［如何避免低沽高追］俄羅斯兵變嘅嘢，關我乜事？關你乜事？而家你梗係嚟鬧我過晒期做乜講。但亦見到，好多人睇個世界，就係睇兩日，難怪永遠畀個市場牽住自己走。 (Patreon)

Summary：本人唔睇華文垃圾KOL

提升水平嘅另類方法：睇過期新聞。

戒除：「啲朋友講」「YouTube Channel講」

而你根本係唔使咁貼市嘅

點解啲人買樓賺大錢，但買股票賺唔到？

當年侵侵選到，主流覺得美股末日，結果呢？

英國脫歐，日本地震，世紀疫情　—　有邊次唔係驚咗先，然後升返？

「俄羅斯內戰」，兩日睇返，都已經得啖笑　—　但當初啲人點講？

兩星期前就問俄羅斯兵變，上星期就問人民幣爆煲，今日就問美國加息

3月你就驚SVB爆煲雷曼2.0，5月你就話我叫你唔好買KRE阻你發達

唔好自欺欺人，呢啲唔係叫關心世界。你係唔驚嘅，唔使問我啦，係咪？

港紙爆煲，你要嘅，日日都有人同你講。所以搞清楚，你想要嘅係乜？

財演KOL，靠乜生存？

金融市場上，「主流意見」錯到七彩，常有發生

即使你「估中」，又點？估中未加完息，但估唔估到Facebook升兩個開？

所謂政經大事，任你演繹

聽日普京倒台，解放軍打台灣，我都係照買美股的。唔使再問

1. 今次呢篇文好似離題，但我認為係相當值得睇嘅。你以為唔關事，但呢啲先最關事。睇完，你咪知道點解好多人都係低沽高追。留意，冇避法絶對避免的，但可以改善。

Summary：本人唔睇華文垃圾KOL

2. 破例畀個summary你—你係唔需要關心俄羅斯兵變嘅。OK，你可以去關心，但同你嘅投資決定完全係兩回事。而你真係要關心，請睇鬼媒，傳統媒體。網上嘅KOL，一概唔睇，特別係華文嘅（華文有邊個寫得好？真係好少，可能所長算寫得好，偉哥都算OK。唔係我睇唔起人，而係有料嘅又唔使出嚟同你一齊鬥做免費內容農場？我都留返啲好文呢度寫啦）

3. 4000字嘅文，其實幾句講完。但世界上有冇咁著數嘅嘢？點解個個富豪CEO都話睇書？點解唔係「兩句講完」？點解有人要睇戲？點解唔係睇谷阿莫兩句講完？

提升水平嘅另類方法：睇過期新聞。

4. 以前講個有個幾另類嘅做法，我估極極有人照做，但你真係好得閒可以試幾日，或者一個星期。

5. 個做法，就係delay—讓子彈飛一會。亦即係話，睇過時嘅新聞，過時嘅分析。十分有益。當然實際上，係好難做嘅，但可以盡做，或者你試一個星期，已經會見到分別。亦即係，睇Economist 好過睇Financial Times（一個星期一次同一日一次嘅分別），睇文章又好過睇breaking news。網上啲乜鬼即時分析，一概不睇　—　點解我要聽啲西里爾字母都未識得晒嘅人，即時同我講聽日俄羅斯會唔會內戰？唔覺得好笑？（當然，你識俄文又唔等於你識分析：俄羅斯人都識俄文啦！個個專家？）

6. 唔睇即時嘢，明顯係違反人性嘅。因為人就係鍾意即時滿足，而且人要社交。你唔睇新聞唔睇社交網，你朋友都會在Whatsapp send畀你。你冇朋友都好，你返工啲同事都會講，甚至啲客都會講，而你職責所在根本冇得唔聽唔答（正如我都不能唔聽你地啲問題）

戒除：「啲朋友講」「YouTube Channel講」

7. 不過，咪講咗咯，多數人就係多數係錯。你要有好嘅回報，當然不能做「普通人」。我唔明點解咁多人都係會用「聽啲朋友講」「網上啲人講」嚟做開頭，點解你覺得要聽多數人嘅意見？咁多次例子，你覺得佢地真係「啱」？

