［冇買都可以睇下嘅］理文化工746盈警。高息股要留意嘅嘢。券商AI工具有冇用？又，可以follow 我IG 同Threads @ivanliresearch (Patreon)

理文化工又盈警，搞乜？

化工產品價格跌，毛利率純利率純利都一齊大跌。點解價格跌？你話呢？

我寫時3/4蚊左右，而家4.75。

我寫時3/4蚊左右，而家4.75。息你都收咗1.3，三十厘都有喎！

上次業績都有寫，見到情況明顯變差

而家就得返2厘息，最初係8厘—但股息就係可以減

半off topic：券商AI工具，對你有冇用？

化工產品價格，其實網上睇到，所以個盈警亦唔會令人意外

不過因為我冇買，就冇特別留意。所以，都係靠你自己

呀首先，除咗我個Facebook Page（就快唔用）．仲可以follow我IG，同埋Threads．全部都係用@ivanliresearch。內容應一樣，但唔會睇漏嘢。順手幫我整大個follower數目

1. 太多嘢寫，逐樣嚟，可能短期內會有幾篇文，但過幾日未必有。嚟緊事忙。遲下你地會知係乜事。不過呢度嘅文我都會盡力出嘅，頂多少啲外遊（實情6月頭之後都冇了）。

2. 呀仲有，之後可能呢度會多啲廣告。但首先，我唔會做植入廣告，係廣告我一定話你知我有得分，利益申報，好似以前咁。另外，只會頭兩日放在正文（兼且錄音），之後就放最尾算數，睇文嘅可以唔睇，錄音嘅亦唔會錄入去。就等於之前大家都見過我有啲券商開戶廣告咁。可能遲下有信用卡之類。

3. 當然了，任何情況下，我都唔會畀你嘅個人資料畀任何人，包括你嘅email

4. 放心，美股業績期呀，銀行業績呀，啲科技股高位急回等等，我都會講。但最迫切嘅，講咗港股先。

理文化工又盈警，搞乜？

5. 冷門嘢，理文化工746出咗盈警。唔係好多讀者買，但都真係有，況且市面都好少人講，都循例交代下。況且冇買，都可以從中學到啲嘢嘅

6. 出咗盈警，留意係收市先出嘅，即係股價未反映。詳情呢度，雖然都好簡短。中期業績按年跌88%。點解，收入跌，同時毛利率純利率都跌。點解收入跌？化工產品價格跌。點解價格跌？經濟唔得咯。

化工產品價格跌，毛利率純利率純利都一齊大跌。點解價格跌？你話呢？

7. 咁以前都寫過，呢間公司，產品價格升嗰時，毛利率純利率一齊升。相反亦都係。其實好多公司都係，Nvidia都會係咁，因為始終公司唔少嘢係固定成本—所以你見一來一回，啲產品價一郁，純利好敏感　—　仲要留意「股價＝市盈率Ｘ盈利」，而產品跌價時，盈利跌時，往往就連個市盈率都一齊跌。

8. 咁所以你會睇到，股價往往大起大落，周期嘢。不過之前都有提過，食得鹹魚抵得渴。

我寫時3/4蚊左右，而家4.75。息你都收咗1.3，三十厘都有喎！

9. 況且，隻嘢呢，照計你買咗，都多數係賺錢嘅。隻嘢2021年3月我第一次寫，略寫嗰時股價3.15，詳細寫時股價4蚊左右。況且，更重要嘅係，中途你都收咗1.3息，當你4蚊買都幾年收30厘，你計賺蝕要計埋落去。另一個角度講，你6蚊或以下買嘅，肯定仲係贏錢　—　然後同期恒指跌咗30%以上喎（咁當然，你買恒指都收返近10厘息嘅）。所以我唔會覺得呢個call係「錯」。況且，早早都講，又工業股又細公司，都不能買得大。

上次業績都有寫，見到情況明顯變差

10. 另外，其實公司情況變差，都唔係呢半年先發生。上次全年業績時我都有寫（今年3月）。舊年上半年，8.9億純利，下半年2.7億，大倒退了。今次呢？咪話同舊年上半年比純利跌88%，即係今年上半年，大約1.1億純利。下半年唔知，但如果就咁計同上半年一樣，全年都係2億純利左右。而呢個其實係差過10年前了， 周期嘢係咁架啦。你睇啲科技公司，就唔會今日盈利差過十年前的（但當然，估值亦高好多）。

