［終極強文］下半年展望（好似係）—美股升咗咁多，仲買唔買得（三之三，完） (Patreon)

六張圖，睇下「歷嚟上半年咁勁，下半年會點」

圖四，美股最好14次上半年，下半年六成升。總平均升2.6%

圖五，只計好過10%嘅年份，但由1950年計起—咁平均下半年，升10%！

圖六：如果只計12-17%嘅年份，又點呢？仲勁，下半年必升！

插播：圖四好定圖五好？短得滯樣本太少，長得滯世界己唔同

圖七：最強嘅圖，睇100年，半年升10%以上。下半年會點？都係幾好！

贏錢機會75%，半年平均回報6%

圖八：同圖七一樣，但唔同表達手法

圖八話你知，廿年得一次，下半年嘔突。但點解圖四又冇？

圖九：呢個圖好難睇，但有獨特地方

結論—諗下你學咗乜

1. 戲肉，六張圖。理論上你唔睇頭兩篇都唔係好大所謂（第一，第二）。今篇我地睇下，「到底半年升咗咁多」，之後會點。

六張圖，睇下「歷嚟上半年咁勁，下半年會點」

2. 你夠聰明嘅已經會問：點解有六張圖咁多？係，因為，可以有六個唔同嘅演繹方法，六個唔同嘅結論（理論上啫，實際上個結論都係「買」）。咁即係點？邊個「啱」？「信」方個？就係我要講嘅嘢。

圖四，美股最好14次上半年，下半年六成升。總平均升2.6%

3. 首先圖四，Charlie Bilello嘅表。其實呢啲表好易整，「有data的話」。都唔係真係廢話，因為有啲圖係有data都好難整。但呢個不難，況且唔少數字都免費找到。

4. 照計易明，但都解。留意佢用咗差不多100年嘅數，咁睇返，歷嚟頭半年嘅最好表現年份。咁你見到了，今年升16%，「史上」排到第13（out of 100年，你可以記低佢）。

5. 留意，佢用咗最好嘅14年（唔計今年），亦即係變相計「升得14.4%或以上嘅年份」。你記得呢句嘢佢。緊要

6. 之後點？一目了然啦。睇最右邊先。呢15次，半年開局咁好，冇一次全年要嘔突（1987就差不多要），但呢個照計冇乜特別。上半年升咗14%起碼，下半年要嘔突，都有啲難度

7. 但你最關心係，下半年升跌跌嘛！

8. 咁睇啦喎，呢14次，有6次要輸錢—「好似唔係好值博」，係咪？

9. 但，唔好咁慮淺。次數唔係最重點，贏幾多輸幾多先重要。我幫你計埋啦，夾埋晒14次，平均拉勻下半年都係贏錢嘅。咁已經支持到「下半年有得升」嘅講法

10. 不過，都係唔好咁膚淺！都話，「美股都係升多跌少」，求其搵半年，平均都係升架啦。升幾多先得架？係咪好過一般年份先？好啦，圖入面呢14次半年，平均雖然係正數，但拉埋，只係2.7%　—　係咪好過普通年份？應該唔係（我點解唔計都知？呢個係常識！咪話一般8-10%一年，咁半年點都大約有4%，總唔會太側埋上半或下半）

11. 不過你可以質疑嘅係：啲大跌，集中在最頂嗰幾行。亦即係升得最癲嘅半年之後嘅事　—　你亦可以解釋為同「估值」有啲關。以前都寫過，有一定嘅mean reversion，升到太多嗰啲，往往下半年就冇力。亦即係之前舊年寫過嗰幾篇（例如呢篇，呢篇，呢篇，呢篇），跌得多嘅年份，之後往往升得幾好。也即是「別人恐懼時我貪婪」嘅實證

12. 於是乎，你可以話，「唔計最頂嗰幾年」，條數即時靚返。好狗？係！陣間仲有更多。但仲有，其實，「點解一定要計半年」？點解唔睇打後一年嘅回報？半年後你冇錢就畀人撕票咩？呢度冇計，但一般嚟講，坐得一年，啲數字會再靚啲。一個好約略嘅rule of thumb，就係睇一年。

