美股業績：富國還好，花旗麻麻，United Health值得睇，BlackRock冇乜特別，State Street大瀉 (Patreon)

講埋另外兩間，雖然都勝預期。但JPM業績就好過富國，富國又好過花旗

富國撥備按季升，就冇JPM（唔計FRB）咁靚仔了

花旗收入就要按年跌。搞乜？淨利息收入增長唔夠強咯。交易收入又跌

開支大升。點解？因為炒人。係喎，炒人都要開支的。拖累盈利跌。人地升

所謂「行業」，其實係乜？三間銀行，一間盈利勁升，一間大跌。

根本「行內人」都話唔到「行業」畀你知。咁所以，點揀股好？

United Health：原來今年要跌。但之前抗跌力好高。走勢同其他股好唔同

United Health，21倍市盈率，巨企，似乎唔算喪貴。有錢我就買。諗諗佢

BlackRock：麻麻地，又唔太貴又唔太平咁

道富State Street：業績後大跌，今年跌15%。等賣？又未咁快

今個星期業績焦點

講埋另外兩間，雖然都勝預期。但JPM業績就好過富國，富國又好過花旗

1. 上篇一大篇講咗JPM，其實另外兩間銀行，都係大同小異，況且冇買。極速講，你有買嘅自己去慢慢研究。

2. 富國Wells Fargo，（英文報導呢度，中文報導呢度）。簡單講，冇JPM咁好，但可能好過花旗，你睇股價反應都係。你睇收入，同埋盈利，都係好過預期，只係冇JPM咁顯著。

3. 另外，富國亦都上調咗全年嘅淨利息入收指引。原本指引按年升10%，而家預按年升14%。但，當然冇JPM升得咁多。另外，佢嘅淨利息收入，按季係跌嘅。但仲係有信心上調全年指引呀下，亦可能最初個指引特登保守啲。期望管理遊戲啫。

富國撥備按季升，就冇JPM（唔計FRB）咁靚仔了

4. 另你仲可以留意，佢嘅撥備按年當然都大升。但按季都升唔少，12億升到17億，而JPM（如果唔計FRB ）係按季跌嘅，呢度又會給比下去了。富國亦特別提到啲消費貸款同埋商業物業。咁當然啦，暫時淨利息收入嘅上升，都遠遠夠冚呢啲嘢有餘，所以你見個盈利按年都升57%的。

5. 拿，盡量簡短咗架啦。即使同行，兩間公司嘅業績其實好難直接比，但由上面嘅嘢，你大約都可以明白，點解一般真係覺得JPM「好啲」，雖然兩間都係好過預期。

花旗收入就要按年跌。搞乜？淨利息收入增長唔夠強咯。交易收入又跌

6. 最後，花旗，英文報導呢度，中文呢度。雖然都係收入同盈利都好過預期，但就好似再差過JPM同富國啦。

7. 首先，佢嘅收入，係按年跌嘅，差啲喎，JPM同富國都升。冇錯，淨利息收入都仲有得升（好難唔升），但個升幅（18%），低過JPM（38%，已計冇計FRB），同富國（29%）嘅增長好多。

8. 咁個增長唔夠勁，有乜後果？就係唔夠冚其他嘢了！都話呢個淨利息收入係個大item

9. 上面講，花旗收入要按年跌。咁淨利息收入有得升，即係其他收入跌突啦。係乜？正係啲交易收入，仲有投行業務。第一篇講過，交易收入，往往係市好嗰時就受壓的。咁不過，市場都大約預咗，所以呢個收入按年下跌都好，都仲係勉強好過預期。

開支大升。點解？因為炒人。係喎，炒人都要開支的。拖累盈利跌。人地升

10. 但仲有其他嘢。例如開支大升啦。點解？因為炒人！下？炒人都開支升？是的，賠錢嘛。咁但，都係指定動作了，一舖過賠錢炒晒啲人，之後啲開支就會靚啲。咁當然仲有，撥備上升。就咁望個數字唔係升得太誇張，問題係收入按年都仲要跌，開支又升，就唔多夠冚呢啲嘢了。

