資舊錢贏一倍！成件事係好誇張的。你食到幾隻咁嘅嘢，買得又夠大，自然掂晒。

公司收入倒退時買，就係最好。而家業績極強，但股價就要跌了

37. 最後，真係睇下，至少事後睇返，乜嘢位買最好？咁你就可以睇呢個圖。你見到，的確2022年第三第四季，公司生意係最唔得嘅，收入按年倒退嘅，股價亦都大跌。但，亦正係嗰個時刻，最得買得。

38. 當然你可以話，係因為後來公司食正AI水啫。係咪？一半半。即使在市場開始「炒AI」前，股價都回升不少。況且，睇多次再上面個圖，根本去到2023年2月嗰次業績，即係出4Q22，都見到仲係收入倒退。仲係好似「壞消息」。但結果嗰時買都仲係幾好嘅時機。

39. 到而家「好消息」先仆入去，就太遲了。唔係絶對唔買得，但記住上面講嘅嘢嘅教訓，否則你只會一路咁錯失機會。

40. 所以記住，根本唔好以為「好多壞消息，唔好買住」。到出晒好消息，就冇得升啦

41. 搞咁多嘢，係咪好難掌握？其實呢啲嘢都係幫你理解其他人講乜，或者解答你一啲問題。但真係操作，真係根本唔使搞咁多嘢，還原基本步。我就費事不停重覆了。