美國CPI，中移動　阿里巴巴　佐丹奴領展　—兼繼續［極長篇專題］(５/７)：拆借市場生態，到底當時我返工做啲乜 (Patreon)

美國CPI，反彈喎，點算？但，9月唔會加息了。咁但點解債息又升？

快講：中移動派息升10%，阿里巴巴業績強，佐丹奴仲強，領展CEO減持

因為有net lender 有net borrower，所以成堆銀行，夾埋結餘可以好細

所以點解香港存款有7.6萬億，但銀行結餘只係400億都得 —再少都得

講下「拆借」係咩回事，aka 2004-2006年我返工做乜

我間行雖然細，但係一間有deposit base嘅銀行

我當年做嘅嘢，就係放晒啲錢出去　—　但要分配長短

潛烏龜，或者German Bridge嘅比喻：龜得一隻，就係銀行體系結餘

拆借市場四點幾收皮，去到三四點，就年宵賣桔咁

lender唔想留過多，borrower唔想借太多，成個net balance應該係好細

我覺得呢篇開始，講拆借就應該好清楚了，因為我會話你知我2004-2006年返工到底有乜做。唔係咩好巴閉嘅工作（咪講咗我得12500人工，後來扭計先加到18500—但我04年中學教書都兩皮頭啦）

1. 個貼現窗/拆借/銀行體系結餘系列，已經寫晒。不過會連載到第7篇，而唔係原本嘅6篇。因為，中途你見我會加插講市況，今日呢篇都會，咁費事啲文寫到極長

美國CPI，反彈喎，點算？但，9月唔會加息了。咁但點解債息又升？

2. 首先，之前講過留意美國CPI數字，昨晚出咗。整體嚟講，都係靚仔嘅。固然你會話個headline inflation回升，按年升3.2%，上次係3%，咁但始終整體都係低過預期（3.3%）。另外，個核心CPI，按年升4.7%，同預期一樣，而上次係4.8%。

3. 咁你睇CME，會見到9月20日嗰次會，照計唔會加息。呢個亦係聯儲局放風嘅訊息。但你睇CME 11同12月嘅數字，依然仲有人覺得會加息。唔係太多，但唔算冇。另一方面，今年減息，照計冇乜機會。

4. 咁所以，你見到美股表現都飄忽，高位蒸發400點升幅。同時間，債息都仲上返去。

5. 雖然大方向都係不變，不過你可以話，個風險可能真係嚟自仲有息加，等極都未真係停，停下加下。唔係大概率事件，但值得留意下。特別你見呢排啲油價糧價有啲反彈咁，經濟又依然強勁。咁再加上，一路都話美股貴，所以你見呢排都係高位徘徊咁

快講：中移動派息升10%，阿里巴巴業績強，佐丹奴仲強，領展CEO減持

6. 香港嘅，其實好多有趣嘅東西。首先係中移動，中期息加一成添呀！但亦因為賺多咗8.4%，所以唔似電盈咁牙煙。公司話有信心今年純利新高添呀（說好了的經濟玩完）。不過你可以留意下，利潤創新高都好，似乎股價同新高有好大距離　—　你可以諗下點解，以前寫內銀講過，有機會再詳細解。第二，賺太多錢呢……以中國嘅國情，就往往唔係好事，可能又搞「提速降價」（不過留意始終派息派返畀政府，所以實會就住嘅）

7. 呢隻我個個月有供，今年表現幾好。咁但當然了，「之荝你又唔買」？而家都仲OK嘅

8. 另外，阿里巴巴，業績相當唔錯（說好了的經濟玩完）。美股股價都OK

9. 最有趣嘅，應該係佐丹奴（709），業績勁強，股價勁強，4年新高，真係說好了的零售業玩完。但當然，你可以話啲香港人窮到只能買佐丹奴，正如雖然LV好賣你都可以話啲人對前景冇信心提前消費，任你講。但股價唔呃你。以前寫過呢隻佐丹奴，走寶了。咁香港都仲係有啲可以賺錢嘅股票　—　只不過個難度真係比較高。另外，你可以留意下，之前咪話周大福想全購，嗰時亦係講到公司死梗啦，姓鄭嘅大發慈悲畀機會你走　—　而家睇返，你應該明白乜事。