11. 結果？你見盈利按年要跌一大截的，JPM同富國就大升。但當然，上面咩炒人開支嗰啲，一次性，亦都一早有同市場溝通。所以即使盈利按年跌，但仲係好過預期，

12. 不過始終，拍埋去，你就見到講業績，JPM好過富國，富國好過花旗咯。

所謂「行業」，其實係乜？三間銀行，一間盈利勁升，一間大跌。

13. 講完三間。我只summarize一句：所謂「行業」，係可以好多Q餘嘅。你見好多人，都會講乜乜行業好唔好景。但，銀行呢啲，已經差不多係間間做差唔多嘢嘅行業。啲item都係嗰幾味，都係淨利息收入升，交易收入受壓，開支升，撥備升。

14. 但，出到嚟嘅效果。有人純利就按年升六成，有人就按年跌四成。差天共地。所以，其實啲人同我講「行業」，我有時都係唔知佢到底講乜，

15. 記住，講數字。

16. 咁你話，但真係好難知點解同樣一個環境，三間銀行差天共地。解決方法，三個。第一，買龍頭，或者第二。做到咁大，往往有啲原因。固然你可以拗增長未必及細公司，但又係講數字，你見似乎都係大公司好啲，仲要JPM呢啲大食細。第二，信人，睇管理層。Jamie Dimon，係有往績嘅，JPM係好少出過咩大問題。當然最後，分散。最緊要唔好自作聰明，「行業點點點」。

17. 呢度應該唔會好多讀者比我更熟銀行業，因為我又做過銀行，做分析員時又睇銀行股（咁可能都有讀者係，但唔會多）。但我唔會因為咁，走去買晒銀行股，或者以為自己一定啱。

18. 你試下問個做美資銀行嘅，都答唔到你好唔好景。可能間間唔同。可能條友自己廢，佢畀人炒以為公司唔好景（炒咗佢公司米好景）。可能只係佢好景公司唔好景。所以，其實，咩叫「行業」？

19. 咁你話，總有啲情況你見到成個行業玩完。都係，咁但，你唔問人都會知。又或者，總有啲行業真係有一排好發，咁但，「又肯定會貴」。所以，我真係唔會太過去理咩「行業」。之前又話晶片荒，然後又話晶片寒冬，之後又話AI。應該係一年內嘅事。咁到底行業好唔好景？其實睇你買Nvidia定Intel Micron

根本「行內人」都話唔到「行業」畀你知。咁所以，點揀股好？

20. 雖然講到尾，我都只係買JPM。就係信Jamie Dimon．200%回報，還不錯啦，雖然用咗六七年。

21. 香港呢？就匯控渣打中銀恒生，「但總唔見我走去買東亞」。

United Health：原來今年要跌。但之前抗跌力好高。走勢同其他股好唔同

22. 繼續去，United Health．呢間公司我完全唔熟，我估好多讀者，特別住美國嘅，會熟過我。咪醫療保險。過去N年升到癲，不過，「之前我都冇買」

23. 呢隻亦係上星期五，唯一一隻出完業績勁升嘅嘢。英文版本呢度，中文版本呢度。由於我真係完全唔熟間公司，就只能快講。見到收入同盈利都好過預期咁咯，另外，調高咗個全年指引。留意到公司之前有暗示過啲成本升，所以市場嘅期望係比較低嘅，但結果出嚟唔係升太多。

24. 想講嘅係，呢隻嘢一路都在我嘅 Radar Screen（講英文型啲）。但一路冇買，除咗冇錢外（咁人人都冇錢，但又總有一期係有啲錢嘅），亦一路係覺得，「咁貴」，點買。

25. 咁但，原來而家，又冇想像中咁貴啦喎。所以，真係可以諗下。我有錢我應該會買。你有閒錢，都可以諗下。雖然，講明兩樣嘢。首先，我一日未買，就係未買。另外，我都話唔清楚間公司—多數我買咗就會清楚啲。「所以最好你地個個upgrade去100蚊美金月費等我有錢買」

