納指權重調整。美股業績一堆（美銀，嘉信，大摩，高盛，AE，雅培，強生）。價值股開始跑贏增長股 (Patreon)

記得Like新Page「金融肉骨茶」meatbonetea。IG/Threads @ivanliresearch

納指權重調整，結果市況都幾靚。但其實有乜調整咗？

到底有冇拖低到科技股股價？

有邊啲公司權重升咗？

Nvidia出業績後，無論升25%定跌25%，都唔影響我決定

今個星期看點：聯儲局議息，同埋科股巨企業績

金融股業績：美銀，Charles Schwab

投行：摩根士丹利同高盛差天共地，到底乜嘢係「行業前景」？

American Express：同Visa Master有乜分別　？

Healthcare：Abbott同Johnson and Johnson　大升

結論：價值股開始跑贏增長股

1. 呼，幾日冇出文（其實中途有星期六日嘅），我回來了

記得Like新Page「金融肉骨茶」meatbonetea。同埋IG/Threads @ivanliresearch

2. 多謝大家，新Facebook Page嘅進度不錯，咁令我安心返。唔只係錢，亦係涉及冇癮。所以之前幾日完全專注去搞（同埋去書展簽書）。而家情況還好，會出返Patreon。雖然呢個星期未必保證日日有文，但8月會回復正常了。

3. 未like新Page嘅，記住去。「金融肉骨茶」，meatbonetea。　https://www.facebook.com/meatbonetea

4. 另外，都可以follow埋我嘅IG同埋 Threads，ID都係@ivanliresearch．內容同Facebook Page一樣，不過睇埋IG同Threads就肯定冇咁易miss post．另外仲有一個特別作用：有時我Facebook嘅文會排時間出，例如我瞓之前會排定兩三篇文。但IG就全部即出的（因為IG好似冇得排時間）

納指權重調整，結果市況都幾靚。但其實有乜調整咗？

5. 首先，早排唔少人講嘅納指權重調整，我都寫咗。呢啲就唔係陰謀論，或將啲政治事件無限放大。但嗰時都寫過，實際影響有幾大？

6. 而家都係唔係好答到你，但可以話，不經不覺咁完成咗，甚至無人關心。Facebook都有貼呢張圖。呢張圖係上星期五，即係「大執位」嗰日。你睇嘅重點其實係Volume Ratio，即係當日成交，同平時平均成交嘅比例。鍾意睇「異動股」嘅可以留意下。又，呢個Excel我係attach埋畀你的。

7. 咁見到上星期五，的確啲科技股成交比平時多一截。但算唔算好多？就見仁見智。都係平時一個double咁上下。印象中同港股恒指或MSCI指數換馬時嘅異動爭好遠。

到底有冇拖低到科技股股價？

8. 至於你睇股價？冇錯見到啲大科企係跌啲。但，亦唔算多。而最後納指亦只係跌0.22%。況且，啲科企係「因為」權重調整洗牌而跌，定其他原因（例如呢排業績），都說不定。但當然了，成交咁多，就應該真係同個權重調整有關

9. 結論？根本係non event．當然你去關心都係好嘅，亦係值得你關心嘅嘢。但切忌自己嚇自己，兩嘢又走去清倉。然後之後又可能好一排都唔買返　—　清完倉大跌固然覺得逃過一劫，清完倉大升又覺得蝕底。

10. 所以，老規矩，心要定。嘢我可以睇好多，關心好多，但唔會影響點影響我嘅決定。同埋，都係stay invested

11. 講咗咁耐，到底最後個權重調整？變咗乜？係有嘅。呢度貼埋畀你，有篇文講。但你真係發現冇乜人關心。因為真係唔係好關事。

有邊啲公司權重升咗？

12. 呀，想再睇詳細啲，台灣媒體都有報。權重升得最多嘅，係博通Broadcm、Adobe、百事可樂同埋Costco．Costco我係有嘅，上星期五都冇為意，但事後睇返，唔怪得嗰日成交大升（可惜冇cap圖）。都係睇個Excel Volume ratio見到，星期一升到1年新高了。但事前冇乜人估到佢係權重升得最多，你亦好難話係「因為」呢樣嘢升。

13. 講到「唔會影響我決定」之類，以前都提過，莫講話俄羅斯兵變（記唔記得嗰時個個講到好大件事？「投資要關心地緣政治呀」。但，咁關心架咩？），都話聽日解放軍攻台我都照買美股（不過如果真係發生，港股日股台股就不了）。

Nvidia出業績後，無論升25%定跌25%，都唔影響我決定

14. 另一種示範，就係「業績」。例如嚟緊啲業績，我可以話定你知，Nvidia 之類，出完業績，升20%又好，跌20%又好，我都係唔會沽（亦唔會加注住）。講真，你諗真啲，其實對你有乜影響？而唔係憑空想像，我說到做到。上次Nvidia 業績後一日升25%，我都冇沽。正如舊年Facebook Netflix之類，一出業績跌 25%，我亦冇沽（不過亦唔敢加，況且當時開刀，冇錢）

15. 同樣地，上星期Netflix Tesla，都係一出業績就跌10%，但我都乜反應。當然亦因為我啲嘢夠分散。

16. 所以，就可以講下啲業績。

今個星期看點：聯儲局議息，同埋科股巨企業績

17. 今個星期，兩個重點。第一，聯儲局議息，加息0.25就肯定。圖我都費事貼。留意5月都食過一次詐糊，好多人都以為係最後一次，包括我。今次呢？前主席都係咁講，估係最後一次　—　咁不代表一定真係最後一次，只係到時真係又食詐糊嘅，「車，前主席都錯啦，你叻過佢咩」。