13. 見到冇？呢度己經教咗你好多嘢。你成日都會見到好多唔同嘅表，但點演繹？冇人教你的。

圖五，只計好過10%嘅年份，但由1950年計起—咁平均下半年，升10%！

14. 圖五，嚟啦喎，你發現同圖四好相似。放心，之後啲圖，個個都好似！但就畀你睇下當中少少嘅分別！

15. 呢個圖，同上面嘅圖四好相似。但首先，佢就計超過10%嘅年份（圖四計最好嘅15次，即係超過14.4%），咁你見圖五就會多啲年份。但又留意，圖五係1950年計起，圖四係計成100年，所以歷史就圖四長啲。但兩者計晒，圖五嘅年份都係多啲（不一定代表好啲）

16. 好啦，上半年升完一成，之後會點？一個月三個月呢啲，太短，冇興趣討論。為求統一，不如睇半年（之後都會係）。咁你見到，靚仔好多喎，八成升！

17. 另外，升幾多？8-10%（視乎你睇中位數定平均），咁就同之前圖四嘅2.7%好唔同！而呢個當然係好過一般半年嘅表現（4-5%，圖有寫）（又，都話估都估到，美股一年8-10%，半年咪4-5%）

18. 見到冇？同圖四好似，但因為拎啲標準（10%定14.4%）唔同，年份（1928定1950年計起）又唔同，出嚟結果爭好遠。大鑊。

19. 雖然，似乎都係應該買嘅。

圖六：如果只計12-17%嘅年份，又點呢？仲勁，下半年必升！

20. 圖六，仲好笑，同圖五係同一個作者，同一堆數（1950年起）。但又點唔同？圖五就只係睇高過10%。圖六呢？又要睇大過10%，又睇12-17%（即係今年嘅情況），又睇大過15%。

21. 於是乎，見到啦，原來美股上半年升得12-17%嘅年份，下半年係最好嘅！回報11%。唔止，仲要係次次都贏錢！永冇例外！

22. 如果我只係sell你買股票嘅，我就只會用呢張圖，踢走晒之前圖四圖五。呢啲係常用嘅技倆

23. 呢個亦都其實等於我講圖四嗰時，話「斬走最高回報嗰幾年」（而之後半年往往大跌），差不多同一效果。

24. 好啦，上半年12-17%嘅，下半年平均11%。仲100%贏錢。「仲唔借盡孖展去買」？

25. 但你當然睇到問題。除咗「過去不代表將來」（的確），仲有一樣嘢，你都應該感覺到。

26. 喂，好狗喎！

27. 是的，咁樣去框，都真係有啲狗。所以，我唔會太信呢個結論。但你要小心，出面好多時人地present畀你嘅，就係咁。係我先咁好心話畀你知呢啲勾當

插播：圖四好定圖五好？短得滯樣本太少，長得滯世界己唔同

28. 咁，圖六係真係比較狗嘅。不過，圖四同圖五，邊個「好啲」呢？都真係難答你。

29. 理論上，應該係搵個計多啲年份嘅，個門檻唔好定得太窄。即係圖五，佢計多過10%嘅年份，就好似好過圖四計好過14.4%（即係最好嘅15年）。

30. 問題係，圖五又只計1950年以後嘛。圖四計1928年開始

31. 有冇兩全其美？有冇得我計好過10%嘅年份，但又計到遠古世紀？係有嘅。「自己計」。又或者，放心，下面圖七就有！我對你幾好

32. 但順手插播多兩樣嘢。第一，呢個「數字拎幾耐」嘅問題，你永遠都會面對。固然太短冇代表性，sample size太細，但太長又怕「個世界唔同咗」，拎啲遠古年代嘅嘢講，加上有啲太遠嘅數字未必搵到。所以靠你經驗去判斷trade off．

33. 但，一個rule of thumb ，點都要有三十年。你話計十年嗰啲真係算數，肯定偏差。仲有，我一般覺得，你可以由1972年計起，之前嘅未必要睇。估下點解？因為呢個係「金本位制」嘅前後，我相信個世界真係唔同嘅。拿，又學到嘢（有關「金本位制」，之前寫過長文，自己上index搵）

