愛馬士：過去十年，每年純利升兩成。咁應該值幾多倍市盈率？兼講估值的種種問題 (Patreon)

全部市場收入都雙位數增長，好過LV，股價反應亦係

過去十年，每年純利增長20%。好勁，但，值唔值咁貴呢？

問題係，點解拎十年？點解唔拎四年？三年？三年嘅，一年增長90%

用幾多年先好？答你唔到。但其實，唔應該計一年市盈率

公司盈利跌一半，但市值唔應該跌一半。

搞咁多估值模型，其實一般不及一句「別人恐懼時我貪婪」

愛馬士Hoh收入都仲有得升，勁過LV

愛馬士毛利率同LV差不多，但點解純利率高咁多？又仲有幾多空間升？

又冇話邊個「好啲」。講利錢高就愛馬士，但講大就LV了

Asia Pac ex Japan已經佔咗一半銷售咁滯，絶大多數係

Hoh計，亞洲勁歐美差。不過，按季又另一情況。

估值時間：50倍PE嘅嘢…….

兩大問題：LV法國股定美股國？仲有，咁貴點買？怕摸頂

特別強調第17段講嘅嘢

1. 上篇講咗LV，收入勢頭麻麻地，但又未算痴線地貴。

2. 今篇愛馬仕。中文報導呢度，英文報度文呢度。公司個Presentation呢度，成份業績呢度。Excel都幫你填埋。

全部市場收入都雙位數增長，好過LV，股價反應亦係

3. 先睇Big Picture，似乎係好過預期嘅，全部市場收入都雙位數增長。聽落個情況好似好過LVMH，出嚟嘅股價反應都係

過去十年，每年純利增長20%。好勁，但，值唔值咁貴呢？

4. 好啦，討論落去之前，睇呢個Slide，Facebook有貼。過去10年，純利複合增長每年19%（留意收入增長冇咁快的，亦即係啲利錢越嚟越好）。十年複合增長每年19%，當然好勁，中間仲要經歷世紀疫情（以及歐債危機啦，貿易戰啦，俄烏戰爭啦，以及每年幾百次嘅中國爆煲）

5. 不過，再好嘅嘢，都有個譜。問題係，到底係咪justify個市盈率？（市盈率幾多？你可以自己計或搵，最後我會開估）

6. 大家都大約可以接受到，如果年年增長極好，咪值貴啲市盈率。高啲增長咪值貴啲，大約係咁。以前寫過乜鬼PE/G，咁你十分大約（真係大約咋！），一年20%增長，justify 20倍市盈率，咁上下。因為如果你20倍市盈率但年年得5%增長，隻嘢會越拉越貴，總會畀地心吸力扯落嚟

7. 愛馬士既然純利複合增長19%一年，咁就19倍市盈率？但，明顯唔止啦。

問題係，點解拎十年？點解唔拎四年？三年？三年嘅，一年增長90%

8. 因為有一個好大嘅問題：呢張圖，明顯係斷開兩截嘅！唔使計，你都見到疫情後嘅增長強好多（原因？唔知，但可能都係因為富者越富。係網上啲傻仔先信咩疫情股災有錢人大鑊）

9. 問題嚟啦喎，計晒成個圖，就19%複合增長。但，如果我只計2019到而家呢？純利7.5億升到22.3億，4年就3倍，即係一年複合增長30%（而唔係19%），喂，即時好似可以拉高個估值。「30倍市盈率好合理」

10. 「咁不如再進取啲啦」，不如2020年計起吖。咁你見到，3.3億升到而家22.3億添。3年咋。複合增長一年90%，「即時justify 90倍市盈率」

11. 咁，好似太狗呀可。但講真，應該計幾多年？資深讀者應該估到答案

12. 答案就係：唔知！根本冇答案。你要明白好多問題永世唔會有答案。唔好當科學實驗咁，100度就滾。人人計嘅數唔同，先會有交易，否則佢就永遠都係同一個價。

用幾多年先好？答你唔到。但其實，唔應該計一年市盈率

13. 不過你真係學術地講，可能你都聽過啲乜鬼discounted cash flow model．以前寫債券101大約寫過，只不過股票因為唔知增長幾多，更難估。

14. 你亦唔使深究，但最好你大約知係乜。因為，當你大約明股票係咩一回事（就係未來所有現金流，或者股息，折現返今日，加埋晒佢）　—　咁你可以避免一啲錯誤　—　例如一間公司，忽然一年盈利跌一半　—　但你不能話個股價就會跌一半的。因為，你唔係睇一年嘅市盈率嘛。當個Excel計股價，A至到Z咁多行（26年太短了）都好，計及present value，加埋晒咁多格佢（以前講債券101講過）　—　咁我中間冇咗一格，甚至兩格，F同G得返原本一半，甚至變咗零，當然對我加出嚟嘅大數有影響　—　但會唔會爭咗50%？梗係唔會

15. 當然你會話，例如Facebook嗰時盈利跌咗一半，「咁但如果之後全部格都得返一半呢，個股價咪一半咯」—係，但，呢個咪涉及你嘅判斷咯。你真係覺得公司從此盈利就每年減半？不如望下每月活躍用戶？正如你睇好多公司，疫情嗰時可能真係冇晒生意，三年死晒　—　但，唔會永遠係咁。除非你真係覺得會永遠封城（但應該好早都知道唔會）

16. 呢個盈利跌一半，但市值唔應該跌一半，都幾合理。再講一次，市盈率唔應該睇一年。否則，唔通盈利跌九成你估值又估九成？盈利變零你市值變零？咁到蝕錢你間公司就一文不值？明顯唔係