10. 最後係領展，CEO減持，就的確令人有啲不必要嘅聯想。雖然首先，我到而家都唔明啲人點解要同佢估股價去相比，係冇意義的。另外，其實呢，當時馬化騰不停減持，騰訊都仲係一路有得升。OK，近年當然跌返好多，但你見佢2005年都有沽…..你睇下而家升咗幾多倍？所以，信你自己，好過信其他人。

11. 繼續個系列，第一篇同你講咗結論先，銀行真係「冇錢」，所以借貼現窗，但冇事嘅。第二篇我解你知，銀行點解成日都「冇錢」，因為多餘嘅錢等於蝕息。第三篇，具體睇下銀行有幾「冇錢」。上一篇（第四篇）講咗銀行拆借嘅生態，一堆多錢剩嘅net lender（例如恒生，同埋我舊公司招行香港），另一邊係一堆長期負數，日日借隔夜錢嘅歐洲行

因為有net lender 有net borrower，所以成堆銀行，夾埋結餘可以好細

12. 咁你諗到，就全香港得四間銀行，恒生招商，瑞信德銀咁。可能朝早嘅現水水平，係恒生+250億，招商+100億，德銀-100億，瑞信-200億咁。我想說明一樣好重要嘅嘢：每間銀行「本身」嘅數可能好大，但net埋晒，可以好細。例如我呢個假想情況，四間銀行夾埋先50億，呢個就係「銀行體系結餘」。而實際上其實會點？我係恒生，根本唔會想keep咁多錢。咁可以點？借出街啦，買債券啦，甚至轉做美金啦，乜都好。實際上，玩到恒生+210億+205億都仲得　—　然後你發現，雖然間間都講幾百億，但個「銀行體系結餘」可以得10億5億。

13. 我嘅比喻係「潛烏龜」，之後會解。雖然我後來發現，更貼切應該係所謂嘅「德國橋牌」German Bridge—不過應該唔係太多人玩過，所以都係講「潛烏龜」

所以點解香港存款有7.6萬億，但銀行結餘只係400億都得 —再少都得

14. 呢個亦都大約解釋到，點解你見香港總存款講緊7.6萬億港紙，但個銀行體系結餘可以得400億咁少。係兩回事嚟的。其實要再少都得，但當然，你個結餘越細，咁上面嗰啲拆借嘅遊戲，「定價權」就會傾向net lender，因為利息就係price of money，缺水的話，利息固然貴。所以，正係點解而家你見到拆息高。但，係一個好似「恒溫器」咁嘅機制，到啲息夠高，啲銀行又會有誘因變返多啲港紙出嚟。點變？例如將啲美金轉做港紙。

15. 你再睇落去之前，最好理解下上面嘅嘢：再講一次，個「銀行體系結餘」唔係「存款有幾多錢」「外資有幾多錢」「政府有幾多錢」「銀行有幾多錢」—就只係佢地呢個net lender net borrower嘅遊戲， net 晒後有幾多錢剩—理論上去到好細都得（但啲拆息會夾到好高）

講下「拆借」係咩回事，aka 2004-2006年我返工做乜

16. 了解成個生態後，真係可以同你解，到底「拆借」係咩回事。好簡單，就係啲歐洲行，日日都冇錢，咪日日都借隔夜錢咁「吊命」。借唔到點算？「畀貴啲咯」，真係借唔到？都總有其他方法嘅，叫總行借咯，甚至借歐元借美金嚟香港轉做港紙，不過有「匯率風險」，多數情況唔會咁玩（但其實佢地可以做「互換」，即係協議定之後又換返，類似早排係咁講咩人民幣爆煲嗰啲嘢，根本冇乜新奇）

