基金批判系列（以C基金為例）（三） - 唔好掛住鬧某基金經理。因為唔好以為換過個就有用。問題其實在買嗰個，即係可能係你自己 (Patreon)

「為何別人盡碰到好的運氣」「自信戴水晶真會轉運」

其實最簡單最有效嘅，都係搞掂自己先。

嗰啲不停信風水改名嘅藝人，有幾多個改完名就掂？多數係越改越頹

平時100% invested，咪唔會一大舊錢摸頂。亦唔會有錢畀人呃

我甚至唔想討論C基金買乜，點低沽高追，因為呢啲都唔係重點

我唔想你覺得，你只係遇人不淑，唔想你以為「換過個」就好啲

「忘掉最重要，帶眼識人」—唔係叫你揀個好基金經理。係叫你唔好買基金！

「唔好誤會，我唔係針對你」「我係話在座咁多位，都係垃圾」

搵笨嘅，唔係個別基金經理，而係成個制度。所以你換第個都未必有用

唔好揀基金經理　—自己做自己基金經理

其實，最大責任都係自己。下次就學精啲啦。

8月MPF人均蝕1.14萬元　今年收益近化灰

1. 嚟緊幾篇，會同你講，「唔好買基金」。類似嘅東西，我在經濟一周或明報都講過，Attachment有文

2. 今日畀啲新意，首先同大家分享一首歌，陳苑淇嘅《幸運水晶》。歌當然好，但最緊要留意歌詞。

3. 詳情我會在Facebook Page寫，唔在呢度呃字數。不過貼得呢度，當然係同投資有關。首歌固然係講愛情，但用落我地嘅主題（投資），一樣適用。

「為何別人盡碰到好的運氣」「自信戴水晶真會轉運」

4. 首歌講嘅，「為何別人盡碰到好的運氣」「自信戴水晶真會轉運」等等。就係我想講嘅嘢。

5. 覺得自己黑仔，畀人呃，研究埋啲古靈精怪嘢。但有冇諗過，最簡單最直接最有效，都係搞掂自己先？

其實最簡單最有效嘅，都係搞掂自己先。

6. 順帶一提，你見啲藝人，咩「信風水」，係咁改名嘅藝人，有幾多個真係會改完就紅？好多都係越改越頹，當然係有原因的。（OK，你可話李玟同王菲，但嚴格佢地都唔係改名，亦唔係因為信風水，王菲就更加係因為紅咗先「改返原名」，而李玫根本在台灣出第一隻碟已經用「李玟」）

嗰啲不停信風水改名嘅藝人，有幾多個改完名就掂？多數係越改越頹

7. 講返正經，第一篇文同你講咗C基金有幾廢，第二篇文話你知，更大鑊嘅係，多數人都係高位飛入去。事實亦有讀者同我講，佢同佢朋友，都係高位飛入去。好正常　—　但記住反省下點解，同埋下次點避免。真係飛，都唔好飛咁多

平時100% invested，咪唔會一大舊錢摸頂。亦唔會有錢畀人呃

8. （其中一個方法：平時有錢就拎去買股票。你冇乜錢剩，就不可能一大舊錢摸頂，亦不太可能幾千萬畀人電騙呃咗去）

我甚至唔想討論C基金買乜，點低沽高追，因為呢啲都唔係重點

9. 原本可能有讀者，想我講下，隻嘢點解咁廢。但我諗真係唔需要，亦都唔好錯重點。我甚至完全唔想討論隻嘢買乜，幾時買，或者李生本人有冇料到。

10. 呢啲好多人會鍾意討論，睇下人地咩位轉現金啦，睇下佢買乜啦，甚至睇下條友之前做乜啦，然後拎出嚟鬧。有冇搞錯，頂位走去買嘢（「你買佢個基金都係咁啦」），有冇搞錯，走去買美團，有冇搞錯，低位沽晒啲Nvidia。嘩，條友原來之前都邊度邊度讀書咋喎。

11. 你事後望住個圖嚟驗屍，一定容易的。好似睇波睇慢鏡重播咁，搞錯呀，嗰邊個隊友空晒都唔交。你一樣可以怪我做乜叫你唔好買KRE，一樣可以話做乜我叫你唔好買TQQQ（但我叫你唔好買3001又有冇計？）

12. 我想講，呢啲嘢，完全係錯晒重點。你太沉迷，甚至害咗你。

13. 我唔會走去批評李生，唔係我怕得罪佢（怕乜？我仲要只係呢度講）。而係，真係唔好錯重點。

我唔想你覺得，你只係遇人不淑，唔想你以為「換過個」就好啲

14. 用返愛情嘅比喻，你當我係你好姐妹咁，我唔係太想同你一齊數落個舊男朋友佢點衰有點衰。

15. 因為我唔想你覺得，「換過個」就解決到問題。亦所以，首歌入面，「自信戴水晶真會轉運」嘅下一句，「忘掉最重要，帶眼識人」—我上面特登冇講。呢句嘢唔係錯，但我唔想你理解做，「哦，下次搵個好啲嘅基金經理」。唔係呢回事。

