納指權重調整嘅嘢：簡單嚟講，我係唔會點理嘅（一貫作風） (Patreon)

有乜影響？冇乜。如有，都只係一兩日，甚至冇。

QQQ有冇自主權？梗係冇。我就係貪佢冇

順手講埋，唔好以為「跟指數」就完全被動。你個指數點嚟嘅先？

其實季季都做調整，只係今次特調。點解？你都估到

順手講下個時間表

一般我對呢啲增持減持，都係唔多關心嘅

不過科企本身估值貴，所以借勢跌，又有幾奇？

咁掉轉，因為非基本因素跌，係咪好嘅買入機會？理論上係嘅

順手解埋，同炒Tesla入標普指數嘅異同

講到尾，冧把。有乜權重升？有乜跌？

最後，大市，「如果之後都係大科企跑出咁納指咪升得冇咁勁咯」

但其實，又唔係第一次特調。又睇下歷史

1. 有人問納指權重調整，很好。原本都諗住寫，但你見我昨日冇寫，寫咗通脹美債之類先，咁即係嗰啲更加重要。

2. 今篇就寫呢個納指權重調整。另外，提埋你，星期五開始美股業績期。又係銀行打頭陣，好可能要出咗之後先寫。今次業績期，我係有啲擔心嘅（雖然上次我都咁講，但最後我都係只買不沽，證明「擔心」同「唔買」甚至「沽」係兩回事）

有乜影響？冇乜。如有，都只係一兩日，甚至冇。

3. 如果懶嘅，好快話你知：其實唔使點理。有乜影響？其實冇乜影響。一兩日可能有（甚至都冇），一個星期後已經唔會有人講。

4. 簡單嚟講？即係恒指成份股季檢之嘛。另外，有啲人可能醒起上次Tesla入標普指數（2020年12月，我有寫的，自己搵Index），但唔係好同。

5. 成個故事背景，呢度。個記者係我識的，呢篇寫得幾好。其實都係直譯外電，但至少唔會好似啲KOL咁曲解，解錯，甚至加鹽加醋（不過呢篇台灣稿好似仲好）

QQQ有冇自主權？梗係冇。我就係貪佢冇

6. 首先，其實係納指100嘅調整（呢篇之後講納指即係納指100了），所以當然影響QQQ。有人問QQQ有冇主自權，答案係冇。跟指數執藥。題外話：你見我差不多買親或叫親你買，都係啲「冇自主權」嘅被動ETF（QQQ SPY 盈富基金 EMXC EWJ 都全部係，KRE都係，不過我冇叫買。ARKK就唔係），就係唔想佢有自主權—否則我咪變咗買基金？變咗要睇個基金經理？而寫過好多次，基金經理，多數都跑輸大市

順手講埋，唔好以為「跟指數」就完全被動。你個指數點嚟嘅先？

7. 另外，亦都講埋，唔好以為「跟指數」就實好。你有冇諗過，背後個指數點嚟？上面嗰啲ETF，都真係「大盤指數」，相對透明，計市值之類。就算IWD IWF，都話你知點定義咩係增長咩係價值咁。相反，有好多「指數」，根本就係好睇條友點去pick，亦都往往係為咗隻ETF先發明個指數—即係例如啲乜鬼「行業ETF」「主題ETF」，就任佢講。AI ETF，咁咩叫AI丫？「我鍾意揀晒快手　萬國數據入去都得」。例如之前有啲咩「通脹受惠股ETF」—咩叫通脹受惠股？任佢講。我就係唔鍾意呢啲「有自主權」嘅嘢。因為就會有好多問題。

8. 再題外話，遲下可能寫C基金。買定花生。唔知咩事嘅？呢度。又，資深讀者會記得勞蘇基金（最後胎死腹中）。咁我可以保證，勞蘇基金唔會咁差。「因為唔會齋買港股」。而事實，我啲港股，都係好過佢隻嘢嘅。

其實季季都做調整，只係今次特調。點解？你都估到

9. 講返正題，做乜比重調整？其實每季都會做（好似恒指咁）。只係今次係個特別嘅「特調」。原因？正係好多人都知，啲大嘢佔個比重佔得太大。留意，呢種「特調」史上亦發生過。

