中國經濟「唔掂」，但LV同愛馬士股價歷史新高。咩回事？而其實，乜嘢係「經濟」？係GDP定失業率？仲有，Richmont業績後大插10%，因為某大國收入好差。「但唔係中國」。咁某大國又係咪好唔掂？唔知噃。其實，「經濟」是甚麼東西？ (Patreon)

到底「經濟」是甚麼東西？唔知噃

「大陸經濟數字全部做假」嘅虛妄

傳統大家講GDP，但你又唔係好信服喎，咁你睇乜？

你去日本，又覺唔覺得人地水深火熱？又好似唔係喎

咁其實，一般人，最貼身，就睇失業率，加人工。但，「香港咪好好景」！

其實你要睇嘅，係公司生意，企業盈利。

LVMH同愛馬士，上星期歷史新高。玩乜？又話中國經濟玩完？

LV 愛馬士創新高嘅三個可能性（可能仲有其他）

早排回咗，又有冇買？又驚喎。咁點算？

做金融嘅，先最不利投資。「不過可以搵到其他人錢」

後記：結果中國出嘅數字好似真係「唔掂」。LV又回。但，又如何呢？

Richmont業績後插10%，點解？「因為某大國生意唔掂」。「唔係中國」

講明，可能嚟緊一兩星期少啲文。但唔會唔出。同埋，你發現我已經超額出文了。嚟緊有啲十分重要嘅事，好快開估。

到底「經濟」是甚麼東西？唔知噃

1. 之前講理文化工盈警，可以帶出另一個問題。產品價係咁跌，當然反映咗大陸經齊差。不過其實，到底「經濟」是甚麼呢？都真係任你講。

2. 正如之前講銀行業績嘅文都講過，到底「行業環境」係乜？你話打工仔都仲易明，間間炒人，定間間搶人，大約睇到。但你公司嘅「行業環境」係乜？唔知噃。JPM同花旗都爭咁遠。但在絶大多數人心中，咪又係做一樣嘅嘢！

「大陸經濟數字全部做假」嘅虛妄

3. 你問某啲人，佢覺得大陸經濟啲數全部係假嘅，過去幾十年都係差。但呢個明顯唔係事實，同你咁講嘅人，水平極低。好多嘢你可以睇得到，你睇人工，你睇啲人消費，睇佢買乜用乜，睇下你去外國多咗幾多大陸人旅行，呢啲總會見到。

4. 當然係有造假，但用一句「造假」嚟總結所有嘢，只係代表佢懶同無知。「你會唔會見Economist Financial Times咁寫？」。所以，睇少啲垃圾KOL。正如你可以話碧根鮑華Magic Johnson張德培（舉例，任你填）「過譽」，但你明顯佢地都係好勁好有成就。「過譽」同「好勁」可以共存，正如「造假」同「過去幾十年增長好勁」可以共存。

傳統大家講GDP，但你又唔係好信服喎，咁你睇乜？

5. 不過，甚麼是「經濟差」，都真係有啲難答。其實瞎子摸象，睇你睇邊部份。如果你話計客觀量度到嘅，咁最傳統啲人睇GDP 增長。咁但，大陸再差，都可能講緊4%？之前更唔使講。但你話「經濟好唔掂」。相反，新加坡美國，冇呢啲數，但你依然話「經濟好」　—　咁你見到，明顯啲人，一係偏見，一係就其實著眼另一啲嘢。

你去日本，又覺唔覺得人地水深火熱？又好似唔係喎。

6. 正如日本經濟，所謂「迷失卅年」，咁GDP增長慢呀，人工加得慢呀，冇以前嗰啲咩銀座加錢坐的士呀（香港就有！！！），就肯定。但，你去咁多次日本，覺唔覺得人地水深火熱？又好似唔係。「顧掂自己先啦你」。咁到底，甚麼是「經濟」？

7. 你話睇GDP，又好多人話「GDP唔代表乜」，聽落好醒，實情係廢話。甚至有好多人有極多誤解，例如以為打爛晒啲嘢起返就可以谷起GDP（係喎日本仔諗唔到呀可聯儲局諗唔到呀可），又或者有啲更加不知所謂嘅故事（自己睇）。

