略講市況　＋　基金批判系列（以C基金為例）（四）　—　唔好自大，但亦唔使自卑！根本，你就可以叻過基金經理！ (Patreon)

實會講Nvidia，但好簡單，未買嘅唔好買，買咗嘅唔使走。真係驚就走一半

大市嘅，都係嗰幾味啦，我嫌美國科技股回得唔夠多添

無論如何，今年股市表現好好，爭在你有冇買盡，同有冇分散

如果今年呢刻埋單計數，你贏錢定輸錢？滿唔滿意自己表現？

9月6日再有免費講座，老虎證券贊助

有個讀者話，朋友按埋層樓買C基金—咁梗係自己問題！唔通賴基金佬？

就算你借錢買QQQ，件事一樣係錯的。

贏錢，最大功勞當然係你，唔係我。但輸錢，一樣。

點解啲人買基金？因為唔想自己負責任。輸咗可以鬧基金佬

你覺得鬧基金佬你會開心啲嘅，隨你。不過只會令你更加冇進步

講咗咁耐，唔係要打擊你自信。畀啲正能量你—根本，你叻過基金佬啦！

奇怪嘅係，你往往又做唔到「個個月買盈富買SPY」

保持謙卑，但唔使自卑！

另外留意，「自大」同「自卑」，經常共存，甚至係一體兩面

希望快手寫埋個基金系列，不過可能都仲要幾篇。

實會講Nvidia，但好簡單，未買嘅唔好買，買咗嘅唔使走。真係驚就走一半

1. 放心，一定會講Nvidia！其實寫咗大半，但反正業績後高位急回，就不急於沽。可能週末插播先吧，費事又拖太耐，況且Nvidia唔會太長

2. 不過好簡單，未買嘅，唔好買。買咗嘅，又唔使急住走。真係好驚嘅，例如升咗100%嘅，咪沽一半拎返個半。未夠100%嘅？咁根本唔使諗任何嘢。

大市嘅，都係嗰幾味啦，我嫌美國科技股回得唔夠多添

3. 大市嘅，都係嗰幾味，買就幾時都要買。但我會主力買美國非科技股，美股以外嘅東西（例如歐洲印度日本），港股就睇科技股同嗰堆派到高息嘅嘢。

4. 你見啲債息咁高，美匯咁強，科技股同其他股市受壓好合理，甚至我覺得跌得唔夠多。但若果（不能保證，但機會不細）之後啲債息回返，美金弱返，照計市況會好啲。

5. 但你真係見到了，之前估「債息見頂」買TLT嘅，都可以一個月輸你10%—記住，呢個估法，根本好合理，完全冇錯。只係話你知，首先，有時好似好合理嘅嘢，都可能未必啱。第二，咩叫「啱」咩叫「錯」？債息可能之後都係會回的，問題只係可能你估得太早。當然仲有最重要嘅嘢：「短期」，就根本好難估。所以必定係長期。

無論如何，今年股市表現好好，爭在你有冇買盡，同有冇分散

6. 無論如何，年初至今，各個股市嘅回報都相當不錯，問題只係你有冇早早買得大，同埋有冇分散（所以唔好嚟反駁我港股跌咗10%—我從來冇叫你只買港股）

如果今年呢刻埋單計數，你贏錢定輸錢？滿唔滿意自己表現？

7. 如果今年呢刻埋單計數，你贏錢定輸錢？滿唔滿意你嘅表現？我就贏錢，都OK滿意。如果你輸錢，或者唔係幾滿意嘅，又真係要檢討下　—　因為今年已經係幾好嘅年份，如果你都仲係輸錢或唔太滿意嘅，就真係出咗啲問題

9月6日再有免費講座，老虎證券贊助

8. 另外，9月6號會有免費講座，老虎證券贊助。星期三嚟的，夜晚七點半至九點。「就唔好問我聽完仲有乜地方食飯」，我都唔知，齊齊去振興夜經濟吧。我有叫佢地唔好呢個時間，但始終係佢地出錢。地點在中環交易廣場，同南方東英一齊搞，所以佢會有人講下啲槓杆ETF之類。南方東英講嗰個女仔我都part過好多次，OK的.

