基金批判系列（以C基金為例）（一）—隻嘢有幾唔掂？ (Patreon)

C基金，三年輸50%。今年都輸12%。都幾差。但有幾差？點解？點計？

純學術討論，絶無私怨，亦唔係為讀者「出頭」（雖然有人買咗輸錢）

C基金只係一個例子，我用嚟示範平時講嘅嘢：例如，唔好買基金！

我就幫你計晒數，你自己計都得，但點都搞你幾個鐘，點都唔止100蚊

順手一講，「派息」基金嘅搞笑　—　刁，咪由你個本派出嚟！廿厘都得呀

投資唔好貪高息！正如唔好貪果盤！

你買個基金，即係信條友管錢好過你，咁做乜又要佢派返畀你？玩嘢？

點計先公平？「我年頭買晒Nvidia添」「我借貴利買拜仁添」

Benchmark：「今年買SPY都15%，C基金居然輸錢，不知所謂」

隻嘢同恒指比，都係大幅跑輪呀！港股廢，佢仲要跑輸20%．咩概念？

跌落嚟跑輸23%，升上去就要追返35%。條數我唔知點計

盈富基金同恒指有乜分別？派息嘅分別！

計埋派息，C基金就跑輸更多。順手教埋你點計，幫你計埋

C基金，三年輸50%。今年都輸12%。都幾差。但有幾差？點解？點計？

1. 今篇好玩，寫C基金。唔知是甚麼東西嘅，睇呢篇報導，或者睇我Facebook Post。

2. 睇圖就知，推出日期至今輸30%（2019年1月1日推出，記住日子），三年輸50%，今年都輸12%。聽落，幾差啦可？

3. 但，係咪真係咁差？有幾差？點解咁差？其實點計？就呢幾篇文研究下。

純學術討論，絶無私怨，亦唔係為讀者「出頭」（雖然有人買咗輸錢）

4. 不過講明先，絶無私怨。首先，唔係我買咗而輸咗錢（我會有咁豬？）。亦唔係我親友買咗。雖然聽聞有讀者買咗，輸唔少錢，但我亦唔係為讀者「出頭」。仲有，個基金經理我知佢邊個，佢應該唔識我，我地唔相識。絶無私怨。

5. 至於中原，實不相瞞，資深嘅讀者知道早兩年我幾乎搞個「勞蘇基金」，原本亦好可能係part中原。不過我都可以幾肯定話你知，畀我去做呢—就肯定唔會咁差。

C基金只係一個例子，我用嚟示範平時講嘅嘢：例如，唔好買基金！

6. 記住，呢隻嘢只係一個例子。我係用嚟示範好多平時講嘅原理。仲有話你知，買基金嘅真係傻仔（我已經好客氣了）。Nothing Personal，但如果你買咗嘅，咁就係唔係幾好嘅決定。最好之後嘅新錢都唔好買。

7. 呢個系列，我會先由計數開始，教你點計（你唔好以為好易計）。然後再講點解隻嘢咁差，點解基金搵笨，但點解仲係咁多人買。

8. 呢個系列我保證非常好睇，記得叫你啲朋友訂。

我就幫你計晒數，你自己計都得，但點都搞你幾個鐘，點都唔止100蚊

9. 首先，基金表現，在官方網頁有，應該係一定要出的。佢有個Excel，你可以自己download，可以睇晒個基金價格，就係個回報咯。但當然，我已經幫你整埋了（所以訂我Patreon真係慳你好多時間，你自己做點都搞幾個鐘，你啲時間點都唔只值100蚊—但我就收你地好多人嘅100蚊，就有數圍。呢個business model係好嘅）