咁其實，一般人，最貼身，就睇失業率，加人工。但，「香港咪好好景」！

8. 好啦，咁其實如果你講普通人，最切身，即使唔學術都好，反而係睇幾樣嘢。第一，梗係資產價格。樓價股價，咁香港同大陸當然唔得，但我亦解過多次呢啲東西並唔代表「經濟」—　坡股表現一樣長期不濟，但個個一樣吹到經濟好到天下有地下無，係咪？

9. 第二，打工仔最切身嘅，當然係失業率。人人有工開，工搶人，咪「經濟好」。個個畀人炒，就經濟差。應該唔會反對啦？咁大陸肯定失業率係好高的（況且佢地只計城市，唔計農村），符合你講「經濟差」。但之不過，日本失業率肯定低，但啲人都係話經濟唔好，嗯，都因為人工加得慢，但物價又升得慢啫。好啦，香港，擺明係工搶人啦，搵工極易，但啲人一樣講到世界末日咁的。咁到底，甚麼是「經濟」？

10. 拿，唔好忘記，香港仲要加人工搶人。而通脹仲要低的。都唔係好多地方加人工高過通脹，香港就係。仲唔好景？但應該冇人同意。

11. 咁到底，what we talk about when we talk about 經濟？唔知噃。任你講。摸大笨象。

12. 不過我想講嘅係：以上呢啲東西，同你睇股票，可以係心乜關係嘅。

13. 我最關心嘅，好簡單，企業盈利。亦即係做到幾多生意咁。咁如果你講中資公司嘅，仲神奇，你發現同「經濟」關係未必好大。特別係習近平上台後。都講過，打壓商家嘛。所以你見經濟唔差嗰時，盈利一樣唔得！反而經濟差就放鬆啲。

其實你要睇嘅，係公司生意，企業盈利。

14. 但即使唔講中國而家針對資本家嘅呢種情況。咁你睇海外公司，都係幾有趣的。例如你睇理文化工（嚴格嚟講唔係海外），化工產品價格跌，咁梗係代表經濟唔得。你睇之前Nike業績，大中華銷售都係麻麻地。我估嚟緊蘋果星巴克嗰啲都會係咁情況。

15. 所以，睇呢啲，就真係「準」啲。畢竟我最關心，係間公司賺唔賺到錢。你「經濟」好唔好，關我乜事？呢個你拎去其他國家睇嘅情況都一樣。雖然外國比較少出現啲「經濟同企業盈利大大脫節」嘅情況（但再講一次，經濟同股市可以好脫節。「咁又話股價由盈利支持」？咁睇你量度幾耐啦小朋友，都話，股市短期係voting machine，長期係weighing machine）

16. 無論如何，總結兩句。首先，其實我真係唔係好有興趣同人討論「經濟好唔好」，因為好多人根本都有晒預設結論。另外，我更加怕讀者自作聰明，同佢講「經濟唔好」咁佢就走去「哦即係叫我沽晒啲股票」（係喎，2020中你話經濟好唔好？2009年初呢？偏偏股票就狂升，以前解過啦，炒預期，放錢）

17. 但真係要一句總結（雖然我至憎）。咁大陸經濟，就梗係唔太好啦。不過再講一次，其實，有何關係呢？好嗰時，一樣係跑輸美股的。同樣地，美股迷失十年原地踏步（200-2010）嗰十年，唔通經濟就死晒？

LVMH同愛馬士，上星期歷史新高。玩乜？又話中國經濟玩完？

18. 而講咁多，其實只係因為一個有啲違反直覺嘅現象。近排有兩隻持倉，創咗新高。好似歷史新高添呀。

19. 咁你覺得，唔奇丫，成堆科技股大升。但，唔係科技股喎。然後如果你有睇我Facebook IG嘅，可能會見我有貼，Visa，SPGI，JP Morgan呢啲都新高啦。但又唔係喎。

