非常重大版務：請like新FB Page 「金融肉骨茶」@meatbonetea．另外嚟緊一星期未必日日有文。ARKK 成立至今升但買嘅輸錢，點解？國泰盈喜，居然因為大陸注資救國航。另外介紹下咩係聯屬公司，咩係優先股，仲睇返最初香港政府個救亡計劃（其實幾好） (Patreon)

重要版務：請like 我新Facebook Page 「金融肉骨茶」。@meatbonetea

亦因為咁，嚟緊一星期未必日日有文。但我已經ahead of schedule

但其實，你應該早早買齊貨等升浪。真係唔使我日日指點迷津吧？

案例：ARKK 一年升10%，Cathie Wood賺幾十億，但買嘅輸幾百億

你要嘅係「走在市場前」，唔係「隨機應變」

舊聞研究：國泰293盈喜，但其實，做乜賺咁多錢？

一大舊盈利，嚟自國航753發新股。點解咁都有盈利？（仲要國泰冇份）

國航係國泰「聯屬」。但其實咩叫本業？睇下　長實和黃嘅例子

國航輸錢累國泰，但國泰又累返國航啫！唔使分咁細！

仲有，國泰會贖返優先股。點解？因為高息。點解咁設計？咩係優先股？

睇返其實嗰時政府個deal，都真係有用下腦，都唔係真係咁廢嘅……

重要版務：請like 我新Facebook Page 「金融肉骨茶」。@meatbonetea

1. 首先，應該係Patreon讀者最先知。我個Facebook Page會搬了，9月就唔用舊Page。Follow 開舊Page嘅，請去Like 新Page．「金融肉骨茶」，@meatbonetea

https://www.facebook.com/meatbonetea

2. 而即使冇like 舊Page嘅，都請你務必要去like個新Page．谷人數又好，又或者幫我開好個頭。

3. 定位同舊Page完全一樣，但之後唔用舊了。點解開新？聽日我嘅Facebook Page會解。短答案：講錯嘢，畀人禁咗，壓到reach好低。

4. 而未來呢個幾日，甚至一個星期，我都會專心去處理個新Page．都好多嘢搞，出新文啦，落廣告啦，通知朋友啦，傳媒呀，客戶啦，各樣嘢。

5. 無論如何，請務必務必like個新Page，最好叫埋朋友。我想講，呢件事困擾咗我4個月！令我身心都受影響，生不如死咁滯。

6. 我希望我一起身，至少見到個新Page有一千幾百like。感謝大家。

7. 真係好大件事的

亦因為咁，嚟緊一星期未必日日有文。但我已經ahead of schedule

8. 咁所以，狼來了，之前係咁講話「遲下忙，可能未必日日出文」。日子終之到了。你見我有出定幾篇，今日係呢個月第14個交易日，呢篇係第19篇文。咁所以，可能嚟緊唔會日日出文了。忙乜？咪上面講嘅嘢

9. 如果真係有好突發嘅事，而個新Page嘅進展超乎預期，而我又得閒，咁我都可能會繼續日日有文嘅。

但其實，你應該早早買齊貨等升浪。真係唔使我日日指點迷津吧？

10. 不過其實，平時嘅文都有講，舊文都講過。啲人睇得太多電視或電影，以為就係幾十個電話周圍飛。事實上根本唔需要「隨機應變」，擺定晒嘢，等個升浪帶你去目的地。早早買齊貨，食盡呢個浪（然後可能下一個跌浪又捱下，再食下一個大浪）。

11. 但你見好多人嘅作風，係十分之「reactionary」—納指調權重，我使唔使沽晒佢。俄羅斯內戰，我使唔使沽晒佢（好少少嘅可能係諗：如果大跌我係咪應該買，但依然係reactionary）．AI浪潮喎，我係咪要買AI股。

12. 你應該好清楚問題在邊：你已經落後咗好多拍。然後你見到好多人啲想法完全矛盾。一方面乜都鍾意講「大戶」「程式沽盤」—但另一方面覺得自己睇啲落後晒嘅嘢仲可以轉身。

13. 即使「隨機應變」係一種戰術，都肯定唔係你有上風嘅嘢。

14. 所以我一路嘅理念，都係希望武裝大家，提升你嘅功力，令你成為一個思考更好，心理質素更強嘅人。咁到時有乜事件，你自己都識反應。就算我忽然死咗都冇問題的，你拎到嘅嘢係一世屬於你嘅