10. 佢其實有幾隻fund，但我只睇隻大fund．

順手一講，「派息」基金嘅搞笑　—　刁，咪由你個本派出嚟！廿厘都得呀

11. 另外順手一提，佢有隻係有「派息」的。但根本就低能之極，可能都有讀者聽過，扯，個派息咪由你個本金度派出嚟！你要十厘息都得呀！

12. 以前都寫過，唔好貪高息，即係同唔好貪果盤嘅道理一樣。根本你間公司生意做唔到嘅，冇可能長期派息。派兩年高息留住股東嗰啲，最後九成都嘔突。

投資唔好貪高息！正如唔好貪果盤！

13. 買基金一樣：首先就係最好唔好買！但，真係買嘅，亦冇理由走去貪派息。我完全唔明，又要拎派息，又要買基金，係乜玩法？

14. 你要嘅，梗係可以派。但你諗下個邏輯：你買基金，送舊錢畀嗰條友玩，即係覺得佢得啦，信佢啦，覺得佢好過你自己買啦，至少係你買嗰時嘅主觀意願（之後事與願違另一回事）—　好啦，咁你明明係信佢，咁做乜又要佢每年畀返啲錢你？你既然信佢，當然留舊錢畀佢一路碌啦。

15. 順帶兩講。第一，要用錢點算？以前解過，自己搵舊文。但好多方法。我亦唔明做乜成日會急用錢，除非真係好似我咁忽然做手術保險又未賠。記住，你投資嘅錢，必定係閒錢。

16. 第二，咁之前我又話買高息股？呢個比較難答。但，其實我都唔係真係睇中啲高息，而係睇中業務穩健。高息係結果，唔係原因。

你買個基金，即係信條友管錢好過你，咁做乜又要佢派返畀你？玩嘢？

17. C基金，「派息」嗰隻，正如Fortune Insight 篇文，講得好好：俄羅斯套娃咁，越縮越細　—　梗係啦，佢不停咁輸錢，然後仲要派息畀你。咁都冇增值，何來有息派？咪在你個本度派返畀你

18. 所以，真係唔好貪啲派息。

19. 講返，集中火力睇佢隻「主力基金」，港紙嗰隻，人民幣嘅唔睇，反正應該冇乜大陸讀者。

20. 我已經download咗啲數，自己計咗一次。回報就係咁。個Excel畀埋你。

21. 咁你見我計出嚟，同官方計嘅差不多一樣。爭咗少少嘅，可能都係啲多一日少一日嘅問題，不用深究。

22. 好啦，呢個表現係咪算差？咁你梗係話係。但有幾差呢？輸錢你就話差架啦，但係咪只係市況唔得？另外，贏錢你就話好架啦，但又係咪只係市況好？

點計先公平？「我年頭買晒Nvidia添」「我借貴利買拜仁添」

23. 都認真講下，點計先公平。

24. 都唔使講到好深，但你會聽人講個術語：Benchmark，亦即係，你同乜比

25. 有啲基金會一早講明個benchmark係乜，呢隻嘢好似冇。但冇關係，我地幫佢整個

26. 首先，你走去講，「扯我今年年頭all in買Nvidia贏200%啦」—但就算你真係all in都好，呢個比較係唔公平嘅。

Benchmark：「今年買SPY都15%，C基金居然輸錢，不知所謂」

27. 正如你可以話，你今年買SPY都15%，C基金居然輸錢，不知所謂。但一樣，咁比較唔太公平。

28. 好簡單，佢隻嘢係買港股的，咁你咪用返港股比。怛生指數，或者盈富基金。即係你可以質疑佢做乜要買港股，做乜唔係全部買美股，做乜唔係全部買TQQQ，做乜唔係借盡孖展買Nvidia，做乜唔係買晒拜仁慕尼黑。

29. 但，be sensible，既然佢由第一日已經話買港股，咁就係同恒指比，同盈富基金比（留意兩者有少少分別，都幾重要，陣間解）

隻嘢同恒指比，都係大幅跑輪呀！港股廢，佢仲要跑輸20%．咩概念？

30. 咁所以，公道啲，同恒指或盈富基金比。不過，即使拍埋去恒指或盈富基金，隻嘢都係跑輸唔少！就以今年為例，恒指跌5%左右—但隻嘢輸咗11%！咁你咪見到，有幾唔掂咯

31. 事實上，可以自己計，我都幫你計咗。盈富基金嘅歷史價格，上yahoo finance有（免費嘢嚟講真係好東西，大家多啲用）。我就由2019年1月1日計起。點解呢日？隻C基金咪呢日開始

