今篇只講一隻愛股：Facebook，完全係照妖鏡 (Patreon)

呢期我最鍾意嘅，一定係Facebook。點解？唔係因為升得多

大半年前啲友話公司死得，今年標普500指數中，佢升幅排第二

收入升11%，好定差？　—　好過Google，好過之前6季

公司下一季收入，可能去到歷史新高。按年升20%

人地收入就快歷史新高。到底話「玩完」「冇人用」嗰啲，生活在乜世界？

答案：因為人云亦云。同埋將自己嘅wishful thinking當係事實

冇人用？Facebook嘅DAU，20.6億，好似歷史新高

如果計成個Meta集團，MAU近40億 – 地球一半人

iOS政策，的確打擊咗公司　—　但人地會克服困難架嘛！

股票如女人，投資即係做生意。不能好嗰時先飛埋去

另外留意，Facebook嘅ARPU 好高的，點解？

元宇宙仲輸緊錢，但有何問題？

留意，強勁嘅廣告收入，其中一個來源，係……中國！

25倍市盈率，還好。但，舊年單位數嗰時你又唔買？

1. 好，繼續美股業績，一定係我最鍾意嘅Facebook（META）先。結果成篇只講呢隻股。

2. 中文呢度，英文呢度

呢期我最鍾意嘅，一定係Facebook。點解？唔係因為升得多

3. 點解最鍾意？唔係我買得最多（最多係蘋果微軟），亦唔係我賺得最多。但呢間公司可以做教材，畀你見到好多關於股票嘅嘢。同埋畀你見到，好多其他人睇嘢諗嘢嘅盲點。

大半年前啲友話公司死得，今年標普500指數中，佢升幅排第二

4. 講基本嘢先，收入盈利都好過預期， 股價大升，升到一年新高。事實今年表現相當強勁，標普500指數之中佢排第二。但，大半年前，個個當間公司會執笠。有幾愚眛？

5. 而正係因為大家覺得間公司會執，先質到咁平，你先有機會平買　—　但正常人真係唔敢嘅。所以只能靠你：合埋眼買，或者有錢就買。或者買QQQ。又或者，至少做到唔買都唔好沽

收入升11%，好定差？　—　好過Google，好過之前6季

6. 留意公司嘅收入，增長11%，好定差任你講，計預期當然係好過預期。但更重要嘅係兩樣嘢。第一，呢個增長高過Google嘅3%增長好多（咪又係靠廣告）。第二，呢個係公司1年半以嚟第一次回到雙位數收入增長　—　但見到冇？股價梗係一早升咗啦。股價當然係行得早過呢啲實數。記住啦。

7. 當然你可以質疑低基數，你永遠都可以。但可以睇埋第二個重點

8. 公司指引下一季收入，好過分析員預期，股價大升。但呢度未係戲肉。戲肉，可以睇下實數。

公司下一季收入，可能去到歷史新高。按年升20%

9. 公司估下季收入320億至345億元。如果做到中上限的話，代表乜？代表兩樣嘢。第一，即係下一季嘅收入升幅，按年去到差不多20%。另外，亦即係話，下一季嘅收入，可以做到史上最高：之前最高應該一季只係336億（邊度搵呢啲數？早兩日嘅文咪教過，Macrotrends或者Yahoo Finance啦）

10. 好啦，下一季嘅收入可能去到歷史新高，咁你好難話只係因為舊年低基數啦？

11. 然後你諗一樣嘢：幾多人，話Facebook玩完？固然，呢啲人錯到九彩（當然仲有啲人係即使人地做到季度收入歷史新高，都仲會話「玩完」，正如Jeff Bezos一度做到世界首富，都仲有人質疑個business model work唔work）