9. 報名呢度。

10. 你見我個玩法都係去R啲券商去贊助，所以大家又有免費講座聽。所以一樣係，得閒又有閒錢就去開戶，反正有股票送，開戶要求亦唔算特別苛刻。懶嘅，其實嗰日當場開都得，佢地會有員guide住你。都係嗰句，有返啲人開，我就易啲交代，可以長搞長有。

11. 繼續呢個「批判基金，相信自己」系列，十分重要。第一篇文同你講咗C基金有幾廢，第二篇文話你知，多數人都係高位飛入去。第三篇同你講，唔好失焦，唔好只係鬧個別基金經理。因為根本基金呢回事就係好伏。但，亦唔好忘記，好多時啲錯誤嘅投資決定，要負最大負任嘅，多數係你自己（除非你係八九十歲老人痴呆，或者人地呃咗你阿媽嗰啲）

有個讀者話，朋友按埋層樓買C基金—咁梗係自己問題！唔通賴基金佬？

12. 我舉一個好簡單嘅例子，Facebook上面嘅讀者（唔知有冇訂呢度）：個讀者講，佢有個朋友，按埋層樓去買C基金

13. 咁就肯定係好錯！肯定係佢個人問題啦！

14. 聽落都慘，買C基金又輸錢，層樓又應該跌咗，但錢又還多咗，仲要輸埋息。但，雖然慘，不過，最大問題都係自己，係咪？

15. 聽落好明顯，但你都記住。由頭到尾，都叫你唔好借錢投資架啦。按埋層樓去買基金，傻的嗎？

就算你借錢買QQQ，件事一樣係錯的。

16. 固然係輸大錢，仲要蝕息。但就算你好彩借去買QQQ都好，贏錢都好，呢個一樣唔係好嘅idea

17. 我諗呢個係好多人嘅思考盲點，亦係我一路強調嘅嘢：你不能只係用個結果，去判斷返個決定啱唔啱。記住，拜仁慕尼黑測試，唔通早幾個月，你話你借貴利去買拜仁慕尼黑拎冠軍，又係好主意？係呀，贏錢呀，我阻人發達。但如果輸呢？記住，alternative path，舊文寫過。咁當然，借錢買QQQ就冇咁極端嘅。

18. 記住，大家咁大個人，請為自己嘅投資決定，負返責任。無論我平時點包裝件事，講有讀者睇咗呢個Patreon買Nvidia贏10倍，無論我Facebook寫多次「大師冇點你」，請你記住，「嗰啲都只係宣傳」，記住，贏錢嘅，最叻嗰個，當然係你自己，任何情況都係。

贏錢，最大功勞當然係你，唔係我。但輸錢，一樣。

19. 咁但，同樣地，你輸錢嘅，任何情況下，負最大責任嘅，都係你自己。Whatever reason，都真係冇人可以拎支槍指住你買嘢。

點解啲人買基金？因為唔想自己負責任。輸咗可以鬧基金佬

20. 於是乎你發現一樣比較少人提嘅嘢：其實有啲人買基金，就係因為害怕「負責任」—輸咗我可以賴嗰條友。亦都等於，啲友行死刑打靶呢，幾個劊子手一齊開槍，有啲空彈有啲真彈，佢地往往唔知係咪自己「殺人」，亦係為咗官方為咗減低佢地嘅壓力。呢種「怕負責任」嘅心態，其實好常見，甚至啲人求神問卜，信教信風水都係咁。心態唔係太奇怪，但應該戒絶