10. 大嘢佔得太多有乜問題？其實你問我係冇的。以前咩Nokia一隻佔咗芬蘭指數三成都係咁添。不過只係美國證監有分散投資嘅規定，所以先會有問題。

11. 技術嘢：個觸發點，就係因為嗰堆4.5%以上嘅嘢，加埋晒超過48%。就要將佢調返去低過40%。而我都唔知有個咁嘅rule

順手講下個時間表

12. 好啦，另外，時間表。今晚（7月14）就公佈詳情，然後係7月24號星期一開市前生效—留意，即係7月21號星期五尾段會執位啦下。好得閒或者唔係香港時區嘅，可以到時睇下。

13. 咁不過提提你，都話市場炒預期。呢單嘢，早一兩日已經公佈咗，其實股價要郁都可能郁咗，唔使等到7月中

14. 但又講返，到7月21日，有乜事發生？咁的確，部份嘢嘅權重會之後星期一開市前會變，而QQQ就真係要跟足的，所以去到7月21日尾市，就真係會沽走啲權重調低嘅股票，買入啲權重升嘅股票咁咯。

15. 咁QQQ嘅規模大唔大？都係相當大嘅。但，你一樣有其他基金會去執啫

16. 好啦，講咗咁多，但其實有乜影響？我認為，係冇乜嘅。有都唔係你太需要關心嘅影響

17. 頭先寫過，其實咪同恒指移檢差不多，次次都有出有入，有啲權重升跌。咁早年我都仲會寫下出出入入嗰啲，但權重調整嘅我都費事寫（後期就出出入入都費事寫）。係架，咩匯控騰訊嗰啲，次次都有調整架啦，但你有冇見到對股價真係有乜好大影響？（然後你見恒指執位，近幾季甚至都好似冇見到要臨尾狂買，以前我寫信和（83）都寫過，唔知係咪盈富基金一早同出面啲人agree咗，唔使自己在市場係咁買賣）

一般我對呢啲增持減持，都係唔多關心嘅

18. 你可以發現，其實一般對於呢啲乜鬼減持增持，我都係近乎唔關心嘅。特別係一早通晒天嗰啲。要反，都反映晒啦。又唔係好似畢菲特買日本股咁，會有好多人跟住買。你覺得會有好多人跟住沽啲大科企？我唔覺得咯

19. 而且一句：其實，呢啲同間公司嘅價值有乜關係？

20. 呀邊個嘅名句，市場嘅嘢，短期就voting machine，長期就weighing machine。上次講座（仲未上Youtube，聽聞月尾會上）我都有講，股票點解升跌？啲人會懶醒咁講「供求」—sound so smart，但其實即係廢話。

21. 咁係乜導致啲供求先得架大哥？況且，所有交易，都係有咁多買，就有咁多賣架啦。

22. 即係，呢啲被動基金減持，最多咪短期影響股價，可能幾日（其實應該一日都冇）。咁，我投資從來都唔會睇幾日。但你要睇幾日嘅，咁就真係純粹睇「供求」了，睇下啲人買賣有幾進取，邊個惡啲。而你真係覺得你估到？

23. 即係話，如果你話去到阿里巴巴減持商湯，或者畢菲特沽比亞迪之類，因為太大件，咁都仲值得講下。喂，被動基金嗰啲，真係唔係太關事。

不過科企本身估值貴，所以借勢跌，又有幾奇？

24. 好啦，你要拗嘅，咁會唔會股價跌？可能會的。況且，一向都話堆嘢估值貴架。借埋呢個消息再跌啲，有幾奇？而到時真係跌幾個巴仙，你又根本不能肯定係「因為」呢個調整而跌喎。

咁掉轉，因為非基本因素跌，係咪好嘅買入機會？理論上係嘅

25. 掉轉，亦可能有人問，「既然啲嘢因為非基本因素跌咗落嚟，係咪買入機會？」—理論上，我係支持呢個講法嘅。正如之前咪話啲美資基金要減持中移動嘅？根本就係好機會。佢地被迫要沽，但同公司本身有何關係？N年前美國基金焗沽俄鋁，情況一樣。