34. 第二，你問，點解係揀好過10%，唔係揀8%？唔係揀好過11%？拿，呢啲就唔係膠問，但都真係冇答案的。都係齊頭數咁解。講真，最好嘅方法，係你自己做一次！你咪自己做8%或者11%，對你有益的，睇下效果係咪好唔同。

圖七：最強嘅圖，睇100年，半年升10%以上。下半年會點？都係幾好！

35. 拿，一次個滿足晒你嘅兩個願望。彭博嘅呢個圖，圖七。歷史夠耐，100年。但又同時睇半年升10%以上嘅年份，唔似圖四咁只睇14.4%。即係，圖四同圖五嘅混合體。正呀喂。

36. 我亦幫你計埋，呢度28個年份。首先，21次下半年係升，7次跌。贏錢機會75%，還不錯。仲有，呢28次，下半年平均升幅6%。咁肯定係好過普通年份。

贏錢機會75%，半年平均回報6%

37. 呢個圖，就真係end all discussion 了。等登舖排出咗圖四五六先，我啲文要心思的！

38. 不過我順手提你，所謂「平均」升6%，你見都係由跌兩成幾，到升兩成幾都有嘅。呢啲係股市回報嘅特別。「平均」一年8-10%，但好多時都係大升大落。但你拉長睇，又總係唔會去到平均年年升三四成，或者長期年年升得2%。

39. 另外，插播，個圖嚟自彭博篇文。篇文唔難明，但要錢，訂戶先睇到，我亦唔打算copy，一來煩（啲圖好難copy），二來我解得仲清楚。

40. 不過要講嘅係，彭博啲文，就真係好啦。但你訂佢嘅文，都好似兩舊幾水個月，唔算好平。當然另一個玩法，你可以訂email newsletter，唔使錢。但會到喉唔到肺，想睇全文就要科水。但我覺得訂咗冇壞，可能睇睇下你就想真係畀兩舊水一個月訂。又或者睇睇下覺得太深唔想訂亦可

41. 但幾可以肯定嘅一樣嘢：你多數都唔會有時間睇得晒！Newsletter你都未必有時間睇晒。正常嘅。但，與其睇啲垃圾文，不如睇啲好東西。免費添喎。

42. 又或者，訂The Daily Shot吧。你見好多圖我都拎佢地。雖然一樣，你唔會有時間睇得晒。又，呢舊嘢，百二蚊港紙個月（年費就一個月一舊水有找）。你計份量好似Bloomberg抵啲，不過呢，「理論上你可以同人夾份嘅」，你收個email，大可以forward畀你朋友。雖然咁做係唔啱的。

圖八：同圖七一樣，但唔同表達手法

43. 圖八，其實我理解，就同圖七差不多一樣嘅嘢。但唔同嘅表達手法。

44. 呢度解下個圖（你亦要留意佢寫嘅字）。首先，打棟嘅，係全年表現。打橫嘅，係下半年表現。上半年表垷？冇噃，一係你睇圖七。你亦可以話，佢揀晒圖七嗰啲年份，即係上半年升得10%嘅年份，就係入面呢啲點，應該係28個點。然後睇下全年（打棟）同下半年（打橫）表現點

45. 唔係好明點解？咁我解你知。首先，在圖下半截嘅，亦即係全年會輸錢嘅。廿八次只得一點，就係1929年。就係唯一一次，半年升到10%，下半年要嘔突，全年要輸錢收場

圖八話你知，廿年得一次，下半年嘔突。但點解圖四又冇？

46. 智力題啦喎，你睇返我寫圖四。明明嗰度話冇試過全年嘔突喎。而圖四一樣係計足咁多年。咁點解圖四冇呢個嘔突？

47. 答案：因為，1929年，上半年只係升12.3%（我點知？圖七咪有寫！）。所以，未入到圖四嘅嗰個標準！（圖四揀最好嘅15次半年，1929年未入到。要半年升到14.4%先入選）