案例：ARKK 一年升10%，Cathie Wood賺幾十億，但買嘅輸幾百億

15. Attach一篇文畀你，我寫嘅，關於ARKK。2014年成立，到而家九年，升130%左右，唔太好又唔太差，一年都有10%咁上下。但，好多人以為股票升即係賺錢。錯。買ARKK嘅人呢？平均都輸20%起碼。點解會咁？因為你幾時識Cathie Wood？當然係2020年尾或2021年頭，亦即係隻嘢最貴嗰時，咪個個飛入去。

16. 而Cathie Wood袋咗幾十億港紙（你冇睇錯，係幾十億），投資者就輸咗過百億港紙。

17. 我好強調，唔好畀市場或評論牽住你走。而其中一樣就係「多數人就多數係錯」，仲有別人恐懼時我貪婪，反之亦然。因為「恐懼」同「貪婪」，就真係幾明顯係周期性嘅。

你要嘅係「走在市場前」，唔係「隨機應變」

18. 下面呢段，週末寫好咗，但太多文出，呢一大段最唔趕，所以而家放出嚟。同你買賣應冇乜幫助，但可以了解下啲基本金融嘢。

19. 極速一補，上星期五國泰出咗盈喜。留意中午出，股價反映晒，好似升咗5%。

舊聞研究：國泰盈喜，但其實，做乜賺咁多錢？

20. 其實唔關我事，我冇買，頂多話我買咗太古（19），間接持有國泰。相信都好少讀者買國泰。但一樣，知多啲嘢都係好嘅。

21. 盈喜喎，半年賺返40-45億，其實都唔少。因為你要明白，應該都好多年冇賺過咁多錢。疫情嗰期固然死晒（舊年同期係輸50億），社運嗰期都半死。但即使2017 2018，都係冇賺到咁多錢。

22. 不過當中我要指出一個重點：其實，當中一大舊「盈利」，係one off嘅東西，而且non cash，仲係同自己營運冇關（但，股價照升，所以又不能話冇意義）

23. 故事係咁嘅，話說，其實國航753，係國泰嘅聯屬公司（associate是也，唔好當係「附屬公司」）。國泰渣住國航18.1%。

一大舊盈利，嚟自國航753發新股。點解咁都有盈利？（仲要國泰冇份）

24. 順手快手溫書。首先，國泰同國航係互控嘅，所以對國航嚟講，國泰亦同時係聯屬，唔存在邊個渣住邊個，互相渣。仲有，聯屬公司嘅入帳方法，就係在你啲收入減開支後，將你佔間聯屬公司嘅盈利，就有個item．粗略咁講，即係國航賺幾多錢，就有18%入落國泰條數度，在國泰嘅收入減開支之後會見到。

25. 好啦，但，國泰嘅盈利，唔係因為國航賺錢（其實蝕錢！陣間再講）。而係因為，國航批新股。即係點？即係國航因為冇錢，發新股集資，但唔係供股—供股人人有份（當然你可以揀唔供，但重點係你有錢你可以揀供），只係定向選擇某啲人。國航選擇咗嘅，就係母公司，即係國航集團，即係中國政府（咁上下）。亦即係，「政府注資救」。

26. 咁但大陸政府救國航呢啲，你應該唔關心。好啦，國航發新股喎。國泰冇得參加（都話定向）。咁會點？當然係攤薄咗。攤薄咗反而有盈利？係！！！

27. 是真的。你第一次聽一定唔明。但諗真啲，可能明。

28. 實情上個攤薄，就係國泰由渣國航18%，攤薄到16%。

29. 咁即係點？在會計上，係等於「減持」，好似你沽咗2%國航咁。雖然，首先國泰根本冇收到任何錢（你都冇真係沽），另外，係「被動減持」（你都冇真係沽！）。只係會計帳面遊戲

30. 但你咪你，呢度都入咗20億盈利！上半年都係40-45億咋！

31. 亦即係話，國泰嘅「本業」，就只係賺20-25億，還好啦。

32. 當然，又係公平地講。留意，國泰除咗自己「本業」，仲要攤分埋聯屬公司國航嘅數嘛。咁而你都估到，國航係蝕錢嘅。盈警都出埋（其實係盈喜！），上半年蝕32-39億人民幣。

