基金批判系列（以C基金為例）（二）—點解仲有人買？因為你當佢係股神咯基金批判系列（以C基金為例）（二）—點解仲有人買？因為你當佢係股神咯 (Patreon)

C基金跑輸盈富一大截，計埋派息仲多，計埋分段仲多，計埋再投資更多

分段就好啲，但買基比較少人分段，多數係一棍摸頂

唔好買基金，但真係要買嘅，每個月焗供嘅就冇咁差（雖然都係差）

點解咁差仲有人買？「嗰時唔知會跌嘛！」

2020年，佢升100%喎，你梗係當佢股神！問題係，你2021年頭買嘛

Skill versus luck：2020年，佢升成個開喎。畢菲特？行開啦。

事實上，你揀基金，都係揀隻升架啦　—　咁咪出事咯

2020年，群魔亂舞，一街蛇蟲，美國連登仔喪炒meme股，你點忍？

人人都係2020年尾仆入去摸項買。點避免？兩個方法

Cathie Wood隻嘢一樣，起始至今係升，但買嘅人輸幾百億。點解？

2021年開始，隻嘢又點？

2021年頭買C基金，100蚊輸剩40。買垃圾盈富？100蚊剩75

順手睇埋，盈富基金，回報計唔計收息，都好大分別

C基金跑輸盈富一大截，計埋派息仲多，計埋分段仲多，計埋再投資更多

1. 上回講咗隻C基金，表現真係極差。固然不能同美股比，但即使同港股，就同盈富基金比，佢都跑輸好多。特別留意係你睇得幾年嘅，睇盈富基金要睇埋派息。港股不振但都仲派到息，一年都近3厘，計埋落去，就爭好多　—　我甚至都冇同你計Dividend reinvestment，即係我上次計，都係當你收到盈富基金股息用咗佢，都冇當你買返落去　—　如果計得夠長嘅，個效應可以分別好大。呢啲亦係好多人嘅盲點，派息就洗咗佢，唔係拎去再投資（我就冇呢個問題，總之有錢就瞓晒落去）

分段就好啲，但買基比較少人分段，多數係一棍摸頂

2. 另外想講嘅係，分段。咁因為C基金又好，盈富又好，呢幾年埋單都係跌，咁所以如果你係分段，例如每個月定額買，咁就會輸少啲。不過問題嚟了：買盈富唔少人都會每個月買，但你買C基金，我估九成都係一炮過落去買—咁就連你分段減少傷亡嘅機會都冇埋

唔好買基金，但真係要買嘅，每個月焗供嘅就冇咁差（雖然都係差）

3. 扯開少少講，所以，固然我會叫你唔好買基金。但就事論事，例如有啲人畀保險經紀/理財顧問水去月供買基金，咁end up可能係好過你自己一鑊過去買基金。因為首先佢等於強制幫你儲錢（固然更加係幫個基金經理儲錢），另外，真係幫你做到平均成本。你自己儲夠一大舊錢嘅，摸頂機會都唔細。

4. 再講一次，我唔係話你知你應該月供基金！只係話你知，整夠一舊大錢一炮過，就仲大劑！（順帶一講，呢個亦係「買樓」嘅一個問題，樓係唔會畀你分斯買的，一定係一鑊過—你搞清楚，你係分期還，但你鎖定個樓價，係一鑊過的。所以摸頂嘅殺傷力可以好大，因為啲友仲要做埋槓杆。只不過因為之前幾十年樓市一路向上，啲友先冇留意呢個問題）

5. 我在最終回，會再講一大輪買基金嘅壞處。

6. 不過首先在呢度，不如你諗一個好簡單嘅問題：點解會有人買？或者直接啲，「點解啲人咁豬」？

點解咁差仲有人買？「嗰時唔知會跌嘛！」

7. 答案就當然係：「嗰時唔知會跌嘛」。

8. 又或者係，嗰時以為個基金經理好勁嘛！好似幾合理喎。然後你就發現，你冇聽我講skills versus luck　—早兩篇先講過！

9. 為咗示範一下呢個現象，我又重新計一次數（在worksheet 2）．乜來？好簡單，我地時光倒流，返返去2019年1月1日，睇下發生咩事。

2020年，佢升100%喎，你梗係當佢股神！問題係，你2021年頭買嘛

10. 個圖就係咁，藍色係C基金，紅色係盈富基金（未計派息），綠色係盈富基金（計埋派息）。

11. 2019年，隻嘢根本冇乜特別，仲要跑輸大市。然後2020年頭，世紀疫情，股災，齊齊跌。

Skill versus luck：2020年，佢升成個開喎。畢菲特？行開啦。

12. 個有趣嘅位，就係2020年3月，你知啦，美國無限QE，股市大反彈。你見到，嗰年C基金就跑贏晒。仲唔係股神？一年成個幾開喎！畢菲特？行開啦。

事實上，你揀基金，都係揀隻升架啦　—　咁咪出事咯

13. 於是乎，大家就當佢係股神了，呢隻基金夠晒勁。事實係咁丫，你唔通買隻輸錢嘅嘢咩。呢啲係人性　—　亦即係人性嘅弱點。一年嘅數字，你就當人股神。明顯我早兩篇同你寫過，四大要素，佢頂多只係有一樣（贏得多，但其實都只係一個開，好多咩？），並不見得買得大（其他人嘅錢之嘛），更加冇往績，亦不再在真心。