公司盈利跌一半，但市值唔應該跌一半。

17. 亦都講得簡單啲。你應該發現，差不多所有估值方法，都係「市乜率」，就係「市」（市值，或股價），同埋另一啲嘢。市盈率，市銷率，市帳率，仲有股息率（咪股息除股價，個「市」在底，你可以叫做息市率）。「市」呢部份冇乜問題，但另一舊嘢，其實唔應該睇一年。正如都話你知，股息率不能睇一年。

18. 但平時我地多數都只講一年，就當然係唔太好的，不過，等你有啲皮毛認識先啦。要學嘅，成世都學唔完。例如話，你睇市盈率，可以睇前後五年咁，即係市值除2021-2025五年嘅平均純利咁

19. 講得太遠，但估值，就真係估估下。唔係完全冇譜，但太過牛角尖嘅，只會令自己更煩惱。多思考冇問題，但唔好妄下結論，甚至唔好一定要求有結論。

搞咁多估值模型，其實一般不及一句「別人恐懼時我貪婪」

20. 而某程度上，都係「別人貪婪時我恐懼」最簡單。但當然唔係咁易判斷幾時夠恐懼，同埋別人恐懼時多數你都恐懼，就算你唔恐懼可能你都冇錢。係咁架啦，致富唔係容易的（但唔係做唔到）

21. 都做唔到？都正常，唔易的。咁但，你做唔到「世界末日買貨」，咪試下做「好天陰天落狗屎都買」，亦即係有錢就買，或者每個月定期買，甚至總之儲夠10萬蚊就瞓落去（如果收入唔固定）。總之，最忌係跌又唔敢買，人人亢奮時你又仆入去摸頂

愛馬士Hoh收入都仲有得升，勁過LV

22. 講遠咗，講返愛馬士業績。先睇今年上半年同舊年下半年比（HoH），見到，好似仲「勁」過LV。半年嘅收入都彈得幾勁，純利更加大升，股價即升（LV出完係跌嘅），剛創歷史新高，今年亦跑贏LV唔少

23. 之前講LV，純利率去到20%，史上最高。但愛馬仕仲誇張，去到33%（其實最高可以升到幾多？係個有趣嘅問題。但，總會加你租吧，員工見到都實會叫加人工）

愛馬士毛利率同LV差不多，但點解純利率高咁多？又仲有幾多空間升？

24. 有趣嘅係，Facebook Page有講個現象：LV同愛馬仕，毛利率其實唔爭好遠。但結果出嚟愛馬仕嘅純利率高一截。點解？

25. 真實答案，未必咁易答。但Facebook Page有人估，可能因為LVMH做得多收購，都有唔少Goodwill年年要攤銷。我真係未得閒睇細數。呢個原因係有可能嘅，但未必咁大影響。

26. 我懷疑，係因為愛馬仕其實唔係點賣廣告的，亦都相對地少搵啲名人代言乜鬼。當然有，但似乎啲marketing開支細好多的。

27. 但點解唔使點賣廣告都得？呢啲就「品牌」啦。正如Tesla都唔使賣廣告

28. 況且，大家都知，佢地賣得再貴啲，貴精不貴多，而LVMH就有啲平價嘅品牌。賣貴嘢，食水當然再深啲

又冇話邊個「好啲」。講利錢高就愛馬士，但講大就LV了

29. 又冇話邊個「好」，咁你見愛馬士利錢咪高啲，但計規模，當然係LVMH大好多

Asia Pac ex Japan已經佔咗一半銷售咁滯，絶大多數係

30. 睇下地理，Hoh比，AXJ特勁，歐洲美國就差啲。度度勁，亞洲特勁，歐洲美國差啲。可以留意下，AXJ已經佔咗一半銷售咁滯，絶大多數係大中華（日本另外計）

Hoh計，亞洲勁歐美差。不過，按季又另一情況。

31. 不過，一樣，如果睇按季，第二季同第一季比，情況就同上面唔多同，或者話同LV差不多，冇咁靚仔的。

32. 按季，收入係要跌嘅，特別係AXJ。反而美國歐洲有得升。至於原因之類，講LV時已經講過。但真係好多唔同因素，匯率啦，啲人走去邊度買啦，季節性啦，開關等等。所以唔好太過過份解讀。

估值時間：50倍PE嘅嘢…….

33. 估值時間。誇張。2100億歐元市，半年22億純利。市盈率48倍。就真係，要返咁上下勇氣同狠勁先可以而家呢啲位買。我就未必會了。但十分弔詭嘅係，好多讀者都講過，其實年頭你都可以咁講，但佢照樣升40%，仲要跑贏LV一截

34. 仲有，愛馬仕2100億歐元市值，之前講過LV就4500億咁上下。放埋一齊睇卜：即係，愛馬仕收入係佢6份1，純利係佢4份1，但市值係佢一半！

35. 固然係因為佢嘅高估值，咁亦可能係因為個高純利率，但高純利率背後亦可能真係個「護城河」，個「品牌」強中之強　—　你總唔見佢要減價同LV搶生意。

兩大問題：LV法國股定美股國？仲有，咁貴點買？怕摸頂

36. 好啦，其實仲有兩大問題可以討論，應該下篇寫，可能連埋「貼現窗」一齊寫。邊兩大問題？預告下，第一，買LV巴黎（號碼MC）定LVMUY定LVMHF好。推而廣之，愛馬士HESAY定RMS好，太古A定B好，之類，試下又解下

37. 第二問題，埃汾成日講估值好重要，相信大家都大約明。太貴買容易摸頂，買完就跌三四成，甚至有排坐。但，有啲嘢好似長期都咁「貴」，咁點算？另外，我買LV同愛馬士時，當時都好似係歷史高（留意歷史新高不一定等於好貴），估值又貴，咁點解又買呢？點去判斷？

38. 都可以講下