完晒貼現窗，市況麻麻，咁先係好事。借機還原基本步：投資嘅嘢，買得大，坐得長，食盡個浪佢。中途睇少啲，同人傾少啲。專心打好你份工。唔好亂咁諗埋啲古靈精怪嘢，唔好高估自己。其實真係咁難咩？ (Patreon)

我發現有啲讀者真係唔聽書。其實冇問題，但就唔好呃自己話「想知」

其實你係唔信嘅，我解1000次都係冇用的。咁港紙爆咗煲未丫？

重點幾時都係你嘅投資心態，同思考方式

唔少讀者嘅investment idea我都未必同意，原因之一係：買得幾多？

OK，KRE三個月升兩成幾，跑贏指數。但你買得幾多？況且，如果輸呢？

回報大但買得細，不如回報OK但買得超大

投資其實可以好簡單

Alternative Path：美國息口見頂我去買TLT，內房最壞情況我去買內房債ETF

近排股市唔多好，但咁先係好事！跌時唔買，唔通升晒先買？

買得大，坐得耐，食晒成個浪

你覺得廢，但我還是要講：將你睇垃圾嘅時間，拎去專心搵你嘅收入

今年賺錢，根本容易之極。點買都贏。但最緊要你有買，買得大

你早兩個月估息口見頂大手買TLT，就出事了。其實點解搞咁多嘢？

我發現有啲讀者真係唔聽書。其實冇問題，但就唔好呃自己話「想知」

1. 卒之嘔完晒個貼現窗系列，有少少失望，因為我發現有啲讀者似乎係長期唔聽書嘅。可能見長又唔想睇　—　咁但，又要問我叫我解喎。我簡答佢話，「唔關事架，借貼現窗好平常」，佢又未必信，又話想我解詳細啲，到詳解又覺得長唔好睇　—　係真係冇問題的！

2. 記住，讀者係我衣食父母，多謝大家（3週年咯！）。所以唔係針對或批評讀者，而係希望大家變得更好。讀者有時做得不足嘅地方，其他人都會有

3. 我唔明點解大家覺得要「識」咁多嘢。你真係求知當然係好，或者拎到嚟返工用更好。

其實你係唔信嘅，我解1000次都係冇用的。咁港紙爆咗煲未丫？

4. 但如果你根本唔係有心想聽嘅，咁做乜要問我？正如咩聯繫匯率，銀行體系結餘，外匯儲備，講完又講，解完又解，都有啲有聽書讀者會微言，覺得不停重覆，然後港紙講極都未爆煲。但依然係不停咁有人要解。其實諗真啲，係咪因為你根本唔信？咁我解1000次都係冇用的

5. 好多人誤解咗，以為我要點識睇財務報表，我要知光刻機乜技術，我要知道大戶動向，我要知道兩岸武裝力量，我要知俄羅斯係咪兵變，我要知貼現窗點運作　—　你拎嚟返工用就有用。但只係投資嘅，根本以上全部嘢都唔使知。你想「求知」係好事，但唔好自己呃自己。

重點幾時都係你嘅投資心態，同思考方式

6. 咁你睇到啦，我用咗七篇文同你解個貼現窗。但呢個真係重點？重點幾時都係你嘅投資心態，同埋思考方式。

7. 之後我會再講成個「貼現窗」事件嘅教訓，希望唔會太長，而且冇技術嘢，唔該你睇咗佢。否則你每個星期嚟問我一次，點解花旗出咁高息搶存款係咪港紙爆煲，點解美資行出期權賭聯匯係咪有內幕（然後昨日就即時有人再問！死未。）

8. 你要嘅，唔係knowledge，係改變你自己

唔少讀者嘅investment idea我都未必同意，原因之一係：買得幾多？

9. 讀者應該會發現，好多時你地嘅investment idea，超過一半我都唔多同意。重點亦唔係你係咪識得多過我，或者你啱定我啱。可能你對贊比亞女足好有研究，覺得被低估（事實非洲女足明顯被低估，Facebook Page過）。但以前寫過，越偏門越古靈精怪嘅嘢，即使唔伏都好，你買得幾多？

