［極長篇專題］(６/７)：戲肉-當年點解我會搞到借貼現窗，然後渣打又做乜會借貼現窗 (Patreon)

今篇真係戲肉：講下我點玩到招行借貼現窗，渣打又做乜玩到借

但其實大唔大件事？在老細層面小小，但在體系層面，好閒

我做咗兩年拆借，都多年後先明套嘢點運作。啲廢柴KOL當然更唔會明

解晒咁多，你應該知道一間銀行咩情況下要用到貼現窗

最簡單：計錯數。咁睇你兩點發現，定四點發現。睇你係德意志，定招商

又或者，你個客真係無啦啦話走舊大錢，幾貴息都畀。

仲有一種情況：你冇計錯數，對家計錯數

你畀唔到我，我就畀唔到人，就連環炒車架啦！

蹺起人間銀行呢？冇後果架？當然有！所以渣打根本唔使畀錢

渣打在貼現窗借31億，其實即係幾錢？50萬息咯（況且唔使自己畀）

順帶一提，31億　X 0.0575 / 365，我係心算計嘅

今篇真係戲肉：講下我點玩到招行借貼現窗，渣打又做乜玩到借

1. 今篇真係入戲肉啦喎，講下當時我點解玩到自己銀行借貼現窗（短答案：冇錢，兼做錯嘢）。亦都睇埋，點解渣打會搞到借貼現窗（答案：根本好閒）

2. 繼續個系列，第一篇同你講咗結論先，銀行真係「冇錢」，所以借貼現窗，但冇事嘅。第二篇我解你知，銀行點解成日都「冇錢」，因為多餘嘅錢等於蝕息。第三篇，具體睇下銀行有幾「冇錢」。第四篇講咗銀行拆借嘅生態，net lender net borrower．上一篇（第五）入直路，畀你睇到 net lender想放晒啲錢，net borrower又只係想剛剛夠錢，所以「潛烏龜」，German Bridge，你發現最後，所有銀行加埋個net balance，係好細的

3. 所有銀行嘅net balance，就係你平時見到嘅「銀行體系結餘」。你見到，真係可以好細嘅，2000億跌到400億都得。然後再講一次，香港嘅總存款，講緊7.6萬億。你見銀行體系結餘，同總存款相比，極之細，甚至可以話唔係好關事。

4. 但當然了，去到400億，甚至再跌，咁銀行間嘅「現水」就會緊，啲拆息就會再升。咁就理論上應該有誘因啲人會借美金換做港紙嘅。其實一路都係呢個機制。真係咁難明？只係你聽啲人妖言惑眾混淆視線，將啲根本唔關事嘅嘢放埋一齊，以為「銀行體系結餘跌」即係「銀行冇錢」。或者以為銀行「冇錢要借貼現窗」即係會爆煲。　我講過了，甚麼叫「冇錢」甚麼叫「走資」，你有冇認真諗？渣打，就真係「冇錢」所以要借貼現窗。我都因為「冇錢」之前用IB拎錢，但你覺得我就快破產？

但其實大唔大件事？在老細層面小小，但在體系層面，好閒

5. 戲肉啦喎，講下我當時做乜玩到招行借貼現窗。渣打又做乜玩到借貼現窗。大唔大件事？睇你點睇。「在老細層面有少少大件事」，但在體系層面，根本好閒。

6. 上篇文同大家講過下我做拆借時做乜，聽落好似幾有趣幾型，真係一個好好玩嘅行業。其實真係，可惜好多嘢我係後來先知。嗰時係知其然而不知其所然，日日返工做拆借，但都唔知為乜。因為嗰時完全唔理解成套嘢點運作。

7. 所以，好難怪你嗰啲銀行都未返過嘅KOL，會理解錯晒。以我咁嘅質，嗰時日日做，都要幾年後先知套嘢點運作喎，何況佢地？—問題唔係佢地唔識，而係佢唔識又要講嚟誤導你

8. 同樣地，你最初唔明就好正常，但睇完我解應該明。呢啲嘢並唔係特別深，但現代社會嘅分工分到咁細，你唔係做呢行嘅往往就唔明，亦冇必要明。但重點一定係：你辦別垃圾同好嘢嘅能力，你知道應該睇咩人講

我做咗兩年拆借，都多年後先明套嘢點運作。啲廢柴KOL當然更唔會明

9. 而家你知晒成套嘢運作，咁根本啲問題，就好易答了。

10. 乜嘢情況會用貼現窗？好簡單，就係銀行莫財！仲要係莫到臨尾三四點先發現，而又甚至不能，或唔想問同業借。點解不能？例如你係當年嘅招商，冇乜人信你，冇人會借錢畀你。點不為？例如太貴（記住呢句！）

11. 好啦，預告時都講過，我係用過貼現窗嘅。好似畀老細鬧，但我都唔知事態嚴重，一來罰息，二來好似要寫報告解釋，同埋用得太多金管局一定唔高興　—　否則我係BNP，我日日當金管局係「金主」，日日問佢借貼現窗去發輪，仲得了？（亦因為咁，貼現窗嘅息會貴）

