乜嘢係貼現窗？點解啲人忽然關心？點解忽然用咁多？點解渣打用？（一 of唔知幾多） (Patreon)

乜嘢係貼現窗，點解啲人忽然關心，點解忽然用咁多，點解渣打用

教你點思考：投資嘅四個層次，四種技能。最重要嘅，係分辨真假好壞

其實點解你會問乜嘢係貼現窗？Google咪答咗你

唔信政府，咪信傳媒咯　—　你又寧願信啲垃圾KOL同網友。

其實廢柴KOL未必有寫錯：貼現窗，就係緊急錢，last resort

走投無路先借，所以會貴息，唔鼓勵你借。但又唔會嚇到你唔敢借

要抵押，要外匯基金票據。所以銀行一定常備看門口，又可以炒。我炒過

5.75%利息，自動調節嘅。因為香港根本冇「議息」

要借應急錢，咪即係渣打莫財咯！Er…..yes and no．咩叫「莫財」先

埃汾平時100% invested，咁要應急點算？咪拎孖展戶口

埃汾夠月尾要用IB孖展拎錢啦，咁佢係咪就爆煲冇錢打邊爐丫？

渣打咪即係埃汾，IB咪即係金管局，貼現窗咪即係孖展拎錢！

「缺錢」係一個好含混嘅概念：Liquidity 定 Solvency？臨時定長期？

就算我借唔到孖展錢，有乜問題？會爆煲嗎？

1. 好，今篇文，講解下乜嘢係貼現窗（Discount Window），點解啲人忽然咁關心（其實呢部份冇乜好解，等於你叫我解點解啲人咁廢），點解忽然間個使用量大升（係事實），點解渣打忽然搞到要用（也是事實）。

2. 但你估到了，最後，其實都係教你點思考，教你改變心態，做一個更高水平嘅人。

教你點思考：投資嘅四個層次，四種技能。最重要嘅，係分辨真假好壞

3. 我越嚟越發現，投資嚟講，四個層次。Hard Knowledge最唔重要（例如點計Earnings Yield Gap，咩係Goodwill），不過佢可以幫你搵到錢（例如打工，或者我而家做嘅嘢）。比較重要係一啲投資嘅「一般嘢」，資產配置呀，點揀公司呀，唔好以為經濟同股市係同一樣嘢呀之類。更重要嘅係「心理」，點樣可以做到別人恐懼時我貪婪，點樣放心買得大坐得長，點樣唔會有啲不切實際嘅期望咁。不過，最最最重要，其實係分辨好嘢壞嘢，真嘢假嘢嘅能力。

4. 你估到了，最尾我會繼續狂鬧狂笑啲垃圾KOL同媒體，順便教你做個高水平啲嘅人。我原本想講啲先，因為最重要。但考慮後，都係由「乜嘢係貼現窗」之類開始解，費事有人覺得講一大輪虛無嘢都未入正題。

5. 所以，將就咗你了。咁請你答應返我，睇晒成個系佢。唔好以為後面嘅唔重要，後面嘅先最重要。

其實點解你會問乜嘢係貼現窗？Google咪答咗你

6. 講返直接，乜嘢係貼現窗？

7. 其實我串啲講句，「點解會有人問呢啲嘢？」。不是嗎？個個又話AI又話ChatGPT乜鬼。其實你唔用ChatGPT都好，Google一下，已經有晒答案啦。

8. 金管局有解，經濟日報都有解。但你會唔會睇？多數唔會。又或者睇完仲會問。咁點解會咁？都有唔止一個原因。首先，官方啲嘢往往係解得未必太過貼地，因為要好小心。即係話，佢可能用一個表達手法2分但事實度10分嘅講法，但我係用一個事實度9分但表達手法9分嘅　—　但官方嘢，不容許出錯，只能犠牲個趣味性。你諗下，佢冇出錯都已經人人唔信，佢有嘢錯嘅，你咪更加覺得「露出馬腳」！

