市況插播：CPI數字靚仔，美金跌到一年低　—　但，通脹幾時見頂？舊年七月。美股幾時見底？就唔係七月！咁舊年見底時，有乜訊號？溫故知新下。順手講埋，而家即係點睇 (Patreon)

CPI數字，靚仔啦，美股勁升

溫故知新：通脹幾時見頂？舊年7月。但美股幾時見底？就唔係7月！

而家先話「確認」通脹回落，就蚊都瞓（甚至有人仲話未「確認」）

Bonus：留意下舊年美股見底時，有乜訊號？

不過其實，兩個「見底訊號」，都隔足一個月。你坐得到先好

係，核心通脹仲係頑固。但，之前啲人就唔睇核心睇Headline，而家又掉轉

10年債息，早排先升到4厘樓上，做乜呢幾日急回？

美匯指數，不經不覺跌到一年低。但，做乜急跌？

講到尾，咁即係點睇？都會話你知。但呢兩個月講座都有講

人民幣回穩，港股回穩。但日圓升，日股跌。

1. 有人話不如講返多啲市況，「其實我唔係好知即係講乜」，但呢篇應該係啲比較傳統嘅「大路嘢」。講通脹呀，美金呀，債息呀，下半年點睇呀嗰啲。雖然都係例牌節目，但都有價值嘅。

CPI數字，靚仔啦，美股勁升

2. 事忙，所以都唔記得提大家星期三會出個CPI數字。當然你地自己去睇都得啦，我向來都會分享啲source．Trading Economics（TE）幫到你

3. 廢話少講，一個字，數字靚仔。

4. Headline CPI嘅，按年升3%，wow，「通脹受控」。上次係按年升4%，街估3.1%。大幅回落，仲快過預期。數字去到2年新低，亦都連跌12個月。留意TE估下次會跌到2.8%

5. 你睇按月，CPI升0.2%，上次係升0.1%。係加速咗，但呢啲涉及好多因素，而至少街邊係估按月升0.3%嘅，所以數字都係好過預期

6. 咁你估到了，美股反應唔錯。

溫故知新：通脹幾時見頂？舊年7月。但美股幾時見底？就唔係7月！

7. 而再提返你，其實舊年呢個時刻，通脹就開始見頂。當然了，當時你的確未必「肯定」。但通脹數字真係唔同股市，你見都係有個「周期」，唔會一個月急升，下個月又急跌咁的。其實去到八月九月，一路回落，你都應該大約估到見咗頂，頂多你拗未必好快回落（而咩叫「好快」就可以任你搬龍門）

8. 想講一樣嘢，舊文都講過，你可以溫故知新。甚至只睇分段標題都得：美國通脹幾時見頂？七月。美股幾時見底？唔係七月。所以係有啲難估。即使估通脹好準，都未必估到美股幾時見底。

而家先話「確認」通脹回落，就蚊都瞓（甚至有人仲話未「確認」）

9. 但，可以好肯定話你知，如果你而家先覺得「確認」通脹回落，就蚊瞓了。美股升咗幾多？Nvidia升咗幾多？甚至而家都仲話「驚」死灰復燃嗰啲 —咁搞法你真係成世都不能買股票。因為，跌到低嗰時，「你又話驚通縮啦」（唔好笑，而家大陸CPI係咁跌，啲人又話驚通縮，都真係幾……無聊）

Bonus：留意下舊年美股見底時，有乜訊號？

10. 大家可以再三睇返，到底舊年美股見底時，係有乜訊號？肯定對你有益。除咗係「恐懼」外，以及網上大把好笑嘢外—特別留意，其實美匯指數，同埋美債債息，都係咁上下時間見頂。你自己搵圖吧（下面都有）。呢個至少事後睇返，係幾解得通嘅

11. 但如果冇記錯，兩者「見頂」都爭咗成個月，一個九月尾，一個十月尾。好難捉到最準—所以你跌幾日都驚嗰啲，真係算吧啦—唔係叫你唔好投資！係叫你唔好試做股神time the market．九月尾飛入去，你要捱成個月。然後又問人點算，又話止蝕，又驚。咁你不如個個月供算了

不過其實，兩個「見底訊號」，都隔足一個月。你坐得到先好

12. 呀，仲有一個小問題（其實完全唔小！）：我同你而家事後涼冷氣，就對住個圖話一個九月見頂，一個十月見頂—　但嗰一刻，你未必真係知嘅（雖然，亦唔係完全事後孔明，跌得兩個星期，你都有信心估見頂啦）

13. 講返而家，你睇核心通脹，就冇咁靚仔了。

14. 一路都用嗰個字：頑固。但當然亦係半杯水，睇你點睇。上次係按月升5.3%，今次街估會回落到5%。出嚟呢？4.8%。其實回落得幾快下，亦明顯低過預期。但你話「仲係相當高」，我亦唔會反對

15. 不過，就唔使亦唔好太鑽牛角尖，除非你份工做呢啲嘢（咁就鑽多啲牛角尖！鑽到冇人熟過你。但記住，呢啲技能用嚟搵錢，唔係用嚟投資！）。

係，核心通脹仲係頑固。但，之前啲人就唔睇核心睇Headline，而家又掉轉

16. 正如信報畢老林都有寫（唔貼了，又，我唔係成日同意佢講嘅嘢，但至少值得睇下）。呢啲嘢，都好睇你點演繹。具體啲，大家知，核心CPI係扣咗食品同通張啦。好啦，之前Headline CPI高，核心唔通嗰時，你班友又話聯儲局離地，食品能源嚴重影響民生，點會唔重要。就算學術講法同你講，呢啲項目一向比較波動，你都肯定又話this time is different—特別係舊年打仗喎，又疫情後冇耐喎。你啲政治膠一定大條道理講「世界從此唔一樣」，「成個供應鏈改晒」，「歐洲半世紀最大戰爭你居然話食物能源價格升只係暫時，你到底識唔識？」