17. 當時，2004年，我在招商銀行做，招商當然係一個net lender　—　主要因為嗰時其他銀行真係識你老鼠（而家都可能係），市場上，冇乜人會肯放錢畀招商的（除咗中資自己友），有啲根本想借都借唔到，因為唔在個「名單」上—你想像到都要有個名單，要啲大粒佬去傾，打招呼，再上啲文件畀人批咁，總不能有一日有間未聽過嘅智利銀行想我放錢畀佢我又放—點知佢係咪流嘢？咁同時，招商都有好大嘅deposit base—但佢地冇分行，得間樓上寫字樓。啲存款，當然係幾間中資企業（話埋你知：招商系自己嘅公司，上實系，光大系，仲有甚麼深發展深控股—圍威喂自己友？當然。但講真，你見日本韓國都係咁玩法）

我間行雖然細，但係一間有deposit base嘅銀行

18. 咁冇問題的，招商做嘅嘢，咪就係拎呢啲客嘅存款，借出街！有時係跑業務嘅同事，傾到個客借幾十億，咁咪畀啲錢佢。但更多時，又未有人借錢，咁舊錢放在招商自己度，有乜做？當然係放出街（再講一次，銀行好憎現金）

19. 嗰時我做Treasury（俗稱炒房，但其實叫「資金部」貼切啲，官方亦係呢個名），每日做嘅嘢，就係將啲錢拆出街。點拆？同你地古代買股票差不多，有經紀，經電話（但唔使真係打，對講機嚟的，叫入去得了），放Bid ask咁。例如　3.5 – 3.55，咁放咗落去，之後就可能有對家會同你deal，即係問你借錢。你咪借畀佢（當然，要在你名單先得，例如忽然整間智利銀行就不成了）

20. 放幾長？冇定！一般越長越貴息（但唔係任何情況下都係，同以前寫過嘅債息倒掛有啲似，但唔係同一樣嘢）。

我當年做嘅嘢，就係放晒啲錢出去　—　但要分配長短

21. 但，如果我放晒長錢，全部12個月。「然後聽日忽然有個客話個定期存款唔續啦，下星期拎錢走」，咁咪跳樓咯！（留意，冇人會咁易放錢畀招商）。

22. 所以，實務上我地當然會整個Excel，睇晒邊日有邊啲錢要出（例如以上講，有個客嘅定期唔續），有邊啲錢返嚟（例如有個客到期還錢），咁樣去玩。咁你亦估到了，因為咁原因，你個客不可能話「我個定存12月到期但我等錢用我想聽日拎」，一定要好早通知，仲會再罰你息。因為，「銀行真係冇錢架！」。招商嘅情況，我甚至好難在街度借舊錢去應付呢個客定存到期拎錢走（我甚至唔講要幾貴息）。但我亦冇可能長期留住啲錢，「以防佢忽然提款」。

23. 見到了，銀行就係一個咁嘅莫財遊戲，在net lender嘅perspective係咁．當然，理論上如果提款機啲錢提晒，要refill，可能都會有公司同事嚟問本部門拎錢。咁但嗰啲唔會好多錢嘅，好似冇試過（花邊一則：話說我地係強制在招商自己嘅戶口出糧，所以一到出糧日，就個個在公司部機排隊拎錢出嚟）

潛烏龜，或者German Bridge嘅比喻：龜得一隻，就係銀行體系結餘

24. 好啦，見到在我招商嘅立場，點樣盡量去「放晒啲錢出街」。但另外想講多樣嘢，我一路都唔係好識表達，但我就係諗起「潛烏龜」（希望你玩過）。重點係乜？隻「龜」得一隻。但留意，個個手上嘅牌，夠一對嘅咪併埋掉走。但之後嗰步係乜？就係你抽我我抽你嘛。咁留意，大家手上可能每日仲有六七隻牌，四條友可能總共廿幾三十隻，但，最後全部會併埋一對，因為「烏龜」得一隻。

25. 我知呢個比喻有啲怪，但我由十幾年前已經係咁諗。想講嘅係，銀行體系結餘，就係隻烏龜。平時各大銀行嘅錢，你拆我我借你，就係啲牌抽嚟抽去。

26. 即係乜？具體啲。BNP可能嗰日資金缺口係200億，咁佢自然會想借200億，佢不能借少（否則佢點找數？），但亦唔會想借多好多，因為要畀息。但同樣地，在招商嘅立場，又係掉轉，我有錢梗係想隊晒出街。