9. 所以帶到第二個原因，我明嘅。塔西陀陷阱，Tacitus Trap（講英文型啲）。即係，「挑，政府都好信」？大家對政府失去信心，咁佢就講乜你都唔信　—　咁但，唔好以為本人幫香港政府護航。即使金管局好似真係冇乜點昆過你，但其他政府部門或多或少都有。就算冇，你仇恨政府，對政府講嘢失去信任，我係絶對可以理解嘅。

Never believe anything until its officially denied：「有事佢都話冇事」嘅邏輯

10. 又或者換個講法，好多人有個講法（我偏見，男人居多），Never believe anything until it has been officially denied。聽落好醒，其實係廢的。奧巴馬係唔係美國人？官方否認，即係係啦。咁但如果佢認，亦都即係係啦。

11. 「有事佢都會話冇事啦」—的確如此。其實你見外國政府都係咁上下，淡化危機，唔好造成恐慌，「因為群眾就係愚眛」。換言之，的確，有問題佢都未必會出嚟直面承認。

12. 咁係咪你就唔會知？又唔係嘅，系列最尾教你睇啲嘢。但，固然你可以話有事佢都唔會講　—　但你總不能因為佢話冇事，就覺得「話冇事一定有事」—呢種真係非常弱智嘅邏輯。你最多只能話有冇事佢都會話冇事，但總不能佢話冇事，你覺得即係有事。因為，咁真係冇事，你想佢點呢？唔通冇事要話有事？

13. 好啦，唔信政府，其實都係正常嘅。雖然話說回頭，而家嘅社會，政府要造假，都唔係咁易。例如啲人覺得啲失業率老作　—　咁但，真係老作嘅，點會冇內部人士踢爆？

唔信政府，咪信傳媒咯　—　你又寧願信啲垃圾KOL同網友。

14. 另一方面，好啦，你覺得經濟日報都係「建制」嘛（其實係）。咁我亦理解。不過，「咁你可以睇明報或者信報」，咁如果你堅持覺得佢地都係打手，咁我其實好難同你拗，你居然覺得啲廢柴KOL垃圾網友畀起呢啲記者更值得你信。

15. 不過，話說回頭，我見到有啲傳媒人，自己離職做KOL後，都極速膠化。冇計，因為social media就係咁垃圾。所以我幾時都叫大家睇少啲，除咗我Facebook Page（仲有IG同Threads）

16. 「咁埃汾你做乜貼經濟唔貼明報信報」—咪因為大家唔肯畀錢訂明報信報咯！我貼咗你又話睇唔到。咁咪整篇免費嘅經濟畀你。但其實內容一樣

17. 好，牢騷發完，都係講得太多虛嘢。講番正題，乜嘢係貼一垷窗？

其實廢柴KOL未必有寫錯：貼現窗，就係緊急錢，last resort

18. 其實好簡單，真係幾句講完，甚至你啲廢柴KOL垃圾網友都可能解啱：就係銀行問金管局借錢。一般係隔夜錢。亦即係「應急錢」—然後啲人一聽應急就覺得好大件事。

走投無路先借，所以會貴息，唔鼓勵你借。但又唔會嚇到你唔敢借

19. 事實，金管局當然唔鼓勵呢個機制。同外國嘅央行有啲似，金管局亦係所謂嘅last resort，你走投無路先好搵我啦。所以，啲息一般都係比較高的。有幾高？最新係5.75厘。Quite Simply，銀行問金管局借錢，收你5.75%利息。不難理解係咪？

要抵押，要外匯基金票據。所以銀行一定常備看門口，又可以炒。我炒過

20. 而且，如果我冇理解錯，你仲要係有抵押品嘅，就會係「香港外匯基金票據」—你當香港版美債（但不能拎美債）。所以，平時銀行總會買定啲看門口。況且亦好似買美債咁，有息收嘛，甚至係拎嚟炒（即係炒美債咁之嘛）。我就炒過啦，你估你啲廢柴網友垃圾KOL有冇人炒過？