10. 例如讀者有問過KRE，我當你真係5月頭低位買，然後又冇震走，又冇「食糊」（雖然我好懷疑有冇可能），而家回報不錯，三個幾月升兩成幾。但我當初當然係不鼓勵人買。咁你係咪走去質疑我「老點你」「阻你發達」？

OK，KRE三個月升兩成幾，跑贏指數。但你買得幾多？況且，如果輸呢？

11. 當中嘅思考問題，以前嘅文都寫過，最好你再諗下。扯，TVB都一日升五成呀，越南電動車SPAC兩日升幾倍添，破產公司Yellow都係。但唔通你問我我又叫你買？然後你真係見「升咗」又覺得我搵你笨？咁日日有人中幾十倍波膽添，但，如果輸呢？同埋，你買得幾多？

12. 至少一樣嘢我好肯定：我就當你5月頭買KRE，而家幾個月執廿幾%，幾好啦，好過納指添。不過，你可以買幾多？我就唔係好信你會瞓身家。但我買SPY QQQ可以瞓身家，你未必得，有你嘅原因，但至少我係咁做。

回報大但買得細，不如回報OK但買得超大

13. 呢個問題，講過真係過百次。回報大但買得細，不如回報OK但買得超大。

投資其實可以好簡單

14. 所以根本上，你問我應該點做，係十分簡單。每個月，拎你嘅錢，全部買晒指數ETF，或者你鍾意嘅公司，然後長期持有。

15. 實情畢菲特都係咁建議你，而我唔覺得佢係老點你。

16. 一定好過你儲埋啲錢但只係拎少少出嚟博。然後跌10%止蝕，升20%「食糊」。講到尾，請你戒咗呢啲賭博心態。仲有，你未贏過幾倍，你嘅現金多過你嘅股票嘅，都肯定係功力未夠。

17. 個股？留返少少錢，或者意外之財，得閒玩下。但絶對不能係主菜。你話真係大公司蘋果微軟都仲好少少，啲古靈精怪嘢，更加只能買少少當玩下。

Alternative Path：美國息口見頂我去買TLT，內房最壞情況我去買內房債ETF

18. 記住，alternative path．你可以話你5月買KRE明明睇啱但我阻你發達，不過，如果你輸錢呢？

19. 正如之前都有讀者，問我「內房最壞情況已過，係咪應該買內房債ETF 3001」，又或者，正路少少嘅，「股票貴，而既然覺得聯儲局應該停加息，咁係咪買TLT，買美債ETF冇得輸」？

20. 拎呢啲例子講，係為咗示範，真係唔好「直線思維」。

21. 首先，呢個世界上，係唔存在冇得輸嘅，除咗買美債。另外，好多時你第一步都已經錯。亦都好多情況，你頭幾步都啱晒，但最後情況就係同你預期唔同（世紀疫情　史無前例　全球封關　一定重創經濟　「所以」我去沽空股票）。

22. 諗到3001咁偏，就當然出事不出奇，以前寫過「甩拖理論」。你一路想買嘅股票，跌咗落嚟（例如舊年啲大科技股），你又覺得過份咗，冇咁差，你買就正常，就可以別人恐懼時你貪婪。

23. 但，有啲嘢你之前根本聽都未聽過，然後有個想法（唔知會唔會發生），覺得某啲嘢會發生（唔知係咪），咁某啲嘢就會升　—　呢種思維，可以相當危險。

24. 況且，都係最重要嘅問題：你買得幾多？

25. 我亦都一路唔明，點解啲人買啲怪雞嘢就敢，但叫佢大注買指數（或者股債平衡組合）就覺得好高風險。大盤指數或股債組合嘅往績，肯定好過你啲怪雞嘢。

近排股市唔多好，但咁先係好事！跌時唔買，唔通升晒先買？

26. 好啦，虛嘢講完，講實在嘢。呢排股市就唔多好，港股固然係，但美股都係。

27. 不過，當然咁先係好事！！！！！

28. 亦係講咗過百次，就係呢啲市況，往往最好。跌多就買多啲。然後唔好問我跌到乜位買，永遠唔知。有錢就買。唔放心嘅就等多兩三個月，但不能太久。你見我買任何股票從來都唔使睇位。但我贏到幾倍，因為就係在嗰啲「冇消息」「壞消息」嘅情況下我照買！

