［都算101文）美股業績期，睇乜？點演繹？其實一切都係睇預期，同埋估值。 (Patreon)

業績期，美股就高位急回。銀行業績好都升轉跌，係有啲今人擔心嘅

估值呢味嘢，好難睇。但往往就通過呢啲業績去考驗

業績得唔得，好唔好過預期，股價升唔升，係三樣完全唔同嘅嘢

當然係炒預期炒將來。首先你要同意。但仲要諗下，點解會咁？

＋不過有時，業績差過預期都升，業績好過預期都升。又點解？

實戰例子：美股盈利，最近三季都係按年跌。但，美股幾時見底？你話呢？

唔通我今年年頭，見到盈利倒退，又去沽晒啲美股？

不過仲要留意下，股市到底同盈利走勢，爭咗幾耐

盈利差—＞加息預期降＝＞債息跌美匯跌股市升

Stay invested：美股係平均一年升8-10%—但往往半年已經升晒幾年嘅平均升幅

結論？都係冇變過。

業績期，美股就高位急回。銀行業績好都升轉跌，係有啲今人擔心嘅

1. 言歸正傳，業績期。上篇寫得有啲虛。唔睇亦唔係極大問題。但我只係想講：星期四皆大歡喜，好多嘢創一年新高。星期五就反高潮，好多嘢都單日內升轉跌，亦唔止係科技股，所以「納指權重調整」唔係一個好理由。

2. 當然你亦可以話，美金反彈，美債債息回升，股票跌。但我認為「美金反彈美債息升」，係同股票跌同步嘅嘢。唔係美金升債息升引致股票跌，而係另一啲嘢，令到美金升債息升股票跌（當然呢個只係我認為，永冇答案）

3. 咁係乜原因？「有沽壓咯」，供求定律，即係冇講過。咁但，可能就真係「估值」貴。估值呢味嘢十分難捉，但照計唔會好多人反對係貴，係咪？（頂多你可以話貴得有道理，貴可以更貴，或者貴又未必會跌）

4. 然後上星期五仲發生乜事？就係呢期美股嘅焦點，又開始業績期啦。

5. 你睇嘅唔止係業績「好定差」，反正好多人連呢樣嘢都未識判斷（陣間我會解）。但至少，業績出完，股價乜反應，你識睇啦？

6. 咁你見星期五出完業績啲嘢，明明業績全部係幾好，但差不多全部都係升轉跌，有啲甚至急瀉。固然，股價跌咗啲人又會走業績度搵啲嘢出嚟講「其實係差」，但與其用呢種事後搵解釋嘅方法。不如簡單啲：就係估值開始貴，你只係出一個「普通好」嘅業績，係不能提升股價嘅。

估值呢味嘢，好難睇。但往往就通過呢啲業績去考驗

7. 亦可以話「估值」呢味嘢可能係通過呢啲實證去考驗。例如乜？例如舊年第三季業績（10月11月）嗰期，啲業績好似「差」，但股價都冇乜再跌，甚至再升。呢啲可能係代表「夠平」。同樣地，舊年第一季業績，Facebook Netflix嗰啲，一日跌25%。你話業績好差咩？都未必係。但一跌就跌咁多，往往係顯示「太貴」。

8. 咁所以呢，星期五嗰啲「業績好股價跌」嘅現象，係令我唔多放心嘅。當然了，可能只係一日嘅個別事件。又況且，擔心還擔心，買就照買。唔好以為擔心就唔買。

業績得唔得，好唔好過預期，股價升唔升，係三樣完全唔同嘅嘢

9. 新讀者未必知。但有關點演繹業績，再講一次。記住，有三樣嘢。業績得唔得，合唔合預期，同埋跌唔跌。係三樣完全不同嘅嘢！

10. 頭兩樣，應該近乎係冇關嘅。好多人都大約知，但你去感受下，同埋諗真諗下點解。我費事詳解，但十分簡單嘅講法：好多公司嘅生意得定唔得，你唔使去到開業績嗰下先知。分析員會估到，而往往機構投資者就跟呢啲預期去睇。

11. 最簡單，國泰，之前幾次業績都蝕錢。但，鬼唔知咩，都冇得飛。所以你見出嚟時啲股價往往係升，因為一早預咗你蝕錢，反而可能蝕得比預期少就係「好消息」。當然亦仲有，估值。其實開始爆疫，股價已經狂瀉。咁你去到出業績輸錢，已經極平了。

