美國被downgrade - TLDR：Non event，真係大跌就買吧。但如果唔大跌呢？另外，解下今次同2011年嘅異同 (Patreon)

記得Follow本人IG Threads同Facebook，真係快過99%華文媒體KOL

要深度？一樣有。5月我已經寫咗好詳細嘅文，講返2011嗰次 downgrade

上次non event．但今次係咪一樣？所以，我地睇下兩次有乜異同

2011年我就坐在公司睇住，你啲KOL毛都未出，或者唔係行內人

失身只有一次：一件污，二件穢，三件無所謂

唔係downgrade再downgrade，而係一間搞完12年後另一間

上次邊個搞？今次又邊個搞？

「但個市跌喎」—上次幾多？今次幾多？

另外，上次幾時downgrade？今次呢？

插播：當年標普條友，畀人死亡恐嚇，但而家仲好地地。證明美股好嘢

而家VIX幾多？2011年呢？

而家估值幾多？嗰時呢？

今次會點？「評級下調會令到融資成本大升」嘅嘢

美股已喘定。咁之後跌，又係咪「因為」downgrade？

真係大跌嘅，咪買咯。但如果唔大跌呢？等到幾時？

1. 寫乜？當然係美國被downgrade．我諗新聞我都唔使點貼，你睇標題都知乜事。唯一你最關心嘅，都係「有乜後果」，「買唔買得」之類。

記得Follow本人IG Threads同Facebook，真係快過99%華文媒體KOL

2. 不過呢度半賣廣告兼自吹自擂。第一，記住follow 我IG同Threads（都係@ivanliresearch）．仲有，留意Facebook Page．我第一時間就貼咗，快過99%華文媒體同KOL，因為我剛上床瞓。

要深度？一樣有。5月我已經寫咗好詳細嘅文，講返2011嗰次 downgrade

3. OK，快係冇用嘅，其實係，可能你覺得有用，我覺得冇用的（但你係讀者嘛）。但，要深度？咁你地有福啦。新讀者唔知，但舊讀者一定知，「早幾個月咪寫過咯」！

4. 當時係5月中，講美國債務上限談判，寫咗3篇（上，中，下）。當時我有講，2011年嗰次咪玩出火，玩到畀人下調評級。

5. 呢個，十分十分重要。因為，只要你有睇，你就已經知道發生乜事！係咪比別人知得多先！你唔使再走去問人「下調評級會點」「以前有冇試過」「上次又發生乜事」

6. 所以，呢篇我唔會重覆講上次嘅嘢呃字數，但講下其他嘢。因為你有睇嘅就會知，「上次幾日就冇事啦」。但，你亦可以合理地諗，「但今次係咪都係咁」—冇人知，冇包生仔。特別係：嗰次係（近代）史上第一次，你可以話得一次事件觀察，好難作準。

上次non event．但今次係咪一樣？所以，我地睇下兩次有乜異同

7. 咁但，我可以話定你知結論，我相信都係non event，但我會話你知兩次有乜分別

8. 睇落去之前，講多樣嘢。舊文好似有講，2011年嗰次，我就正正坐在公司度睇住（冇睇美股，但嗰時加班），睇住呢個歷史時刻，睇住美股一晚跌7%（等於而家道指跌3000點）。唔係恃老賣老，但你睇嗰啲KOL，有啲嗰時毛都未出，甚至唔知有件咁嘅事，你覺得佢地可以識幾多嘢？

2011年我就坐在公司睇住，你啲KOL毛都未出，或者唔係行內人

9. 當然你唔使好似我咁加班，你亦唔使真係嗰時見證過。因為我5月已經寫咗篇文嘛！我相信係好大幫助的。

10. 點解我強調幾次5月寫咗？好簡單，因為差不多真係一樣。你有睇5月篇文，就真係唔使問人，亦都唔會兩嘢畀人震走咗（而事實美股只係跌2-3%）

11. 事實上，今次嘅情況，差不多係完全一樣。都係因為債務上限談判引起，都係美國喪失最高嘅信用評級，都係美國兩黨一齊出嚟鬧，都係啲反美小粉紅出嚟講美元霸權玩完，都係個個話股災

12. 但，「差唔多完全一樣」，即係有唔同。所以我講唔同嘅地方，你可以判斷下。

失身只有一次：一件污，二件穢，三件無所謂

13. 首先，一件污，二件穢，三件無所謂。再傳神啲，失身只能失一次。我講真的，美國「走下神壇」，就係2011年嘅事啦。自此已經喪失咗嗰個「光環」（但即係同貞節牌坊一樣，其實冇乜實際影響）。咁借問聲，今次又有乜所謂？