18. 正經，其實加多一次，同兩次，到底有乜分別？應該係冇乜嘅。

19. 今個星期，繼續睇業績，差不多去到尾聲。但留意蘋果要去到8月頭，Nvidia會去到8月尾。不過正路地，蘋果之後，大家就當個業績期「完」

20. 今個星期當然係重磅科企，星期二微軟Google VISA 仲有LVMH．星期三有Facebook同可口可樂。星期四係Amazon同愛馬士。我都未必睇得晒咁多隻，亦未必得閒寫晒，盡量。

21. 然後，可以講返上星期嘅一堆業績。照舊，畀埋中英文嘅報導你。當中ASML，Tesla，Netflix三隻我會講得詳細啲，大科企，而且三隻都有。仲有，台積電都會講詳細啲，未買，但有諗過，亦有唔少讀者有買。

22. 所以，速寫咗啲冇咁留意嘅。呢四隻聽日先講

金融股業績：美銀，Charles Schwab

23. 先講銀行股，美國銀行（中文，英文），幾好的，收入盈利都好過預期，股價亦升。原因都係嗰幾味，最主要咪因為加息有利淨利息收入，你見到好顯著的。

24. 不過一路都冇買，實情一路我只係買JP Morgan．但你見今年股價表現最好就係佢，又再一年新高了。實情搞咁多嘢，不如有大買大，同埋我信Jamie Dimon。就只係咁。你花太多時間係咁啄個Balance Sheet，實情係浪費時間的（當然你嘅工作係做呢樣嘢就例外，用嚟搵錢嘛）

25. 另一間唔係銀行，係券商。Chares Schwab，嘉信（中文，英文）。業績十分強，好過預期好多，股價大升。但其實之前今年跌咗三成！大幅跑輸，然後業績後升返一成多啲咁。點解之前咁差？因為受累於嗰時SVB爆煲，嘉信啲客都係咁拎錢走。好似已經定咗落嚟了。無論如何，從冇打算買，得個知字。

投行：摩根士丹利同高盛差天共地，到底乜嘢係「行業前景」？

26. 另外，投資銀行兩間。首先係「大摩」摩根士丹利（中文，英文）。業績相當好，收入盈利都好過預期，股價亦單。但主要嚟自財富管理業務。留意「大摩」比較多投行業務，本質上同美銀或JP Morgan有啲唔同。

27. 話時話，叫「大摩」唔係好專業，行內人唔會咁叫，我就唔會咁叫的。而其實「大摩」嘅市值只係「細摩」JP Morgan嘅三份一。

28. 另一間投資銀行高盛Goldman Sachs（中文，英文），業績就唔得。收入好過預期，但盈利差過預期。留意啲交易收入都係唔得嘅，上次講過市況好投資銀行嘅交易收入反而唔好。另外仲有啲一次性減值咁，不過股價都微升。

29. 呢隻曾經買過，好多年前了，後來又係因為啲原因（等錢用！）沽咗，都係後悔嘅。事實上，過去十幾廿年，任何位沽美股，都應該係後悔嘅。

30. 又，同樣係「投行」，你見業績表現都可以好唔同。所以我到而家都覺得啲人講「行業前景」，係有啲奇怪嘅。你睇Nvidia，台積電同ASML嘅例子都會見到

American Express：同Visa Master有乜分別　？

31. 另外講多隻金融股，美國運通American Express（中文，英文）．係麻麻地嘅，收入低過預期，盈利好過預期，另外啲撥備大升。股價要跌。又，我就只係有買Visa．不過可以留意，Visa同MasterCard就真係差不多一樣嘅業務，但American Express係有啲唔同的。例如American Express應該係有間銀行，所以先有咁大撥備（亦因為佢會直接借錢畀你）。但Visa Master之類，就真係齋中間人，一般借錢畀你嘅係銀行，你唔找數都唔關Visa Master事。咁好難就咁話邊個業務模式好啲，但真係有啲唔同。

Healthcare：Abbott同Johnson and Johnson　大升

32. 上星期其中一隻焦點股，雅培藥廠Abbott（中文，英文）。留意之前市場期望相當低，因為疫情過去，公司啲快測產品收入大跌。但結果業績依然好，因為啲醫療器材銷受勁，股價係大升嘅

33. 最後，曾經講過下又諗過下買，但好耐冇講嘅一隻股，Johnson and Johnson（中文，英文）業績非常強，收入同盈利都好過預期，仲調高埋全年指引，股價大升。

結論：價值股開始跑贏增長股

34. 下一篇先講ASML Tesla Netflix 台積電。但整體你見到，普通非科技股嘅業績，好過科企股。或者你可以話對科技股嘅預期太高。又或者甚至根本科技股都唔係特別差過預期，但估值太貴。咁你見好多，出完業績，好定唔好都跌。

35. 然後你可以望下呢排，IWD（價值股）明顯跑贏返IWF（增長股）。亦唔知會維持幾耐。不過我嘅睇法都係一樣，新錢嘅，我會買啲非科技股，或者其他市場。

36. 但最後補一句。暫時見Tesla Netflix ASML呢啲，冇錯係出完業績急跌，但好似只係一兩日。就似乎唔係好大嘅調整，你甚至見到納指都唔係點跌。高位只係回咗5%都唔夠。