你覺得鬧基金佬你會開心啲嘅，隨你。不過只會令你更加冇進步

21. 所以你見到，有時有啲讀者不滿，話「我聽你講買咗XXX」（然後當然係輸錢），嚟抱怨投訴。我多數都係簡單直接，你覺得鬧我你開心啲嘅，隨你。不過只會令你更加冇進步。基金嘅，一樣，你鬧李生鬧黃國英你會爽啲嘅，咪鬧。但有個譜，鬧夠，都係最好檢討下。否則下次你又係會中伏。因為個root cause始終在你度，難聽講句，「人地只係順住條水賺埋你」，你唔係畀佢賺（或呃），都係會畀其他人賺（或呃）

22. 記住啦，搞咁多嘢，不如做好你自己先，由自己改起。心態最重要，最重過一切技巧。睇咁多嘢，你見好多都係學做人（反正投資往往係反映你性格，係你世界觀嘅延續），而唔係諗埋啲咩古怪嘅發財大計，研究埋啲乜鬼超導體技術，去研究俄羅斯係咪兵變　—　見到問題在邊未？

23. 不過放心，我唔係邪教教主，唔係NLP洗腦課程，我會叫你反省自己，做好自己　—　但唔係要打擊你自信（不過千萬唔好過度自信），唔係要踩低你。

講咗咁耐，唔係要打擊你自信。畀啲正能量你—根本，你叻過基金佬啦！

24. 而家畀返啲正能量你：根本，扯，你要叻過啲基金，容乜易？你根本做得到！大家跟我講，做唔做得到？做！得！到！

25. 根本，你叻過基金佬啦！當然佢可能搵錢多過你。但我講嘅係投資能力。你要叻過佢，唔難喎！佢叻嘅，只係點打工，點包裝自己，點水人落搭之嘛！呢啲同佢投資能力，冇乜直接闗係！係咪？

26. 事實係喎，你要跑贏呢啲所謂「基金經理」，有幾難？我咪寫過，亦同你計過，根本你個個月買SPY買盈富基金，已經好過佢地！係，當然啲基金會跑出，但，skill versus luck，事實無數研究證明，多數（if not絶大多數）基金，扣除收費後，都係跑輸大市。

奇怪嘅係，你往往又做唔到「個個月買盈富買SPY」

27. 不過奇怪嘅係，你往往又做唔到「個個月買盈富買SPY」。又或者，你依然選擇信基金。呢個咪就係問題所在。

28. 記住，真係唔使買基金，因為你可以做得好過佢。就係咁簡單。下次任何sales任何西裝友同你講，你照答佢，你可以叻過佢，睇佢點答。佢答你佢之前跑贏嘅，你同佢講李生　黃國英　Cathie Wood。

29. 之篇文解過，信乜水？四個條件（贏得多　買得大　時間長　夠真心）。你睇佢達唔達得到。咁C基金嘅情況，肯定個往績唔長啦，一年跑出你咪當人神仙。但即使真係做得到四樣嘢，都唔代表你要買。因為佢仲要抽你一大舊，而至少畢菲特唔會先。

保持謙卑，但唔使自卑！

30. 保持謙卑，唔好以為自己有乜咁醒。但又同樣地，唔好太自卑，唔好以為呢啲基金佬有乜咁叻—　就算佢地本身叻（例如黃國英），個制度都係搵笨。

另外留意，「自大」同「自卑」，經常共存，甚至係一體兩面

31. 最後一講，相當有趣的，「自大」同「自卑」係可共存嘅，甚至成日都可以共存。大家可能都聽過，啲人講嘢寫嘢好串嘅，往往反映心中嘅不安全感（例如我）。

32. 具體講，一個成日好多古怪諗頭，覺得世事會點點點，所以佢要點點點嘅人，往往亦係一個走去買基金嘅人。冇矛盾的，有時佢好多諗頭，但輸得幾次，又覺得不如外判畀人，至少到時有得鬧。

33. 兩種心態，都應該改善。要做嘅，就係不亢不卑，唔好咁多情緒起伏，悶悶地咁玩，大大力咁買。