意大利股，兼繼續［極長篇專題］(4/6) - 恒生拆咗640億 畀同業，如果呢啲錢留在現水，一年收少26億息，一日輸700萬。所以，銀行長期冇錢的。另外，恒生長期水浸，我舊公司都係，但有英雄就有惡魔，有凹就有凸，有啲銀行，就長期都問同業借錢嘅。微妙嘅平衡 (Patreon)

意大利股project，咪即係垃圾股project（好少少啦）

明明埃汾話唔好買咁多個股，唔好見啲古靈精怪人甩拖就飛身入去

所以我買嘅係意大利ETF，而且只係買3萬

如果意大利經濟唔得呢？如果之後又繼續抽呢？

講到尾，都係我港股美股外分散嘅一部份，又有故事講

如果只係講錢，根本就應該全部買指數ETF。但點解我仲要買個股？

長期有錢剩嘅銀行，當然留越少錢越好，但又不能不留。咁留幾多？

留得太少錢，咁啱嗰日好多人提款，提晒，咁會點？怕且唔會執

但銀行嘅「現金」，真係用晒，咁點？冇錯係「印」，但冇得篤手指嘛。

HIBOR點定出嚟？實則冇人定。市場機制，睇下嗰日多人放錢定借錢

恒生嘅現水＋中央銀行結餘，先90億。但拆借出街640億—幾多利息？

留在現水，等於公司一年收少26億息，一日輸700萬。你話得唔得？

有英雄就有壞蛋，有凹就有凸，有S就有M，有啲行水浸，有啲行莫財

歐洲行多數係net borrower，但，借咁多港紙做乜？

再講一次，銀行唔會同你對賭中移動，梗係買晒貨打底。公字佢都贏

1. 今日呢篇會長，因為仲要拎一千字講下埃汾買意大利股（其實冇乜好講，但你好奇嘅我咪解你知）

意大利股project，咪即係垃圾股project（好少少啦）

2. 但一句，同我當年嘅「垃圾倉」「垃圾股」計劃差不多（又，咁啱又係3萬港紙）。有興趣睇嘅，而家講。冇興趣嘅，跳到後面我繼續講，銀行系統，貼現窗，拆借等等。

3. 昨日話買意大利股，Patreon都有人問。但我就講真廢事貼篇文在呢度，一來多粗口，二來多廢話，三來唔想打亂成個系列嘅連載。但你想睇嘅，Facebook Post 在呢度。一句講完嘅，因為收暴利稅，意大利銀行大跌，我覺得跌多咗，所以買

4. 話說回頭，你想求知嘅，又值得去睇。重點唔係你要去買意大利股，但你可以望下我大約「分析」嘅框架，點樣去理解一件事。

明明埃汾話唔好買咁多個股，唔好見啲古靈精怪人甩拖就飛身入去

5. 但嚟啦喎，一般我都同你講，之前你唔識同埋唔係有興趣買嘅，最好唔好只係因為佢跌咗而飛入去，以前講過「甩拖理論」，求其一個甩咗拖你又飛埋去咩。咁意大利銀行我當然識（本人做銀行股分析員），但從冇諗住買。所以今次，係咪少少違反咗上面講嘅嘢？答案：係。係咪違反咗我話買返多啲ETF嘅講法，都好似係。

6. 於是兩樣嘢。首先你見到，我買嘅唔係任何一間意大利銀行。我甚至唔係買意大利銀行嘅ETF—因為根本冇（可能有，但不切實際）。我買嘅只係買返隻意大利ETF，iShares嗰隻，EWI，以前講環球ETF時提過（呢度送埋個Excel畀你）。有冇第隻？其實都冇。你會搵到隻FLIY，好以管理費低啲，但成交近乎冇，冇得玩。

所以我買嘅係意大利ETF，而且只係買3萬

7. 仲有，另一個重點，我只係買咗3萬蚊（開頭諗住買2萬），小小地，真係過下癮，刷下存在感。記住，我絶大多數嘢，都係大股，ETF。

8. 話說回頭，你要「質疑」呢個決定，可以有好多理由。冇咁好嘅理由，例如你同我討論意大利經濟　—　我就覺得無聊。鬼唔知經濟差，但經濟同股市從來都係兩回事（你見好多人唔明的）。意大利股市今年升幅拍得住美股，但明明經濟收縮。銀行股就升得特別勁添。所以，真係唔使同我討論意大利經濟。啲人就係以為要識睇，根本唔關事。

