Nvidia（上）　—　公司勁　業績勁　但股價照跌 (Patreon)

公司梗係好，業績梗係好，但股價照跌喎。

從來都冇叫過你「好消息」買。根本「壞消息」或「冇消息」先應該買

業績勁，新產品，中東佬又買晶片，索羅斯又增持　—但人人知啦

盈利高出市場預計三成。又，點解有時睇每股盈利，計唔返個股數？

公司指引110億，街估112億，結果收入135億

嚟緊嘅收入指引都調高咗，同上次一樣。但上次爆升，今次跌，點解？

兩次嘅「消息」一樣，真係講嘅，今次仲靚添，但股票唔係咁簡單

溫故知新：之前到底幾時爆升？上次業績又乜事？

股票炒預期，一間咁大咁多人睇嘅公司，街估都爭咁遠。所以唔好自大

公司純利升9倍，咁係咪900倍市盈率？但之前跌又點計？

呢兩篇會講Nvidia業績，但真係冇乜好講，當然係勁。但又如何？買咗嘅，固然恭喜你，記住要坐得穩。未買嘅，就應該唔好了。更重要嘅係，我又會用呢間公司嘅例子，去示範返一啲講過N次嘅嘢

公司梗係好，業績梗係好，但股價照跌喎。

1. 好，講Nvidia業績。一句，當然係好勁嘅公司（仲使討論？），業績亦都好勁，但你見業績後照樣倒跌。又再示範畀你睇「好消息」唔等於會升，其實你應該「壞消息」或「冇消息」時買。呢啲好基本嘅嘢了。唔信？睇上面呢個圖。放心，之後我會再解

從來都冇叫過你「好消息」買。根本「壞消息」或「冇消息」先應該買

2. 而家就當然都係比較貴，你問我我唔會而家呢啲位買，可能回多兩三成考慮下。冇錯，上次業績時（5月）我都係咁寫（開埋出嚟吧，有用的），都係叫你未買唔好買。咁上次嗰時400蚊，出完業績見過500，而家460，當你上次飛入去，到而家都唔係升咗好多啫。況且，上次業績400蚊後，再升咗陣，升到上470。但之後高位急回過15%，落返400蚊邊的。

3. 你見到，再好再勁嘅公司，買完都係可以忽然跌15%，甚至三四成（唔好忘記美股今年已經係十分之好）。點避免？冇得避免，呢個係遊戲一部份。不過如果你間公司盈利一路有增長嘅，就一般可以返返家鄉嘅。

4. 公司份嘢在呢度，我在Facebook Post有快手講過。Zacks嘅數字在呢度，另外業績報導中文版呢度，英文版呢度。

5. 仲有篇信報畢老林寫嘅舊文，放心，我知你班友實係冇訂，講到氣咳，不過唔緊要，今次copy埋attach埋畀你。之後會用到。

6. 仲有，我個Excel都update埋。材料齊晒，去片。

業績勁，新產品，中東佬又買晶片，索羅斯又增持　—但人人知啦

7. 我諗最簡單一樣嘢，好消息當然係不絶。沙地阿拉伯又話係咁買啲晶片啦，又有新產品啦，又話索羅斯都增持啦。我甚至都唔使同你討論技術上面嘅嘢。

8. 不過問題係，以上呢啲東西，有邊個唔知？呢種思考嘅問題我都寫過多次，啲友會以為自己識乜識物，但個盲點係：你識又點？基金經理分析員唔知咩？人人都知嘅嘢，唔會忽然令你有超額回報。

9. 所以，都係睇返數字。

10. 簡單嘅，睇呢個圖都可以了。Save低佢啦

11. 個業績，當然係非常好了。經調整每股盈利大約2.7，街估2.09，亦即係超出市場預期30%，都好誇張下。

盈利高出市場預計三成。又，點解有時睇每股盈利，計唔返個股數？

12. 你會發現上面個每股盈利同我張圖嘅唔同，因為上面嗰個係「經調整」。順手記住，Nvidia大約25億股齊頭，相當好記。咁你見我張圖嗰個，61.9億純利，就對應返每股盈利2.48。

13. 呢度嘅教訓係：唔好走去用你有時睇報導見到嘅「每股盈利」，去計返個「股數」出嚟。例如你用61.9億純利同每股盈利2.7去除出嚟，個數就唔啱，因為2.7呢個係經調整，61.9億就冇。咁實際上點知公司有幾多股？以前講過。但一般最方便係睇：市值。例如邊度？Google Finance咪有，上面再上面張圖，睇股價睇市值，就大約計到。

公司指引110億，街估112億，結果收入135億

14. 然後收入135億。街估呢？112億。特別留意係，上次公司自己指引係110億。咁你見到分析員都會保守啲，估公司「僅僅達標」，但結果又係遠超預期。

嚟緊嘅收入指引都調高咗，同上次一樣。但上次爆升，今次跌，點解？

15. 同樣地，今次業績中，公司亦都調高埋今季嘅指引（即係下一次業績）。估收入會升到160億，而街只係估緊126億。

16. 有趣嘅係，你望落，今次同上次咪差不多玩法，都係出個指引係遠勝分析員預期。但點解上次一嘢升25%，今次就直頭倒跌？股價固然唔識講嘢，但你可以估下。

17. 我會認為，幾個原因。首先，當然係估值，貴咗唔少啦。另外，亦因為債息，呢排係高咗好多的。仲有，雖然個指引數字都係高過市場預期，但冇上次爭得咁誇張。況且有咗上次嘅經驗，都會有啲人有晒心理準備。最後，好多要買嘅，都買晒啦，唔次上次咁恐慌性買貨。

