講少少市況，兼繼續［極長篇專題］(3/6)，乜嘢係貼現窗？點解啲人忽然關心？點解忽然用咁多？點解渣打用？—銀行，有幾多現金？全香港呢？提唔提得晒？ (Patreon)

速評：中國出口遜預期，內房違約，美國銀行被下調評級。今晚買意大利股

銀行「冇錢」，所以借貼現窗。但點解成日「冇錢」？有幾「冇錢」？

恒生有幾多存款：11500億。「現水」呢？幾十億

留意銀行存款，好多都係定期，仲要係極大額

恒生幾十億現金，咁有幾多客？好似，一人幾千蚊咋。

實情，你真係100萬人，同時去拎2萬蚊都好，都唔會提爆間銀行嘅

恒生90億係「現金 + 中央銀行結餘」—就大約係「銀行體系結餘」

現金幾十億，銀行體系結餘幾十億，但1.7萬億資產，1.2萬億存款

「一人2萬提爆中銀」，其實你提緊乜？條數點計？

銀行體系結餘400億，香港每人6000　—　呢個係存款咩？

但你話，唔係喎，我真係提咗420億現金出嚟喎，咁邊度變出嚟？

其實呢，你未試過長假去到提款機冇錢襟咩？銀行會唔會爆煲？

冇錯，全部人去晒提款，銀行會唔掂　—　但SVB唔係因為美國散戶提爆

銀行體系結餘，每人6000。但存款？每人100萬

100萬人，每人提4萬，爆晒個銀行體系結餘　—　只係存款嘅0.5%

咁香港成個銀行體系，有幾多現金？都可以估下

教你計數，點估數係好重要的

幾個remark：睇財務報表嘅缺憾—會唔會只係年尾檔高個數？係會的

速評：中國出口遜預期，內房違約，美國銀行被下調評級。今晚買意大利股

1. 係繼續呢個超長篇，我明係有啲吃力或者有啲技術性有啲悶，但我應該已經盡力寫到唔悶。仲有，睇完一次，一勞永逸，唔使以後次次問。

2. 至於市況，都依然係冇乜特別。固然中國嘅出口數字差過預期，亦好可能代表今季啲經濟都麻麻地，另外亦見到可能再有內房要違約，但呢啲根本唔係重點。同埋反正亦唔係好多讀者買港股（雖然我都仲有買）。

3. 另外你見到美國一大堆銀行被下調評級，亦係美國被下調評級後好可能發生嘅嘢，但即使你睇KRE，都只係跌1%，小事。固然你可以無限推演，銀行融資成本升呀就會爆煲全球危機。但你應該知道呢啲講法嘅問題（特別係冇量化）。銀行危機？3月咪爆過一次勁。

4. 乜都唔係重點（我的確係咁諗），咁咩先重點？其實都係企業盈利，估值，情緒，同埋息口通脹呢啲嘢（又，小心啲呢幾個月嘅美國通脹數據）

5. 仲有，今晚會買意大利股，晏啲在Facebook Page/IG/Threads講。記得follow，今晚篇文先補充，我費事放篇意大利股上嚟，亦費事打亂「貼現窗」嘅連載

銀行「冇錢」，所以借貼現窗。但點解成日「冇錢」？有幾「冇錢」？

6. 講返今次呢個系列，第一篇同你講咗結論先，銀行真係「冇錢」，所以借貼現窗，但冇事嘅。第二篇我解你知，銀行點解成日都「冇錢」，因為多餘嘅錢等於蝕息。今次呢篇，具體睇下銀行有幾「冇錢」

7. 上次叫你估下，你去銀行提款，嗰啲現錢在邊度嚟。咁銀行有幾多現錢？

8. 不過你睇圖都見到（呢張圖你save低，雖然我會不停重貼），例如恒生，姑且唔好理個同業存款住。你見下面，11500億存款（留意總負債都只係15300億，絶大多數嘅負債，就係存款）。但睇上面，90億現金。「咁咪冇錢！」

