市況嘅嘢：美股星期四皆大歡喜，星期五高位急回。Nvidia升5%轉跌。銀行股業績勁照跌。搞乜？另外，港股五連升，又升乜？明明又話爆煲 (Patreon)

快手望下美股市況：星期四皆大歡喜。美金跌，債息跌，股市新高

Netflix ASML Visa SalesForce JP Morgan SPGI LV 愛馬士新高。然後話升AI

不過，星期五就另一回事，高位急回。Nvidia 升5%變倒跌。乜事？

出業績堆銀行，業績靚，但都全部高位急回

其實睇美匯指數，同埋美國債息，好過你一大堆咩經濟行業故事

順手講，港股五連升，升乜？港紙又唔爆煲啦？但明明大陸出口數字極差

其實，日日咁多膠論，我駁得幾多？又使乜去浪費時間討論？

而我真係唔明白，做乜啲人咁鍾意討論。有乜好討論？

結論：其實美股都真係有啲貴的。業績好都跌，唔係太好意象

1. 之前有讀者希望我一個星期至少有一篇講下「市況」 ，其實我都唔係好明即係講乜。

2. 如果係叫我估下星期會點嘅，其實浪費時間，我亦冇咁嘅能力。短期嘅市場，就係不可測。一季已經好難，仲要一星期？冇得估。頂多提議下你要留意乜

3. 但又斷估唔係想我講昨日道指升幾多點，呢啲你自己睇都得啦。又或者，呢排升乜，呢啲都係你自己知。不過諗真啲，又不能話冇用嘅，因為真係未必個個知。況且，即使係「歷史事實」，都有唔同嘅演繹，亦都有啲嘢你冇留意。

4. 咁我理解，「市況」，就係啲「基本心法嘢」，或者啲專題知識嘢（ETF呀，聯匯呀乜鬼）外嘅嘢。

5. 例如今篇，講美股市況，應該啱心水。

快手望下美股市況：星期四皆大歡喜。美金跌，債息跌，股市新高

6. 你睇到篇文都星期一晚，但真係要講星期四五嘅「市況」。好快話你知，之前出咗個CPI數字，市場好受落（寫咗啦）。中間仲有呢個納指權重調整嘅小插曲（呢度寫咗）（話時話，好似唔見官方有聲氣，有再話你知）

7. 值得講嘅係，星期四，標指納指都創一年半嘅新高。另外我持倉都十隻股票至少一年新高（未計ETF），你睇我Facebook/IG/Threads（所以要睇，@ivanliresearch）都有貼。除咗FAAMG+Nvidia堆嘢，仲有Netflix，Shopify，ASML，Visa，SalesForce，JP Morgan，SPGI，甚至LVMH，愛馬士

Netflix ASML Visa SalesForce JP Morgan SPGI LV 愛馬士新高。然後話升AI

8. 你睇ETF，QQQ SPY就唔使講。但EMXC，IDEV都一樣新高了。再講一次，同你講「只係炒AI」嗰啲人，真係連個世界發生咩事都未知，只係人云亦云。你見我在Facebook大力恥笑

9. 不過去到星期五，情況有啲唔同。好明顯嘅「單日轉向」。特別例如你見到Nvidia，一度接近500蚊，升5%，但收市倒跌。亦唔止佢一隻係咁，好多隻都係咁！

不過，星期五就另一回事，高位急回。Nvidia 升5%變倒跌。乜事？

10. 當然一日半日唔代表乜，但都可以講下。

11. 星期五發生咩事？其實冇乜事。事後驗屍，你當然可以講話「納指權重調整」，因為好多人就係見完市況就上Google搵新聞解釋。但我係唔同意的。雖然之前都寫過，堆科技股本身就貴，借勢跌10% 20%都不足奇（係！股票係可以忽然跌20%的，你接受唔到嘅，幫你唔到。你最好早啲接受。因為股票又可以忽然升四五成）