如果意大利經濟唔得呢？如果之後又繼續抽呢？

9. 我認為跌多咗，對盈利嘅影響只係一年，唔應該跌咁多。但當然你可以質疑，喂，此例一開，可能之後又嚟過，沒完沒了。有冇呢個可能？當然係有，肯定唔係講「打仗」之類咁細嘅可能。但，冇架喎，正係因為有呢種可能，先會跌得多。

10. 當然，另一個問題，我都有寫，啲意大利銀行股，其實升咗唔少。係咪抵買？真係答你唔到。

11. 所以你見，其實我係買意大利ETF。一路都話美股貴港股廢，咁搵啲嘢分散，咁啱又有呢啲消息，咁買意大利，都還OK，都係睇長線（你有幾可見我睇短線）。

講到尾，都係我港股美股外分散嘅一部份，又有故事講

12. 但當然重點兩個：首先，我只係買咗3萬蚊，佔我組合好少，講真聽日變晒零我會唔開心，但對我生活冇任何影響咁滯。

13. 另外，最高透明度，我都可以話你知，如果唔係我搞Facebook Page之類，我應該唔會買呢仕嘢。所有你見到嘅KOL，佢地做嘅買賣，唔多唔少亦有呢啲計算。

如果只係講錢，根本就應該全部買指數ETF。但點解我仲要買個股？

14. 所以之前都有人問，咁其實係咪應該全部指數ETF算？其實係。但講過了，你個人會悶死的。等於我叫你乜都戒晒齋食草，你嘅生命冇乜樂趣，亦都根本違反人性。所以接受自己嘅弱點，偶然放縱一下，買個股係過癮嘅，亦都學到嘢，好似食甜品咁。但分清莊閒，唔好食甜品多過正餐。正餐始終係指數ETF

15. 另外，如果我全部都係SPY 盈富基金 IDEV，怕且都好難有嘢在Facebook寫，在Patreon寫，呢個亦係一個考慮。但你唔係我，所以，你真係唔使跟我買呢隻EWI

16. 不過你想分散嘅，就真係可以IDEV或者EFA（已發展市場），再唔係就EMXC（新興市場走中國），或者你買印度ETF都冇話唔得，甚至日本（近排麻麻地）。但玩到去EWI，我覺得已經有啲太刁鑽。

17. 講完意大利呢部份

18. 繼續個系列，第一篇同你講咗結論先，銀行真係「冇錢」，所以借貼現窗，但冇事嘅。第二篇我解你知，銀行點解成日都「冇錢」，因為多餘嘅錢等於蝕息。上一篇，具體睇下銀行有幾「冇錢」。今次，就講下啲拆借市場點運作，因為我以前就真係在招商香港（嗰時好細，極細）做呢啲嘢。而因為細公司，好多嘢我都接觸到，亦都一腳踢。人工固然奀，但事後諗返，係極之好嘅經歷，有幾多公司可以放手畀個新仔接觸咁多嘢？早知再勤力啲學多啲嘢。

長期有錢剩嘅銀行，當然留越少錢越好，但又不能不留。咁留幾多？

19. 講返，在銀行，特別係招商呢啲有錢剩嘅銀行（有啲係長期缺水的，陣間解），你都睇到啦，最好梗係一個仙都唔留，但又要預留少少可能有人提款嘛。現金越少越好，但太少又唔得。實際上點知留幾多？「憑經驗」，「AI」，「大數據」，咁你總會知以前啲人提幾多錢，大約有數計。

