［強文］下半年展望（好似係）—美股升咗咁多，仲買唔買得（三之一，一次過出晒） (Patreon)

一個月只睇一篇，就睇呢（三）篇

美股升咗咁多？下半年仲會唔會升？應該係會嘅

唔算好值博（之前你又唔買？），但還可以

未買繼續買，買咗唔使沽　—　特別係買咗唔沽

點解升咗咁多，貴咗咁多，都仲有得升？

唔講利率唔講經濟唔講政治唔講盈利唔講估值，齋講死數。全量化

唔講「利好因素」「不利因素」—呢啲嘢係幫唔到你做決定的

估值，都係要睇嘅，不過真係好難掌握，學到老

純量化：之前「升咗咁多」嘅年份，多數下半年都有得升。

舊年玩過「跌咗好多，之後會點」，今次玩「升咗咁多，之後會點」

一個月只睇一篇，就睇呢（三）篇

1. 呢篇就犀利，精彩咯。我敢講係近期寫得最好嘅，亦係你會最有得著嘅。你一個月睇一篇嘅，就睇呢篇吧

2. 結果寫足三篇，一次過出晒佢。但，你好冇耐性嘅，就直接睇最尾嗰篇都可以嘅，戲肉在尾。但當然，你問我，就應該睇晒三篇。順手之後可能我休息兩日，有啲其他嘢整。

美股升咗咁多？下半年仲會唔會升？應該係會嘅

3. 呢三篇，理論上係講下美股半年展望，但未必係你估到嘅講法。我一路都會話回顧重要過展望，咁但有啲人唔滿意，就畀個展望你先。

4. 其實主要都係針對一啲你最想知嘅問題：「下半年會升定跌」「買唔買得」。而你嘅潛台詞應該係，「升咗咁多，仲買唔買得」。

5. 咁當然了，記住記住反省，「之前你又唔買？」。咁但，都會答你。你都估到，當然係買得。你問我值博率高唔高？唔算好高，喂，你都識講升咗咁多啦，「之前你又唔買」。但又唔算好唔值博，即係還可以。亦即係答埋你，照計估下半年美股仲有得升。

唔算好值博（之前你又唔買？），但還可以

6. 咁當然了，「其實美股多數年份都係升嘅」。亦當然，冇「肯定」。唔好下半年股災跌四成然後又嚟嘈我呀，話我燈呀，出去鬧呀，或者抱怨「我聽咗你買」之類。再講一次，你鬧我會爽啲嘅，咪鬧。但咁樣只會令你永遠學唔到嘢。記住，冇包生仔。呢個Patreon三年，中途都經歷過好杰嘅股災，但我都照樣坐住咗，係咪？

未買繼續買，買咗唔使沽　—　特別係買咗唔沽

7. 所以結論，是好簡單的。未買繼續買，買咗唔使沽。亦係我會做嘅嘢。特別強調買咗唔使沽嗰部份。以前寫過，再重覆講多次。「止蝕」我從來做，但可以理解點解啲人咁做，唔少人仲係對我呢個講法半信半疑，我都理解　—　「但止賺嗰啲我真係理解不能」。真係差不多係保證贏唔到大錢。升少少就走，咁你點食到幾倍股，十倍股？而你冇升幾倍嘅嘢，點去補返你買錯股票輸嘅錢？除非你話你永遠唔會錯（咁就係你寫文我訂你啦，下話）。當然你「嚴守止蝕」可能可以避免輸得多，但亦同時放棄埋upside

8. 以上嘅都講過，開始正場。好啦，我話叫你有貨唔好沽，有錢繼續買。咁當然係因為睇好下半年嘅美股。但你一定會問，點解。仲有，好應該問嘅，就係「升咗咁多仲有得升？貴喎」。好合理嘅問題。

點解升咗咁多，貴咗咁多，都仲有得升？

9. 一般嘅「半年展望」，係點做嘅呢？我以前都做過唔少，特別係打工年代。你都會見到出面好多人做。拿，同你講下市盈率啦，講下下半年有乜「有利因素」啦，由拜登連任谷政績到通脹受控都可以講。又講下有乜「不利因素」啦，由中國爆煲到拜登拉柴都可以講。仲可以講下啲經濟增長呀，失業呀，聯儲局加息呀，企業盈利呀。

