ivanliresearch

Google Microsoft 業績。AI當然睇晶片商同數據中心。美國幾時減息？而家買定等減息先買？ (Patreon)

Published:

2023-07-28 12:16:49

Imported:

2023-09

Downloads

Download Ivan_May6th event_V5.pptx

Content

Google：期望低，之前升得少，所以業績後大升

廣告收入升得3%，低過Facebook好多，但至少扭轉之前嘅跌幅

亮點係雲計算，收入升28%，利潤遠超預期—可惜銀碼太細

幾間公司都講大力投資AI，買晶片，投資數據中心　—呢啲公司係大贏家

何謂「行業」？Facebook收入升，Google升，SnapChat跌

大公司份額越嚟越大，所以，跑贏細公司，有幾出奇？

微軟：收入增長5年嚟首次得單位數—仲唔加價？！

雲計算收入增長放慢，指引亦都比較保守

快手講下堆科技股，而家呢啲位邊隻我覺得比較好

香港拆息17年高有幾奇？美國加息加到22年高嘛！但美股都22年高！

幾時減息？你話呢？幫你睇睇

咁應該而家買？定等減息時買？你估下？

1. 上篇講咗Facebook業績，今次講Google．兩間其實都係主要靠廣告收入，不過相對地Google唔係全部靠廣告（雖然都大部份，佔收入約80%），仲有啲雲計算之類嘅。

Google：期望低，之前升得少，所以業績後大升

2. Google業績，中文呢度，英文呢度。整體亦係好嘅，收入同盈利都勝過預期。股價亦都升。當然亦因為相對地大家期望低啲，你見Google今年升幅係幾隻Big Tech中最少嘅

廣告收入升得3%，低過Facebook好多，但至少扭轉之前嘅跌幅

3. 首先最重要嘅，當然都係廣告收入。廣告收入入面仲有唔同嘢，主要就係search ad，佔咗廣告收入嘅八成幾，剩返主要係YouTube．成個廣告收入，按年升3%，不過都係好過預期，而且之前兩季係按年跌嘅。

4. 不過同Facebook 嘅雙位數增長比，就差啲了

亮點係雲計算，收入升28%，利潤遠超預期—可惜銀碼太細

5. 不過你可以話個亮點在雲計算，收入按年升28%　—　見到個增長好勁，但真係銀碼細，所以即使呢舊嘢升28%都好，因為銀碼大好多嘅廣告收入只升3%，所以成間公司收入只係升7%（畀你大約計下數，而家廣告收入581億，雲計算收入80億）

6. 另外，YouTube應該仲蝕緊錢（好多人以為好賺錢的），但雲計算呢瓣上一季已經開始賺錢。最近一季大約賺4億，比街邊預期高好多

7. 計數時間，16500億市值，一季184億盈利，22倍市盈率。著實真係唔太貴。你睇Zacks嘅預期市盈率就24倍。幾隻Big Tech中，可能係呢隻比較買得過。

幾間公司都講大力投資AI，買晶片，投資數據中心　—呢啲公司係大贏家

8. 另外好多人講嘅，AI。最重要嘅重點：Google同微軟都有提AI，但講到明，冇咁快貢獻到盈利，相反係要更多投資。仲有，Google講到明會增購AI晶片—所以你明白點解Nvidia可以升咁多。但而家咁嘅位，我就唔會買 Nvidia了。反而如果出完業績跌返三成，就可以諗下。

9. 另外，你熟嘅，可以留意下Data Center．兩間公司都講到明會加大投資。不過外國有乜股我都仲未好熟。但香港大家都知新意網（1686），以前都寫過。然後你見今年股價不升反跌的—當然留意隻嘢都幾重債，唔知會唔會減派息。但反正母公司係新地（唔重債的），負債重都唔會有任何問題嘅。就快出業績了，睇下有冇機會去直擊下。

何謂「行業」？Facebook收入升，Google升，SnapChat跌

10. 仲有留意另一樣嘢，我在Facebook都預告過，Facebook嘅廣告收入有雙位數增長，Google都有幾個% - 但你睇Snapchat，就直頭係倒退嘅。Twitter都好明顯係（已私有化），我估Pinterest都係（未出業績）。Amazon未出，未知（係，Amazon都有唔少廣告收入）

大公司份額越嚟越大，所以，跑贏細公司，有幾出奇？

11. 於是你見到兩樣嘢。第一，何謂「行業」？你話數碼廣告增長，咁就睇下你講　Facebook定Snapchat了。第二，你明顯見到大公司食緊細公司嘅份額—細公司唔止係market share 越嚟越細，直頭係分到嘅銀碼都縮咗。

12. 點解會咁？你就要問行業嘅專家了。但首先，呢個趨勢一直都係咁。亦都好符合winner takes all，幾間大晒嘅規律。仲有你可以想像，以前比較好景，息口較低嗰時，啲輸錢嘅細公司都仲可以燒錢。但到而家息口高，融資難，相信細公司係更難競爭嘅

13. 然後帶到一個點：相信好多人都聽過，美股今年只係升啲Big Tech。首先呢個講法都唔係完全啱，特別係，諗真啲，到底呢句嘢即係乜意思？（係，好多人人講嘅嘢，最好深究下係咩意思）。