恒生有幾多存款：11500億。「現水」呢？幾十億

9. 但你應該知答案，冇錯係有11500億存款，但，你唔會一次過所有人去拎晒出嚟嘛！仲有，例如你啲存款，轉去第間銀行，轉畀朋友，拎去交卡數，呢啲全部唔會涉及「現水」，記數啫。只有你去分行或提款機拎銀紙，先要有「現水」

留意銀行存款，好多都係定期，仲要係極大額

10. 況且，好多係定期（而家講緊一半，因為息高嘛）。唔止你地做嗰啲幾千萬，可能係企業做，幾億幾億嘅定期。唔會亦不能話拎就拎（真係要拎點算？陣間解）。全部一齊拎，咪會變SVB。但真係正常唔會的，特別香港

恒生幾十億現金，咁有幾多客？好似，一人幾千蚊咋。

11. 另一角度睇，恒生，就係得90億「現金」。恒生有幾多客？我真係唔知。況且你仲要計企業。但我當，100萬人咁？一人9000蚊，好似唔係好多。不過，首先你真係唔會同時去拎。另外，咁又同時會有人轉錢過嚟嘛。

實情，你真係100萬人，同時去拎2萬蚊都好，都唔會提爆間銀行嘅

12. 直接講，即使100萬人，同時去拎錢，拎2萬蚊都好（好似一日上限），都係唔會提爆間銀行嘅。因為呢啲現金可以不停變出嚟。點變？你睇下「資產」嗰度有啲其他乜東西可以變？之後開估

13. 實際上，銀行嘅「現金」，就大約係你理解佢地放在提款機嘅嘢。當然唔止啦，行分都會有，你可以櫃枱拎。仲有，實際上肯定冇90億現水（你可以問下專業人士一部提款機可以放幾多錢，然後數下香港有幾多部機，照計有數字）。因為上面有寫住，90億係計埋「中央結行之結存」。實情「現金」冇90億

恒生90億係「現金 + 中央銀行結餘」—就大約係「銀行體系結餘」

14. 你可以暫時唔理係乜，但，某程度上，呢啲就係「銀行體系結餘」之類嘅東西。係架，恒生可能得幾十億（大數90億嘛）。然後你諗下，好似都啱數。成個銀行體系結餘，而家400億多啲。咁恒生佔幾十億，聽落啱數（亦所以，點造假？買起晒所有咁多間銀行一齊造假？收買晒所有會計師所有經手嘅人？睇少啲垃圾KOL啦好心）

現金幾十億，銀行體系結餘幾十億，但1.7萬億資產，1.2萬億存款

15. 我想你再三再四留意，呢幾個數字。在恒生嚟講，現金+中央銀行結存得90億，你當每樣幾十億。但，恒生嘅資產，16900億，係「現金」嘅N倍。股東權益係1600億。存款係11500億。

16. 一大堆嘢無非話你知，首先，銀行高度槓杆，資產係股東權益10倍。仲有，「現金」（同中央銀行結存）佔好少。「銀行係好莫財的」。點解？咪話咗，現金一個仙息都冇，點解銀行會留現金？就只係預你提錢。其他嘅，盡量少！有咁少得咁少

17. 呢度亦可以再鞭屍一次，社運當時，好流行乜鬼「每日提2萬蚊 中銀好快爆煲」，甚至有人覺得可以「提爆」個銀行體系結餘。你有冇諗過，你提緊嘅係乜？呢啲亦係啲人不求甚解，將啲嘢亂咁放埋一齊嘅後果。

「一人2萬提爆中銀」，其實你提緊乜？條數點計？

18. 不如我同你計下數，香港而家銀行體系結餘400億左右啦（高位好似2000億，係跌咗八成，啲友又話「跌八成都話冇問題？」。但你睇真啲，樓下間銀行執笠未？）。當700萬人，即係每人6000蚊？請用你嘅常識，覺得香港人有冇咁少錢？我相信普通讀者銀行照計都唔止6000蚊（而家仲係月頭！），係埃汾先咁仙都唔仙。唔好忘記，都未計一大堆富豪同公司。

銀行體系結餘400億，香港每人6000　—　呢個係存款咩？

19. 另一個角度睇，「銀行體系結餘」真係好細的，因為呢舊嘢根本唔使大。但你點計都好，每個人得6000蚊，不可能啦。「然後啲人以為提走晒呢400億銀行體系結餘會清零」。你提嘅係存款，唔係「結餘」呀大佬。