26. 好啦，睇下個股價圖，係比較特別嘅。首先留意下，今年係跌嘅。計埋上星期五嗰浸都仲係要跌。

27. 仲有亦都留意下，舊年十月十一月時，股價冇大跌，甚至逆市升。你亦可以話，之前個抗跌力極強。高位都只係跌咗兩成唔夠。

28. 而個低位，係今年早前出現嘅。留意個形態同好多美股（即使非科技股）都好唔同。

United Health，21倍市盈率，巨企，似乎唔算喪貴。有錢我就買。諗諗佢

29. 咁今年股價不升仲要跌後，但盈利仲有得升。於是，啲估值好似比較合理？一排冇睇，原來都冇想像中咁貴。畀數字你，公司4500億市值。過去12個月盈利呢？都有210億。21倍嘅市盈率，似乎唔係喪貴。

30. 揀巨企，非科技股，可能呢隻都可以諗下。但再講一次，我冇買過，亦唔知幾時會買。但如果你今日畀10萬港紙我，我就會拎去買。當然，亦因為我都渣咗唔少科技股。

BlackRock：麻麻地，又唔太貴又唔太平咁

31. 繼續去，Black Rock，呢隻有買。英文報導呢度，中文報導呢度。盈利係叫做勝預期嘅，不過出嚟股價要跌，今年亦都跑輸大市的。

32. 以前寫過呢隻嘢多次，呢刻反而冇乜好講。係幾屈機的生意模式，問題係都冇乜點平過（而家好似OK），而且啲業務亦唔係好爆炸性增長。但勝在都幾穩定。

33. 首先要講嘅係，公司係受惠於之前SVB之類爆煲。咪話好多人拎走啲銀行存款，拎去買貨幣基金MMF。咁BlackRock都係大供應商。

34. 其實公司就係基金管理，收管理費表現費。好多係被動ETF，但唔係全部。但個量真係極大，收你少少fee個數都好大。亦因為佢夠大，可以收得平。但亦令到其他對手冇得鬥。我有咁大就可以收咁平，你細嘅，收咁平，租都未夠交。

35. 個「管理資產」，Assets under management，AUM，9.43萬億。第一季尾係9.1萬億。但其實，預咗個AUM升啦。因為有兩個因素，首先係本身啲嘢升跌，咁第二季明顯股市仲係升（當然佢唔係全部係股票），但另一方面亦要睇fund flow，咁呢方面，似乎係麻麻地。

36. 當然啦，亦都係估行業整合，同埋龍頭公司真係好難動搖。所以隻嘢長期都冇乜點好平。我買咗咁耐（都有幾年），都係賺四成左右。

37. 又係計數時間，1100億市值。過去12個月嘅純利，52億（留意係幾穩定的，舊年第三季都冇乜大跌）。21倍市盈率，還好啦。

道富State Street：業績後大跌，今年跌15%。等賣？又未咁快

38. 最後一間，真係兩句講完。可以話係BlackRock嘅行家，道富StateStreet．亦係之前盈富基金嘅管理人。英文報導呢度，中文嘅呢度。業績其實係OK嘅，盈利勝預期，但收入差過預期，指引亦都差。咁就夠大鑊了。今年股價跌咗15%，嚴重跑輸大市。見星期一晚都仲跌緊。

39. 實情如果講ETF發行商，都係嗰三大間。BlackRock（所有iShares），Vanguard（例如VOO）），同埋道富（SPY就係佢）。計AUM Vanguard 細過BlackRock少少，而道富再明顯細一截。半間Vanguard 咁

40. 一路都傳行業整合，不過可能係買起啲更細嘅公司先。況且，BlackRock買道富，過唔過到反壟斷？都係個問題。

今個星期業績焦點

41. 然後最後介紹返，今個星期嘅業績。照舊，睇Zacks，清楚易明。

42. 今個星期二，美銀摩根史丹利。星期三，NetFlix Tesla ASML同高盛。星期四台積電同Johnson，星期五American Express。

43. 最關心嘅，當然係Tesla Netflix ASML啦。首先呢三隻我有，其他冇。另外，科技股嘛，貴嘢。不過重頭戲都係月尾，FAAMG嗰堆更重要。