Netflix同台積電業績。非廣告，但合資格讀者，記得認購政府銀債 (Patreon)

NetFlix上客量同盈利都好過預期，點解股價大跌？

客量升8%，但收入只升3%，點解？

近排荷里活編劇同演員罷工，有乜影響？

Netflix都30倍市盈率，但照計有加價空間？

台積電，盈利四年嚟第一次倒退，調低展望。又話AI好景晶片好景？

AMD話會分散，想減低倚靠台積電，玩乜？

驚打仗所以唔買台積電？你話呢？

Unpopular opinion：你係唔使去諗「地緣政治」嘅

非廣告（我使？），真心推介合資格嘅讀者認購銀債。

好過做定期甚至買美債。門檻低，5厘息，3年，仲要實派到，冇任何風險

如果加息？中途可以掟返畀政府！呢個期權無敵

不過介紹返，冇二手市場。但又唔怕「穿底」了

「香港政府冇錢走去借老人家錢」

小小技術故障，結果昨晚出唔到到呢篇

1. 之後到Netflix，高位跌七成，然後彈返130%。又係有數計到，即係離高位仲有三四成。不過，可以講嘅係：我就剛剛回家！

2. 業績中文呢度，英文呢度，市場評價都麻麻。但當然之前亦升咗好多。 股價插咗兩日，十幾%（但都回穩咗）

NetFlix上客量同盈利都好過預期，點解股價大跌？

3. 你睇盈利係好過預期嘅，不過收入差過預期，而似乎多數人都會留意個收入多啲。咁仲有，有留意呢間公司嘅，都知道啲人最關心嘅唔係收入同盈利，係上客量。結果今次個上客量，都係高過市場預期好多。雖然，股價都係照跌。

客量升8%，但收入只升3%，點解？

4. 上客量升到8%，一個好主要嘅原因當然係因為打擊啲人share password．問題嚟啦喎，咁點解上客量高過預期，收入低過預期？又係啲「價錢」累事。睇實數，總客戶按年升咗8%，但收入只升3%．似乎係在某啲地方減咗價的（但當然有啲市場加價），當然公司亦講到同匯率有關（所以，根本你間公司做得全球生意，就會有匯率風險，唔好自欺欺人），仲有，公司嘅未來指引，亦係比較保守嘅。

近排荷里活編劇同演員罷工，有乜影響？

5. 業務？其實都冇乜好講。不過反而想分享少少好似離題嘅嘢：近排咪話荷里活演員同編劇罷工嘅？

6. 我型住咁玩法，就只會益咗三樣嘢，亦即係三樣唔使用「荷里活演員編劇嘅嘢」—首先，就係拍韓片韓劇（日本泰國都得），平好多，啲友冇咁煩。仲有，Facebook都有寫，就拍多啲「動畫」之類，你整件勞蘇，整個阿愁，又可以賣公仔，勞蘇阿愁又唔會扭計要加人工，又唔怕OT，更唔會出post鬧你無良。第三，就係啲輕紀錄片，你見Netflix好多的。

7. 當然了，動畫紀錄片，都係要編劇嘅，都係要動畫師之類。但人數少好多，同埋都真係冇啲頂級演員咁煩咁貴。

8. 有乜投資啟示？未必直接有。但可能呢啲對NetFlix都係有利。仲有，你真係好爛賭嘅，留意下啲韓國製作公司，雖然都升咗唔少。我亦未必得閒去睇。首先唔識韓文，二來買唔到韓股（但之前講嘅Boom戶口好似買到），三來好似之前都升咗唔少。

Netflix都30倍市盈率，但照計有加價空間？

9. 又係睇估值時間，市值1900億，一季純利15億。30倍市盈率左右，係咪好貴？又唔係極誇張。（不過預期市盈率去到36倍）。不過客戶增長，似乎真係有限。但見到而家成熟咗，啲成本係冇再不停上嘅。