26. 問題係，其實，今次呢堆減持，有幾大影響？我懶計數，但照計，個影響都唔會太大。事實上，本身納指每季都會有呢啲權重執位，不過今次係「特調」咁解。

27. 而仲有個問題係：堆嘢本身係貴嘛！咁就算跌3%，5%，你飛入去，都可能係貴。而你不能保證話「沽完就會彈返上之前嘅位」　—　即係掉轉，你話小朱忽然傻咗沽晒啲Facebook出街間嘢一晚跌咗60%（比喻啦），你去搏，就可能make sense

順手解埋，同炒Tesla入標普指數嘅異同

28. 呢個亦都解釋埋，點解嗰時我又寫過炒Tesla入標普指數，我甚至都玩埋一份，都執咗少少（極少可短炒）。首先，嗰時貪心嘛！二來，嗰時成街都係游資（2020年無限QE後嘅大半年）。仲有，Tesla係百年一遇嘅情況，一下就由零跳到去相當大嘅比重　—　以前啲股票係唔會咁的（個故事係因為Tesla一路輸錢，但又市值好大，所以先會咁。如果佢係以前啲企業咁賺錢，早早入咗指數）

29. 仲有，嗰時Tesla大把支持者，亦都唔少人混水摸魚，你係知道好多人會一齊去買的。但今次完全另一回事：首先，唔會有好多人跟沽。同埋，你都要有先有得沽架！（而我唔信啲美國連登仔會今次走去沽空Big Tech）

30. 咁當然啦下，錢多身痕嘅，玩下就可以。但真係要短炒，我寧願搏話「炒權重升嗰啲」。而唔係「沽咗權重跌嗰啲之後先買返」（唔跌咁你點？）。我亦唔會因為咁賣走啲嘢。另外，你話「因為權重跌而畀人沽啲嘢去追」，我都覺得冇乜意思，上面都解咗—　唔通Nvidia跌3%你又飛去入買咩。

講到尾，冧把。有乜權重升？有乜跌？

31. 最後，冧把。權重會跌嘅，上面都提咗啦，咪而家比重超過4.5%嗰幾隻：即係，微軟，蘋果，Nvidia，Amazon，Tesla。留意微軟蘋果佔成12%，Nvidia Amazon 7%，Tesla就剛剛過咗4.5%

最後，大市，「如果之後都係大科企跑出咁納指咪升得冇咁勁咯」

32. 另外，雖然未過4.5%，但全部一齊執下，Facebook Google都有可能比重跌，雖然影響應該好細。

33. 好啦，我反而會睇，可能「受惠」嘅。其實唔知邊隻，但街有人估。Starbucks，Mondelez（賣嘢食的，吉百利，三角朱古力，Oreo）, Booking.com，、Gilead Sciences之類。值得望下，特別係Starbucks同Mondelez，雖然冇幾可平過，今年亦跑輸大市（兩隻我都曾經想買）

但其實，又唔係第一次特調。又睇下歷史

34. 至於最後，大市。可能有人問：咁今年都係最大嗰幾隻帶動喎，如果之後情況都係咁，但佢地比重調低咗，咁納指咪冇之前咁勁咯—理論上又係啱的。但，你點知？況且，之前集中晒在嗰幾隻大嘢，又有人話唔健康。而家減咗，又有其他嘢驚。其實，真係唔使去理呢啲東西。

35. 況且，如果你真係只係睇好大科企，以前都寫過，有啲齋FAAMG嘅ETF買的。「你睇香港隻2814今年升到笑」。但即係，最初你買QQQ，就係為分散，同埋貼住大市嘛。然後忽然間佢調整你又反悔？

36. 另外，又係睇歷史時間。頭先講過，納指呢味「特調」，之前玩過兩次。第一次1998，第二次2011。

37. 咁睇圖，明顯見到冇乜點影響。其實，如果我遮住個刻度，根本你分唔到係邊年—甚至，你連金融海嘯同世紀疫情，都未必真係好快搵到！！！（2000年科網爆破，同埋舊年嘅加息大跌市，就認到嘅）。

38. 可見好多你嗰時講到世紀股災（疫情時的確係股災），事後睇，真係唔係咩回事。更加唔好講嗰啲一日跌5%然後問我乜事，點算。

39. 不過最後，醒埋你。公平地，其實拎到咁長時間，又升咁多嘅圖，係應該用log scale嘅。呢個好啲。

40. 呢篇都滿意啦？實情7月呢堆文，應該篇篇都滿意。再預告，下星期可能比較多嘢做，但盡量都出返至少兩三篇。