［極長篇專題大結局］(7/７)：渣打係咪個別例子？唔係！點解銀行借貼現窗？因為缺水！點解缺水？美國加息加到22年高，銀行當然水緊。美國都係咁。但， net lender嘅銀行咪賺到笑咯，有何問題？ (Patreon)

「技術細節嘢」最後一篇。但始終，重點都係「睇少啲垃圾」

唔好下個月又嚟問我花旗係咁搶存款係咪就爆煲

9月頭又有免費講座。另外華泰YouTube片已經上線

渣打係咪個別事件？唔係。係咪多咗銀行冋貼現窗？係！

銀行係咪水緊？梗係啦！但再講一次，佢水緊，同會爆煲，係周好遠嘅事

另外，其實唔公佈貼現窗數字，你都係睇到水唔水緊的

你睇拆息，咪知道個體系係咪有危險。市場成交，冇得呃

「其他人唔知大難臨頭得我地知」嘅自high，係好開心的

忡有：季節性因素

「派息都2000億呀，銀行體系結餘得400億，點夠？」

其實呢，你捐幾次血，唔會令你少咗血的。射精都係

拆息7厘都仲得呀，有何問題？Net lender咪賺到笑。你睇匯豐同JPM？

最後一點：有冇諗過，貼現窗可以平過拆息？

「喂你講到咁正常不過點解金管局唔開名　點解渣打唔認　咁神秘」

1. 呢幾日搞公司報稅，昨日冇出文，今日貼埋呢個系列最後一篇。

「技術細節嘢」最後一篇。但始終，重點都係「睇少啲垃圾」

2. 最初講過了，講完晒呢啲技術嘢後，我仲會講返最基本嘅「唔好睇啲垃圾KOL」「唔好信你啲傻仔朋友/網友」之類嘅嘢，亦即係「應該睇乜嘢」嘅問題。講過N次，呢啲嘢先係最重要，否則你下次又會再嚟問我銀行體系結餘跌到350億係咪會爆煲，一個月跌50億係咪8個月就會冇晒。反正我可以保證，垃圾資訊垃圾意見會不停出現。

3. 呢個系列最開頭我已經提過，原本你問我，我諗住一開頭寫呢啲，但廢事你覺得「講咁多都未入正題」。所以我最尾先講。記住，將就咗你了，就唔該你務必睇咗最後呢堆嘢。

唔好下個月又嚟問我花旗係咁搶存款係咪就爆煲

4. 因為我唔想你下個月又嚟問我「花旗好落力搶客係咪就快爆煲」（這是廣告，遲下解）「美資行推期權賭聯匯唔脫勾係咪即係有內幕知道實爆煲」（訂戶先睇到，唔好嚟叫我copy 畀你睇。首先尊重知識產權，二來一早叫你訂，三來……「我遲下都會講，應該都會copy畀你」）（車埃汾又話尊重知識產權？唔同。點唔同？你開口問我，同我主動畀你嘅分別。即係你去食飯R免費糖水R熟客折扣，同人地主動畀你嘅分別）

5. 之後會寫其他嘢，歡迎點唱，但唔包實識寫。

9月頭又有免費講座。另外華泰YouTube片已經上線

6. 9月頭又有免費講座，遲下畀詳情你地。但應該係9月6日星期三晚，係，平日嚟的，我叫咗佢地唔好，但佢地搞就冇計。會在中環交易廣場某寫字樓，遲下再通知大家。

7. 到時大家再去開下戶（線上又得，當日先開亦得），幫手交下數，咁就長玩長有。

8. 然後上次，傳說中十分精彩嘅華泰講座，佢地都放咗上網。上集呢度，下集呢度。PowerPoint我呢度畀埋你。不過遲下我應該在呢度會寫一次。

9. 繼續個系列，今篇真係完。第一篇同你講咗結論先，銀行真係「冇錢」，所以借貼現窗，但冇事嘅。第二篇我解你知，銀行點解成日都「冇錢」，因為多餘嘅錢等於蝕息。第三篇，具體睇下銀行有幾「冇錢」。第四篇講咗銀行拆借嘅生態，net lender net borrower．第五篇入直路，畀你睇到個生態，就一定係搞到銀行體系結餘好細，事實根本所謂「未爆煲」前都只係2000億—但存款係近8萬億。上次講埋我點解玩到借貼現窗，渣打又點解會搞到借。