17. 不過之後糧價油價越跌越有，寫過啦。

18. 到而家，風水輪流轉啦喎。Headline CPI回落，「但你又話核心仲係好高」。咁想點？即係，要鬧，實有得鬧嘅。

19. 我嘛？我就會照同你分析呢啲嘢，但投資決定，真係未必睇呢啲嘢。正如上面講，你係睇，都睇美債債息同美匯指數啦。

20. 不過近排啲美匯指數同美債債息，講真，你問我，「我都唔係好明」。

10年債息，早排先升到4厘樓上，做乜呢幾日急回？

21. 睇圖，10年債息。留意舊年10月尾見頂。但重點睇返呢排。

22. 呢個CPI字數一出，美債債息跌，好合理，你都估到丫。

23. 不過，我想你留意下，其實6月尾開始（即係兩星期前），債息係咁升，上星期上過4厘樓上。但你見股市又唔係太受影響。

24. 當時點睇債息升？大約係因為聯儲局都仲話會再加息，可能比大家預期再多咁。

美匯指數，不經不覺跌到一年低。但，做乜急跌？

25. 美匯指數呢？仲神奇。今年早前都仲有人同我講美金強，我心諗點強？同舊年9月高位爭好遠喎！（反而你睇，上星期見4厘嘅10年債息，同舊年高位，冇爭咁遠）。

26. 記住，舊年9月後，美國仲係咁加息的，而家仲加緊。但美匯指數9月已經見頂。請你反覆咁思考呢點，咁你下次就唔會講「美國仲加緊息美金唔會跌」之類嘅錯誤講法。

27. 但，近排美匯指數亦係咁回，不經不覺，一年新低。一年去幾次日本嘅你，都知日圓由5.4升到上5.7啦。亦唔係出咗CPI先回。

28. 夾埋晒，係咪有啲矛盾？點解明明話聯儲局仲係放鷹（是的），然後之前美匯同美債債息（特別係美債債息）反彈，但兩嘢又急回？甚至都未等到出CPI

29. 只可以演繹為：其實，無論如何，大家都係估「就快加完」。冇錯，係真係拖了再拖，舊年年尾又估就快加完。但都不改呢個事實。正如我嘅比喻，補時，補上補，但大家都知近完場　—　即使聯儲局話再遲啲，再加多一次，都改變唔到啲「好友」呢種信念。

30. 越嚟越近「確定」停手，就越多郁動　—　因為往往到真係「確定」時，就太遲了。

31. 又或者，你可以話，啲人呢幾日開始估到個CPI會大手回落。雖然我覺得呢個講法太過夾硬嚟。

講到尾，咁即係點睇？都會話你知。但呢兩個月講座都有講

32. 咁，即係點？

33. 即係，首先睇返個加息預期。提返你，7月尾要議息。全世界都估會加多0.25，出埋呢個CPI都冇懸念，好事。

34. 但，下一次呢？9月。又提提你，而家聯邦基金利率，5-5.25。7月底加多次，5.25-5.5。9月嘅預期呢？都係呢個水平。即係，加埋7月就收工

35. 但在你噓之前，都真係要講：呢啲預期呢，只係代表「呢一刻」嘅真理。主席出嚟講兩句嘢，或者下個月出個唔靚嘅CPI，又即時一晚大轉。所以，要明白市「市場預期」就係咁。

36. 講咗咁多，「咁即係點」？

37. 詳情細講。但其實大睇法，呢兩三個月，差不多冇變。特別有嚟講座嗰啲會知（所以都係有用嘅，仲要免費）。

38. 早早都幾有信心，估美匯指數見頂，美債債息見頂（上個星期上返4厘，都驚咗啲）。

39. 但美股呢？科技股我覺得唔值博。我當然完全唔會沽，但新錢頂多買啲QQQ，主力都係買其他嘢。其他乜嘢？咪非科技股，或者其他市場。

40. 港股亦講過啦，一係騰訊阿里巴巴（呢排好返），一係高息股。

41. 然後你見到，美匯一落，人民幣回穩。「早排又講咩港紙爆煲嘅，又要過兩個月寫過」—啲人真係話大陸外匯儲備用晒就要拎埋香港嗰啲呀（而其實，「係要拎嘅，使乜等而家？」）。

人民幣回穩，港股回穩。但日圓升，日股跌。

42. 仲有，可以快講。唔記得我有冇講過，可能有，但冇成日提。美匯跌，日圓強，你地見到啦。但日圓強，又似乎巧合地同時見到日本股跌。

43. 然後你諗真啲，日本股過去兩年強勢，又好似見到係日圓跌的。係咪一個反向關係？答案係：似乎係的！

44. 當然理論好多，我都識吹（本人乃係CFA Charterholder），正向嘅，你咪話吸引資金流入。反向嘅，你咪話提高出口競爭力乜鬼。，

45. 不過一個大約嘅rule of thumb：你發現，成熟市場，多數就匯價同股市負相關。新興市場，就正相關嘅。

46. 但只係十分大約。

47. 咁，「仲買日本股？」。買！但係咪睇好日圓好快跌返？未必喎。咁點解仲買日本股？因為，睇長線嘛。況且，都話上面呢個rule，相當弱嘅，但的確有時見到

48. 仲有，「日圓升你咪賺匯價咯」。跌嗰時又話蝕匯價，升嗰時又話原來有時負相關，咁想點？