20. 我可以話你知，即使真係700萬人去每人提6000蚊，或者100萬人去提42000（人數少啲總額不變，好似比較可行），對銀行體系結餘嘅影響係乜？答案：係零

21. 因為你提緊嘅，係自己嘅存款。

但你話，唔係喎，我真係提咗420億現金出嚟喎，咁邊度變出嚟？

22. 但你話，唔係喎，咁真係提咗銀紙出嚟喎。當我真係有100萬人，每人拎42000（姑且當可行，雖然實際上我估唔會有100萬人戶口有42000蚊），咁真係拎咗420億現鈔出嚟嘛。是的。

23. 銀行夠唔夠現鈔？唔知。但我估應該唔夠。恒生都係得幾十億。

其實呢，你未試過長假去到提款機冇錢襟咩？銀行會唔會爆煲？

24. 咁但，提爆會點？其實你應該試過，廿年前呢，仲未咁多無現金交易呢，師傅教落，放長假前去拎錢，甚至放之前幾日拎定。因為，你真係會見到提款機畀人拎晒。

25. 拎晒點？「咪拎晒咯」。我估你都試過。咁你會點？一係搵第二部。都冇呢？「咪返屋企」，明天請早（而家可以加埋上網出post講銀行爆煲）。即係，我冇見過因為你拎晒提款機啲錢，會令銀行執笠的！

冇錯，全部人去晒提款，銀行會唔掂　—　但SVB唔係因為美國散戶提爆

26. 銀行唔夠現鈔？咪之後再補。同埋可以印（都要少少時間）。但當然了，太多人去擠提，銀行會有問題，咪SVB。不過，so sad嘅係，銀行嘅存戶，主要都係大戶。SVB唔係因為啲網友去ATM拎晒啲現水而出問題，係因為啲大客拎錢走（話說回頭，因為科技先進，大客太易轉錢走，都係一個問題）（再話說回頭，SVB technically都冇提爆，啲美國存戶冇損失）

銀行體系結餘，每人6000。但存款？每人100萬

27. 講遠咗，但再強調一樣嘢。成個香港，銀行體系結餘，400億左右，人均（以下都用700萬人計），每人6000，明顯「太細」。總存款呢？（計晒港紙美金人民幣，同埋企業），7.6萬億港紙等值（BTW，說好了的走資，好心啦），計落，每人100萬，拿，咁就差唔多啦！你要提爆？搵幾百萬人每人提100萬啦，但當然冇咁多人有100萬存款（我都冇，1萬都冇），因為多數存款都係富豪同埋企業

28. 有人質疑金管局做假，咁我再反問多次，間間銀行都有出數，由唔同嘅會計師做，好多人經手。可以全世界呃晒？個個老婆畀人捉晒唔敢出聲？

100萬人，每人提4萬，爆晒個銀行體系結餘　—　只係存款嘅0.5%

29. 特別想再四強調，「銀行體系結餘」，同「存款」，爭咗200倍！係兩樣好唔同嘅事！所以，即使我當你100萬人每人4萬蚊，提咗400億現鈔出嚟（再講一次，其實做唔到，邊有咁多人有咁多錢又咁多閒）。其實，只係佔咗總存款嘅…..0.5%都唔夠。

30. 嗰時嘅「提爆中銀」或「提爆政府」，完全係錯晒。你可以話只係為爽，只係表態，冇問題。但，你真係唔好以為啲計法係啱的。仲有，睇得多，你就不知不覺變笨，唔好高估自己嘅能力。正如有啲讀者send啲垃圾畀我，佢都強調返自己都唔信。我心諗，咁你又睇？睇得多會潛移默化的。

31. 有冇人問？點解銀行體系結餘咁細咁化學？其實同現金一樣，銀行就係唔鍾意留咁多錢。因為冇息

咁香港成個銀行體系，有幾多現金？都可以估下

32. 香港存款講咗，銀行體系總結餘講咗，最後一個問題：有冇人想問，香港嘅成個銀行體系，有幾多現金？好啦，短答案：唔知。長答案：但可以估

33. 順手提你，好多嘢都係「唔知」，但你點樣去搵一個大約make sense嘅答案，係好重要嘅技能。對你打工投資都有幫助。記住，估數甚至重要過計數　—計到嘅，邊個唔識？你唔會叻過計算機或機械人。但估數，就係哲學。唔好咁低能話「人人都唔準」，我諗起差不多先生，咁唔準，都有「離晒譜」同educated guess

