［思考文］索羅斯好似睇好，畢菲特好似睇淡，咁信邊個好？根本兩個都唔使信。咁亦所以，網上啲意見，更加唔使理。你值得睇嘅人，要有四大條件，話你知邊四個 (Patreon)

索羅話加碼AI，睇好。畢菲特增持現金，睇淡。咁點算？跟邊個？

答：兩個都唔信，兩個都唔跟。然後連佢地都唔跟，就唔使理你啲網友

其實市場永遠有正反意見。所以，睇下你嘅作者係咪滿足呢四個條件

高盛點睇，富爸爸又點睇。講真，關我乜事？關你乜事？

得個講字就固然冇意思。但真金白銀「睇好」，就真係心中睇好？

知名度高嘅人，當然知道自己有用。一個字：莊思敏的士牌

我個個月買重人壽，又係咪「睇淡」自己條命，估我下年死？

係呀，李澤楷連續四日增持8號仔，「不過你睇下佢收幾多股息」

其實畢菲特，係咪真係睇淡？富爸爸講之嘛！

畢菲特，當然長期係好友。事實根本冇長期淡友，因為長淡必死

畢菲特覺得美股貴，咪去買日本股　—　不過唔會事先話你知

我寫嘅嘢根本唔深，與其日夜睇垃圾資訊，睇住個市，不如諗下嘢

拿，唔好話啲文又長又悶啦。今次呢篇夠短（因為我又拆做兩篇），亦都肯定易明。含金量一定高過你睇貼現窗文。因為你要了解嘅係你自己，唔係貼現窗

索羅話加碼AI，睇好。畢菲特增持現金，睇淡。咁點算？跟邊個？

1. 可能過兩日先講個「貼現窗」嘅後記。講過了，呢部份先最重要，分辨真假資訊嘅能力，識分高低質素嘅能力，理解呢個世界嘅能力　—　呢啲嘢先係最緊要，而唔係你每日去睇住人地講乜，或者睇住個圖。兩日前聽索羅斯講話加注AI股你又衝入去，然後隔幾日聽講話畢菲特都睇淡股市，Micheal Burry（The Big Short條友）又係，咁你又嚇走。今篇就由呢個例仔講起，教你諗一樣嘢：skill versus luck，好波定好運？

答：兩個都唔信，兩個都唔跟。然後連佢地都唔跟，就唔使理你啲網友

2. 留意，呢啲都已經係比較出名同成功嘅人，但你都不能咁樣去「跟」。至於你啲朋友嘅，講真，除非你嘅朋友或作者，滿足到以下四個條件，否則更加唔使理。

3. 邊四個條件？陣間詳解。但預告定：賺幾倍，買得大，重覆到，真心。

其實市場永遠有正反意見。所以，睇下你嘅作者係咪滿足呢四個條件

4. 原理好簡單：其實市場永遠有正反意見，因為永遠有人買有人賣。畢菲特索羅斯你照聽都會死一邊（兩個打交喎），但呢啲已經係叻嘅人。咁你啲朋友呀，咩KOL呀，更加係可以不理

高盛點睇，富爸爸又點睇。講真，關我乜事？關你乜事？

5. 好廢但答你一句：永遠就係有人睇好，有人睇淡。所以，每日啲讀者send畀我，話呢間行點睇點睇，呢個人點睇點睇。講真，關我乜事，關你乜事？「嗰啲就真係財演啦」。對，你以為幾百萬幾千萬人工嘅就唔係財演？只係套戲服靚啲，台詞深啲。原則上，你在電視見到嘅，都係財演，特別係打工嘅，基本上冇例外。

得個講字就固然冇意思。但真金白銀「睇好」，就真係心中睇好？

6. 然後你再可以諗下，索羅斯真係睇好AI股？唔知喎。你咁演繹啫。你話，喂，佢大手買仲唔係睇好？但第一，係咪完全佢嘅錢，都唔敢講。第二，你睇嘅已經係過時嘅數字。第三，你點知佢背後冇買其他衍生工具？佢增持1億AI股，然後背後用十倍嘅錢賭佢跌都仲得。所以，除非佢真係畀你見到買得好大。