渣打係咪個別事件？唔係。係咪多咗銀行冋貼現窗？係！

10. 最後嘅問題，渣打係咪個別事件？唔係。係咪多咗銀行用貼現窗？係！所以，個使用量咪兩年新高

11. 之後會點，爆唔爆煲，核唔核戰，大陸幾時統一埋美國，就涉及預測嘅嘢。無從判斷。但，我地睇一啲fact嘅嘢。同你啲廢柴KOL嘅講法唔同，金管局從來冇呃你，一路有公開呢啲數字。並冇「特登粉飾太平」，係咪？

12. 你可以話啲數假，雖然我發現啲傻仔有任何嘢反駁到佢佢就話假。但，仲有兩樣嘢。首先，啲人話假，但寫嘅嘢拍嘅片，一樣係基於呢啲佢認為假嘅數字，非常好笑。另外，你比較理性少少嘅，其實可能會覺得：唔係佢唔想造假但比較難　—　呢個可以話有道理。但掉轉講，根本金管局唔出呢啲數字，你都吹唔脹。只係以前公佈開，而家忽然唔公佈，你會覺得有問題啦係咪？咁公佈得嘅，如果真係造假，根本唔使畀你睇到「壞消息」，係咪？

13. 以上呢啲，之後再講。但簡單一句，你覺得係邊個昆緊你？你睇啲廢柴KOL，定（你以為）萬惡嘅金管局？

銀行係咪水緊？梗係啦！但再講一次，佢水緊，同會爆煲，係周好遠嘅事

14. 咁你話，銀行係咪「水緊」，就當然係啦！但，咪寫咗，「水緊」同好唔掂係兩回事。我幾時都水緊，但冇人會當我好唔掂下話？

15. 點解銀行咁缺水？簡單，你都有眼睇，銀行體系結餘得返400億嘛！咁當然缺水。如果唔缺水，你就真係可以懷疑啲數字做假。但再講一次，水緊同爆煲，係兩樣嘢。

16. 仲有，大家知啦，美國加息加到廿幾年近高嘛！咁銀行梗係水緊啦！事實上美國都一樣。但美國拆息高你又唔覺得人地會爆煲，香港就銀行體系玩完，十分搞笑。當中，根本係好多人投射咗自己嘅想像。更唔好忘記，美國嘅銀行亦不停借貼現窗。

17. 但你見到冇，好多人，就係將「流動性緊」，好快就跳咗到「銀行唔掂」「爆危機」，當中真係跳咗無數咁多個步驟，好似朝早你買大家樂早餐個阿姐同你笑你覺得今晚可以同佢上床咁　—　喂，佢無啦啦對我笑喎，之前咁多日都冇，仲唔係冧我？

18. 我講真的，你可以留意下佢地嘅講法，點樣將一啲「事實」（貼現窗借得多，阿姐對住我笑），然後通過一啲好似聽落言之成理嘅推理（無啦啦借貼現窗仲唔係冇錢？）無啦啦對我笑仲唔係冧我？），然後推出一啲荒謬嘅結論（銀行體系會爆煲，你今晚有著落）

19. 同渣打或大家樂無關，但你可以好快望一望呢個故事　—　嗰一蚊去咗邊？你可以慢慢諗下。但答案係：根本冇消失過，只係佢個講法誤導咗你。

另外，其實唔公佈貼現窗數字，你都係睇到水唔水緊的

20. 然後，根本呢啲嘢，你亦可以由個「市場」見到。你覺得金管局啲數字假嘅，個auditor畀強力部門脅持咗全家嘅，fine。但，拆息係市場嘅嘢，你全部睇到，所有做Treasury嘅人日日坐低都會見到，冇可能可以造假。

21. 亦即係話，個拆息，就係應該反映返銀行體系結餘，而金管局從冇否認銀行體系結餘跌。你話如果佢作大話仲有5000億，但你見到拆息升到5厘6厘，咁你就可以質疑係咪造假啦。

22. 但你而家見到，隨住銀行體系結餘跌，拆息咪一路上，金管局一早同你講咗係咁架喎，我都有同你講。只係你啲垃圾KOL妖言惑眾之嘛（BTW，因為拆息夾上，你見港紙就冇再7.85了）

你睇拆息，咪知道個體系係咪有危險。市場成交，冇得呃

23. 但，拆息固然夾高，但唔係去到「爆煲水平」。亦足以證明，銀行只係「有啲水緊」，但唔係去到一個有問題嘅地步。好簡單，你睇下真係有問題嗰時，可以挾到上幾高。遠嘅，金融海嘯。近嘅，疫情嗰時。嗰時你見就銀行出問題，大家互不信任，就見到啲息夾到好高。因為有錢我都唔借出街，借咗你兩個星期後爆煲我咪大件事？