20. 創新高嘅，係LVMH，同埋愛馬士。今年都升三成，絶不失禮。不過啦喎，「之前你又唔買」？

21. 細思極恐，係咪有啲奇怪？首先都唔好講咩「經濟差」。拿，美國就人人驚衰退（驚極都未真係發生），歐洲直頭真衰退，中國又明顯唔得。甚至好多人認為呢兩隻嘢嘅業績都係受中國需求帶動（包括大陸嘅舖，同埋大陸人在海外買嘅）。

22. 但，偏偏愛馬士LVMH齊齊創新高。點解？我都唔知！但又係討論下。

LV 愛馬士創新高嘅三個可能性（可能仲有其他）

23. 可能性一，就係根本其他需求取代到大陸客，至少可能取代到部份，亦唔係不可能。實情我記得之前兩間嘢啲大陸業務都仲係麻麻地，但股價都冇大冧，成個業績亦都冇死晒。畢竟，都只係其中一個市場啫。大陸最多佔佢三成左右啫，仲有七成係其他地方。（拿，以前寫過）。

24. 可能二，就係根本「經濟唔好」，同埋「LV收入唔得」，根本係兩回事。亦可能係咁，你見以往都係咁上下，你估真係啲有錢人輸身家咩—事實次次金融危機，都係再拉濶貧富懸殊（印錢嘛！）。你睇媒體，只係會放大咗幾個破產嘅富豪（睇KOL就仲衰）。你睇人地業績，絶對唔係咁。況且，其實好多人真係唔用腦嘅　—　LV之類嘅最大客源，唔係「富豪」，係中上級中產。一個100億港紙身家嘅富豪，身家等於1000個1000萬身家嘅中產。但你估邊組人買嘅LV多？梗係後者啦！你一條友買幾千個咩！（大劉例外）。

25. 可能性三，就係，市場太樂觀咯。咁亦係可能嘅。咁所以，嚟緊嘅半年業績，會係幾有趣。但我唔知得唔得寫寫，LVMH 7月25號，愛馬士7月28，自己到時研究。

26. 呀，唔知會唔會有人話，「係因為歐羅強美金弱」。咁的確，其實只係ADR股價創新高，你以法國上市計，就未創新高。但，都只係爭好少，唔好咁煩。

27. 又或者，掉轉頭諗，如果你過去一路覺得中國經濟唔掂（事實亦唔係好掂），咁你就「所以」唔買LVMH愛馬士，結果亦係一個好錯嘅決定。當然，錯失股票本身唔會令你輸錢。例如你拎晒啲錢買QQQ，一樣很好，你唔係去沽空愛馬士LV就得啦。但，至少你呢個「中國經濟唔掂　所以唔買LV」嘅想法係錯嘅。一係就根本前提錯，中國經濟唔係唔掂。又或者個推理錯，中國經濟唔掂，LV一樣可以掂。所以，唔好太多想當然。

早排回咗，又有冇買？又驚喎。咁點算？

28. 最後，又係要講。兩隻嘢早排係靜咗落嚟的，高位回調10%。我就梗係唔會走去「止蝕」。但不過，你見好多之前想買嘅，但一路覺得高位追唔太好嘛（都係有道理嘅）。但，回落10%，你又可能都係冇買啫。咁點解？可能嫌未夠深？但，假設，出完業績，跌20%，你又一樣未必敢買喎。

29. 呢啲心態都好常見，亦唔係你有乜問題。呢啲係人性，我都會咁，只係程度上。

30. 咁所以呢，有錢時，都係想買就買啦，唔好搞咁多嘢。「但唔係話太貴買又會出事」—係！咁點避免！又唔係避免唔到！咁你總唔會所有錢都係最貴時買嘛！你總唔係話我知舊年10月11月你完全冇錢，然後就係LVMH升到新高時你先忽然有錢啩，冇咁大鑊啩。

31. 不過off topic講句：你做金融，就會有呢種問題！股市貴又癲時，可能公司賺到錢，你花紅出得多。股市死晒時，你冇花紅出，分分鐘減人工，仲要畀人炒埋。睇住股票平都冇錢買，甚至被迫低位沽！