34. 其實點估？好易估。Pro Rata！正比例，小學數學。講多次，香港存款7.6萬億港紙。恒生呢？11500億（聽落make sense），15%。咁反推返，恒生嘅「現金及中央銀行結餘」，90億嘛，即係成個系統，可能係90/0.15，600億左右

35. 不過留意，呢600億，係「現金加銀行體系結餘」，咁好粗略咁估，咪大約每樣300億咁上下？咁可以估，大約全香港銀行嘅「現金」，300億左右。實際上應該就係幾百億，唔會係幾十億（恒生一間都唔止），但應該唔夠千億。

教你計數，點估數係好重要的

36. 然後知唔知最正係乜？最正係，上面咪講咗，銀行體系結餘，400億　—　啱數！我用另一個方法計返轉頭，啲數都對到的！（順帶一提，應該有人知我中學年代數學好叻，超叻，我嗰時考試就係咁，一份卷做幾次，每次用唔同方法做，保證冇錯）

37. 亦都證明，啲數字應係可信嘅，真係作大，要作到咁天衣無縫，都係好難的。

38. 最後，我寫到最尾先醒起。其實金管局有公佈「政府發行的流通紙幣及硬幣」—呢個可能就係大家理解嘅現水（我唔係好肯定）。數字幾多？130億港紙左右。我上面估300億，「差唔多啦」。咪話唔會係幾千億，又唔會係幾十億。

幾個remark：睇財務報表嘅缺憾—會唔會只係年尾檔高個數？係會的

39. 最後，幾個remark．首先希望唔好有人駁咀，「唔係喎埃汾話過唔好直線思考，如果A就會B咁就會C我就買D」，每個step爭少少，出嚟就爭好遠 —冇錯。但我地今日講緊嘅係完全唔同嘅嘢。

40. 另外，你當然係可以質疑，啲數「唔夠準」，肯定。但會有個譜。我話香港所有銀行嘅現水，應該300億。可能最後得200，或者去到800。但至少個order係啱嘅，就係幾百億。你可以話「嘩爭幾倍喎」，但，至少我唔會好似啲人咁以為銀行體系結餘係「存款」，爭200倍

41. 仲有，當然了，呢度只係恒生6月30號嘅數字。咁你話，會唔會佢谷靚嗰日嘅數？答案係：會嘅！！！！

42. 但，冇啦。冇其他更好方法。我又冇得突擊檢查佢。不過我可以話你知，公司係真係會在嗰日整靚少少個數（我唔一定話恒生）。但一樣，有個譜嘅，化少少妝都得，但總唔會李嘉誠變咗李嘉欣（P圖就得）。況且，你話你嗰日撲水整靚條數，「但人地都要嘛」，總不能個個都谷大的。

43. （忽然好無聊咁諗，如果每間銀行年結日子唔同就得了，「一舊大錢輪流放上去谷」，好似以前啲人窮到一條褲幾兄弟著咁，邊個出街邊個著）

44. 好似寫得有啲遠，但相信大家都係有得益嘅。講咁多嘢，你大約了解「現水」「銀行體系結餘」「存款」「資產」等等嘅東西。

45. Back to basic，我想你留意一樣嘢：銀行，真係留好少錢。恒生，90億現水—呢個數仲要計埋中央銀行結存，即係現水可能幾十億。但，存款呢？1萬幾億。資產呢？近2萬億。貸款呢？都近1萬億。股東權益都1600億啦。同呢啲數相比，現水真係好少！

46. 點解？重要嘅講多幾次。因為，現金冇息收！銀行最憎現金！（BTW，我嘅嗰個不留現金哲學，就應該唔關我做過銀行事嘅）

47. 所以，銀行係長期「莫財」的！但一般唔會影響佢嘅財務穩定性