美股數據邊度搵。ASML 同 Tesla業績。要減價嘅公司，係咪值得咁高市盈率？ (Patreon)

資源共享：美股數據邊度搵

ASML：收入盈利都好過預期　產品供不應求　調高展望。但都係跌

30幾倍市盈率，算唔算好貴？永遠冇答案。但可以留意下個增長

明明話晶片需求疲弱，但ASML啲機供不應求。咁到底，咩叫「行業」？

Tesla：收入盈利都高過預期，但股價績後大跌

交付量升80%，收入只升47%。咁固然因為減價，但減價有乜問題？

70幾倍PE，仲有幾多上升空間？「以前都係咁」。但以前還以前

要減價嘅公司，護城河有幾強？又值唔值得咁高市盈率呢？

一個傷心嘅故事：2016年我買過Tesla

Amazon呢？都係減價頂爛市喎

1. 好，繼續美股業績，今日先重頭戲。四間科技公司，ASML，Tesla，Netflix，台積電。頭三間有買，台積電都有諗。先講ASML 同Tesla

2. 要講結論嘅，其實頭三間都唔平，特別係Tesla。台積電反而可以考慮。另外，畀我揀嘅，可能Tesla係我最唔願意持有嘅一間。不過不代表我會沽，只係話你知真係拎支槍指住我，三間揀一間沽，我會揀Tesla沽走（但既然冇槍，當然就唔沽）

資源共享：美股數據邊度搵

3. 另外，資源共享。想搵市值嘅，好易，一般報價或Google都有。想知公司啲收入盈利嘅，如果睇遠嘅，MacroTrends，免費。近嘅，Yahoo Finance或者WSJ（唔肯定要唔要畀錢）都幾好，況且有詳細Breakdown，但得近幾季近幾年。一般一係你計T12（過去12個月），一係計最近一季或半年去年度化。

4. 如果想玩到預測市盈率嘅（即係市值除2023年預計盈利），其實免費source都有嘅，Zachs之類都應該有。正式嚟講係應該睇預期市盈率會好啲。可能我以後都直接用預測市盈率算。

5. 先講ASML，之前高位跌一半，之後彈返六成，但當然離高位仲歷史有啲距離。記住，跌一半之後彈六成，都係輸兩成。但我當然唔係高位買。順手講，差不多所有科技之前都係呢個「大跌後大升」嘅模式，但幅度有啲唔同嘅。ASML高位跌一半，算係相當硬淨。

ASML：收入好過預期　盈利好過預期　產品供不應求　調高展望。但都係跌

6. 業績中文呢度，英文呢度。整體係相當唔錯，純利升38%，好過預期。收入都升27%，亦好過預期。仲有，上調咗全年預期，收入預升30%，之前指引係25%。

7. 不過，你見一出業績，股價即插5%（其實又唔係好多，咁都受唔到嘅，就不如買SPY算，雖然有時都會一日跌5%）。但都好快又企返穩。

8. 又大約睇下估值。2900億美金，一季純利21億。就咁年度化，35倍市盈率。當然你可以話有增長嘅，之後兩季可能唔止21億。

30幾倍市盈率，算唔算好貴？永遠冇答案。但可以留意下個增長

9. 呢個市盈率叫貴定合理（怕且好難叫平）？照舊，永世冇答案。不過以前寫過PE/G，市盈率同增長比。咁你見到，佢啲純利都仲可以按年升三四成。全年收入指引亦估升三成，而因為冇乜直接競爭對手，所以好少會減價，純利率一般都比較穩定。既然有三成增長，35倍市盈率，又好似唔係極過份（但當然都係貴貴地）。

10. 又，你睇預測市盈率嘅，32倍，都唔爭好遠。都合理，因為而家已經出咗半年數（所以嚴格嚟講，啲人睇2024市盈率）

11. 結論？冇架。呢啲位買當然好雞肋，但我亦唔覺得真係去到「完全不能買」嘅水平。不過，如果本身都多科技股嘅，諗其他嘢吧。「之前你又唔買」？但你見跌一半時又更加冇人敢買，永遠係咁。

12. 仲可以講幾樣嘢，首先，公司啲光刻機照樣係供不應求。同時亦話對中國嘅出口禁令，冇乜大打擊　—　不過我係半信半疑嘅。美國遲下應該會再收緊，以前只係頂級型號唔畀賣，遲下就次級啲嘅都唔畀。你睇公司都有講，業績強亦唔多唔少因為中國買家提早買定。

明明話晶片需求疲弱，但ASML啲機供不應求。咁到底，咩叫「行業」？

13. 仲有，你會見到有啲傳媒提到全球晶片需求疲弱（應該主要係智能手機，陣間講台積電都會講）—咁但問題又來了。ASML AMD Nvidia之類升到癲。所以，到底咩係「行業」呢？到底係晶片寒冬定晶片荒，拗一大輪，對你投資到底有乜幫助？

Tesla：收入盈利都高過預期，但股價績後大跌

14. 好多人鍾意嘅Tesla，留意股價之前高位跌咗七成，然後彈返150%　—　但當然了，仲係低過最高位兩三成。亦可以留意，往往係啲高估值嘅股票，就會在大跌市中跌得多（但當然有啲例外，例如你見META，之前估值唔係痴線地貴，但一樣跌七成，因為業績真係曾經比較大走樣）