14. 咁唔使我講你都知，圖嘅右手邊會發生乜事。

2020年，群魔亂舞，一街蛇蟲，美國連登仔喪炒meme股，你點忍？

15. 咁但，再講一次，你返返去2020年嘅情況，群魔亂舞，一街蛇蟲鼠蟻，美國連登仔炒meme股，香港網友講契媽（冇錯Cathie Wood都係同一時間嘅產物），個個講全職炒股，畢菲特out啦，契媽先係股神，股票要有盈利架咩？

16. 在咁嘅情況下，當然就大把人拎錢畀佢洗。順手提埋你，我搞勞蘇基金，就再遲少少嘅事，但依然都係大把人捧錢過嚟。

17. 然後你見到，最開心嘅地方。之前咪貼過C基金由開波（2019年1月1日）到而家嘅回報？畀你睇多次。

18. 但，如果你係開波時買，都已經值得還神，輸3成之嘛。

19. 雖然我冇實數，但我可以話你知，絶大多數人，都係2020年尾買嘅！點解？因為升晒，啲人咪仆入去咯！！！

20. 你而家睇當然覺得搞笑，但我同你，都或多或少犯過呢啲錯誤，只係程度上，金額上嘅分別，因為呢啲係人性。

人人都係2020年尾仆入去摸項買。點避免？兩個方法

21. 所以，點去避免？兩樣嘢，第一，唔好成日睇股價，唔好成日上social media，唔同成日同人討論。投資係孤獨嘅，你嗰時上得越多網，自然就沾染埋啲亢奮氣氛。我就話做金融食呢行飯冇得避，唔係做金融嘅你，我唔明做乜成日要睇。

22. 第二，當然就係一有錢就飛入去，咁你就2020年3月已經買咗啲，年中又買咗啲，唔係去到最尾先一炮過摸頂。

23. Cathie Wood隻ARKK嘅例子，亦都完全一樣。我唔記得有冇寫過，但可以肯定話你知一樣嘢：隻嘢由開波至今，都仲係有得升。不過，投資者，就輸咗幾百億。點解矛盾？好簡單，money weighted，因為個個都係最貴嗰時飛入去買的。

Cathie Wood隻嘢一樣，起始至今係升，但買嘅人輸幾百億。點解？

24. 好合理啫，2016年，鬼識邊個Cathie Wood咩，佢亦都係2020年尾開始聲名大躁，變得入屋，傳媒爭相報導。

25. 於是你亦見到一樣好重要嘅嘢：點解人人講嘅嘢，就好多時會瀨嘢。因為實係升得貴一貴先有人講。

26. 呢啲道理，萬試萬靈，講過一百幾十次。但大家依然不停再犯。不過唔使太灰心，正常嘅，因為真係人性。問題係，你可以減少犯錯嘅頻率，同埋減少出錯時嘅傷害。

27. 輸得幾次，又有反省嘅，就會慢慢學精（亦所以，點解投資趁後生開始好）

2021年開始，隻嘢又點？

28. 於是乎，我地可以睇埋最開心嘅嘢。2021年打後，隻嘢嘅表現。WorkSheet 3

29. 再講一次，絶大多數人，都係2020年尾，或者2021年頭仆入去買嘅。亦即係，佢地嘅表現，當然係遠差過C基金「由開始至今」（即係2019年1月1日）嘅輸三成表現

2021年頭買C基金，100蚊輸剩40。買垃圾盈富？100蚊剩75

30. 實際上係點？我又幫你計埋。慎防你睇圖睇唔到。2021年頭你買C基金嘅，輸60%，100蚊剩返40蚊。買垃圾盈富基金呢？輸32%，100蚊輸剩68蚊。買盈富計埋收息呢？輸25%，100蚊輸剩75蚊。

31. 咁你知道了，當然要計返轉頭。你買C基金嘅，40蚊想上返100蚊，你要贏150%。買盈富基金嘅，要贏返47%。計埋派息嘅話，你買盈富就要贏返33%。

32. 見唔見到，個難度爭幾遠？況且，盈富基金好可能之後都一年仲有3厘息收下。C基金係乜都冇嘅

順手睇埋，盈富基金，回報計唔計收息，都好大分別

33. 最後補充，反正我整咗數，計埋你睇。照計唔使點解，但十分明顯地，你盈富基金計埋收息，當然就係跑贏未計收息。不過你睇圖好明顯見到，個差距越差越越。開頭唔覺，到你坐得耐，買得大，就會好覺。

34. 事實上，盈富基金而家一手9000幾蚊，派一次息幾百蚊，的確好大意慾「飲餐茶冇咗」（又，其實不如拎去訂明報信報之類）．但如果投資耐啲，富貴啲嘅讀者，咁你坐住廿幾三十萬港紙嘅盈富基金，絶不為奇。咁一次收息，去到一萬幾千，就真係應該買返落去—或者拎去買其他嘢。Stay invested嘛，而唔係搵地方洗咗佢（所以以前有啲公司玩以股代息，好值得去揀，錢唔經你手，直接變埋股票，但越嚟越少呢啲安排了）

35. 好好消化呢兩篇文，之後我再話你知，點解唔應該買基金，但點解仲係咁多人買。