12. 亦即係話，請你真係唔好咁低層次。唔好去講咩「盈利跌九成好差」，或者「盈利升幾百倍好好」，個世界唔係咁運作。直接啲講，如果你關心業績後嘅股價，你甚至根本唔使睇佢盈利升跌幾多。

13. 亦都即係，你只係要睇係咪好過預期。以後就算我寫「業績差」，都係指「差過預期」。因為原本個業績跌九成定八成，無關重要的

14. 你應該關心嘅，就係「係咪好過預期」。街估輸100億，佢輸50億，往往股價升。街估跌九成，佢只係跌七成，股價又係有得升。相反，街估盈利升三倍，你升得兩倍，就往往跌。唔係100%準，但大約你見到會係咁。

當然係炒預期炒將來。首先你要同意。但仲要諗下，點解會咁？

15. 只係我講你知，然後你自己都見到係咁，同意，都仲係唔夠嘅。更重要嘅係，你真係要諗下，點解會係咁。當然係因為股票睇預期，睇將來。但點解？以前寫過好多次，你可以諗下。得閒我又會回下帶。

16. 短答案：因為價格，係會極短時間內反映晒所有市場上嘅資訊。

17. 好啦，而理論上，業績勝預期，股價應該升。差過預期，應該跌。但你見近年，又好似唔係好靈—唔係已經「冇用」，但可能以往十次有七八次跟呢啲規律，而家可能十次得六次咁（其實有數字統計的）。

不過有時，業績差過預期都升，業績好過預期都升。又點解？

18. 其中一樣嘢，亦同個估值有關。大約就係頭先講嘅：估值低嗰時，股票（或指數）對啲壞消息冇乜反應，唔再跌，甚至壞消息照升。相反，估值貴嗰時，你再不停有好消息，都係冇力彈　—　亦可以話，估值貴唔貴，可以用呢啲實驗去判斷。

19. 咁，一路都話美股貴，特別係科技股。業績稍有差池，固然可能大跌。但即使業績好，都未必唔使跌。都話貴。而「好消息出貨」「sell on fact」「見光死」呢啲，大家都聽過下。

實戰例子：美股盈利，最近三季都係按年跌。但，美股幾時見底？你話呢？

20. 呢度講啲實數，順便亦畀啲實戰例子你。

21. 你鍾意嘅，可以睇埋我嘅一篇舊文，第一季業績時出。放心，得幾段講業績，好短。

22. 都唔想睇嘅，咁直接睇圖。記住，係上一季出業績前嘅東西，4月中。

23. 見到啦，第一季標普指數嘅每股盈利（你可以當「大市」），按年跌7%。留意當時已經係連續兩季按年跌（舊年第四季都係），亦都預下一季（第二季，即係呢刻今季）會再按年跌。連續三季按年跌。

24. 但，你睇咗我最上面講嘅嘢，應該明白，呢個「按年跌7%」本身，唔會令到當時啲股票繼續跌。就算股價跌都唔係去到出業績時先跌啦，啲「預期」數字一早出咗。

25. 最後？最後第一季啲數字，應該好過預期些少。但呢個都唔係最想講嘅重點。

26. 最想講嘅重點，你睇下張圖。舊年第四季，今年第一季，今年第二季，連續三季盈利按年倒退嘛。好差，係咪？

27. 但你估到我想講乜了：偏偏，就係舊年第四季，同埋今年上半年，股市升到七彩。

28. 呢度好值得你思考下。

29. 順手提埋你，所謂第四季嘅數，要今年年頭先見。第一季就四月，第二季咪七月，即係而家。

30. 嚟啦喎，美股幾時見底嘅？舊年十月十一月左右啦。正係出第二季業績時。亦都正係你會見到之後業績三季按年負增長嗰時。

唔通我今年年頭，見到盈利倒退，又去沽晒啲美股？

31. 所以，你千萬不能因為見到啲業績「將會唔掂」，就覺得股市冇運行。

32. 但，又話炒預期？係喎。咁點解唔係「預業績倒退」就會股票跌？

33. 答案：唔係咁簡單。仲要睇你嘅「時差」，個Horizon（講英文型啲）有幾長。

不過仲要留意下，股市到底同盈利走勢，爭咗幾耐

34. 至少事後睇，你會見到，盈利倒退幾時見底？就係今年第一季。股市幾時見底？舊年第四季左右。同一向rule of thumb，領先三個月至半年，都大約吻合（好大約啦下）