人地收入就快歷史新高。到底話「玩完」「冇人用」嗰啲友，生活在乜世界？

12. 但我更加想你諗嘅係：到底啲人，點解可以咁愚眛？點解可以錯得咁交關？冇耐前佢地覺得間公司玩完。實際上間公司好快會創出史上最高嘅季度收入。

13. 特別留意，呢間唔係一間你唔知做乜，唔知有幾多生意嘅公司（例如Palantir嗰類）。呢間係一間全世界幾十億人日日用嘅公司。

14. 點解啲人都會好似活在平行時空咁？

答案：因為人云亦云。同埋將自己嘅wishful thinking當係事實

15. 答案，當然係因為偏見。可能係有人講，佢又講。亦可能係佢自己「唔鍾意」（一路又照用就一回事）間公司，就「覺得」佢會玩完。然後可能聽到啲傻仔KOL垃圾評論講，佢自然就對號入座，「係啦，間公司都玩完啦，冇晒創意，冇以前咁好玩，我啲朋友全部都用少咗，新一代都唔用」（但新一代用IG）

16. 記住啦，好多人就係咁搞笑，將佢地「想發生嘅嘢」（甚至未必真心想），當咗係「會發生嘅嘢」。

冇人用？Facebook嘅DAU，20.6億，好似歷史新高

17. 請睇，好簡單一樣嘢。Facebook嘅用戶數，DAU（每日活躍用戶）20.6億，仲係高過分析員預期的。如果我冇睇錯，好似係歷史新高　—　唔知你啲網友係活在邊個世界的。

18. 另外，如果計成個邪惡META集團，包晒Facebook Messenger Instagram Whatsapp，睇返個MAU（每月活躍用戶），講緊39億，按年升咗6%。係咩概念？即係地球一半嘅人

如果計成個Meta集團，MAU近40億 – 地球一半人

19. 補充，當然係已經計咗overlap嘅（事實好多），唔係四個平台各自嘅MAU加埋。仲有，當然係未計Threads的，雖然計埋嘅分別都應該好細　—　因為Threads暫時都只係億幾用戶，況且，照計全部都會係IG嘅活躍用戶

iOS政策，的確打擊咗公司　—　但人地會克服困難架嘛！

20. 另一樣嘢，記唔記得最初Facebook亦因為被iOS影響，搞到發晒火？大約就係IOS唔畀Facebook Track啲用家嘅數據，咁自然做唔到太過精準嘅投放，廣告客戶自然會卻步（我成日覺得蘋果一係想收Facebook錢，一係想自己做廣告，or both—見你經我部機賺得咁過癮，點會唔搞下你？）

21. 而個影響，係真係見到嘅，亦導致舊年Facebook收入放慢（然後諗下再加埋忽然重手加息，再加埋元宇宙啲燒錢嘢，幾樣嘢一齊打落Facebook度，盈利跌，估值跟住跌，所以股價高位就跌咗七八成）

22. 但想講嘅係一樣我在Facebook Page 都成日講嘅嘢：大佬，人地就係不停咁爆鑊不停咁去應戰架啦。總有解決方法。你見到而家，季度收入就可以上返新高。

23. 最初都有讀者問我，呢個IOS政策嘅影響。我話都會有相當嘅影響，但唔知幾大　—結果個影響比我想像中大好多。

24. 但想講嘅係，難道我又因為「壞消息」即時沽晒佢？你話最初爆iOS呢個限制時你即沽（我都唔記得幾時），都仲可能明智。但到你睇到收入走樣時先沽，肯定遲咗十幾拍，股價已經跌咗三四成甚至過一半。倒不如信公司，等佢克服難關吧。

25. 以前用過個比喻，非常政治不正確，但都係想講一次：股票嘅嘢，好似對女人咁。多數時間都係好可愛嘅，但有時惡起上嚟癲起上嚟，好得人驚。但，你係不能咁投機，在佢好嗰時就攬住佢，在佢唔順你意時踢走佢的。

股票如女人，投資即係做生意。不能好嗰時先飛埋去

26. 實情書展Lorey訪問我，其中一個問題（段片未出），問我「你認為投資係乜嘢」。係問得好好的，呢啲最簡單嘅問題，最值得你思考。你可以諗下，我畀咗三個答案佢。但其中一個，你應該都聽過，「咪就係夾錢做生意」