7. 當然我唔係陰謀論，但亦好肯定唔會照單傳收。返返好基本嘅邏輯：我唔明點解有人覺得睇呢啲「部署」有用。參考下可以，拎嚟壯下膽都得。但，唔好太認真，更唔好畀佢主宰咗你。如果你真係自己唔識思考嘅，冇問題，認咗佢。咁咪個個月買指數基金，有幾難呢？我就真係冇見到有幾多人可以長期跑贏指數。

8. 若果你睇住呢啲咁嘅「大戶申報」（每季都要報旗下啲持倉有乜變動），就搵到食嘅，講真，呢啲資訊就應該好秘密，又或者大把人收一舊大錢去幫你解。但似乎你冇見到咁嘅事

我個個月買重人壽，又係咪「睇淡」自己條命，估我下年死？

9. 另一個角度睇：我個個月畀錢買人壽，但我係咪「睇淡」自己條命？覺得自己就死？又唔係喎。你分析啲乜鬼期權嗰時，更加留意呢啲嘢（有冇話你知期權金同保險金一樣都係叫premium？）

知名度高嘅人，當然知道自己有用。一個字：莊思敏的士牌

10. 而另一方面，以佢地呢啲知名度咁高嘅人，一定知道自己一舉一動都會引嚟其他人注意。就當然會諗下想唔想多加利用。講得簡單啲，我未買齊貨嘅，我點會想你知？點都避得就避。到畀你知得嘅，唔一定話實係伏，但佢地一定知有乜效果。

11. 仲唔明嘅？好簡單，三個字，莊思敏。點解佢要拍片分享買的士牌？好簡單，引人入市。唔一定係接「佢嗰件貨」，但至少令多啲人買，或者多啲人留意。佢係名人，當然會留意呢樣嘢。你100個人睇片有99個落井下石冇所謂—反正呢啲人又冇得沽空，佢令到有1個原本唔識買的士牌，唔知點買嘅，會埋呢個市場，就已經夠。

12. 亦都所以好簡單，除非你了解晒佢一舉一動，佢攤晒所有嘢畀你睇。否則，所謂「睇好」「睇淡」，全屬廢話。邊個會攤晒畀你睇？「我咯！」。我不致於所有倉畀晒你睇（廢事啲少數麻煩讀者多多事實），但我有錢就買晒股票，一直如此，咁當然係「睇好」

係呀，李澤楷連續四日增持8號仔，「不過你睇下佢收幾多股息」

13. 冇錯，即使係真金白銀增持，亦不代表睇好。係呀，李澤楷連續四日增持8號仔，業績後佢買得就即買。但唔通我地又就咁簡單話「佢睇好間公司」？固然你都知，扯，千幾萬對佢嚟講唔係乜錢。但更重要嘅係，我咪寫咗，「佢一年收息都10億啦」，拎千幾萬出嚟，根本濕碎，「係睇好嘅拎幾億啦」

14. 話說回頭，的確「咁佢雖然有錢，千幾萬唔係錢，但都唔代表要益你，拎去溝女明星唔好？」。事實如此。但，佢呢千幾萬，就可以引嚟好多人「跟風」，唔少人真係以為佢「睇好」，絶對係除笨有精。

其實畢菲特，係咪真係睇淡？富爸爸講之嘛！

15. 在呢個課題上，畢菲特係真係比較少呢啲古靈精怪嘢。你見佢話睇好，就真係睇好。佢當然都有雙重標準，亦當然會睇錯市。但整體嚟講，依然係近乎無人能及。而佢講嘢，亦都係比較「真」。

16. 咁你話佢係咪「睇淡」？唔知喎。但，其實段故事，都只係「窮爸爸」（呢個就大財演啦）「話」畢菲特睇淡啫。呢個同「畢菲特睇淡」就己經係爭好遠嘅事。但你見好多人，唔好話唔睇內容，連個標題都理解錯的

