LVMH業績，麻麻地（「咁你又買？」），但唔算太貴。收入冇乜增長，但開支減咗。另外，全球化年代，你好難由啲銷售數字睇到邊度嘅經濟係咪好唔掂 (Patreon)

不孤單？投資就係孤單架啦。諗真啲你就明。不過，做乜要咁多朋友？

LV，業績麻麻地咋

「咁你又寫？」「咁你又買？」

整埋個Excel畀你，你可以試下自己整，要幾多個100蚊

真係睇分析睇評論，就聽官方講法，或者傳統媒體。唔係網友

LV純利升30%，但出完業績股價都係要跌

半年同半年比，收入跌，但開支跌得仲勁！

「通脹原材料價格升人工有壓力租金有壓力拖低盈利」—冇數講乜都假

100蚊淨賺你20蚊—扣晒材料租金人工利息交埋稅喎。不過愛馬士仲勁

半年半年睇，Asia ex Japan一命救全家。說好了的中國爆煲

第二季美國收入按年跌，其他市場雙位增長。係咪美國好唔掂？

睇按季，就另一回事了。AXJ跌，美國歐洲升。咁到底邊度爆煲？

實呢啲地區收入數字，受好多唔同因素影響嘅。不能簡化做嗰度好唔好景

咁信邊個？梗係信首富。雖然佢唔會去廣東道巡吉舖。冇你啲網友咁熟

計數時間，4250億市值，半年85億純利。即係點？

1. 進入8月，歡迎各位新舊讀者。8月有乜特別？因為呢個Patreon係2020年8月開嘅，多謝大家一路支持。

不孤單？投資就係孤單架啦。諗真啲你就明。不過，做乜要咁多朋友？

2. 早兩日去富途event，佢地有個口號講，讓投資「更簡單，不孤單」。前者我係同意嘅，投資可以好簡單，雖然好多人會將佢複雜化，去搵你錢。但後者，all due respect，我完全反對。遲下解，但長期讀者好清楚，投資路上當然係孤單。否則唔會股市長升但輸錢嘅人多。

3. 不過，根本咩係孤單，都係任你講。點解真係要「好多人」認同？你處理到嘅朋友，咪又係100-200個咁上下。真係好朋友，咪十個八個。你話同幾百萬人比，或者同某啲Youtube IG FB台比，Patreon讀者 2000人唔夠，好似「孤單」，但為何要人認同？今日認同你嘅網友，聽日可以掉轉槍頭。乜嘢唔呃你？唔係我。係錢。錢就唔呃你。

4. 我地，「小眾圈子入面互相扶持」

5. 講遠咗，幾日冇寫文，大家都見專心做Facebook Page。但總會平衡返兩邊。上個月出咗23篇文，幫你監工讀者數埋都得（之前係有個咁嘅讀者的）。

6. 另外，雖然未必好多人care，但我都分享下：有人覺得我「放多咗時間在Facebook會放少咗在Patreon」，表面聽落合理，時間得咁多。但我自己認為，並唔係咁的。相反，之前有一排我係寫Facebook同Patreon都冇心機（因為個Page畀人限咗嘛）。呢排呢？全線反彈，Facebook多嘢寫，Patreon都多靈感

LV，業績麻麻地咋

7. 就好似呢篇，緊要，LVMH同愛馬仕業績。不過你想要結論嘅，話定你知，兩隻嘢值博率都唔高，特別係愛馬士，堅貴。而業績，兩間都麻麻地

8. 實情，兩隻嘢今年表現唔算太好，特別係LV。愛馬仕好啲，但亦唔係好誇張，雖然都創咗歷史新高，跑贏指數。

9. 即係，如果我係你，有新錢嘅，都未必諗買呢兩隻住。

「咁你又寫？」「咁你又買？」

10. 於是你會有兩個問題。第一，「咁你又寫」？呢個好易答啫，值得寫同值得買係兩回事。第二個問題難答啲，「咁你又買？」　—照計有啲讀者知我拎咗2萬蚊港紙加碼買LV，仲買法國股。點解？短答案係，「都有啲太衝動」，嗰時都未睇晒份業績。另外，留意我買法國正股，唔係ADR，但明明之前我係買ADR的，咁梗係有啲特別原因。遲下開估（睇下有冇人估到，遲下我在Facebook會開估）

整埋個Excel畀你，你可以試下自己整，要幾多個100蚊

11. 先講LV，媒體報導，中文呢度，英文呢度。官方嘢，份業績Powerpoint呢度（幾靚的，值得收藏）。官方稿呢度。另外，整埋個Excel畀你了，update咗。只係呢度都值回票價。你可以試下自己整一次，睇下要幾多個100蚊

真係睇分析睇評論，就聽官方講法，或者傳統媒體。唔係網友

12. 值得睇下英文版報導，反正唔太長。另外，畀個指引你，睇呢啲乜鬼業績，請你最好睇返公司嘅評論，而唔係啲「分析」，因為可以亂嚟。固然公司官方點都係隱惡揚善唱好自己，但一般都係好過啲唔啦更嘅「分析」，況且公司吹得太大呀，講錯嘢呀，最後都會穿煲，要負責。但好多「分析」拍下籮柚兩嘢走咗啦。真係要睇「分析」，就睇傳統媒體。