唔係downgrade再downgrade，而係一間搞完12年後另一間

14. 你特別留意嘅係，佢唔係畀人downgrade再downgrade．而係一間downgrade完，另一間事隔12年先downgrade．咁，其實第二間，仲點有殺傷力呢？

上次邊個搞？今次又邊個搞？

15. 更重要嘅係，2011年郁手嗰間，係標準普爾Standard and Poors（BTW，佢嘅母公司，環普環球SPGI，我買咗，早前創咗一年新高）。今次郁手嘅，係惠譽Fitch．邊個有威力啲？唔計前後都好，標普當然地位，影響力都高過惠譽好多好多。

16. 事實上，好多人以為得兩間信貸評級機構。都有道理，因為就好似Visa Master咁，信貸評級，長期就係兩間公司嘅Duopoly，標普，同埋穆迪Moodys．而標普同穆迪，各自大約40% market share. 惠譽？10%唔到。即係未有銀聯出現前嘅AE 咁

17. 講到呢度，你都應該明明地，點解真係non event

「但個市跌喎」—上次幾多？今次幾多？

18. 「但個市跌喎」，係。不過，上次一晚跌7%添。今次，一晚跌完2%，第二日己經差不多企定。你會話，「有啲股跌一兩成喎」，咁你都識講，「有啲股」啦。當然講大市。一直叫你分散。你話你啲嘢一晚輸10%，當然係你問題。我冇叫你咁做

另外，上次幾時downgrade？今次呢？

19. 另外，仲要講多一個分別。其實係有啲奇怪。雖然兩次都係8月。留意2011年嗰次，係兩黨未傾掂數，標普就「費事等你傾，唔知傾到幾時」，就去做嘢。但今次，你都記得，明明個債務上限解決咗喎。點解仲要Downgrade？係喎，惠譽當然有佢嘅講法，話結構性問題，美國政商界當然「不接受」，但都係各自噴一輪口水啫，grade已down

插播：當年標普條友，畀人死亡恐嚇，但而家仲好地地。證明美股好嘢

20. （呢度可以插播：我一路講，美國嘅特色。你見雖然政府狂轟，但總不能拉條友去打靶。標普2011年個「刀手」呢排都有畀人訪問，當時都話好驚，周圍畀人鬧，甚至驚畀人買起　—　但結果咪好地地。講真，你在第啲國家，就未必係咁。中國固然，但係咪「民主」地方就都好似美國咁？我好懷疑你在印度或日本韓國有冇得咁。一方面，你可以話美國的確係尊重言論自由。但另一方面，亦係「尊重資本家」，或者「商人話事」。隨你點演繹，但結果一樣：呢個係一個對資本家有利嘅社會。所以美股長期強，係有原因嘅，就係有個好好嘅營商環境。你睇Donald Trump憎Jeff Bezos憎到死，但都奈佢唔何。在第度係咪咁？未必）

21. 講返，正因為大家明以為「解決咗」，惠譽先忽然做嘢，所以先奇怪　—　而正係見到股市嘅特色：梗係冇預期嘅先震憾。雖然，嚴格嚟講，惠譽5月已經將美國放入「負面觀察名單」。正如標普2011年都係咁。都唔會「一下」downgrade ，會畀警告你。但講真，大家（包括美國政府）都狼來了啦，你嚇我呀？我就唔信你敢　—　不過，經過2011年，其實大家應該真係知道「人地敢」

22. 呢度我想表達嘅係：2011年，好快就冇事。但今次係咪一樣？冇人知。但我可以話你知有乜唔一樣

而家VIX幾多？2011年呢？

23. 首先，最重要嘅係：呢壇嘢之前，美股嘅VIX，係3年低位！這好重要，十分重要。

24. 大家睇得文耐嘅都應該知，恐懼與貪婪。市場未必極度貪婪（都未見啲網友個個做股神），但係相當「鬆懈」，complacent，太過大安旨意，太過坐定粒六。就係呢啲位，往往一爆啲嘢，就會大瀉。

25. 至於2011年？就唔係咁嘅事。當時仲係歐債危機發展中，美股唔係好恐慌，但VIX絶對唔會好似而家咁低。標普出手之前，VIX係廿幾嘅

26. （再插播：如果你只能夠keep一組數字，我講真的，keep 美股VIX。我就keep咗幾十年嘅數，1990年開始，在個Excel。固然你網上可以搵到啲數，但我仲有做埋分析。不過呢個終極武器，我諗住留在將來股票班講。會貴的，亦唔會講足咁多堂都講呢個，但呢件真係神器，至少有一堂專講。所以賣下廣告。當然你夠能耐嘅，自己做都冇話唔得。但我會幫你睇埋其他各種嘢）