27. 咁你做生意，亦不能順境嗰時買去，逆境嗰時走咗去的。市場自然會懲罰呢啲心術不正貪小便宜嘅人。

另外留意，Facebook嘅ARPU 好高的，點解？

28. 講遠咗，講返公司。除咗用家量多，個ARPU（每用戶收入）都勁。留意，平台嘅嘢，用戶固然緊要，十分十分緊要。但例如Twitter，你會見到，用戶固然少過Facebook，但ARPU更加低　—　即係量低，價更低，所以自然數入就低一截，市值亦細一大截。兩間公司市值嘅比例，係遠超過用戶數目嘅比例的。

29. 而Facebook就係一個好能夠變現嘅平台，好識令廣告商落廣告。所以你明白點解Facebook IG嚴打種族仇恨，鼓吹自殺，同埋裸露內容（Twitter係好鬆的，你會見到啲打真軍片）—就係為咗營造一個廣告商開心嘅園地（結果卒之我都誤中流彈）

30. 我再舉一個例，雖然呢啲操作其他公司都會做。但我想講，Facebook係派咗個「客戶經理」畀我的—唔係幫我復活個 Page，係問我拎錢！正係因為我之前有在Facebook落廣告，亦可能落得唔少，所以佢地有專人照顧我。當然唔係只係照顧我一個，亦唔會係　24/7 on call．但至少佢真係隔兩星期就同我傾次電話，傾成粒鐘，主要就教我（同埋氹我）落廣告，教我點做得好啲。而我懷疑呢啲嘢都同佢地谷返個收入上去有啲關係。

元宇宙仲輸緊錢，但有何問題？

31. 仲有，元宇宙甚麼，其實仲係輸緊錢嘅。但已經無關重要。記住，炒預期。呢啲東西已經存在咗，除非忽然間再虧蝕擴大好多，否則唔會點有人理。因為而家食咗呢啲虧損，公司啲數都仲幾靚。萬一一個唔該畀佢打和，甚至賺錢，仲得了？又或者，到有一佢斬停呢啲嘢，相信對股價都會好嘅。

32. 記住，不能將啲已經發生晒反映晒嘅嘢不停咁當係「負面因素」。第一日先知咩？

留意，強勁嘅廣告收入，其中一個來源，係……中國！

33. 最後仲想講一樣嘢，Facebook嘅CFO有提到，啲廣告收入，主要由乜帶動。你可以估下。第一樣係網購平台，冇乜特別。第二樣係，中國。

34. 下？

35. 係。好多人都唔知，Facebook有相當多嘅收入，係黎自中國嘅。

36. 想講一樣嘢，亦都有好多人鍾意自作聰明，以為因為入唔到大陸，Facebook冇中國業務（唔計香港啦下，唔好煩）。絶對錯。

37. 固然個個都翻牆，但呢個都唔係重點。重點係，好多中國公司會落廣告去吸海外客嘛！咁都唔明？大陸係冇乜用家，但，用家根本唔係畀錢嘅人。「生意」係嚟自落廣告嘅公司，而佢地嘅客戶，可以唔係在大陸嘛。

38. 呢個我以為係好簡單嘅常識。但你見到，好多人係冇嘅。

39. 事實上，同我合作作嗰幾間大陸券商，有啲同我接頭嘅根本係在大陸嘅大陸人。但佢地照用Whatsapp 同我傾計，佢地做Promotion亦都照用Facebook IG

40. 最後，數字時間。Meta 8000億市值，一季78億盈利，咪25倍市盈率咁上下。你上Zacks搵預期市盈率都係差不多。還好。我覺得仲係可以買的

25倍市盈率，還好。但，舊年單位數嗰時你又唔買？

41. 不過你真係可以計返，股價在低位嗰時，真係單位數市盈率　—　係曾經有平過的，但真係好難嗰啲位買。所以都係嗰句，最好梗係壞消息時買，但比較現實就係冇乜消息時買。好消息先買，就最易摸頂。搞唔掂嘅，有錢就買股票，或者每月定期買。再搞唔掂嘅，QQQ算。