11. 又，你見啲純利跌咁多，你發現計市盈率都唔知點計。所以去到啲盈利大起大落時就好難用。真係科學啲嘅，應該計幾年盈利。

而家就得返2厘息，最初係8厘—但股息就係可以減

12. 順手計埋，公司我當2億純利（應該都未必有），我當都係派返30%息（唔敢講唔會減），7000萬左右嘅股息。40億市值，咁就得返2厘息唔夠了。

13. 然後，你見你睇報價機，仲係見到11厘息。梗係啦，舊年嘛！仲有，我最初嗰時寫，都話你知8厘息（嗰時真係有，亦派到，你仲要收咗幾年）。

14. 亦即係話，你係不能單靠呢啲「幾多厘息」去買股票。特別係咁大上大落嘅行業。寫高息股系列時都講，你盈利大約保得住先得，否則好難一路維持派息。而你收息亦不能只計幾年。仲有，當然了，唔好走去睇住個報價機嘅「股息」，一係你自己做少少功課，一係索性唔好信。因為，報價機啲估值數字，一定係舊嘢，但股價炒將來。

15. （股息率都算係一種估值，因為股息率即係 派息比率/市盈率，例如100億市值，5億盈利，派40%息（即係2億 ）。市盈率就20倍，股息率就係派息比率/市盈率，即係40%/20，即係2%，也就同你計2億除100億一樣）

16. 所以你不能只係睇個「股息率」，甚至幾年派到都好，都可以忽然一年冇晒。但股息支持又係咪冇用？梗係唔係。咪話理文化工呢個例子，過去三年你都收咗1.3股息，係一個好大嘅buffer。當然唔係所有位買都唔會輸，但計返呢1.3股息，好多原本股價輸嘅，計返收息，就有得贏。

17. 所以，保持到派息，當然都好重要。但亦要你真係肯坐定定收。有啲可能半年已經嚇走。

半off topic：券商AI工具，對你有冇用？

18. 半off topic一句，近來有券商出咗啲「AI工具」（如圖，有興趣可以遲下解多啲）。你不能話冇用，但，你可以想像啲人自我感覺良好，倚賴呢啲嘢，然後就去問「理文化工股息率」，見到11厘，狗衝入去　—　見到冇？我認為，科技只係令啲人更加笨。「資訊」越嚟越冇用（因為普及化），練好你個腦袋同心理，先係致勝之道。

化工產品價格，其實網上睇到，所以個盈警亦唔會令人意外

19. 呀另外，補多筆。啲化工產品價格，大約你網上都可以睇到，以前都貼過。所以產品價跌，肯定唔係今日先知—講真，上次全年業績（即係今年3月）都知啦！。亦好可能係因為咁，你見股價一路都差。所以有時你自己買咗嘅，睇緊啲呢啲，都可能有啲用嘅。至少你知發生乜嘢事　—　特別係，呢啲公司同行業，你唔會見到平時有媒體或其他人講。即係舉例，Nvidia啲晶片加價減價，好多人會留意。但大陸啲哥羅芳跌價，除咗業內人士外，冇乜人會留意。

20. 於是你可能質疑，喂，埃汾你又唔去睇住，唔去提讀者？「上次業績咪提咗」。仲有一個好重要嘅原因：因為我冇買！有買我可能睇得緊啲嘅。當然亦不代表睇得緊啲就唔會輸錢。

不過因為我冇買，就冇特別留意。所以，都係靠你自己

21. 但即係，舉例你自己有買咗，有去睇啲化工產品價格—但其實我當你PM問我，「呢排啲化工產品跌價喎，點算/點睇？」—講真，我都未必答到你。因為你見到，根本你知得仲早過我啦！我好可能都要自己走去上網睇，先知道「哦，係喎」。

22. 咁我有乜用？我嘅用途就係，教曉你各種道理，同埋減低你犯錯。咁到你自己見到啲嘢發生時，都醒水知道點做啦。我買嘅股票已經好多（港美夾埋過100隻），但，仲有更多係我冇買嘅。所以你與其靠我，嚟問我一隻我冇買甚至未聽過嘅股票，不如靠自己。