32. 咁計出嚟嘅數，你見到啦。一句：港股廢，但呢隻基金更廢。

33. 我不再重覆圖入面嘅數字，但你見到，某啲年期，佢可以跑輸港股20%以上。喂，咁真係好大鑊：即係，我個股市升10倍（當你N年前買QQQ），你跑輸20%，都冇乜所謂。但，「港股已經咁廢」，你仲要可以輸多20%，你諗下有幾大件事？

跌落嚟跑輸23%，升上去就要追返35%。條數我唔知點計

34. 具體啲，以一年嚟講，你買佢隻嘢，100蚊輸剩70。你買盈富基金，100蚊輸剩92.5。但以前都解過，你計下，追返上去先係戲肉。盈富基金92.5要上返100，升返8%就得。但佢隻嘢70上返100？要升43%！碌落嚟時爭23%，上返山就爭35%了！（點解我揀一年講？為咗表達輸多20%係咩概念，係有啲bias嘅，但之後再解）

35. 不過，係咪講到呢度就完？唔係！

盈富基金同恒指有乜分別？派息嘅分別！

36. 頭先咪講咗，盈富基金，同恒指，有少少分別。所以我呢度都係用盈富基金，唔係用恒指。

37. 分別係乜？就係，派息！

38. 「唔係話佢隻嘢冇派息咩？」。係！但盈富基金有嘛！咁一來一回，有乜後果？

39. 唔好以為唔重要，計埋落去，就爭好遠。點解？美股你唔係好覺，因為美股唔多派息。除咗因為美股貴，市盈率高，股息率低外。亦因為美股啲公司好多直接做回購　—　背後因為美國會收股息稅，啲股東都寧願唔收息，公司用啲錢直接回購算。所以啲人計美股，好多時都唔多理啲息（但近年先係咁）

40. 但，大家都知，港股夠殘。不過，港股as a whole，盈富基金本身，都仲係一路keep到幾好嘅派息。非常roughly講，一年可能3%股息。喂，咁你計3年5年，就爭唔少了

41. 實務上點計？簡單，兩個方法。冇乜時間嘅，咪一年幫盈富嘅回報加多3%上去。留意你睇到嘅價格都係除咗淨之後，但你真係買咗盈富基金，會收到股息嘛。一年兩次，一般係5月最後一日，同11月最後一日。

42. 認真少少計嘅，咁可以睇返晒盈富嘅派息歷史。我幫你搵埋計埋了。例如一年嘅，你睇盈富基金最新18.88，一年前20.42，咁回報係負7.5%。但，今年5月派咗次息，0.1。舊年11月又派咗次，0.56。加埋派咗0.66。咁你加返上去，即係你實際上係18.88+0.66，19.54。同返20.42比，就只係輸4.3%。由輸7.5%變到輸4.3%，因為你中間收咗3.2%息。都幾係嘢。

計埋派息，C基金就跑輸更多。順手教埋你點計，幫你計埋

43. 最後提埋你，盈富基金派嗰兩次息，金額唔同的。例牌11月嗰次會大舊好多。點解？因為唔少股息都集中在7月後，特別係內銀。拿，上次寫貼現窗提過的，有冇聽書？

44. 所以，計埋派息後，你睇下跑輸幾多！

45. 你計佢開張至今嘅，100蚊變70蚊。買盈富計埋收息嘅，100蚊變83蚊。碌返上去，C基金要升43%，盈富只係要升返20%—更唔好忘記，盈富可能一年都仲有3%股息收下。

46. 極端計，計3年嘅，佢隻嘢100蚊變52蚊。買盈富計埋收息嘅，100蚊變80蚊。碌返上去，佢隻嘢要升一個開。盈富只係要升返25%—仲每年有啲息幫下。

47. 所以，你見到隻嘢，真係極唔掂。然後下篇同你解，點解咁唔掂。點解你唔應該買。但點解仲有人買。

48. 仲有一樣嘢：你估下多數人，係幾時買？就梗係唔係2019年開張嗰時。多數就係3年前買。呢下先係最正。