［極長篇專題］乜嘢係貼現窗？點解啲人忽然關心？點解忽然用咁多？點解渣打用？—點解銀行咁少現錢？因為冇息收！（2/6，或者更多） (Patreon)

「貼現窗係乜」「點解銀行借」「點解渣打」—可以幾句講完，但唔好咁懶

應急錢。點解借？莫財咯。點解渣打借？渣打莫財。「咁即係爆煲？」

朱克伯格夠供樓啦。佢都水緊。咁係咪好唔掂？

李嘉誠去廁所冇錢買紙巾問你借，佢又會破產？

點解埃汾唔留多啲錢？拎晒去買股。點解渣打唔留多啲錢？因為冇息收！

31億，一日都等於50萬息。對銀行唔係好多錢，但老細會唔會豪畀你？

所以，有錢梗係拆晒出公海收息。但，有時就會出事的

銀行冇錢。但銀行嘅「錢」，其實係乜？

恒生為例：到底，間銀行有幾多錢？咩係錢？

你嘅存款，在銀行角度，係「負債」。你去提款，係減緊佢嘅債。

我在馬會中咗5000蚊波，拎現錢去銀行存，其實會發生乜事？

「買樓係負債」？唔好人云亦云。幾多香港人靠呢舊「負債」去英國呀

預告：銀行有幾多現金？拎晒會點？—你去七十一買晒啲杯麵，佢會執？

今次堅，呢個系列，我寫咗15000字，嚇親未？仲要只係解釋嘢，未連恥笑KOL嗰部份。但放心，我會斬開五篇。另外，即係除非有乜死人冧樓，否則呢個星期我都只係連載呢幾篇。你有問題可以唔使等晒先問，但如果我在後來嘅文有寫，就未必會覆你了

不過，關於市況嘅睇法，呢幾個月都係冇乜變。你問我嘅，始終都係美國非科技股，或者美國以外嘅市場，香港就睇嗰啲真高息股，或者阿里巴巴騰訊。講咗幾個月。

1. 續講「貼現窗係乜」「點解呢排咁多銀行借」「點解渣打借」。

2. 快手畀少少免費資料你，知道發生乜事。其實5月尾已經有人留意個貼現窗用得多，38億，兩年新高。官方有解但你當然唔信。話時話，其實覺得金管局乜都呃你嘅，有冇諗佢做乜要畀個數你睇？唔公佈嘅，其實邊個知？

3. 然後到7月尾，一日貼現窗39億，再創兩年高，亦都傳話係渣打用咗31億。然後就係各式KOL嘅看圖作文大陰謀。

「貼現窗係乜」「點解銀行借」「點解渣打」—可以幾句講完，但唔好咁懶

4. 要懶人包真係可以「幾句講完」，但真係唔好咁懶。大家知我最反對懶人包文化，只會令啲人越嚟越低水平。「奧本海默」你都可以幾句講完，咪有條反發明原子彈炸死晒啲日本人提早結束二戰然後戰後佢畀人迫害。一句講完啦。咁點解要拍3個鐘？點解有人睇？同樣地，睇書亦都係咁。

應急錢。點解借？莫財咯。點解渣打借？渣打莫財。「咁即係爆煲？」

5. 要一句答晒上面嘅問題，真係唔難。咩係貼現窗？應急錢咯！銀行緊急關頭咪用。咁點解呢排用得多好多？的確因為銀行水緊。咁點解渣打借？因為渣打水緊。

6. 呢幾句嘢，其實不能話錯。但啲垃圾KOL，正係利用啲人不求甚解。水緊呀？即係冇錢啦。銀行都冇錢喎，仲唔係好大件事？　—　聽落啲人覺得好合理。但你認真啲，係咩？跳咗好多steps喎