10. 雖然我個人認為串流有好大加價空間，戲院睇場戲都舊幾水，串流一個月任睇，又唔使啲麻煩友嘈住，仲可以睇住做其他嘢。啲小朋友，冇Netflix會死的。又睇下我估計正唔正確

台積電，盈利四年嚟第一次倒退，調低展望。又話AI好景晶片好景？

11. 台積電，股價大約高位跌四成，然後升返五成咁。當然了，跌四成升五成你都仲係要輸錢的。但見隻嘢高位真係跌得少（雖然另一個角度睇，你見到好無敵嘅公司都可以高位跌四成）

12. 業績中文呢度，英文呢度。本身嘅數係好過預期，你計收入同盈利都高過預期（雖然四年嚟第一次倒退），但出面反應亦係麻麻。主要係個展望麻麻地。原本已經預營業收入跌1-6 %，新指引係跌一成。下一季嘅收入指引亦都低過市場預期，毛利率指引亦係低過預期。

13. 喂，「又話AI好好景」？Again，其實我唔知啲人講「晶片行業」，即係講乜。之前寫ASML都寫過，晶片需求係疲弱嘅。直接啲講，主要只係Nvidia嗰啲東西供不應求。其他嘢？啲consumer electronics麻麻地，即係乜？手機，電腦之類。

AMD話會分散，想減低倚靠台積電，玩乜？

14. 另外仲有單花邊，AMD打算分散生產，降低倚賴台積電。固然呢啲諗法好合理，差不多你做所有行業都會咁諗，全部靠一間公司，佢有乜事你咪跳樓？但當然都係引發無窮聯想，包括嗰啲認為好快打仗嘅人。

15. 不過又計下數，一季賺58億美金，市值4800億左右。20倍，就好似唔算十分之非常貴的（話時話，台積電因為美股同台股唔同價，所以計數有啲煩的，大約吧）

16. 所以，成堆科技股中，我有新錢，就可能會買呢隻。

驚打仗所以唔買台積電？你話呢？

17. 但又話時話，真係擔心打仗唔買台積電？咁莫非你覺得解放軍會收復台灣？呢個問題我都冇答案，但純思想實驗：如果你覺得解放軍會打輸嘅，咁，你唔使點擔心台積電。咁如果你覺得解放軍會打贏嘅，你唔敢買台積電，「但照計你唔會怕買中資股」，但照計而家叫你買港股，十個有九個都耍手擰頭啦係咪？你買都頂多買香港公司，或者太古匯控。

18. 好啦，認真：我上面寫嘅呢段嘢，其實係好有問題嘅。純粹做個錯誤示範。你可以諗下點解不能話「覺得解放軍打輸就唔怕買台積電」「而覺得解放軍打贏嘅，就唔怕買中資股」。

19. 成日都寫，唔使學啲網友咁，維園阿伯上身。更加唔好直線思維，如果咁咁咁，就即係咁咁咁。首先，咩叫「打贏打輸」，都唔係呾易解。解放軍打輸，不代表台灣或積電唔會被重創。同樣地，解放軍打贏，亦不代表中資股有運行（實畀人重手制裁一輪喎）。

Unpopular opinion：你係唔使去諗「地緣政治」嘅

20. 呢幾段真係純屬廢話。但無非想說明一樣嘢：你係唔應該去諗「會唔會打仗」，更加唔應該用你自己嘅猜測（或其他「專家」）嘅清測去做投資決定。如果「有機會打仗」係你唔買台灣股嘅理由，根本過去廿年（since李登輝）你都唔應該買台灣股，但結果都係升咗唔少。唔通我因為「覺得會打仗」就年年沽空台股？於是你見到，啲「地緣政治」分析，拎去投資，會有乜問題。「專家」可以不停錯，今年唔打下年打，但你副身家就唔會呃人。