14. 但總之，大型科企今年跑贏小型嘅，呢個明顯啦。當時好多人質疑，覺得個升市冇說服力。但去到呢個位你又諗下　—　例如Facebook Google之類嘅巨企，咁真係見到業務表現好過細公司喎　—　咁，股價跑贏，唔係相當合理咩？

15. 之後係微軟，中文呢度，英文呢度。實情你話好好又唔係，但好差亦唔係，不過一出股價係跌5%，都合理嘅，始終估值都唔平。

微軟：收入增長5年嚟首次得單位數—仲唔加價？！

16. 好啦，收入同盈利，都係雙雙好過預期嘅。不過收入只係升7%，5年嚟第一次得返單位數增長（不過市場一早預咗）。而我估即係微軟啲嘢好快會加價了。雲計算嗰啲嘢未必加（仲要同其他人競爭），但Office 之類，加你10%你都係照用的吧，

17. 另外留意，因為啲研發開支跌咗，所以你見雖然收入只係升7%，但盈利按年升到兩成的。以一間咁巨型嘅公司嚟講，算係相當好，

18. 另外比較多人講嘅，係佢嘅雲計算業務。當中包括Azure（但仲有其他嘢）．首先成個雲計算收入，按年升27%，但慢過上一季嘅31%。另外，只計Azure，收入增長就26%（但仲係好過預期），上季講緊27%，公司預計會再放慢。

雲計算收入增長放慢，指引亦都比較保守

19. 到底Azure嘅收入銀碼有幾多？公司從來冇講！但今次露咗少少口風，話達到成個雲收入嘅一半。而雲收入係1100億，即係Azure佔550億—留意下，Google Cloud嘅收入係80億

20. 最後，公司對下一季收入嘅指引，都係低過市場預期嘅

21. 講？其實冇乜好講，業務一向都係咁上下。又係計數時間，25000 億市值，一季200億盈利，31倍市盈率，睇Zacks嘅預期市盈率都差不多，係有啲貴的。

22. 但，業務真係冇乜大變。你而家諗返，你要做嘅嘢，係早早買定，最好唔係太貴時買定，然後往往去到唔知咩事就會升上嚟，然後市場先再搵一輪理由。

23. 最後，Visa，亦冇乜好講。中文呢度，英文呢度。整體業績麻麻地，股價都要跌（但早排都創過1年新高）

24. 公司收入同盈利係好過預期嘅，但收入增長已經係兩年最低。而且指引又比較保守。

25. 計下數，4800億市值，一季42億盈利，29倍市盈率左右，Zacks嘅預測市盈率都差不多。應該好難叫做平。

26. 結論？雖然蘋果同Amazon未出，但畀個小結論你先。大睇法都係不變，都係覺得大型科技股普遍貴，而家我未必會買，你想買就QQQ吧。反而留意下啲非科技股，或者美股以外嘅嘢。

快手講下堆科技股，而家呢啲位邊隻我覺得比較好

27. 不過真係就呢排寫過嘅一大堆公司嚟講，我會覺得現價我會諗台積電同Google，之後可能係Facebook ASML，然後微軟。NetFlix Tesla就冇乜意慾而家買了

28. 雖然，除咗台積電以外，全部我都有。但早早買咗。幾時都話需要時間。

香港拆息17年高有幾奇？美國加息加到22年高嘛！但美股都22年高！

最後快手講埋議息。今次真係最少人關心，甚至我都幾乎唔記得咗。一如所料加0.25。

29. 另外，留意呢個係22年最高嘅水平。本身冇乜特別。但兩樣嘢：首先，你見啲人講咩「香港拆息升到17年新高」（呢個係事實）—有乜咁值得討論？美國息都升到22年新高啦！

30. 第二，你見到息口升到22年新高，但美股亦差不多升到22年新高（其實係歷史新高）—你可以再諗下，記唔記得最初好多人講加息會整死股市？但你又不能話完全錯喎。舊年咪死晒。但今年反彈晒。所以首先你見到，唔使等減息唔使等停加息甚至唔使等到放慢加息，股市已經會反彈。另外，息口在22年最高水平，同股市在22年最高水平，係可以共存嘅　—　但兩年前你同人講應該冇人信。

31. 咁大家都知，睇展望。好啦，主席嘅講法，當然係比較含糊　—　一定係咁的，太早講實就好煩。佢冇保證9月唔會再加息，但亦有話停加息當然係可能。咁事實真係要睇返啲通脹數字。

32. 係即係冇講過，但市場點演繹先係重點

33. 好啦，自己上CME Fed Watch睇，我唔慢慢貼圖。順便你可以當係測試下自己睇咗我咁多文係咪學到啲嘢　—　至少識點睇啲圖。

34. 首先，大多數人（但未算絶大多數），都覺得剛剛呢次加息，已經係最後一次。

幾時減息？你話呢？幫你睇睇

35. 咁另外，幾時減息？冇乜人估今年，事實聯儲局主席差不多講明今年唔會減息。而家市場，就估出年3月，或者5月會減息。

36. 可以睇返上面呢個圖，5月講座貼的（PowerPoint都呢度畀埋你），冇嚟嘅走寶（雖然以前啲文都有）。呢個圖睇返，歷史上，最後一次加息後，幾時減息？其實係比好多人想像中快好多。平均，大約係半年就會減。事實上，咁耐亦只得一次超過9個月（嗰次係15個月）。所以，而家啲友估下年3月或5月減，都係幾合理。