朱克伯格夠供樓啦。佢都水緊。咁係咪好唔掂？

7. 畀多個例子你：朱克伯格買樓都做按揭。咁梗係唔想拎一大舊錢先做按揭啦。搞錯呀！4000萬港紙都冇？但唔通你覺得佢係盧啟賢空心老倌？（BTW，Facebook Page有寫，盧啟賢好可能都係有錢人，只係唔係超級有錢）

李嘉誠去廁所冇錢買紙巾問你借，佢又會破產？

8. 見到冇？乜都「兩句講完」，就好易畀人誤導。正如上篇講，咩叫「水緊」？李嘉誠入到廁所冇錢買紙巾要問你借（你當佢個保鑣暈咗啦，個銀包又跌咗落屎坑），咁佢又會破產？

9. 昨日同大家大約講咗個例子，就係我本人。再講一次，比喻唔係100%準，但畀你有個概念。要借應急錢可能真係「冇錢」，但咩叫冇錢？一時周轉不靈？（而呢四個字亦有好多唔同意思，你係李嘉誠去廁所定SVB擠提？）。冇錢，不等於係有問題嘅　—　固然你可以話，「咁點解唔袋多啲錢」。點解李嘉誠唔袋多啲錢（都話銀包跌咗），點解埃汾唔留多啲錢（都話買晒股票）

點解埃汾唔留多啲錢？拎晒去買股。點解渣打唔留多啲錢？因為冇息收！

10. 點解渣打唔留多啲錢？—　拿，呢個就31億嘅問題啦。但我簡單答咗你先：銀行，同埃汾一樣，就係最唔鍾意留低啲「錢」。其實你好易諗到：銀行最憎現錢，因為一個息仙都冇。我留31億，一日就唔見咗50萬。固然唔係好多錢，但首先，唔止涉及31億，另外，50萬唔係好多錢，但你做渣打嘅，試下叫老細加你50萬人工睇佢制唔制？

31億，一日都等於50萬息。對銀行唔係好多錢，但老細會唔會豪畀你？

11. 再講一次，你記住，銀行同我一樣，唔鍾意現錢。又，我相信你唔會搞笑到話「點解唔存入銀行收息」。我諗起啲無聊港片，有個魔警做色魔咁，然後個女事主（男都得叫）大叫：唔好埋嚟呀，我報警架　—　然後個魔警笑淫淫咁答：「我咪警察囉！」

12. 唔係搞笑，是真的。銀行留低錢在自己度，「有冇利息？」—你咪玩啦，自己畀利息自己咩。「你自己咪銀行」

所以，有錢梗係拆晒出公海收息。但，有時就會出事的

13. 但你聰明少少嘅，會諗「咁放去其他銀行得唔得？」。得！有冇息收？有！呢個，就係同業拆借嘅概念啦！

14. 但記住，真係唔好不求甚解。你睇垃圾懶人包嘅，不如直頭唔好睇。識一半仲大鑊過唔識，因為你以為自己真係識。睇完垃圾KOL以為自己識晒添。講真，讀者想知多啲梗係好。但你唔識貼現窗係乜，其實，對你生活，工作，甚至投資有乜影響？除非你做銀行，否則我唔多明。我買美股固然唔使理香港貼現窗點運作。但我買港股，其實都唔使理。

15. 正經解下，幾個概念。「錢」是甚麼？呢度唔係同你講咩M1 M2嗰啲Econ嘢，一來深，二來悶，三來真係無關。但我只係想你搞清幾個概念。銀行嘅「錢」，係乜？

銀行冇錢。但銀行嘅「錢」，其實係乜？

16. 其實之前寫咩債券101好似寫過少少，但好似未寫到Balance Sheet已經爛尾。當時我用嘅係恒生舊年嘅業績，最近佢中期業績都出埋。我唔排除之後會再續寫個債券101，而為咗完整，只會用返舊業績。