況且，talk is cheap（包括我）。你個KOL瞓身沽空美股，我反而會去睇下。你把口講聽日爆煲但齋講唔買嘅，早抖啦，因為聽日你又話後日爆煲。所以，「評論」而冇落注，是廢的。佢就完全睇淡但一個仙都唔沽空，我就話你知我審慎睇好但我100%身家買股票，咁你話邊講真心啲？

而你根本係唔使咁貼市嘅

8. 好多人以為要「貼市」，係錯嘅。呢啲只係一啲奇怪嘅誤解，特別係啲人想sell嘢畀你，要收割你嘅attention，當然係話畀你聽要秒杪鐘睇到實，乜都要知。但事實係咪咁？你試下咪知。我差不多可以保證，2020年2/3月，或者2022年10/11月，你去放兩個星期假，乜都唔睇，肯定對你投資成績大有幫助。

9. Email，我都只係一日睇一次。啲即時財經新聞，我都只係一日睇一次。仲有，長off notification．以上種種，除咗幫到你投資，仲幫到你工作。

點解啲人買樓賺大錢，但買股票賺唔到？

10. 以前都寫過，講升幅，過去幾十年，港樓並冇多過港股。但點解你極少聽人買股票贏大錢，但好多師奶都買樓賺唔少錢？除咗因為槓杆（股票會畀人斬），同埋買得大，仲有樓價波幅細，唔會一晚跌10%—而最重要係，你係不可能半夜起身忽然賣咗層樓嘅。但股票就會

11. 特別係你自問唔係好好功力，更加唔好太貼市。正係因為唔貼市，你先可以比較容易避開低位沽，高位買。因為你冇咁易畀市況牽住你情緒。

12. 以上呢啲可能都講過，咁講啲新嘢。

當年侵侵選到，主流覺得美股末日，結果呢？

13. 講具體嘅，好簡單。侵侵當年選到，美股即時大跌，大家覺得世界末日，我都覺得係—但我冇沽！嗰時有講講法，希拉莉選到，就係美國第一個女總統。侵侵選到，就係美國最後一個總統。唔少人都覺得佢當選股市就玩完，但結果呢？美股好快已經升返上去，之後破晒頂。留意，嗰啲甚至唔只係普通網友。好多真係有料嘅「專家」都咁估。

英國脫歐，日本地震，世紀疫情　—　有邊次唔係驚咗先，然後升返？

14. 英國脫歐又係咁。唔止，疫情都係咁，甚至日本地震都係咁　—　市場必定係情緒行先，多數人，就多數係錯。之後往往會修正。但往往都係panic行先，先沽為敬，然後因為跌咗，就牽動更多人驚，唔驚都會覺得「自己係咪太老定」，於是更多人沽。

15. 因為跌咗，啲人自然識得搵「理由」。上面嗰啲已經係真正大事。借問聲，其實舊年10月11月跌乜？你解唔解釋到？但嗰時「二十大權鬥」都拎出嚟講啦。好笑唔好笑？

「俄羅斯內戰」，兩日睇返，都已經得啖笑　—　但當初啲人點講？

16. 最近嘅，當然係所謂「俄羅斯兵變」。

17. 你隔兩日睇，就已經根本係另一回事。而家隔咗兩星期我先寫，你直頭想鬧我添，係咪？「過晒時嘅嘢仲寫」。但見到問題冇？好多人嘅焦點，就只係過往一兩日發生嘅事。你亦知道，社交網年代，好多嘢都只係炒兩日，你睇下星期一仲有冇人講Coco Lee？

兩星期前就問俄羅斯兵變，上星期就問人民幣爆煲，今日就問美國加息

18. 金融市場亦係咁，甚至更嚴重。兩星期前係咁關心俄羅斯兵變，三日前就個個嚟問人民幣爆煲，今日就個嚟講美國加息。問題係，其實一間公司嘅價值，會唔會在兩個星期內變嚟變去？變咗嘅，係乜？