32. 我點解知？因為我都試過咯。

做金融嘅，先最不利投資。「不過可以搵到其他人錢」

33. 所以，同好多人嘅直覺唔同。我覺得，做金融係影響你投資表現嘅。照計投資最好應該係公務員，教師，護士之類。咁點解做金融工？搵錢！亦即係話，搵唔到大錢嘅，可能轉行好啲。

34. 我相當肯定，做金融嘅人，投資表垷係差過非金融嘅人。我講整體。不過，佢地賺人錢嘅能力就相當高。包括啲基金經理。

後記：結果中國出嘅數字好似真係「唔掂」。LV又回。但，又如何呢？

35. 後記：上面呢堆嘢係週末寫嘅。最後補兩筆。首先，你見到中國第二季嘅GDP增長，「只得6%」，低過預期。不過，其實對上面講嘅嘢近乎全無影響。6%嘅增長冇可能叫做「差」。就算你話低基數之類，全年個數字可能都有4-5%，有幾「差」？

36. 咁到底，你話「經濟差」，係指乜呢？我並唔係覺得「唔差」，只係想講，「經濟」呢個詞語，極之咁含混，最好少用。反正過去幾十年你都可以話差的。正如香港股樓跌，你話經濟差。但之前狂升，你亦覺得「冇得受惠」—見到冇？其實你有冇工開，你搵唔搵到錢，先係最應該關心嘅嘢。

37. 記住，我經常都希望大家用字清晰啲。唔好問我「中國經濟係咪好差」，不如問我「你會唔會買中資股」（更好嘅係講埋邊隻，你買幾多）。

38. 另外，見到呢兩日，LV愛馬士就回返些少。咁可能真係市場太樂觀。亦可能係因為中國出咗個疲弱嘅經濟數字，你用呢個理由解我都信服。

Richmont業績後插10%，點解？「因為某大國生意唔掂」。「唔係中國」

39. 不過，仲有留意，歷峰Richmont（卡地亞母公司）出咗業績，大插10%—可能呢個先係愛馬士同LV跌嘅原因（唔係好多啫）。而留意埋：歷峰業績令人失望，居然係因為美國嘅數字麻麻。

40. 「咁其實美國經濟係咪好差？」—一樣，任你講，睇你問邊個。但我都係覺得，拗呢啲嘢浪費時間。對你投資其實有幾大影響？

41. 聽日美國衰退，我都係繼續買美股。唔衰退呢？一樣。明冇？

42. 而最好笑係乜？「歷峰集團稱主要受惠於中國內地經濟重開和低基數，以及香港、澳門增長旺盛」

43. 最最最後，後記嘅後記。我相信呢度啲讀者唔會。但我地想像下，如果我早幾日在Facebook寫上面LV 愛馬士嘅嘢，會有乜後果？寫完即跌，就會有人話「燈」。寫完即時又見到中國個經濟數字唔好，又會有人話「燈」。

44. 我就真係唔多介意，甚至我可以拎嚟大力恥笑。你見我多數回一句「係呀我 all in 買美股呀我係燈喎你記住之後日日沽空美股呀包你發達」

45. 但呢啲，只係我作為 KOL 呃engagement 嘅無聊活動。

46. 對你嘅啟示係乜？記住，千萬唔好太集中於短期嘅嘢。亦即係話，難道我寫完後，兩日LV跌咗5%，咁上面寫嘅嘢就係垃圾？但掉轉頭，如果寫完兩日LV升多10%，咁我又係咪生神仙？（但當然了，我就會在Facebook自吹自擂，搵食嘛）。

47. 點解隻嘢兩日跌5%，同升10%，我篇文會有分別？係好嘅，就好到底。係垃圾嘅，亦唔會因為升咗10%而唔垃圾。理論係咁，但你發現人性未必係咁。

48. 投資，甚至做其他嘢，就戒絶呢啲思想。唔好只係記咁近嘅嘢。

49. 「我兩年前買LV你又唔買？」