而家估值幾多？嗰時呢？

27. 亦都仲有另一樣嘢唔同：之前都講美股估值貴啦，科技股特別貴。所以，一出呢啲嘢，即時就係科技股散晒。太貴，又太老定，大把人有profit take，自然會咁。

28. 好，你最關心嘅，之後又點？

今次會點？「評級下調會令到融資成本大升」嘅嘢

29. 有關「評級下調會令到融資成本大升」呢個講法，我在舊文已經反駁過，你可以睇返，當時美債債息好快就係一路跌。同樣地，你以為人人唔信美金，但兵荒馬亂梗係人人買美金，所以美匯當時跌一跌，就升返。股市都好快回穩。

30. 但今次係唔係？答你唔到。但我會咁去諗：

31. 首先，冇錯今次美債債息係升咗—但再講一次，12年前標普己經下調咗，今日到最細間嘅Fitch去做，講真，你覺得有乜實質影響？我覺得係：零。

32. 當然，如果債息一路升，或者在4厘呢啲位唔落，正路應該係不利股市嘅（但你見今年都唔係好跟呢個規律，雖然我依然信，所以你見我一路都叫你唔好買科技股）

33. 但都係好簡單講返，上次咁大鑊，股市都好快冇事啦。但你話，今次可能唔同。我信。點解唔同？你話今次股市貴。我都同意

34. 所以，就係講中咗重點啦：其實，即使之後股市大調整，係咪真係「因為」下調評級？定只係因為「貴」？冇人知。但人嘅思考，係鍾意「故事化」。絶大多數人，佢願意信服「因為下調所以跌」，但佢唔太願意信服「因為貴所以跌」，更加唔願意信服「其實冇乜點解」

35. 不過，正如之前大半年嘅升浪，大把傻仔講乜鬼「熊市反彈」，「冇說服力」—點解要說服你？唔好將自己個ego放到大過股神

36. 即係點？好簡單，希望你唔好噓我。但，不變應萬變。之前嫌貴嘛，咁真係再回嘅，可唔可以入市？當然是可以的。之前買咗啲嘢，升咗啲，而家跌返啲，好唔好沽走？當然係唔好。

美股已喘定。咁之後跌，又係咪「因為」downgrade？

37. 因為，呢單嘢真係non event．雖然，一路都話美股唔平　—　你會諗到一個好大嘅問題：跌多10%，20%，都未必真係好平。但，幾時都係，到平嗰時你又唔敢買

38. 所以，在呢啲永恒嘅煩惱之中，係可以簡單啲。想買，咪買。點解要說服自己「今次有排跌所以我遲下先買」，又或者「上次都只係跌幾日，今次都一定好快反彈」—不如接受，短期（幾個月當然係短期！）股市係冇路捉。但你有耐性嘅，市場總會獎勵你。

39. 2011年，任何位買，下調前買，下調後買，都唔使好耐　—　一兩年後，你都已經知道係好決定。相反，你冇買嘅，打後咁多年你都會後悔。當然我無法保證美股之後10年好似2011年打後嗰咁多年咁勁，其實好可能唔會（貴嘛）。但，真係唔使太過「自欺欺人」。

真係大跌嘅，咪買咯。但如果唔大跌呢？等到幾時？

40. 嫌太虛嘅，講實少少。如果美股真係之後股災，例如你見到個VIX，上到三四十嘅，咁就更加放心買！呢個我就真係幾有信心

41. 不過問題係，如果一路都唔見呢啲「恐懼位」呢？等等等之前，你會錯失幾多升幅？更唔好講，真係到呢啲位，你係咪真係敢買？其實永遠都係呢啲問題。

42. 雖然未必係你完全想聽嘅嘢，但希望幫到大家。而至少我，都係一股不沽，有錢就加注。不過未必係科技股，可能非科技股，或者其他市場。呢個觀點過去幾個月都冇變（但，如果啲科技股真係大瀉，又可能會轉想法了）

43. 寫到呢度，見到盤後蘋果亞馬遜出業績，好似都不錯。盤後股價都OK，至少冇大瀉。所以，我估比較可能係，星期一已經冇人再講呢單評級嘅嘢。正如上次週末舖天蓋地講俄羅斯兵變，但星期一就沒戲唱了。我連寫同答都慳返

44. 睇嘢短視，係好難賺大錢的。我啲N倍股點嚟？全部都係要時間。