17. 既然會咁，就不如睇少啲。

畢菲特，當然長期係好友。事實根本冇長期淡友，因為長淡必死

18. 畢菲特對股市嘅取態，應該幾明顯。你見到佢真係比較少出手買美股，佢自己都話嫌貴。甚至疫情下佢都未覺得夠平。我以前嘅文有討論過呢個問題—在佢年代，啲股票真係唔會咁貴的，當然好可能有個結構性改變（例如長期低息），而佢都係人，點都會受制於自己以往嘅經験。

19. 但，佢的確話美股貴，買唔落手，亦都真係冇乜點大手買，做得最多就係回購。咁其實講到明你知佢點諗了。而放心，畢菲特好少會表裏不一，唔會唱淡自己又大手增持。或者表面增持少少實則背後用衍生工具造淡。

20. 話說回頭，你見畢菲特真係「長期睇好」。佢頂多係留住啲現金，但總唔會清倉，更唔會造淡。其實呢個亦話到你知，根本股市長遠一定係樂觀者贏。成日睇淡呢樣嗰樣嘅，必然冇運行。從來冇一個人可以長期睇淡發到達。甚至索羅斯都唔係，Micheal Burry（The Big Short嘛）更不用講，根本唔算發達，況且佢亦唔係「睇淡」，就算你當佢係，佢都只係一次，仲要好短期。即係而家標納指比起金融海嘯時升咗幾多倍？我當佢2007年whatever開始造淡指數（事實佢唔係），唔及時抽身，都係必死嘅。

畢菲特覺得美股貴，咪去買日本股　—　不過唔會事先話你知

21. 最後補多筆，咁你見，畢菲特就走去買日本股，我甚至懷疑仲會繼續，或者佢會睇其他股市（不過都九十幾歲了）。見到冇？佢覺得美股貴，咪買其他股。不過佢唔會事先話你知佢買日本股

22. 雖然，佢買完之後你再飛入去，都仲有幾可觀嘅回報嘅。始終嗰時日本股真係平（而家亦唔係好貴）。

總結

我寫嘅嘢根本唔深，與其日夜睇垃圾資訊，睇住個市，不如諗下嘢

23. 畀個小總結你：呢篇，同埋下一篇文嘅嘢，我諗夠晒短，亦絶對易明。你根本唔使讀過金融，甚至唔識計市盈率唔識計股息率都冇所謂。但呢啲先係最重要嘅嘢。唔好本末倒置，記住睇返我第1段寫乜

24. 根本，呢篇同下一篇，我都係討論一啲好平常嘅嘢。好似以前都講過，如果你真係想睇書，其實睇哲學書最幫到你投資。

25. 以上講嘅嘢，完全唔深。但，可能你平時根本冇去思考。所以，與其睇埋咁多垃圾資訊，與其日夜mon住個股市，不如多啲諗下嘢。

26. 下一篇我就同你講，你應該聽嘅「人」，要有邊四種特質　—　留意，唔係你要十足信晒，只係你應該聽下。有啲完全符合唔到呢四個條件嘅，根本理都廢事

27. 重覆一次，四個條件係：賺幾倍，買得大，重覆到，真心。你甚至諗下，點解要有齊呢四樣。

28. 你見真係好簡單，好多你以為理所當然，人云亦云嘅嘢，我都會思考，係咪真？好多嘢聽落「言之成理」，有紋有路。疫情重創經濟股市一定唔掂，聯儲局仲加緊息今年科技股實唔掂，日本經濟迷失廿年股市點會掂，索羅斯買Nvidia仲唔係睇好？　—　但，不妨諗多啲

29. 同埋記住金句中嘅金句：多數人，當然多數係錯嘅。有眼你睇，網上最多人like最多reach嘅，多數係最垃圾最假嘅嘢。我在Facebook貼過篇文，機械人打乒乓嘅假YouTube片，成億view．講真相嘅，十萬都冇。咁你稍有常識，都知你睇到前者嘅機會，遠大於後者。所以，網上當然係充斥住垃圾。