17. 然後你亦明白，點解我嗰排用咁多時間同你睇銀行，雖然好多人都冇買，又要鬧悶又話浪費時間，「然後而家又嚟問」。因為銀行的確係個有啲難明，但又耐唔耐你會關心嘅行業。「百業之母」嘛。即係你冇買SVB冇買渣打，但耐唔耐你咪又係會嚟問我佢地死得未

18. 不過，今次我地睇最新嘅恒生業績。唔使太複雜，睇下面個圖（你save低都得）。份嘢在呢度，第24頁。

19. 個圖太長，最底我斬咗，但話埋你知，股東權益係近1600億。因為資產＝負債＋股東權益（唔解了，會計101，但你冇讀過都要識，正如學校冇教洞房你都要識）。近16900億資產，15300億負債，減出嚟咪大約1600億股東權益。

20. BTW，你會見到，銀行高度槓杆，1600億股東權益，15300億負債。好少行業會咁。理由以前解過，不重覆。恒生已經係算當保守的了。

恒生為例：到底，間銀行有幾多錢？咩係錢？

21. 但重點係，銀行有幾多「錢」？咩叫「錢」？

22. 諗真啲，你關心銀行有冇事，最切身就係你提唔提到錢出嚟啦。或者你係對家嘅，佢找唔找到數啦，會唔會欠租啦。你係員工嘅，佢出唔出到糧啦。但呢度，都已經有啲唔同嘅概念。

你嘅存款，在銀行角度，係「負債」。你去提款，係減緊佢嘅債。

23. 首先，你嘅「存款」，在銀行角度，係「負債」。唔明咩叫負債嘅，自己維基，會計101（但好正嘅係好多人可以讀過會計都唔知，教育嘅失敗）。負債係obligation嘛，你可以去提款，所以「存款」係銀行對你嘅負債。有啲連呢樣都未搞清，就冇得討論。

我在馬會中咗5000蚊波，拎現錢去銀行存，其實會發生乜事？

24. 咁但，你話，好啦，我在馬會中咗5000蚊六合彩，拎現錢，然後走去銀行存晒嗰啲銀紙入去。咁會發生乜事？正係你戶口多咗5000蚊。在銀行嘅帳目上，即係銀行嘅「存款」多咗5000蚊，佢欠你5000蚊，記住數。「咁我入落去嗰啲銀紙呢？」。冇錯，就成為銀行嘅「資產」，佢同時多咗5000蚊銀紙，就係佢資產。記住呢個過程，銀行資產同負債都有增長。事實又係會計101，每個活動，都會同時郁到兩邊（或者一邊唔同嘅嘢一加一減，甚至四加五減咁），否則你個Balance sheet會唔平

「買樓係負債」？唔好人云亦云。幾多香港人靠呢舊「負債」去英國呀

25. 呢度順帶一講，有啲又係人云亦云，「窮爸爸富爸爸」，講「買樓係負債」—亦係相當搞笑。你諗下你自已條數咪知。冇錯，你多數要借按揭，多咗舊負債　—　「但你同時拎住層樓嘛大哥」。你睇好多香港人，就係賣咗香港層樓，拎舊錢去英國，相信呢度嘅讀者都有　—　咁你嗰舊，點會係「負債」呢？

26. 冇錯，你中咗六合彩，存啲銀紙入銀行，就係銀行多咗資產（你啲銀紙）同埋負債（你嘅存款）。咁相反，到你幾日後去ATM提款，拎現鈔出嚟，成件事就掉轉做啦。

預告：銀行有幾多現金？拎晒會點？—你去七十一買晒啲杯麵，佢會執？

27. 所以，你提款提嘅，係銀行嘅「現金」。但銀行有幾多現金呢其實？

28. 我貼多次呢個圖，你save低都得，雖然下次我會再貼。你可以估下，銀行到底有幾多現金，邊個數字係。又，你拎晒啲現金，會發生乜事。提示1：銀行好少現金。提示2：拎晒，咪拎晒咯，你去七十一買晒啲杯麵，佢會執笠？