24. 所以，由拆息可以見到個體系嘅安全，冇得呃。類似睇你血壓，咪知你啲血管有冇事。而家係高咗，但肯定仲係安全水平。你可以睇下危險水平時嘅情況？望下2008年時啲拆息，或者2020年爆疫情時，嗰啲你就真係見到銀行互不信任啦。

25. 而家呢啲5厘拆息，根本平常過平常　—　美國再高啲都係咁啦！幾時亡國呀？係啲友走去誇大，「嘩拆息升咗好多倍呀」　—　你之前0.幾厘嘅拆息喎。不如你又望下美債債息升咗幾多倍？

26. 同樣地，渣打股價冇耐前先創咗一年高。邊忽似係爆煲？你望下2008金融海嘯時，或者2020疫情時，甚至幾個月前SVB爆煲前，啲畀人覺得「出問題」嘅銀行，股價會點？實際上係冇事都冧咗先。點會銀行危機但股價創新高？

27. 留意，今次渣打已經係香港人最崇拜嘅英國銀行，都可以作咁多嘢。如果係間中資銀行呢？相信仲精彩。事實上你信英國銀行多過中資，都合理嘅。而你要作故事嘅，一定可以搵到某中資行某個行長早排畀人拉咗呀，然後搵到佢可能三十年前同胡錦濤打過邊爐呀之類，又可以演繹成大內鬥。

28. 我知啲傻仔KOL點諗，眾人皆醉佢獨醒嘛，其他人都唔知大難臨頭佢先知。即係一句，「咁你唔瞓身沽空」？亦係我一路講嘅，金融市場上，冇大力落注，任何意見都係廢話。

「其他人唔知大難臨頭得我地知」嘅自high，係好開心的

29. 不過當然了，對佢地同埋佢地嘅觀眾嚟講，呢啲「其他人唔知大難臨頭得我地知」嘅自high，係好開心的。但事實上，你睇雷曼，疫情，SVB都好—銀行有事，必定走漏風聲的，一定有人傳。可能對家知唔對路，可能有人特登周圍唱（一早沽空定），可能自己行啲高層都掉走啲股票先。你見，次次都紙包不住火，甚至必定係有殺錯冇放過，冇事嘅都大跌。因為價格真係比較難呃人。

30. 不過上面血壓個比喻唔完全啱，正常人血壓唔會不停升，實情做乜拆息夾高咗？做乜銀行體系結餘跌？好簡單，因為美國加息咯！

31. 其實，有幾難明？美國息口去到22年新高，咁香港嘅拆息，當然都會去到十幾廿年嘅新高。水緊情況，亦當然係十幾年最緊。

32. 所以，5厘幾嘅拆息，根本正常不過　—Fed Fund Rate都5厘樓上啦。我都唔知有幾難明。咪就係加息咯！如果咁加息你啲拆息都唔上，你就可以懷疑係造假啦

忡有：季節性因素

33. 仲有一樣嘢，都有啲季節性因素。除咗之前好多人都知嘅，半年結大家借錢頂一頂個Balance Sheet外（留意，唔止銀行，啲企業都要嘛！）。仲有一樣嘢，8月係啲中資派息高峰期。

34. 喂！成千幾億港紙喎，而呢啲錢係派走的，唔係拆完會還返畀你。難怪銀行會水緊。記住，銀行體系結餘都係400億咋喎。咁你係咪又可以看圖作文講，嘩，息都唔夠派呀，8月一定爆煲！

「派息都2000億呀，銀行體系結餘得400億，點夠？」

35. 大佬呀，啲錢走咗，會由其他地方補上的嘛（例如企業，啲派息根本就嚟自盈利）。即係你捐幾次血，係唔會自己啲血越嚟越少嘛！

36. （對唔住，真係講：即係等於啲男人射完咁，又會reload返，唔會「射晒就爆煲」。容量就得咁多，但冇咗自然會gen返出嚟，所以唔會幾次後就乾塘，最多抖陣就得。明冇？）

其實呢，你捐幾次血，唔會令你少咗血的。射精都係

37. 最後一講：老細，建行派一次息都成1000億啦（然後有人話啲數子假，但，派出嚟嘅股息可以點假？你可以拎去食米芝蓮喎）。咁，居然有人覺得渣打31億都冇？「明明大陸經濟好差　英國經濟好好」

38. 咁但，正常地，其實啲拆息係可以一路升，唔會爆血管嘅。啲友供唔供得起樓，另一個課題。有啲公司之前借落太多錢（例如香港寛頻）融資成本大升要減派息，甚至蝕錢，另一回事。