15. 業績中文呢度，英文呢度，業績其實肯定係好嘅，根本收入同盈利都高過預期，但市場反應相當差，股價插咗兩日，十幾%（但都回穩咗）。我又覺得都有理由。

交付量升80%，收入只升47%。咁固然因為減價，但減價有乜問題？

16. 收入實情升到破紀錄嘅水平，250億，按年升47%。但留意佢嘅交付量，係升咗83%。咁你估到了，收入=價X量。量升83%，但收入只升47%，即係啲平均售價都跌得幾勁。

17. 固然你個 product mix都有影響，例如可能舊年賣得多貴型號。但大家都知，其中一個原因，就係因為減價。

18. 大家最關心，就係減價對佢毛利率嘅影響。而家跌到得18.2%，舊年係25%，最近嘅毛利率亦係4年新低。

19. 而Elon Musk亦講到明，如果經濟不景，繼續減價（當然呢個「如果」未必好大機會出現）

20. 計數時間，8000億市值，一季純利27億。年度化計，市盈率，七十幾倍（預期市盈率都一樣）

70幾倍PE，仲有幾多上升空間？「以前都係咁」。但以前還以前

21. 唔敢話實爆煲，亦都可以講之前仲貴，我亦都之前錯誤咁質疑過（正係好多人質疑而唔死嘅嘢，先升到喪。例如十幾廿年前嘅Amazon，仲有之前嘅Netflix，Tesla亦係咁，三間公司都係狂燒錢，負債勁，幾乎以為會死）

22. 不過，真係以前還以前，而家還而家。首先，其他對手都會追上嚟—咁呢句本身原本係廢話，幾年前講一樣啱。但好現實嘅係：而家你見到毛利率跌，要減價，就見到個威脅真係出現。

23. 另一個問題係：間嘢而家8000億市值，仲有幾多上升空間？一樣，呢句嘢本身，不能奉為鐵律。五六年前你都可以話，「蘋果1萬億市值，仲有幾多上升空間」？—結果升到3萬億。

24. 但我仲想講，睇下市值排名，Tesla 排第六。頭五呢，不難估，蘋果，微軟，Google，Amazon，Nvidia。Tesla後面係Meta （姑且唔計巴郡，況且唔係科技股）

要減價嘅公司，護城河有幾強？又值唔值得咁高市盈率呢？

25. 我想問一個問題—你有冇聽過呢堆公司減價？蘋果微軟有冇減價？冇噃。Google Facebook呢？都近乎冇—固然佢地好多服務免費，但嗰啲係用嚟吸user base　—　Google Facebook對落廣告嘅客戶，就好少會有得減價。又或者，YouTube premium之類，都係加價嘅。

26. 減價有乜問題？好啦，去過下講座嘅，一定會聽過我講「護城河」。一如好多嘢，好虛幻。但一般嚟講，有護城河，就係避免到紅海，大家鬥平。愛馬士就唔會減價，Nvidia ASML都唔會減價。

27. 咁唔係話Tesla「冇護城河」—實情應該戒絶咁二元思考。不過，諗真啲，個護城河係咪咁強？好似弱過其他同等市值嘅公司吧。況且，估值亦相當誇張。所以我就話，成堆科技股，迫我套現一隻，我會揀佢。掉轉講，我最唔會推薦嘅，係呢隻。

28. 但再講一次，我冇話過沽！亦不打算沽。雖然話說回頭，2020年喪炒佢入標普指數嗰時（自己搵舊文，2020年12月的），我都買咗。後來升咗成倍，亦高位沽咗一半，所謂「拎返個成本」。而家剩返嘅，就有得佢　—　留意呢個動作我都少做，證明由頭到尾我對間公司都唔係極有信心（但佢可以照升就另一回事，我冇話我一定啱）。

一個傷心嘅故事：2016年我買過Tesla

29. 然後仲可以講件傷心事：我在200蚊左右買過Tesla。你心諗，唔係好多之嘛，而家咪又兩百幾蚊  —我想講嘅係，我係在拆細前（好似拆上拆添？）。即係2016年左右。升咗幾多倍？十幾倍！慘無人道呀。

30. 所以你大約明白，點解我真係唔會「食糊」，點解我係偏向「寧願輸錢都唔想沽咗啲之後掂嘅公司」。

31. 咁嗰時又沽？就係做錯決定咯！亦係因為等錢用。同埋亦因為轉工之類嘅麻煩嘢。唉。

32. 十幾廿倍呀！唉！然後你諗下，一隻20倍股，可以頂幾多隻冇止蝕輸錢嘅股票？（況且，冇止蝕嘅，未必仆直，可能之後都爆升。死，亦未必係total loss）

33. 唯一安慰自己，當時唔算買咗好多，「四五萬港紙之嘛」，「即係我贏少六七八十萬咁咯」，唉。但相信，呢啲故事你都會有

Amazon呢？都係減價頂爛市喎

34. 順手一講，咁Amazon呢？我都唔知！但有冇減價？好似都冇。固然佢做免運費之類，但純係以本傷人，令到冇人競爭到。Amazon Prime之類，應該冇得點減。況且，佢嘅「網購本業」一向都唔多賺錢，甚至蝕錢。係靠AWS（有冇減價？都有可能嘅），仲有Prime 嘅收費（留意有啲似Costco），同埋　—　廣告。所以佢亦有少少似Facebook Google．至於佢收啲商家嘅錢係加價定減，我就真係唔知。

35. 所以，Amazon亦係一間我唔係好識睇嘅公司。不過至少客觀上，佢做到咁爛，令到競爭對手死晒，然後可能諗其他嘢搵錢。Tesla即使減價，都做唔到呢個效果嘅。

36. Tesla嘅故事太傷心了，下篇先寫Netflix同台積電（講笑啫，因為篇文太長了。下一篇會出埋）