［強文］下半年展望（好似係）—美股升咗咁多，仲買唔買得（三之二，一次過出晒） (Patreon)

數字嘅嘢，當然冇得「保證」，亦實有例外。仲有，睇點揀點演繹，我教你

與其話「你要買嘅理由」，其實係「反駁一啲你覺得唔買嘅理由」

買股票實在唔使咩理由。但好多人就有好多「唔買嘅理由」。

圖一：納指100半年升咗四成，史上最勁半年

圖二：明明標指已經進入牛市

圖三：目標價得啖笑　—　標指已經升穿晒所有大行嘅目標價

留意，唔好咁慮淺，以為大行分析員廢。唔見請你去做？

而我不知道到底咩係「目標價」，你問嘅時侯，其實即係問乜？

預告：六張圖。歷嚟美股升得咁多，下半年會點？又，點解六張圖？

1. 好啦，上篇只係引子。今篇比較短，戲肉係下篇（會即時出埋）。

2. 但再講一次，純量化分析，解返做乜下半年會覺得美股仲有得升。做乜「升咗咁多」，都仲有得升。

數字嘅嘢，當然冇得「保證」，亦實有例外。仲有，睇點揀點演繹，我教你

3. 唔係好肯定點表達，但呢度可以再講一講：留意，呢啲歷史數字嘢，當然冇得「保證」。而數字本身，亦都好睇你點去揀，點去演繹（呢三篇文嘅重點！！！）。

4. 以前都寫過，唔好咁表面。有啲「數據」，係冇用嘅。以前講過個例，例如你睇足球聯賽，總會搵到可能個名長啲嘅表現好啲（Manchester嘛），但呢啲東西係冇意義嘅。除非你證明到同成績直接有關（Off topic：點解英格蘭成功嘅球會都在北部而唔係倫敦，就有得解的。正如歐洲唔少成功球會往往唔在首都。德國柏林冇料到，意大利羅馬不及米蘭都靈）。

5. 但我想講嘅係，與其話我以下嘅嘢係「列出一啲你要買嘅理由」，不如話係「反駁一啲你覺得唔買嘅理由」。Save低呢句，慢慢細味下。

與其話「你要買嘅理由」，其實係「反駁一啲你覺得唔買嘅理由」

6. 亦即係話，一啲你今日用嚟懷疑嘅理由，明顯在歷史時空好多情況你都可以照用，但最後你發現根本唔係理由。

7. 亦即係話，唔係話俄羅斯疑似內戰（最後冇發生）所以你要買。「但根本唔關事」。你話我知呢啲叫「不利因素」，我咪話你知唔係

買股票實在唔使咩理由。但好多人就有好多「唔買嘅理由」。

8. 對我嚟講，買股票真係唔使咩理由，照計對你嚟講都係。但反而，往往啲人會有好多理由「唔買」。例如在今次嘅例子，「升咗咁多」。而我就係話你知，「升咗咁多」，都仲係有得升嘅。至少歷史如此。唔敢話一定重覆，但你「反駁」嘅理由，照計用落歷史任何一年都可以，每一次你都可以咁講。然後我用歷史數字話畀你知，結局就同你估嘅唔同。

9. 不過首先，講下，所謂「升咗好多」，其實係幾多。

圖一：納指100半年升咗四成，史上最勁半年

10. 首先睇圖，納指100，今年上半年升咗近四成（未同你計舊年年尾）。四十幾年最強，亦即係史上最強（納指歷史冇標普指數咁長啦）。咁所以，記住又係問自己，「之前又唔買」？

11. 你可以覺得呢句好難聽，或者我有啲串。但，至少我就買重啲大科企，亦都一路坐住，有錢就買晒落去股票。好難做到咩？

12. 同樣地，納指100升咗咁多（史上最多半年喎），你會有啲卻步，好合理。亦所以，而家我唔會覺得啲大科企極之值博。不過介紹返，呢篇文我地係講「美股」，即係標普指數，唔係納指100。