「忘掉最重要，帶眼識人」—唔係叫你揀個好基金經理。係叫你唔好買基金！

16. 「帶眼識人」in this context，唔係「揀個好基金經理」，而係「揀個好方法」—亦即係，唔好買基金！！！！

「唔好誤會，我唔係針對你」「我係話在座咁多位，都係垃圾」

17. 我在Facebook或者明報經濟一周嘅文，都有提到「破壞之王」嗰句，「唔好誤會，我唔係針對你」「我係話在座咁多位，都係垃圾」。

18. 呢個就係我對「基金」呢回事嘅態度。一概不買，清楚冇？

19. 再講一次，千萬唔好將個焦點放在李生點唔掂，啲時機點差，啲揀股點差　—　因為你會講到，好似搵過第個，就萬事大吉，但事實根本唔係咁，

20. 講白啲：搵笨嘅，唔係（或者唔只係）基金經理，而係成個制度。明冇？所以你換過第個，都係差不多。

搵笨嘅，唔係個別基金經理，而係成個制度。所以你換第個都未必有用

21. 好簡單畀個例子你，李生當然而家當然多人鬧。正如洪龍荃同紅猴都多人鬧（我識佢地，但完全唔熟）。咁但，冇架喎，黃國英都畀人鬧啦，Cathie Wood都由契媽變臭雞啦

22. 黃國英唔叻咩？由頭到尾我都覺得佢叻。我同佢唔相熟，但至少佢知我乜水。我亦經常叫大家睇佢嘅嘢，不過佢呢幾年已經唔寫嘢。黃國英有往績啦，寫嘅嘢亦有質素，我同佢傾計亦唔少得著，佢亦肯定唔係心術不存心昆你錢嘅人

23. （但當然佢有佢嘅弱點，正如我都有，冇人完美，況且有時有啲「優點」亦係「缺點」，只係睇你點演繹。例如好多人知佢係「獨狼」，咁呢種性格當然令佢成功，但亦有機會令佢諗埋一邊。我亦都係）

24. 你就當黃國英之前都唔係太風光，自己搞檔嘢後先時來運到，乜都好。但Cathie Wood呢？好靚嘅CV，名牌大學畢業，正宗投行紅褲子做Research出身。但出到嚟，咪一樣！（不過佢今年當然好過以上幾位，咁美股強嘛，特別係科技股，雖然依然絶大多數人買佢隻嘢係輸錢嘅）

唔好揀基金經理　—自己做自己基金經理

25. 記住，唔係「下次揀個好嘅基金經理」就冇事。下次你應該做嘅，係「唔好揀基金經理」。「自己做自己基金經理」（呢句幾好，不如拎嚟做股票班嘅slogan）

26. 記住啦喎，係制度問題，唔係個別基金經理嘅問題。你畀我去做，應該係咁上下，可能好少少。你去做都差不多。

27. 咁但，「你唔鍾意香港都可以移民啦」。所以一樣，你唔鍾意基金個制度，點解要買？冇人迫到你喎

28. （強積金另計，因為唔供犯法，所以我係教你「畀人搵最小嘅笨」，搵笨就梗，但減低傷亡。記住埃汾金句：逆境時輸得少過其他人，順境時贏得多過其他人少少，幾個周期後，自然拉開晒，）

29. 咁所以，雖然呢度都有讀者係苦主。但我都係要客氣又直接地講：真係，都要檢討下自己。

其實，最大責任都係自己。下次就學精啲啦。

30. 因為你鬧乜，講乜都好。一句，佢有冇犯法有冇詐騙？冇。咁第二句：有冇人拎支槍迫你去買？又好似冇。咁所以，都真係自己嘅選擇

31. 選擇錯咗，我唔會答你「唔緊要」—梗係緊要啦！但，汲取教訓，下次選擇好啲。原理上同你拍拖遇人不淑差不多。

32. 但記住，有啲問題，真係出在自己身上，唔好批評李生，因為根本冇意思。你以為換過個就好啲？黃國英隻嘢一樣畀人鬧到九彩。

33. 「而根本你簡簡單單買SPY 同 盈富基金就得」- 真架喎！好難咩？好似唔難。但點解好多人都做唔到？咁當然有原因。所以，望落唔難，其實都有啲難度。

8月MPF人均蝕1.14萬元　今年收益近化灰

34. 畀單新鮮滾熱辣嘅新聞你，8月MPF人均蝕1.14萬元　今年收益近化灰．當然一般網上嘅討論，不外乎都係講強積金廢，港股廢。

35. 不過，我想講一樣好簡單嘅嘢：今年美股升15%，港股跌10%　—　咁照計你一半SPY一半盈富基金，全年都唔應該歸零。更加未同你講日本歐洲之類。

36. 咁點解會有咁情況？好簡單，因為個個講就叻，但實際上連最基本嘅分散都未做到。

37. 仲有，留意埋，你放去債券基金嘅，照計今年都係輸錢。我肯定寫過，未夠50歲嘅讀者，強積金明顯係應該100%股票，環球分散，唔好轉嚟轉去，唔好成日望。

38. 聽落簡單，但好多人都唔會做。