12. 於是乎，你聽咗咁多，真係可以諗下，一間銀行有乜情況會搞到借貼現窗？

解晒咁多，你應該知道一間銀行咩情況下要用到貼現窗

13. 我畀幾個情況你。第一，最簡單，個交易員計錯數，或者做錯嘢！呢個亦係我嗰時嘅情況。例如點？例如係，三點鐘有同事打畀我，「喂老細，我地個數仲負緊百幾億喎，你仲咁得閒食西多？」「吓？做乜負百幾億？」「XX今日存款到期拎錢嘛」「吓？唔係話續咩？」（or 「下？唔係下星期一咩？」）「續你條命，走咗錢啦，睇返上星期五個email，提定你，自己執生，拜拜」

14. 呢啲，就係當時嘅真實對話。順手講埋，打畀我嘅就係做「Operations」嘅同事，佢地就睇到銀行到底有幾多「錢」。其實我都應該係睇到嘅，但個系統太複雜唔係好識睇，亦懶去學，「就搞出事」

15. 咁你想像到，呢啲嘢，係真係會發生的。咁點？你咪屎淋尿賴咁，在個市場上面借。但，頭先講過，係冇乜人借錢畀招商嘅。咁就睇你造化啦，事實上亦唔止試過一次。

最簡單：計錯數。咁睇你兩點發現，定四點發現。睇你係德意志，定招商

16. 咁睇下你係兩點半發現計錯數，定四點先發現，越早發現當然越好—不過一般出面同事發現負數都唔會好早提你：因為，點知你係咪特登留到最尾先借返錢？佢唔敢干涉你嘅trade嘛

17. 仲有，睇你個缺口有幾大，細細地易搞，好大嘅當然大件事。當然，我話招商「冇乜人」肯借錢啫，唔係完全冇，咪其他中資銀行。咁所以，你亦好睇佢啲錢放晒出街未，未嘅幫下你（當然息照收，甚至更貴，你求人嘛）。亦睇佢收工未，你四點半先發現，條友落咗去食西多了。

18. 不幸地，呢啲嘢，在我做嗰時，真係唔止一次。拿，有次仲大件事，玩到點？玩到香港啲友都閃晒。但最後點？外國勢力！最後嗰次，誰人救我一命？韓國人！嗰次係中國銀行漢城分行（甚至仍未叫首爾嘅年代），so happen有啲港紙（或者計過數有得賺我，特登走去拎美金甚至韓圜換港紙），就打救我地。點解係漢城？唔知，明明佢地仲晏啲，可能韓國人唔放工。

19. 然後我最想你留意嘅係：招商當時一直係一間net lender，但一樣會搞到「冇錢」。再講一次，「冇錢」有唔同嘅意思，我月尾都耐唔耐「冇錢」。

20. 你心諗，嘩，咁鬼化學嘅？但又兩睇，咁你見，即使我搞到好似咁鬼化學，但有冇搞到咩出現過問題？係冇的。

又或者，你個客真係無啦啦話走舊大錢，幾貴息都畀。

21. 有冇啲冇咁騎呢嘅情況？亦可能係，你個客真係忽然話要走錢。唔得呀救命呀等唔到聽日呀，罰息就罰息，甚至係佢話「我唔會罰息，我同你老細講，你照做得了」，咁到時老細話做咗先，你都只會照做。咁呢啲情況，都係會發生嘅。雖然因為個客走錢搞到去貼現窗，應該係……「唔得嘅」。照計不能咁同金管局解釋。可能係「我地個Dealer新嚟嘅佢計錯數」（即係我嘅情況），會比較易解釋

仲有一種情況：你冇計錯數，對家計錯數

22. 仲有一種情況，唔係你計錯數，係對家計錯數！即係點？咪話會有個Excel，我今日知道有舊之前拆出去嘅錢到期，會返，咁我就當佢會返架啦　—　但，佢唔返，咪大鑊咯。其實同你出糧供樓差不多，你預31號出糧，1號供樓。公司忽然間話遲兩日先出喎，咁就搞到你好麻煩了。「但我總冇可能個個月留幾皮嘢喺度預你會遲出糧嘛」「準時出糧係老細責任嘛大佬」（認真，遲兩日出，肯定唔犯法，但你都會狂媽公司）

23. 同業會唔會發生咁嘅情況？係會的！我諗住到期收返佢舊錢，但佢還唔到喎。唔知做乜，可能佢計錯數定乜，總之佢嗰邊出唔到數過嚟，打去媽佢地都唔出數，咁吹唔脹架喎，唔通你拎支槍過對家Office？