拆息7厘都仲得呀，有何問題？Net lender咪賺到笑。你睇匯豐同JPM？

39. 但在銀行層面，有何問題？拆息7厘又如何。記住，有net lender有net borrower嘛，net lender嗰堆，例如匯控，不知幾開心，收多好多息。

40. 係咪又有人想拗利息收入高咗但支出都高咗？係咪有人想拗壞帳會多暋？之前講JP Morgan業績咪講過咯，淨利息收入勁升，夠冚啲壞帳有餘啦。你睇匯控都係。你睇之前我寫意大利銀行都係。你唔量化嘅，就講乜都只係作故事，任何結論都得。

41. 但當然了，業績好一回事，股價另一回事。你見恒生股價都一年新低啦

最後一點：有冇諗過，貼現窗可以平過拆息？

42. 仲有，補多筆。仲有樣嘢，我唔係好肯定，但似乎都講得通。最初我講，銀行借貼現窗，當然係因為水緊，而冇在同業拆借市場借。可能係不能，或者不為。不能者，上面講咗，計錯數啦，畀人蹺起啦，太遲發現啦之類。但不為呢？

43. 有冇諗過，其實問貼現窗借，可能仲平過問同業？

44. 正常下係唔會，但，偶然會發生。你會質疑，咩呀，隔夜息先3厘幾，貼現窗就5.75。但，7月頭嗰時5厘幾都見過 。而仲有，拆息，特別係短期拆息，可以好波動。你上網睇或聽媒體講嗰啲，多數係個HIBOR Fixing（我條link有講，正係11點鐘有人計出嚟），或者有時你見有啲地方講收市。但中間可以好波動。我當上午11點你見到5.4厘—但到你3點4點發現缺水屎淋尿賴咁走班水，仲會唔會係咁低？咁去到嗰個位，真係有可能計落：借金管局5.75厘好過啦！

45. 不過again，金管局一定唔鼓勵你咁做，所以正路會照肺，點都要你有個說法，你不能日日咁去做的。

46. 好啦，以上係咪好技術？係！因為可能我唔講你連平時睇到嘅「拆息」係11點鐘嗰個都唔知（股票唔會咁的，順手講埋，點解拆息唔會用收市價？因為尾段太過波動，況且你真係唔係好知幾時真係「收市」。以前咪話咯，玩到六七點打去漢城都仲試過）。但重點係，其實，你係咪要知咁多嘢？你知咗又點？我成日覺得，呢個根本唔係重點。重點係，「你根本唔使理嗰啲人」

47. 最後一樣嘢，會有人發現，其實由頭到尾冇人話過係渣打，渣打冇認過，金管局亦冇認過。都係市場傳。但有冇發現一樣好得意嘅嘢：我由頭到尾，都冇質疑過呢件事係假，或者唔係渣打。事實我都係睇媒體睇返嚟，但你應該信乜人？乜媒體？就係我下半場要講嘅嘢。

「喂你講到咁正常不過點解金管局唔開名　點解渣打唔認　咁神秘」

48. 不過你可能有個質疑，我覺得係合理嘅：你會諗，喂，既然埃汾講到咁小事，「咁點解渣打唔出嚟解？」。好似絲絲縮縮畀人踢爆咁喎。做乜唔可以光明正大？仲唔係有內情？

49. 這個嘛，其實係國際慣例，第啲國家都係咁的。原因亦好簡單：因為真理唔係越辯越明，群眾係低智的。若果金管局或聯儲局要開名，咁啲KOL更加興奮，可以作得仲精彩，肯定間嘢唔掂。而講過了，銀行擠提係「自我實現」，到時一傳十十傳百，人人去拎晒啲存款，冇事都可能變有事。

50. 所以，一向都係金管局唔會開名，借嗰個亦唔會，免得有個「負面標簽」。但總數，你係睇得到嘅，呢個亦係國際慣例。

51. 事實上，如果渣打或者金管去證實，固然就會發生恐慌。但如果否認，又變咗講大話。所以唯一做法，就係不予置評。不承認也不否認。

52. 好啦，呢個系列萬幾字，應該叫做完—　之後係下半場—唔講呢啲技術嘢，又係我教你思考，教你明辨是非，識分好嘢同垃圾，以及我會狂批（兼笑）啲廢柴KOL同佢地嘅觀眾

53. 不過，記住心存感恩　—　冇呢啲人，大家在股票市場上唔會有得贏錢。記住，多數人，就多數係錯嘅。係有呢啲人高買低沽，你先可以安享晚年。記住感謝佢地。