非廣告（我使？），真心推介合資格嘅讀者認購銀債。

21. 另外快手短打，銀債。未開始認購（28號），遲下得閒先詳細寫，但好可能唔得閒，反正我又未夠資格，多數讀者都未夠（但可以借屋企人嘅身份嘅）。但一如以往：合資格嘅讀者，記住買呀！（我估係有少數60歲嘅讀者嘅，我都45）。

好過做定期甚至買美債。門檻低，5厘息，3年，仲要實派到，冇任何風險

22. 詳情遲下講，但一句：門檻低，5厘息，3年，仲要實派到，冇任何風險（係咪你想話我知香港政府破產？你打算賭幾多？請PM我。一賠十又點話？），仲要中途可以掟返畀政府。（其實唔止5厘，5厘係保底。理論上佢跟香港CPI，咁CPI唔夠5%，佢都照派5%畀你。當然你話3年後嘅嘢難講，可能之後CPI高過5%，咁你最後就收得多過5%添。但總之，5%係最起碼你一定收到的）

23. 你話，咪同做定期存款差不多？都唔係，係著數過定期存款唔少。首先唔同你計政府必定派到，定存都仲有少少機會銀行執笠（有啲小朋友真係覺得政府會派唔到錢，但銀行就仲安全，隨你）。

24. 問題係，銀債1萬蚊入場，銀行你1萬蚊，點會做到5厘？況且，銀行做定期存款，你拎到5厘都好，點會畀你做3年？（事實上銀行定期好少超過一年）。

如果加息？中途可以掟返畀政府！呢個期權無敵

25. 仲有，世事無絶對，你話好多人估減息所以應該鎖定啫。但你一樣可以話，可能大家錯呢，可能之後加上10厘息　—　咁我鎖定5厘咪好蝕？咁理論上是的，但，一來冇得輸打贏要啦，「如果減到零息又點計」。二來，呢啲問題，你做定期都會面對。

26. 但最重要嘅係：銀債嘅case，你係可以質返畀政府的！原價。連埋啲應收嘅利息按比例（因為債券唔會除息，呢啲技術嘢以前債券101寫過。啲友寫嗰時又話悶又要鬧，然後又要問）。

27. 亦即係話，真係加到10厘息，你覺得鎖定咗蝕章（絶對係）—咁你咪隊返畀政府，然後拎舊錢再去出面做定期買美債乜都好。但你做定期，就冇呢回事，提早完，當然要罰你，否則銀行做仲做生意？（係喎，政府就係唔使做生意的，明益你，或者你當維穩，乜都好）

28. 當然仲有，一個唔該香港CPI真係高過5%，咁你銀債就再收多啲，定期存款就冇呢回事。

不過介紹返，冇二手市場。但又唔怕「穿底」了

29. 呀都講埋，銀債，就不同iBond，冇二手市場。等錢用咁點？咪話質返畀政府咯，唔會走你數嘅。但又不過，亦即係即使之後加到20厘息都好，都唔會出現隻嘢「跌破面價」（iBond試過啦），然後啲傻仔又一個二個喺度嘈又話政府昆人又話蝕錢之類嘅鬧劇。

30. 拿，穩穩陣陣3年15厘息呀下。上限做到100萬（但照計派唔到咁多，我估　end up你只係分到10萬至20萬）。

31. 拿，支持政府嘅，記得抽，搞活香港債券市場。反政府嘅，更加要抽，食窮佢，拎返自己嗰份。

32. 我覺得，「其實我應該入政府做推銷」

「香港政府冇錢走去借老人家錢」

33. Last butt not least，我唔知你會唔會聽到又有「朋友」話，「香港政府冇錢走去打老人家主意」。有咁嘅朋友，「最好疏遠佢」。

34. 因為好簡單一樣嘢：香港政府發債，都肯定唔使5厘息。仲有，香港政府，負債1.5萬億。「呃你嗰500億銀債嚟填真係浪費時間，息都未夠畀」