唔講利率唔講經濟唔講政治唔講盈利唔講估值，齋講死數。全量化

10. 呢啲東西，你一定見過啦，早年我啲講座都會咁做，而家就唔係好鍾意咁做。知唔知點解早年鍾意咁做？「因為慳時間」，易做，況且夠大路，「大行都係咁做」。而家就比較有良心，唔好浪費大家時間。而且有咗你地呢班固定支持者，我就唔怕做得「另類啲」。

11. 以上呢啲東西，企業盈利呀，利率呀，經濟增長呀。其實唔係完全「冇用」。首先可以增進你嘅知識，對你返工或做其他嘢（例如做KOL，或者在男神女神面前扮專家）特別有用。正經啲嚟講，對你理解呢個世界，都係有用嘅。

12. 不過，你靠呢啲嘢去「決定」買唔買股票，就死得。例子講過好多次了。股市往往同「實體經濟」都脫節。更唔好講咩拜登拉柴。

唔講「利好因素」「不利因素」—呢啲嘢係幫唔到你做決定的

13. 呢類嘢都講過多次，唔係直線思維嘛。首先你「擔心」嘅嘢，未必會發生。發生咗，又唔代表真係好似你估咁行。俄烏戰爭，世紀疫情，日本地震，聯儲局強力加息，大把例子。不重覆。

估值，都係要睇嘅，不過真係好難掌握，學到老

14. 比較值得睇嘅，就真係「估值」。固然博大精深，有啲人甚至難免覺得講咗等於冇講。因為，首先用乜去計估值都隨你，市盈率又得市帳又得，計歷史定計預期又得。計完「呢刻」後，你就算有個數，20倍，「咁即係平定貴」？都答唔到。又要睇下當時嘅息口呀。然後你同歷史比，又要睇同幾多年比（記住呢句！）。太短期，冇代表性。太長嘅，你又覺得個世界已經變咗　—　差不多所有涉及金融嘅嘢，都有呢種問題。解決方法？冇！都係靠主觀。但，你功力厚咗，做嘅判斷就會好咗，會比較識判斷到底邊啲嘢會重覆，邊啲嘢「世界變咗」。

15. 不過有樣嘢我肯定唔同意嘅，就係你話「估值唔重要」。就真係唔多make sense。In general 我可以接受你講「貴嘅可以更貴」，「平嘢冇好」之類。但，其他嘢不變的話，冇理由啲嘢貴咗一倍，你都覺得「冇分別」。

16. Nvidia升咗幾倍，個值博率梗係低咗啦　—　特別想講嘅係：平時啲友仔，買美股都走去「排隊」，即係300.1 300.3 都仲要排300.1 —　然後呢啲人嚟同我講「估值唔重要」，你唔覺得好笑？一個仙你就去慳（而冒住買唔到嘅危險），然後隻嘢升兩倍你話「估值不重要」—大把呢啲咁嘅人。而我講過，基本我買股票係唔排隊嘅。

17. 講咗咁多，都未入戲肉，你應該未覺得呢篇文有幾精彩。下半篇你就會見到（會即時出埋）。

18. 但好簡單，點解覺得下半年會升？點解「升咗咁多」都仲覺得會升？

純量化：之前「升咗咁多」嘅年份，多數下半年都有得升。

19. 就係因為極簡單：之前「升咗好多」嘅年份，下半年都係會幾好嘅！就係之後兩篇做嘅嘢

20. 亦即係話，純量化分析。我完全唔會同你講咩企業盈利，拜登，加息。甚至估值都唔講（不過估值都重要，只係唔在呢篇講。而所以我話你知都只係OK值博，唔係極值博。都係嗰句，舊年你又唔買？）

21. 就只係睇一樣嘢：到底之前嘅歷史，升咗「咁多」之後，係咪下半年就會唔掂？

舊年玩過「跌咗好多，之後會點」，今次玩「升咗咁多，之後會點」

22. 記性好嘅讀者，會記得舊年我都做過啲類似嘅嘢（例如呢篇，呢篇，呢篇，呢篇）。只不過上次係做「跌咗咁多，之後會點」。

23. 而如果你當時有睇嗰幾篇文，咁你根本舊年8月已經放心買股票啦！至少都唔會沽。自然食盡今年個升浪啦。就好似我咁。

24. 就唔使再去問自己，「之前又唔買？」

25. 下篇都未入戲肉。但，既然講「升咗咁多」，其實有幾多？然後去到最後一篇先真係睇「升咗咁多，之後會點」嘅歷史數字。

26. 三篇一齊出，唔使等。之後休息兩三日，有其他嘢搞