兩次嘅「消息」一樣，真係講嘅，今次仲靚添，但股票唔係咁簡單

18. 好簡單嘅現象，畀你睇到，股市真係唔係簡單地「好消息」咪升。根本兩次嘅「消息」差不多一樣。你真係計嘅，上次佢業績冇今次咁靚添。

19. 然後，就溫故知新時間。我想時光倒流，同你睇返，到底之前，甚至一路發生乜事。

20. Nvidia之前嘅歷史，信報嘅高天佑又寫過。佢嘅文有時免費在網上找到的。順帶一提，佢係我忠心讀者，講緊廿年前已經睇緊我啲文。簡單嚟講，公司連環中六合彩（其實唔係，成功要苦幹），連續食住幾條水。最先係3D遊戲，然後係加密幣，之後係元宇宙，當然仲有而家嘅AI。

21. 特別有趣嘅係，例如加密幣或元宇宙泡沫爆破時（算係爆咗了），公司生意同股價當然都受影響。然後你事後見到當時就係最好買入機會　—固然你不能早早知道，否則人人發達。但我想講嘅係：成功嘅公司，就係咁樣不停面對挑戰。你不停去講話個經濟唔得呀，行業唔得的話，咁人人死晒啦。但永遠有危有機。

22. 以上種種係遠啲嘅歷史，甚至所謂AI，幾時開始人人講？今年1月2月時已經炒起晒，我都寫過。

溫故知新：之前到底幾時爆升？上次業績又乜事？

23. 我想再講返近少少。冇錯正係上次業績，5月嗰時，可以睇返我篇舊文。好值得重溫個故事。一間巨企，一日升25%，當然引起好多人討論。正如當年Facebook一日跌25%咁

24. 重覆返上次業績時嘅事。你亦可以睇圖（1Q23），當時72億收入，20億純利。特別留意嘅係：個收入按年仲要跌。AI好景？有幾好景？咁固然啦，你睇純利就按年升25%嘅，但真係同「好好景」爭好遠。

25. 咁上次做乜一日升25%？上次業績後，公司畀嘅指引就好正面。上次估之後一季（2Q23，即係剛剛出業績呢季），收入去到110億。留意返，當時公司一季只係72億收入，街估下一季都係72億咁上下。咁當然了，剛剛今次業績見到，何止110億，直到做到135億。

股票炒預期，一間咁大咁多人睇嘅公司，街估都爭咁遠。所以唔好自大

26. 於是你見到至少兩樣嘢。第一，講過N次，股票炒預期。上一次個業績完全唔靚仔，20億嘅純利甚至低過2021年第四季，72億嘅收入亦係低過之前頂峰。但，升乜？因為畀個指引極強！好簡單嘅例子，再一次說明，唔係睇咩「好消息」「壞消息」，係預期，係有乜個市場未知。

27. 第二，我下篇會再講。但留意下，5月嗰時，分析員估緊今季係72億收入。結果而家見到，今季係135億收入。留意，只係幾個月間嘅事，仲要咁大間公司，仲要係間人人都望住嘅公司　—　啲數都可以爭咁遠。

28. 唔好自作聰明，我唔係話啲分析員廢。而家想你知道：連啲分析員咁多資源，有啲係行內專家。只係一季嘅數，估計都爭咁遠。咁所以，大家係咪唔應該對自己嘅預測能力太過自信？

29. 好啦，返返今次嘅業績。上面都只係講收入，今次睇埋個純利。留意highlight咗黃色嗰兩行，按年比。收入大約一個開，但純利呢？9倍！6.6億升到62億。咁固然好多公司都會係咁，收入越高毛利率純利率越高。留意Nvidia嘅毛利率去到70%，純利率去到46%。相當明顯地，係不停加價嘅，而「成本」根本冇乜點升。

公司純利升9倍，咁係咪900倍市盈率？但之前跌又點計？

30. 但更重要嘅係，純利升9倍，咁我個市盈率應該幾多先合理？以前大約講過啲乜鬼PE/G，市盈率/增長，大約話15%純利增長，就15倍市盈率啦。咁但，難道純利升900%，就值900位市盈率？

31. 答案係：我都答唔到你。固然你會話，歷史數字啫，之後唔會9倍。照計係。但我當時光倒流返一年前，你真係估到個純利升9倍，咁但，係咪900倍市盈率你都買？又好似唔係。

32. 同樣地，再睇返4Q21，公司30億純利，但去到3Q22，就得返6億幾。咁又點計市盈率？

33. 以前都寫過呢個問題，你真係想知嘅，咁都講過，其實你係要睇晒「咁多年」嘅盈利，不能只睇一年。但實際上去計，就幾麻煩了。

34. 比較簡單嘅方法？你亦可以計price to sales，個波動會冇咁大嘅。

35. 下篇再解啲基本嘢