20. 不過，數學常識話你知，例如你計咗99%情況都夠，「即係有1%情況會出現」（留意我不可能用到99.9%—留得太多現水咪蝕章）

留得太少錢，咁啱嗰日好多人提款，提晒，咁會點？怕且唔會執

21. 正如頭先講，如果真係有人發起，又有多人真係做，真係全部機嘅現金都提晒，咁會點？啲人可能去分行排。咁都提晒，咁會點？

22. 當然銀行唔會執笠，實務上呢，師傅教落，「咪開少啲counter，盡量拖延」。派籌，等啲人可以明天再嚟過。最好你畀佢睇住啲錢運入嚟，等佢有信心。

但銀行嘅「現金」，真係用晒，咁點？冇錯係「印」，但冇得篤手指嘛。

23. 咁但，真係提晒啲現鈔喎，咁點？即係我當恒生，嗰90億嘢，冇晒。咁邊度變出嚟？固然你話「印出嚟」，係嘅，但呢個只係個物理過程啫，我係恒生不能篤手指叫人印的嘛。

24. 問得簡單啲，即係個圖入面，最頂嗰90億消失咗，咁你總要填返些少。去邊填？

25. 個情況，其實好似我講自己咁。真係忽然要用錢，你點填？係沽股票丫，問埃汾太借呀，上網行乞丫，定點？

26. 你其實大約望到，成堆資產入面，有乜嘢夠快，又夠大？你係銀行，不太可能催個貸款客早啲還錢，更冇可能賣咗自己個寫字樓。

27. 可能嘅做法，例如有啲短債到期，咪有錢返，以前寫過，銀行投資債券啦，安排得好嘅，總會有啲係聽日，或未來幾日到期，就係應付呢啲情況。仲有，好常用到嘅，「同業拆借」，就係我地要講嘅正題（真係講咗好多基礎嘢先入正題）

28. 同業拆借在邊？見唔見貸款上面，有個640億嘅嘢？仲有留意，負債度，一樣有個同業存款33億。

29. 有乜分別？好簡單。恒生將啲錢放在荷蘭銀行（即係「拆錢畀佢，拆出」），就係恒生嘅資產。呢個同現金唔同，有息收，收嘅就係你成日聽嘅同業拆息，HIBOR．HIBOR點定出嚟？冇人定，交易出嚟，市場機制，好似股票咁之嘛。嗰日荷蘭銀行好等錢使嘅，咪開佢高啲。嗰日恒生水浸，放錢出街都冇要嘅，咪開低啲，夠平總有人借，就係咁一回事。

30. 甚至你想像到，如果果日忽然有個神秘大陸佬或中東佬存幾千億錢入某銀行（實際上冇咁易，反洗黑錢嘛），即時會推低晒個拆息，因為嗰間行要不停fair晒啲錢出街。相反，嗰日忽然有個客真係忽然拎一大舊錢（上千億），就會水緊　—　例如乜？例如，啲大公司派息！之後會講

HIBOR點定出嚟？實則冇人定。市場機制，睇下嗰日多人放錢定借錢

31. 實務上好似恒生去荷蘭銀行做定存之嘛，不過呢啲東西可以短至隔夜，最長亦不過一年（同你做定期幾似，不過一般真係冇得中間提早拎返，罰息都不能）。但如果掉轉，恒生在德意志銀行拆錢入嚟，就變咗係恒生嘅負債了，你遲下要還畀人嘛，當然要計息。

32. 同業拆借，大約就係咁回事。接下嚟我會試下比較詳細咁講。但講落去之前，又再提下你睇數字嘅銀碼。

33. 恒生嘅現水，先90億（包埋中央銀行結餘）。但拆出去未收返嘅錢，640億　—　見到冇？我盡量梗係寧願拆出街啦，有息收，點低都有啲（特別早幾年低息年代），放現水我一個仙都冇。留意，640億，我當而家大約4厘（其實唔止），一年係幾錢息？係25.6億！一日都700萬。

恒生嘅現水＋中央銀行結餘，先90億。但拆借出街640億—幾多利息？

34. 換個講法，呢舊錢我唔拆出街，有得佢放現水，等於公司一年拎少25.6億，好大件事。即使一日，都代表我幫公司倒米倒咗700萬。雖然恒生係間好大嘅銀行，但有條友或有個部門，日日幫公司白倒700萬落海，當然不能接受

留在現水，等於公司一年收少26億息，一日輸700萬。你話得唔得？

35. 有埋數字，係咪好具體知道，點解銀行咁憎現金？聽住呢句，好正：正係因為銀行太多錢！所以先要整到自己冇晒錢！因為現金冇息！即係如果我係中學生一個月兩千零用（其實而家幾多？），我唔會介意銀行剩低啲錢。但如果我個個月剩幾皮嘢，我就會諗放晒落股票。