33. 咁即係，大約，國泰就攤分咗6-7億國航嘅損失嘅。所以，你又可以話個「本業」唔止賺20-25億，係賺26至32億。

國航係國泰「聯屬」。但其實咩叫本業？睇下　長實和黃嘅例子

34. 不過，其實咩叫「本業」，都有排拗。即係廢老想當年，未重組前（都十年前了），長實渣住49.97%和黃（當然係特登的，定你以為李嘉誠唔夠錢買埋嗰0.03%？），所以和黃係長實聯屬公司。

35. 但，和黃係一間極之巨型嘅公司，所以你會見到，有時佔和黃嗰舊，仲大過長實自己嗰舊。妹仔大過主人婆，temp嘅員工做得耐過perm之類。咁長實賣樓係本業，定和黃堆嘢先係本業？都唔知。

國航輸錢累國泰，但國泰又累返國航啫！唔使分咁細！

36. 呀另外，你可以質疑，喂，國航長期蝕錢，其實咪即係拖累國泰？可以話係！不過，扯，「國泰咪又係長期蝕錢」，咁國航一樣畀佢拖累。累鬥累，唔好分咁細。

仲有，國泰會贖返優先股。點解？因為高息。點解咁設計？咩係優先股？

37. 最後，都講埋，國泰因為情況改善啦，所以會贖返啲優先股。咩優先股？就係嗰時疫情時，政府注資　—　但亦避免真係入股咁，就選擇入優先股。咁優先股，其實你可以極簡單理解為，好似永續債咁。年年要畀息，但冇到期日。唔使還本。

38. 政府唔直接入股，選擇拎優先股，原因不明，可能費事太過「干預」商業運作，可能係唔想攤薄國航，亦可能係因為國泰唔制，因為畀政府入股，往往之後好多掣肘（例如高層要加人工！！）。你見外國啲公司（航空公司都有），畀政府入咗股，派息呀，加人工呀，都煩，因為實會畀人鬧用公帑補貼班高層同資本家。所以好多公司都唔係太想受政府接濟。

39. 咁無論如何，唔好太陰謀論，亦即係睇少啲網上嘅垃圾。有啲又覺得政府畀人昆，優先股都拎唔到股權（冇得投票嘛）。但扯，畢菲特嗰時救啲華爾街大行，都係拎優先股。

40. 然後個故事就係，國泰會贖返呢啲優先股。點解？因為息貴。亦係當時嘅設計，最多3年（2020-2022），每年3厘息。特登定得低，否則國泰頂唔住添（嗰時完全冇得飛），但太低又會畀人鬧免費益國泰。但今年，就去到5厘。下年7厘，2025年加到9厘。

41. 200億優先股，如果去到9厘息，一年18億了，都幾係嘢。咪話國泰好景時，有時一年都係幾十億純利咋。

42. 想分享嘅係，點解咁設計？你都估到。越加越貴，就係鼓勵國泰快啲贖返啲優先股，即係快啲還錢。政府都想快啲退出。亦都避免國泰玩「永續」—頭先解咗，開頭一定低息，3厘，等你頂得順。但如果一路都3厘，你係國泰，可能真係永世唔還呀！長期3厘息借到錢喎

43. 咁當然，國泰今次贖返優先股之餘，仲要找返晒過去3年冇畀嘅優先股息。乜話？冇找數架咩？係！但有拖冇欠的，優先股息可以拖（合約上寫咗），但一路要累積，雖然應該唔使特別罰息。

44. 亦都講真，最初設計時，都唔知疫情搞幾耐。所以都預開頭一兩年，優先股息都未必畀到。

睇返其實嗰時政府個deal，都真係有用下腦，都唔係真係咁廢嘅……

45. 除此以外，其實政府都仲有就咁借錢（過渡貸款），甚至仲有個option去買國泰嘅股權（但似乎政府唔打算行使？留意，行使價4.68，現在係價內的）。唔止，嗰時供埋股添。詳情睇舊報導。唔止，國泰嗰時仲供埋股。國航太古都有供，中東佬都有。

46. 講咗咁多，只想講一點：雖然好多人認為政府啲官好廢，我都不反對，但真係往往批評嗰啲更加廢。呢單嘢你而家睇返，個設計都係幾精妙，都真係要傾嗰個有啲財經常識先得嘅。你搵啲傻仔KOL去諗，分分鐘唔記得要年年加貴息。

47. 不要搞錯，我唔係為政府歌功頌德（我使？況且佢又冇畀錢我）。但真係純在金融角度，欣賞下人地點設計一個plan．係設計得幾好的。