LV純利升30%，但出完業績股價都係要跌

13. 講返，LV純利叫做升30%（留意下，同個市盈率都好似尚算匹配），但唔算好過預期。收入叫做好過預期少少。但業績一出，股價都係跌嘅，雖然跌些少就企定咗

14. 另外，十分重要嘅，公司會加價—但你可以睇下之後嘅數字會點。理論上呢啲嘢當然有好大嘅加價能力，加少少唔會有問題，但總會有個譜，總不能幾萬蚊買個卡片套啩？

半年同半年比，收入跌，但開支跌得仲勁！

15. 嚟啦喎，先睇今年上半年同舊年下半年比，HoH。你見到，收入係跌嘅。原因？其實好多，不能太易下結論。季節性可能有影響，仲有就係最麻煩嘅匯率。偏偏舊年比較波動。但當然了，你有心機嘅，公司係有講「撇除匯率因素」嘅增長的。但我地簡單啲，只睇報出嚟嘅數

16. 正如Facebook Page都有講，雖然收入HoH跌，但落到盈利就有幾好嘅升幅。點解？因為成開支低咗，都唔好話「減開支冇用」（網上好多紙上談兵做生意都係咁講，減成本冇用，最緊要做好自己，產品做得好，客自然肯買　—　講到啲收入好似可以空氣中變出嚟咁）

17. 特別可以留意嘅係，融資成本跌咗，舊年年尾減咗啲債的。

「通脹原材料價格升人工有壓力租金有壓力拖低盈利」—冇數講乜都假

18. 呢度你可以見到一樣嘢，Facebook都有講。就係，要「量化」，雖然未必咁易。但即係，唔好只係睇故事，故事往往係點都講得通。

19. 例如？即使我唔同拗「疫後大家知道生命可貴多啲陪屋企人重要買少啲LV」定係「知道世事無常活在當下買多啲LV」之類。不如只講開支。好多人會同你講，「通脹，原材料升價，人工又升，請唔到人，租金又反彈。仲有加息，利息成本升」—以上講嘅，表面好似好合理。但事實呢？就唔係咁簡單。

20. 固然你同舊年上半年比，成本升咗好多，「但收入又升好多嘛」。然後如果HoH咁比，好多成本已經跌。所以，你冇數字嘅，講乜都假。但點知數字？就真係幾難。不過兩樣嘢，首先人地有出季度數字。另外，你都可以參考返歷史嘅。例如你可以諗下，到底LV啲人工，係咪真係好受通脹影響。再講白啲，做LV嘅，唔係拎最低工資嘅人啦係咪？

100蚊淨賺你20蚊—扣晒材料租金人工利息交埋稅喎。不過愛馬士仲勁

21. 繼續睇，毛利率去到70%，純利率去到20%　—　呢個好似係史上最高嘅純利率了，真誇張，100蚊嘢淨賺你20蚊，扣晒材料租金員工利息交埋稅啦喎！不過，你睇愛馬仕仲誇，100蚊淨賺你33蚊

22. 「邊個話要好高科技？」

23. 又，第啲公司唔敢講，但對於呢啲「賣嘢」嘅公司，實情往往就係收入高毛利率純利率就高，畢竟唔少成本都仲係相對固定嘅。

半年半年睇，Asia ex Japan一命救全家。說好了的中國爆煲

24. 然後睇地理，我可以話你知，「其實好難睇」。HoH睇，當然係AXJ（Asia ex Japan，主要就係大陸）最靚，一命救全家。其他地方，好似全部半年都放慢。

第二季美國收入按年跌，其他市場雙位增長。係咪美國好唔掂？

25. 然後如果你睇媒體講，多數會聚焦於第二季美國收入按年跌，但其他市場都雙位升（亦即係上面呢個圖）。但係咪美國好唔掂？就梗係唔係咁簡單。你又順手諗下，如果換著係中國出咁嘅數，你又會覺得中國好唔掂了。

26. 於是，不如睇下按季嘅情況？睇下第二季同第一季比？

睇按季，就另一回事了。AXJ跌，美國歐洲升。咁到底邊度爆煲？

27. 好啦，按季，你見到收入差不多係零增長。最重要係，你會見到AXJ收入就跌，但美國歐洲升。好似同上面講嘅，又完全唔同。

28. 原因？當然部份係因為舊年嘅基數。但仲有好多其他嘢。例如？匯率啦，仲有，開唔開關，同埋啲友去旅行。所以你走去睇呢啲數字，去估邊度邊度經濟唔掂，就真係幾多餘，太簡化個故事了。

實呢啲地區收入數字，受好多唔同因素影響嘅。不能簡化做嗰度好唔好景

29. 咁點演繹？首先，都係睇大數好啲，因為啲人會走嚟走去。另外，咪睇返官方講法。固然可以自吹自擂，大老細亦唔會走去尖沙咀巡吉舖，「冇你啲KOL咁熟」，但都係有個譜嘅。

咁信邊個？梗係信首富。雖然佢唔會去廣東道巡吉舖。冇你啲網友咁熟

30. 你睇返大老細嘅講法，其實都係話你知見到美國放慢（但點解？佢都話唔知。不過話可能之前派錢加人工啲效應消失了），但話中國補得返。咁所以，都真係傾向話你知中國消費者OK，美國就麻麻。死未

31. 另外，佢都有提到，好多所謂「日本」嘅數，係嚟自中國　—yen平，個個走晒去買，而加價都總不能即時生效。同時間，亦有好多美國人走去歐洲買。全球化年代，真係比較難定義啲「收入」嚟自邊。可能你去歐洲門口睇下有幾多大陸人，請幾多普通話店員，會比較掌握到實情。

計數時間，4250億市值，半年85億純利。即係點？

32. 計數時間，4250億歐元市值，半年賺85億。即係25倍市盈率左右，你睇Zacks嘅預測市盈率都差不多。上面講咗，盈利增長30%，望落，唔算喪貴。

33. BTW，LV會贊助巴黎奧運，好似係史上首次。有冇用我就唔知了，甚至永遠都唔會知。

34. 愛馬士，就下篇先講。