27. 好神奇地，每日係咁啱大家fit晒，真係剩好少錢。剩低啲尾數，冇人要，啲散紙，就去咗「銀行體系結餘」。你話，唔會有人要嘅咩？畀幾秒你諗下呢個問題嘅答案。

28. 答案：你夠平咪有人要！供求定律呀。

拆借市場四點幾收皮，去到三四點，就年宵賣桔咁

29. 實際上就係咁，拆借市場四點幾收皮（好多年前了，唔記得時間）。去到三四點呢，就真係年宵收檔賣桔咁，大減價。記住，個大原則係，「我唔想留低啲錢」，最初可能3厘，之後得2厘（冇人肯借嘛），1厘，半厘我都放出街—原因？三個字：好過冇！

30. 可能你會問，但人地都冇用，平一平都要成本嘛，冇用嘅借嚟做乜。係。咁點解總有人借？好多原因。例如可能有啲友，根本係等錢使，但「掩飾」得好，兩點前唔出手，扮唔等錢用，然後到三四點先執你呢啲死雞，慳返（亦即係啲友九點去買壽司！其實幾似，因為壽司舖平一平都賣出去，好過冇）

31. 亦有可能，佢夠平借到，佢咪轉返咗美金歐元返返總行，夜晚再第度拆出街都仲得，或者畀總行用都得，大把玩法。

32. 當然，如果嗰期係市場水緊，就會變咗三點幾啲人搶錢了，「speed dating見到劉鳴煒咁」

33. 另外，你見到了，最後嘅結局，就係net lender盡量清晒啲錢出街。但net borrower又唔會想over-borrow，所以一般真係夾到啱啱好。Net lender 只係會剩少少錢，net borrower只會係畀佢需要嘅借多咗少少（然後，你銀碼太細嗰啲，幾千萬嘅，冇人同你癲啦，自己食咗佢。基本上我年代都係5000萬港紙起跳，留意廿年前，我估而家一定係幾億幾億咁拆）

net lender唔想留過多，net borrower唔想借太多，所以成個net balance應該係好細好細

34. 所以，點解銀行體系結餘咁少錢？就係因為上面嘅機制！細心思考一下。但大原則：net lender唔想留過多，net borrower唔想借太多，所以成個net balance應該係好細好細。實際上點做到？係通過價格！

35. 順手答埋你，銀行畀你提晒啲現鈔，有乜事發生？好簡單，你咪等聽日，或後日。銀行邊度有錢返嚟？呢啲拆借啲錢返嚟，咪會有錢。「要等幾耐」？咁上面寫咗了，我總唔會全部錢拆晒1年出街（會畀老細媽，甚至炒，事實亦有一定規定）。

36. 大原則都係，總係分散（記住你投資都係！），聽日有啲，下星期有啲，一個月三個月半年一半全部有啲。當然實際上點分配，可以睇好多嘢。例如乜？例如你下個月有冇啲客要走錢，有冇loan要提。又或者，視乎你個交易員（即係我）點去賭個息口。你平時見啲HIBOR LIBOR，就係咁嚟。冇錯，市場會price in，大家預期三個月內加兩次息，咁三個月啲拆息就會高一截。但，如果我獨具慧眼，覺得「你班友都低能，邊會仲有得加」，咁我就會放晒啲錢出去，鎖定呢個息，「到時唔加息我咪著數」。相反，如果我覺得，「邊止加兩次呀，加四次呀」，咁我就老死都唔放錢出街住，留住，等到時啲友如夢初醒，息口扯高晒，到時我先拆出去。

37. 所以你明白點解叫炒房。Dealer，即係做我個位嘅人，夠勁嘅，係可以拎呢啲嘢嚟炒，睇你估息口有幾準。

之後我就會講，到底玩乜我會玩到借貼現窗。但真係，呢啲東西，有幾多人真係做過？你想像下，啲人真係完全唔識的