36. 第二，留意，「同業拆借」可以係資產可以係負債，基本上同時出現。有啲行爭你錢，你又爭某啲行錢。但在恒生情況，640億係資產，33億係負債，即係人爭佢640億，人爭佢33億。

有英雄就有壞蛋，有凹就有凸，有S就有M，有啲行水浸，有啲行莫財

37. 呢個唔係偶然，唔止6月30日係咁，照計長期都係咁。正如招商都係。但，點解會係咁？另外留意，有英雄就有壞蛋，有凹就有凸，有S就有M（仲有L同XL），所以，有啲行，係長期都爭同業錢

38. 術語講，恒生係net lender，係拆錢出街嘅行。點解？好簡單，「錢多」。仔細啲講，因為佢deposit base夠大，多分行啦，歷史長啦，多企業客啦（建立咗關係嘛）。仲有，例如招商呢啲大陸行，當時在香港識你老鼠，冇乜同業會借錢畀佢地（除咗鄉里），亦要時間打招呼。正係因為咁，佢地會保守啲，因為驚太缺水時班唔到水。相反，嗰個年代（留意2008雷曼爆煲前），你係歐洲美國大行嘅，缺水都唔係咁驚，實有人借畀你。

39. 相反，有啲銀行係net borrower，長期係問同業借錢？有乜問題？其實係冇問題的，大家計掂數。例如邊啲？你都估到，冇乜deposit base嘅銀行。歐洲行就最多。例如甚麼法巴（BNP），德意志，甚至瑞信（在香港呀下，在瑞士人地梗係有deposit base）都會係　—　你有冇見法巴在香港開分行？

40. 你話，會唔會有啲係switch？「我一時係M一時係S」（唔明嘅讀者有得佢）。有時會，但多數時間都係壁壘分明。因為係結構性問題：歐洲行嘅，由第一日就冇諗住分行　搵企業存款，根本第一日已經係諗住長期靠借同業。咁佢一般唔會忽然多咗存款的（咁當然可能忽然間有日馬雲轉晒啲錢去BNP開戶口嘅）

41. 所以，真係一般一早有晒角色扮演，switch嘅，好少。不過預告定：「渣打就係早排忽然由net lender變咗net borrower」，就搞出貼現窗嗰壇嘢。

42. 上面講，歐洲行多數net borrower，因為在香港冇分行，亦唔想花時間慢慢搞。仲有個好處：起身起得快。忽然間意大利總部話摺埋香港，咪摺埋咯。如果你一堆分行，就麻煩好多，你總要留啲人看舖，又要炒人，又要搵人接手

歐洲行多數係net borrower，但，借咁多港紙做乜？

43. 有冇人問，歐洲行問同業拎埋咁多錢做乜？當然係自己搵錢。點搵？好簡單，例如有歐洲客借錢。又或者，更常見嘅，「出啲各式產品昆啲客」。例如乜？發輪，或者牛熊證，accumulator，乜乜掛勺存款，原理一樣。同好多人想像唔同，銀行自己唔會點坐盤買股票（特別係我地講緊普通銀行，唔係投資銀行）。

再講一次，銀行唔會同你對賭中移動，梗係買晒貨打底。公字佢都贏

44. 但，例如我係法巴，要發中移動輪，我點都要搵啲中移動返嚟，「對沖」。我唔會賭白頭片。呢個亦係好多人嘅誤解，以為法巴要睇好睇淡中移動，痴線啦，法巴條友，預測中移動股價走勢嘅能力，真係未必在一個普通散戶之上　—　咁對賭，銀行好蝕。等於我係何鴻燊，我點會坐落枱同你賭Poker？你叻過佢，有乜出奇？但佢知自己嘅優勢在邊。（大家聽過了，賭場係冇鐘嘅，亦都會不停有嘢食有嘢飲有娛樂，等你樂而忘返，因為時間在佢嗰邊，你長賭，佢食硬你）

45. 大家知了，銀行嘅做法，同賭場馬會一樣，當然係賺spread．我唔會同你賭白頭片的。銀行做足對沖，發咁多輪買返咁多正股（要計數），就食硬你。