21. 呀仲有，我唔係好肯定，講明真係唔肯定。但聞說，用咗呢個咁嘅貼現窗呢，都會有少少煩。除咗畀利息外，好似仲要同金管局解釋。唔知係有份form填，定佢會打嚟搵人照肺（我點解知呢啲嘢？聰明嘅讀者估到了：因為我都用過貼現窗！但當然填 form或被照肺嘅係老細，所以我唔係好肯定）

5.75%利息，自動調節嘅。因為香港根本冇「議息」

22. 留意呢個5.75%嘅息口，一般係跟美國嘅聯邦基金利率自動調。以前解「加息」解過好多次，搵舊文。好多傻仔係鸚鵡學舌，「聯繫匯率下港紙息要跟美金息」　—　但照計有少少常識嘅都聽過，用咗聯繫匯率，香港就「冇咗自己嘅貨幣政策」（是真的），所以根本唔存在金管局任志剛或余偉文，需要同屯門區聯儲　小西灣聯儲　議息咁。你唔係美國，唔係英國，唔係大陸。至於呢個「貼現窗利率」，自動嘢，唔使「議息」。（順手講，其他咩P，HIBOR之類，市場嘢，亦唔使開會）

23. 講到呢度，不難明啦。應急錢，唔鼓勵你借，你真係借就收得貴，等你唔好亂咁用　—　但又唔係唔畀你用嘅。

24. 暫時到呢度，應該好易理解嘅。

25. 於是乎，可以去到第二同第三個問題，點解呢排好似用得多？但詳細討論之前，其實都好易估到。點解用多咗應急嘢？因為「莫財」！點解渣打要用？因為渣打「莫財」！是真的！

要借應急錢，咪即係渣打莫財咯！Er…..yes and no．咩叫「莫財」先

26. 你睇到呢度，可能自作聰明：嘩，即係KOL講嘅係真喎！香港啲銀行好缺水，渣打好缺水。

27. 所以，點解你要睇我嘅文。因為凡事不能咁表面。不如你諗下，乜嘢叫「莫財」？

28. 我用一個好直接嘅比喻：我嘅情況！我包你明！

埃汾平時100% invested，咁要應急點算？咪拎孖展戶口

29. 眾所周知，埃汾長期都「莫財」，「佢仲好自豪」。點解佢莫財？唔係佢冇收入，亦唔係佢開支太大（唔完全係）。係因為佢「去到好盡」，有少少錢都拎晒去買股票嘛。呢啲作風大家未必同意，但耳熟能詳啦。

30. 埃汾嘅作風，有乜後果？就係佢真係長期「莫財」。咁當然，正如我建議大家，你當然係扣除晒你嘅開支，供完樓畀完家用找完卡數預埋食飯甚至預埋錢一年去一次日本，剩返嘅閒錢，先好放入股票度。

31. 順帶預告定你知，銀行做嘢，都係好似埃汾咁作風嘅。「所以會莫財」

32. 咁但在埃汾嘅情況，咪就係計晒數，咁有剩嘅錢，就放晒去股票啦。往往去到月中已經得返幾千蚊。月尾可以係得幾百蚊，甚至冇。

33. 好啦，都唔止一個讀者問，咁你忽然要用錢點算？以前答過，不詳解。

埃汾夠月尾要用IB孖展拎錢啦，咁佢係咪就爆煲冇錢打邊爐丫？

34. 咁但，早幾個月，就真係真實例子：原本計好晒數啦，知有乜開支，我甚至都會有啲buffer—點知，唔記得咗保險今年轉咗年繳喎。忽然間月中扣咗我35000蚊。好啦，咁莫講話我不能捱到月尾—就連月尾找卡數都成問題啦，係咪？