圖二：明明標指已經進入牛市

13. 圖二，見到了，標普指數低位升咗超過兩成。擺明就係「牛市」。大佬，蘋果歷史新高啦，但仲係有人話係「熊市反彈」。呢樣嘢我成日都質疑，呢度不再重覆

圖三：目標價得啖笑　—　標指已經升穿晒所有大行嘅目標價

14. 另外，少少離題。但好似舊年都寫過。圖三，睇返之前美股啲大行策略員嘅「目標價」，而家當然已經全部過晒。以前都寫過，好似年年都係咁。升市嘅年份，年尾指數高過晒所有人年頭估嘅位。跌市呢？更唔使講，當然係跌破晒所有人估嘅位。

15. 當然你可以話，因為呢幾年股市大上大落。但，相信都仲有啲更深層次嘅原因。首先，唔好咁膚淺，覺得「大行分析員」廢。講真，你唔會自大咗啲？你拎唔拎到人地份工？公司開善堂？做得嗰啲位嘅，斷估識嘢點都多過你　—　但當然，未必佢投資叻過你！拿，留意兩樣嘢係有分別的。正如照計我對股票金融嘅認識，多過絶大多數讀者同朋友（否則你訂嚟做乜？），但，唔少朋友讀者嘅投資表現都好過我。兩者唔係同一樣嘢。

留意，唔好咁慮淺，以為大行分析員廢。唔見請你去做？

16. 不過，我就靠呢啲知識同技能搵錢，無論係返工定係呢度，「咁咪有錢投資」。正如你都應該用你嘅talent去搵多啲錢，唔好本末倒置。你長期都拎最低工資嘅，就真係好難脫貧的

17. 其中一個原因，大行分析員，都係打份工。最緊要乜？最緊要保住份工。講得太牛，或者太熊，都可能會畀啲客質疑（而唔好以為啲客就好醒！）。

18. 當然仲有，以前都寫過。其實呢，有冇諗過，咩叫「目標價」？你見你但凡問我「睇幾多」，「目標價幾多」，我都係唔識答。因為我都唔係好知咩叫「目標價」，你都可以諗下你心目中嘅定義係乜。

19. Nvidia 100蚊，我同你講目標價400蚊，你當我玩你啦，係咪？但真係一年間嘅事咋喎！同樣地，佢300蚊時，我話目標價100，你又話我耍你啦，但又真係一年間嘅事咋喎。咁即係，如果隻嘢一年間300蚊跌到100升上400，咁到底目標價係100嗰個啱，定400嗰個先啱？好似兩個都啱，或者兩個都錯？咁到底咩叫目標價？

而我不知道到底咩係「目標價」，你問嘅時侯，其實即係問乜？

20. 識啲金融學術嘢嘅，咁會知，可以「計」個合理值出嚟。但，當隻嘢100蚊，我計到120蚊　—　咁你係咪去到120蚊沽晒佢？去到200蚊呢？唔通你瞓身沽空？「合理價」120蚊喎．咩叫「合理價」？唔知噃。

21. 指數都仲還好，大約有個市盈率嘅Range（雖然濶過英倫海峽）。個股嘅，我都唔知咩叫「目標價」。

預告：六張圖。歷嚟美股升得咁多，下半年會點？又，點解六張圖？

22. 下篇就戲肉，六張圖。我地睇下，「到底半年升咗咁多」，之後會點。

23. 你夠聰明嘅已經會問：點解有六張圖？係，因為，可以有六個唔同嘅演繹方法，六個唔同嘅結論（理論上啫，實際上個結論都係「買」）。咁即係點？邊個「啱」？「信」方個？就係我要講嘅嘢。

24. 呢度我畀埋你六張圖你，Attachment有，呢篇文最下面都貼晒，

25. 你可以試下自己睇，睇下有乜心得。又或者唔想煩嘅，下一篇，我就會解釋呢六張圖，話埋你知即係點。你亦可以自己睇咗，諗下，然後再睇下我嘅解釋同你諗有乜唔同。呢個係好好嘅鍛煉，唔好永遠只係聽人講，但亦唔好永遠都自己閉門造車

26. 下篇，戲肉，大結局，解呢六個圖。四千字，但一次過吧，唔再斬兩篇。