24. 咁會有乜後果？你想像到，就世界大亂啦。因為你還唔到畀我，我又還唔到畀人，人地又還唔到畀佢其他人。連環炒車。是真的

你畀唔到我，我就畀唔到人，就連環炒車架啦！

25. 呢度順帶再講，特別留意，都話潛烏龜，成個結餘好細，係真係預到「好炆水」，放嘅放晒出街，借嘅僅僅借畀自己需要嘅多少少。點解？咪講咗，因為利息。好啦，所以，係冇buffer嘅！

26. 江湖傳聞（信報寫的，應該係真），渣打就係咁嘅情況。就係對家蹺起咗佢，甚至可能四點先蹺起（馬後炮講，其實兩三點見對家冇動靜，應該有人去催）。咁渣打點？咪可能屎淋尿賴咁要在市場借錢。但可能銀碼太大，可能時間太趕，可能其他原因。咁，咪搞到去金管局度敲門。

27. 其實係咪好大件事？唔係好大件事。耐唔耐都有。不過你話，嘩，咁化學嘅？係架。點解唔預多啲buffer，咪講咗！利息呀！我不能放幾百億現金白蝕息。

28. 順帶一講，所以你見到，點解銀行真係出事呢，都真係可以好麻煩，點解會火燒連環船。亦因為，真係冇乜buffer．點解遇到咁抆？唔好再問！

29. 而同時間，金管局或聯儲局呢啲last resort，就係守尾門。但佢地一定不能鼓勵你去做，因為moral hazard，你冇乜代價，你就日日去滾搞佢了。所以會貴息，同埋會照肺（應該係）

蹺起人間銀行呢？冇後果架？當然有！所以渣打根本唔使畀錢

30. 仲有人會問，嘩，咁蹺起人嗰間銀行呢？全無後果架？世界係唔會咁嘅。嗰間銀行，會唔會畀渣打黑名單，我就唔敢講。老細會唔會要去請渣打老細食飯，都可能要。不過可以肯定嘅係：渣打借貼現窗嘅息，全部由呢間銀行畀返，梗係啦，你蹺起我喎。唔止，另外仲要罰息，梗係啦，我要畀人照肺喎，我啲同事搞到一頭煙喎。

渣打在貼現窗借31億，其實即係幾錢？50萬息咯（況且唔使自己畀）

31. 去到呢度，同你計下數，其實，講緊幾多錢？

32. 江湖傳聞渣打借咗金管局31億港紙。首先，31億唔係多錢，但都話大家預到好炆水，成個銀行體系結餘先400億。另外，我地睇睇呢個所謂嘅「貴息」，即係幾錢？31億　X 0.0575 / 365 （梗係要除365，小學數學）。即係50萬。

33. 聽落甘甘地，但其實，都真係細數。人地間公司，一年出花紅都100億港紙呀小朋友。同埋實務上，唔使渣打畀嘛，仲有得罰人添。

順帶一提，31億　X 0.0575 / 365，我係心算計嘅

34. 順帶一提，31億　X 0.0575 / 365，我係心算計嘅！唔係演嘢我數學叻（我數學叻但心算唔叻），而係想話你知：係我當時工作必然有嘅技能。其實好簡單，一早背咗（呢個不能心算），1億 1厘 1日，大約係2700蚊息（1億 X 0.01 /365）。咁所以，30億1厘1日，就大約係8萬蚊（實際上係82000）。30億 5.75% 1日（當6厘，大約），咪就係48萬！（實數係49萬）

35. 勁唔勁？但再講一次，唔關數學或心算事。係想話你知，我係真係做呢啲嘢出身嘅。然後你信啲垃圾KOL？

36. 31億嘅貼現窗，對渣打嚟講，係咪大數？當然唔係。係啲窮酸網友先以為好大件事。對渣打嚟講，雞碎咁多，又唔係冇咗31億。

37. 渣打香港其實有幾大？大過恒生些少。恒生17000億資產，渣打香港25000億。但留意，係講資產咋下，你計股東權益，真係差不多，亦可以話渣打係進取啲，槓杆做得更盡。

38. 無論如何，渣打6月30日嘅現水及中央銀行結餘，870億（出奇地多），同業拆借750億。固然只係其中一日，但你大約想像到，人地啲規模有幾大，拆出街未收返都750億—咁31億，真係其中一單，或幾單啦

39. FYI，上面都有講，當年我在招商，做嗰啲拆借，大約係1億起跳—5000萬都做到，但即係中介人會同你講「咁細呀，幫你搵搵先」，亦可能對家要壓價，同你賣碎股一樣。嗰時一日拆出街嘅，可能幾十億港紙？但，我講嘅係2004年嘅事，仲要招商香港。而家係2023年，印咗咁多錢，渣打又係大行。我估佢地一日拆借，點都幾百甚至上千億港紙。如果有行家知道，可以話我知。

40. 留意，上面我講嘅數，都只係渣打香港。如果成間渣打咁計，更大。缺錢，都唔係缺嗰31億啦，多兩個零差不多。都話人地出花紅一年都100億。