35. 你係我，你會點呢？

36. 咪就係動用啲「應急方案」！

37. 有乜應急方案？以前解釋過。但重點係，你咪當我要用到IB或富途嘅股票戶口，拎錢出嚟咯。咁要畀息的嘛！

38. 實務上我可以問埃汾太借，或者賣咗部份股票，但呢啲都係有「成本」的。不過你當我用IB孖展吧（雖然最後我都冇用，因為忽然追到啲舊客戶數，月中又有啲新讀者）

39. 唔好失焦，重點唔係討論我有幾牙煙（雖然都應該留意）。

渣打咪即係埃汾，IB咪即係金管局，貼現窗咪即係孖展拎錢！

40. 重點係：你諗下，成件事，我咪好似渣打咁咯！IB咪等於金管局，個孖展額度咪好似貼現窗，孖展息口咪等於貼現窗息口　　—　貴架，應急先好用啦，唔通我個個月拎嚟食飯咩，6厘定7厘息呀

41. 但於是，你再反思下。銀行點解用貼現窗？真係因為莫財。埃汾點解用IB孖展？又真係因為莫財。

42. 但，100萬嘅智力問題：會唔會有人覺得我好唔掂？就爆煲？財政好唔健康？幾皮嘢都冇要去IB用孖展？你會唔會真係覺得我好窮，有流動性問題？真係「莫財」？

43. 明顯唔會啦！

44. 咁所以，渣打，何來真係「莫財」？

45. 講一大輪，我想你理解一啲嘢，亦係我平時寫Facebook文成日講嘅嘢：好多時大家日常用嘅語言，極之含混。含混當然有原因，主要係方便。但去到一啲情況，要精準啲。

46. 渣打借應急錢喎！仲唔係冇錢？係！埃汾借IB錢喎，仲唔係冇錢？係！

47. 但乜嘢叫「冇錢」？

48. 於是乎你發現，「渣打搞到要借應急錢，肯定因為水緊」，同埋「渣打會出事」，根本係兩樣唔同嘅嘢。正如埃汾搞到要用IB孖展，同埋「佢以後冇得食方榮記高流灣，冇得一年去幾次日本」，亦係兩回事。

「缺錢」係一個好含混嘅概念：Liquidity 定 Solvency？臨時定長期？

49. 正經返啲，所謂嘅「莫財」，係有好多種。以前寫過，有liquidity嘅問題（資金錯配），有solvency嘅問題（長期輸錢，資不抵帳，例如有線）。

50. 有Solvency問題，不等於即時爆煲，你睇有線不停蝕，資不抵債，都好地地（仲收咗我今個月月費，我遲下會投訴），Liquidity OK，有銀行借錢畀佢，還到息，咪OK。

51. 相反，即使solvency 完全冇問題，liquidity 有問題，都可以爆煲。例如？八佰伴（後生仔Google吧），或者銀行劑提

52. 但，liquidity 問題亦有好多種。咁例如埃汾呢種，係冇乜問題嘅。Worst case，IB富途都借唔到（你當我唔見咗個戶口密碼），股票都賣唔到（同上），問朋友都借唔到，上網乞都乞唔到。最壞情況係乜？我咪冇錢找卡數，會罰我息，好甘　—　但我總唔會要跳樓—As long as我下個月仲有Patreon收入，或者搵得返個密碼

就算我借唔到孖展錢，有乜問題？會爆煲嗎？

53. 渣打嘅情況，亦係一樣。根本借應急錢，有乜問題？

54. 以上我特登冇講好多技術細節嘢，但先當講故事咁講。當然比喻唔會100%一樣（趣味同準確係有取捨），事實上，我找唔到卡數最多罰息，但渣打借唔到金管局呢，都可以幾麻煩。

55. 不過始終你明白個重點：你畀啲人嘅語言偽術fake咗　—冇錯渣打要用貼現窗，係「水緊」。但，間間銀行都水緊架啦（下篇解），我長期都水緊。

56. 咁但，咩叫「水緊」？我要用到IB嘅孖展拎錢，係咪代表我會爆煲？你話呢？