12. 話納指權重調整拖累嘅，你仲可以話星期五納指要倒跌，道指標指更強。但亦係我想講嘅一點：星期五高位急回嘅，唔止只係科技股。好多非科技股都係咁。包括一大堆銀行

出業績堆銀行，業績靚，但都全部高位急回

13. 亦都適逢星期五係幾間銀行出咗業績（仲有啲其他公司），差不多全部業績都係好，我另文再講。但股價呢？好多都升轉跌，有啲甚至大瀉（State Street咁），JP Morgan都蒸發晒啲即市升幅？

14. 搞乜？唔知噃。但，之前都寫過，今次個業績期，我係比較審慎嘅。當然審慎唔係叫你沽晒佢，唔係叫你乜都唔好買。但唔好瞓晒入去然後跌20%然後又問我點算。

15. 「之前你又唔買？」

其實睇美匯指數，同埋美國債息，好過你一大堆咩經濟行業故事

16. 正經，呢期你見到，其實講乜都假。好似都仲係睇美匯美國債息實際啲。

17. 固然，你去估呢兩樣嘢嘅走勢都唔係太易。不過短答案：未來一年半載都係睇跌嘅。通脹受控就快停加息嘛，不過留意美匯高位都跌咗12%了！郁得好快的，唔會等你慢慢「確認」

18. 估將來走勢唔易，估中亦未必估到股市走勢（正如之前債息都上過，但科技股照升）。但即係至少，事後解，都見到大約有個規律。

19. 你見到早排債息由4厘樓上，之後急跌（出CPI數字已經急跌），股市即時有運行。美匯指數嘅情況一樣。

20. 相反，去到星期五，債息忽然又彈返上，美匯又彈返上少少的。

21. 呢種「美金跌　債息跌　股票升」（反轉亦係）嘅玩法，其實同第一季，甚至第二季都係差不多。第一季就明顯啲，第二季就冇。當然中途唔會所有嘢都跟足，你亦未必解釋到點解科技股不停升。

順手講，港股五連升，升乜？港紙又唔爆煲啦？但明明大陸出口數字極差

22. 順手講埋，你見之前港股連升五日。升乜？

23. 首先固然係「支持平台經濟」（即時有利啲科技股，拿，肯定寫過的。都話「一死就放」，雖然有啲怕死得太緊要放都未必識翻生）。仲有其他嘢。

24. 係乜？好簡單，當然首先係美匯跌，人民幣反彈（留意兩者唔係完全同步，之前美匯跌人民幣都冇升，但總之而家人民幣就彈）。另外，美債債息跌，似乎都係利好晒全球股市。

25. 我想講嘅係：之前講到咩似層層，又話人民幣有排跌呀，甚至又話要掏空柏港啲外匯儲備呀，爆煲呀乜鬼。啲小朋友，又要再作過文　—　但其實唔緊要，反正每次都係嗰啲嘢。

其實，日日咁多膠論，我駁得幾多？又使乜去浪費時間討論？

26. 有讀者叫我評，而我講咗幾次，我當然可以評。但，為何真係要花呢啲時間？除非嗰期冇嘢寫，但呢期好多嘢寫。

27. 順手話埋你知，港股五連升，一個星期8%呀下，上返牛熊線添，「唔知可以叫牛市未」。但你留意，中途仲有一壇都幾杰嘅「壞消息」

28. 上星期三，中國出嘅出口數字，非常之差。你見CNBC嘅標題寫超過三年最大跌幅。而其實佢地email breaking news係寫badly misses expectations．唔止差，亦遠遜遠期。