48. 另外，睇佢個圖有寫，而我上面都寫咗。在上半年升到10%嘅呢廿八次，平均下半年就升6%，咁當然係好過平常年份嘅下半年了。留意埋，佢有寫埋，全年平均升幅係24%—亦即係話，原來呢廿八年嘅上半年，就平均升18%左右（因為全年24%，下半年6%嘛）。仲唔明？即係話，在呢堆上半年升到10%嘅年份中，到底上半年係平均升幾多？就大約係18%。所以你可以今年上半年並唔係特別強（但納指當然強）

49. 然後你見到，呢廿八年中，上半年18%，下半年6%—似乎都真係有啲腳軟。呢個亦可能係同估值有關。頭半年升得18%，要下半年升多兩三成，有啲難。

50. 最後，呢廿八年，廿一次升，七次跌嘛。75%機會贏錢，圖七咪寫咗。

圖九：呢個圖好難睇，但有獨特地方

51. 最後，圖九，相當難解嘅一張圖，我亦覺得個presentation差。仲要冇啲數字，冇我解我你估真係唔知佢講乜想表達乜。

52. 首先，英文生字時間，Top quintile係指「top 20%」（正如top quartile係 top 25% ） ，佢揀咗最好嘅20%半年表現出嚟，做呢啲點。

53. 另外你都會奇怪，點會有咁多點？佢有明明話1945年計起，但有183個點（寫住，唔係我走去數）。78年，邊有183個半年？仲要計咩最好20%？

54. 因為，佢同上面所有圖都唔同，佢唔係揀「上半年」，而係「任何一個6個月區間」，咁就可以有好多了，例如2月至7月，10月至3月（包頭尾）。咁揀晒呢啲出嚟，由1945年至而家，應該係有九百幾個「6個月區間」（自己計吧，記得斬頭斬尾喎，唔好QKA23）。入面揀最好嘅20%，就係上面呢183個點

55. 打橫嘅，就係之前嘅六個月表現。打棟楝嘅，就係之後六個月表現（所以你見到打橫條軸由10%開始，入得圍嘅，全部都係之前六個月起碼有10%）

56. 咁然後做嘅嘢，同上面差不多，就係睇返打棟，睇返打後六個月嘅表現。結論都差不多，都係話畀你知，「6個月掂」，之後嘅6個月都會OK掂。

57. 右下個框有寫，74%情況之後嘅六個月升。平均6% 左右。最高兩成幾，最差跌兩成幾。其實，同圖七咪差不多一樣！

58. 不過，嚴格嚟講，係應該好似圖九咁做嘅。因為你可以質疑股市做乜要睇日曆，點解只係睇勁嘅上半年，唔係睇勁嘅「6個月」

結論—諗下你學咗乜

59. 應該有啲頭暈吧，但慎防你get唔到。

60. 呢度圖四至圖九嘅重點，並唔係我要話畀你知下半年多數升！！！！！！！

61. 如果只係要講呢樣嘢嘅，我一篇文可以講完，或者一張圖七已經得。

62. 你真係要get到嘅係：同樣一樣嘢，人地用唔同嘅包裝，拎唔同嘅門檻，time frame，做出嚟嘅嘢可以相當唔同！你仲會明白，當中有乜唔同嘅考慮（太近唔夠代表性，太遠又驚個世界唔同咗）。我仲教埋你，到底邊啲圖比較「好」

63. 仲有，你亦可以學埋點樣去 present啲data，甚至你自己整都得。

64. 當然了，用呢度一大堆圖，其實出嚟嘅結論，都大約係支持「升咗咁多都好，下半年都有得升」—證明呢樣嘢史上都真係相當「強」嘅現象

65. 但有啲有咁「強」嘅現象，就可能真係隨住你拎唔同 time frame，就爭好遠了。可能完全唔同結論。例如？「加息股市升定跌」之類

66. 所以投資嘅學問，一世都學唔完。其實呢篇嘅嘢唔止對你投資有用，對你日常見嘅其他嘢都有用。