買得大，坐得耐，食晒成個浪

29. 仲有，亦係因為我買得大，坐得耐，食晒成個浪。你要嘅唔係Nvidia 500蚊然後等佢跌到400蚊買（萬一唔跌呢？）然後到450蚊又「食糊」。

30. 你要嘅，唔係望住個圖，估佢幾時跌，然後你就跌10%時買，佢反彈20%時沽。好多人就係咁做，所以好多人就根本永無脫貧之日。

31. 你要做嘅嘢，好簡單。40蚊時買Nvidia，然後坐到上500蚊。做唔到？但我嘅忠實讀者就做到咗。其實重要嘅，唔係佢「做咗乜」，而係「冇做乜」。太難？咁我都100蚊買Nvidia啦，而家都300%以上。

32. 中間你可以乜都唔理，特別唔使睇啲廢柴KOL，唔使聽朋友講，唔使睇圖，如果自問冇定力嘅，新聞都唔使睇，股價都唔使睇（我唔明睇嚟做乜，跌咗10%你又沽？升20%你又沽咗佢？），根本乜都唔使。專心打好你份工或者做你自己各種秘撈或生意，搵多啲收入。

你覺得廢，但我還是要講：將你睇垃圾嘅時間，拎去專心搵你嘅收入

33. 如果你永世都係萬幾蚊人工嘅，呢個Patreon幫唔到你，根本冇人幫到你。因為有數得計，就係8-10%回報，畀你好啲可能拉到15%，頂盡。仲未計回報高風險都高，你兩嘢就止蝕，或者根本買唔大。

34. 但我可以幫到你嘅係，你努力你嘅工作，一路有錢落個股市，我幫到你碌大佢，碌到上某個數，然後你就真係應該衣食無憂（個數要幾大？下篇講）

35. 呢篇有啲散，但照計都係有用嘅。下篇正經啲，睇返近排市況。特別係，債息又升，美金又升，股市當然冇乜力。特別留意，估債息落話諗買TLT，或者諗美金轉弱買外幣嘅，就怕且中伏了

36. 邊有咁簡單？

今年賺錢，根本容易之極。點買都贏。但最緊要你有買，買得大

37. 但掉轉頭，扯，今年賺錢，依然係話咁易。我年頭半港半美都好，今年都仲贏5-6%起碼，全部美股一定唔止，「全部買晒QQQ更加唔止」，「不如全部買晒Nvidia丫」「不如全部跟我訓身買拜仁慕尼黑捧德甲，一晚就400%，已經退咗休」

38. 認真，真係，使乜搞咁複雜呢？年頭SPY QQQ 盈富基金 EMXC IDEV 乜都好，亂買，照計撈勻，你都必定贏錢。甚至我當你係退休人士，保守啲，股債混合啦。SPY + AGG（呢隻也是美債ETF，夠分散），今年一樣相當唔錯。

你早兩個月估息口見頂大手買TLT，就出事了。其實點解搞咁多嘢？

39. 但你早兩個月走去估息口見頂買TLT，就出事了。或者你年頭去買3001（其實任何位買都保證輸錢，足以見到呢個idea相當差），就出事了

40. TLT你都仲可能話有得守，都係嘅，「但係咪10%要止蝕？」。至於3001呢啲，輸一半，我諗都幾難翻身

41. 你見到嘅係，你嘅「預測能力」，冇你想像中咁高。最好都係謙虛啲。主力買大市，真係閒錢先去考你呢啲眼光，當賭下馬賭下波好了。當然了，好多人只會覺得我叫佢唔買KRE阻佢發達（升好多嗎？），但對於我幫佢避免咗呢啲伏嘢就未必記得。

42. 可能你反駁，我買少少啫，死唔到人。但，買得少少嘅，畀你中又如何？

43. 之後點部署？唔好又問呀下！呢幾個月都冇變過。睇多次第14段。唔想買大盤指數咁齋？咪主力指數，少少錢玩個股。乜個股？呢幾個月都冇變過。咪美國非科技股（早排啲醫藥股好強啦），或者美國以外市場。香港嘅，咪騰訊阿里巴巴，或者啲派到高息嘅嘢。