29. 不過股市呢？冇反應喎。升足5日。咁就冇人講呢樣嘢

30. 你可以又諗下，如果港紙係跌500點，咁又會有另一種演繹，大陸經濟失速，人民幣繼續跌，淘空香港，世界大戰，冚球鏟。嘭！

31. 咁亦都證明，呢啲「經濟嘢」，根本唔係重點。跌咗你咪拎嚟解釋咯。唔跌就扮睇唔到，係咪？

32. 最後一講，大陸下星期出嘅GDP數字，可能去到7%增長。可能冇，但怕且有5% 6%—但你依然係會話，「經濟好差」。係咪？我亦都唔係完全反對。

33. 咁但其實，到底「經濟」是甚麼？如果中國經濟增長5%你話差，美國4%你話好。咁即係唔係計GDP增長啦？咁到底計乜？

34. 呢個我亦會寫篇文講。不過短答案係：慳返啖氣。我唔明做乜啲人咁鍾意討論。係咪應該收口，睇多啲文，睇多啲書，思考下會好啲？甚至返工勤力啲，做多啲運動，都有益過你去同人拗呢樣拗嗰樣

而我真係唔明白，做乜啲人咁鍾意討論。有乜好討論？

35. 我諗我寫得好清楚，聽日台海打仗，我都係照買美股的。所以唔使嚟問我俄羅斯兵變（BTW，照計分分鐘一年內就和談了，你要我講我一樣可以同你講一個下午，但，對你投資有乜幫助？）

36. 呢度證明乜？證明，早排港股嘅弱勢，都主要真係同人民幣弱有關。甚至同啲咩「經濟好唔好」都冇乜關係。然後，你見債息一回，美金一跌，港股咪又五連升。

37. 然後我又唔知啲港紙爆煲青有乜嘢講了。仲有人民幣互換又係人民幣瀉唔停又係掏空香港。淘咗咁耐，而家港紙直頭7.81，近排越嚟越強（雖然，呢啲嘢係同股市完全無關嘅）

38. 當然，不停講，可能真係有一日中，我亦不覺得50年後都仲有港紙。但係，其實，估中又點？你啲網友咁醒，做乜唔日日沽空港紙？

39. 所以搞清楚，到底你係想同人圍爐，定係想有知識，定係想賺錢。

40. 然後有讀者同我講，朋友send畀佢。咁我就只能講，「我啲朋友冇send畀我」，十分殘酷嘅一句，不如審視下你啲朋友係乜人。當然亦未必要咁極端，但即係，等於我都成日見啲人講「熊市反彈」，唔通我又走去反駁佢？好得閒？

41. 我學會一樣好簡單嘅，就係唔好同人浪費時間拗任何嘢。

42. 你要多朋友嘅，好易。你唔投資，做窮人，一定好多朋友的。因為任何社會，民唔民主，專唔專制都好，都係金字塔，窮人多有錢人少，係咪？

43. 而你亦真係見到，多數人講嘅嘢，就當然係多數錯的。美股長升，買指數都升幾十倍，但個個發晒達未？點解冇？個個網友咁叻，點解咁窮？點解仲要搞基金昆你錢，仲要拍片開IG搵廣告？

44. 所以，你真係唔使去浪費時間的。你覺得港紙會變零嘅，咁咪唔好買港股，最好借盡孖展去沽空。你覺得股市係騙局嘅，咪唔好買港股。你覺得男人女人都係賤格嘅，拍拖做愛傷身嘅，咁你咪去做和尚尼姑。

45. 就唔使嚟同人拗的。

46. 但你要我「指正」嗰啲人有乜謬誤，同佢解做愛有幾爽嘅，咁我真係唔會浪費時間的。一句，做乜要教精你？我好得閒？

47. 唔好意思，講遠咗，要留返下篇講（應該即刻出埋）。但想講嘅重點係：

結論：其實美股都真係有啲貴的。業績好都跌，唔係太好意象

48. 你見科技股，高位回。銀行股，業績間間好，一樣高位回。咁呢啲望落唔係太好嘅蹟象，當然只係一日，咁可以睇多幾日。

49. 你可以見到，係同啲咩「業績」「經濟」冇乜關。上面講咗，近期都見到幾明顯，債息升跌，美匯升跌，同股市相當同步。但呢啲本身只係一齊出現嘅現象。背後可能都係反映，啲估值有啲難搞。

50. 特別強調一樣：業績好都仲要跌，係令人比較擔心嘅。又睇下係一日半日定點？

51. 下篇會詳細講啲業績，回顧同前瞻。