35. 甚至可以回帶講返，舊年嘅見底訊號，亦都寫過。係美匯指數見頂，美債債息見頂。固然可能事後耐啲先知，但當時要有信心估到，都唔係不可能。

36. 不過上面都有講，亦有可能根本美匯債息股市都係同步嘅東西。唔係美匯見頂債息見頂令股票升，係其他嘢導致呢三樣嘢。

盈利差—＞加息預期降＝＞債息跌美匯跌股市升

37. 咁係乜？以前都講過下，可能係聯儲局嘅加息路徑。但再講一次，唔使等減息，唔使等停加息，甚至唔使等到「加慢啲」（由加0.75變到加0.25）—事實係市場開始聞到將來幾個月有機會開始加慢啲，債息美匯就見頂，股市就見底。你可以再搵返啲數字望下。

38. 咁關企業盈利乜事？亦都至少係事後見到，可能係加到啲企業盈利開始倒退，聯儲局就開始慢慢踩慢啲油—咁，只要開始覺得踩慢啲油，股市就升了。唔使等真係踩慢啲，甚至唔使等停，甚至唔使等入返後波。

39. 換言之，可能就係呢啲盈利，影響返聯儲局加息，然後再影響美債美匯股市之類。當然呢個只係我嘅一個解釋，你可以不同意的，我亦唔敢話一定啱。

40. 好啦，今次業績又點？可以睇呢篇。都係，講業績嘅好短。

41. 又懶下話，咁幫你cap埋個重點。

42. 好啦，盈利會按年連跌三季。但，who cares？根本至少4月已經知，甚至舊年已經知。第二季按年跌7%，本身亦唔一定導致股市唔掂。

43. 你亦可以留意，第一季時嗰個圖，估第二季按年跌6%，而家估跌7%，好似係調低咗少少嘅。亦係兩睇，我覺得係好事，至少啲友並冇過份樂觀。

44. 好啦，預之後兩季，第三第四季，就會回復增長。但一樣，一早預咗。仲有，明顯見到同低基數都有啲關係。

45. 講到尾，你不能因為跌7%就話差。亦不能之後到第四季見到升８—9%就話好，都係睇同預期比。

46. 不過啦喎，而家同今年年頭，甚至舊年第四季，當然仲有一樣嘢好唔同：就係，啲嘢升咗好多！！！

47. Facebook 舊年低位90蚊，而家310蚊。Nvidia 舊年低位100蚊，而家幾乎500蚊。呢啲，只係講緊半年前嘅事（之前你又唔買！！！）

48. 唔講咁極端嘅，咁蘋果低位都升六成，微軟都係。納指都四成，標普都三成啦。

49. 咁你想像到，啲嘢買貴咁多，值博率當然低好多，業績可以出錯嘅空間亦都好細。甚至乎可能根本業績再好都會跌。

Stay invested：美股係平均一年升8-10%—但往往半年已經升晒幾年嘅平均升幅

50. 照舊，講到明。唔係話而家唔買得。但再三問自己，之前你又唔買？你話要捉正個位低梗係冇可能。唔係叫你100蚊買到Facebook 同Nvidia。但，200蚊呢？300蚊呢？呢啲位任你買。

51. 就當指數，都係一樣。你未必捉到低位。但，過去呢六個月，任你買。點都買咗啲嘢啩。有嘅，很好，咁分享到啲成果。冇嘅，多多檢討。

52. 因為你見一樣好難搞嘅嘢：美股係一年升8-10%—但好少真係6-12%，往往都係大起，大落。你見有時係半年已經升晒幾年嘅「平均」。（呢個亦係成日都講stay invested嘅重要）。

結論？都係冇變過。

53. 即係點？冇變過，大型科技股，太貴了。你買QQQ都仲還好，個別去買Nvidia我真係唔會（好似300蚊後我都冇叫人買，咁你又可以質疑走寶嘅。下次你示範下）。

54. 當然了，有新錢，除咗QQQ外，買非科技股可能好啲。仲有，香港嘅，騰訊阿里巴巴啦（呢排咪幾好），或者啲高息股。

55. 超長線嘅，咪印度印尼越南。國家ETF啦，甚至EMXC算。不過你真係超長線先好。講十年八年。就唔好一年輸三成又問我點算又話我點你。越南股市舊年一樣跌到趴街，一年跌三成。你不停同人講咩經濟好　人口年青　取代中國　之類，有乜用？得你先知咩？

56. 下篇講返上星期五堆業績（基本上全部都好）。仲有嚟緊啲業績