3月你就驚SVB爆煲雷曼2.0，5月你就話我叫你唔好買KRE阻你發達

19. 正如只係幾個月前，SVB爆煲，瑞信爆煲，咁個個驚到覺得世界末日啦。都真係幾驚架，雷曼2.0喎，金融大災難喎，我都會驚（但我冇沽！）。但，幾日後，見唔跌喎，自然冇晒事啦。然後再隔一排，見到KRE升喎，「仲要去批評我阻你發達添呀」。

20. 恐懼與貪婪，就係市場上不變嘅嘢，人人都係，只有程度嘅分別。要克服，就真係最好唔好咁貼市。我就因為職業需要冇得太遠離，擺明對我投資有害（所以做金融記住要撈到高人工！做卒仔嘅，真係轉行算）。但你唔使好似我咁。

21. 之前篇文都寫過，你最感恩嘅，係件事星期六日發生，否則你又會做錯決定。

22. 都有讀者PM嚟問我，點睇。我心諗有乜點睇？上RT定CNN睇？其實，做乜我要關心？做乜你日日要關心咁多嘢？最關心嘅，應該係自己嘅投資，配置，心理，同埋打好你份工（冇錢何來投資？）—我相信你份工應該同華格納兵變無關的。我亦相信，你畀啲心機一個月搵多1000蚊，易過你去估克里米亞局勢。

23. 千萬唔好覺得我針對讀者個問題，我覺得係正好相反：佢嘅問題，正好代表好多人嘅心聲。我就借呢篇文去講下，點解其實大家係唔使關心呢啲嘢。

唔好自欺欺人，呢啲唔係叫關心世界。你係唔驚嘅，唔使問我啦，係咪？

24. 又，唔好自欺欺人，呢啲唔係叫「關心世界大事」，呢啲只係刷存在感，只係滿足你嘅immediate gratitude（講英文型啲）。Economist收咁貴都維到皮，因為佢就唔會同你鬥快，而人地啲讀者遍及全球，一般都係啲比較富貴嘅人。然後，人地啲記者就真係識嘢，識俄文同烏克蘭文有乜分別。不過使唔使每日出30個分析畀你？一個星期一本，夠晒。有啲嘢，隔兩日睇返，你都已經覺得係得啖笑

25. 讀者話，啲財演講到世界末日咁。其實我亦唔明即係點。首先，我估佢唔係當我都係一份子啦，因為我乜都冇講。咁其他人講乜，點解你要care？有人話地球係平嘅添（美國大學生添呀，有錢過我同你），有人話登月係騙局，有人話希拉莉係蜥蜴人。況且，得罪講句，你睇都睇鬼媒啦。一大班港仔，自己份工都未打得掂，幾時變晒俄羅斯專家？有咁好嘅見解，點解要免費話你知？

26. 我回咗讀者話，冇乜好關心。然後好快件事就「平息」。咁讀者話，啲財演冇話題了　—　我其實完全唔明個用意。咁，做乜你咁去關心佢地？當然你可以話你只係去恥笑下，但，係咪真係可以唔受影響？佢冇牽動你情緒嘅，咁做乜要問呢？好似吸毒咁，你以為唔會上癮，上咗癮你都不自知啦。睇得多，你自然畀佢影響。

正如港紙爆煲，你要嘅，日日都有人同你講。所以搞清楚，你想要嘅係乜？

27. 我就真係理都唔會理，特別係網上嘅垃圾。我就真係冇驚過，所以我亦冇走去同任何人討論。唔係你地嚟問，我完全唔會去睇去駁。Kyle Bass輸極都有（人地嘅錢之嘛），之前又再話聯匯8月會爆煲—留意係舊年8月。但冇所謂，呢排又有網友嚟問我。世上傻仔何其多，問你笑得幾多個？有人話兩萬蚊一日可以提爆中銀，我又去反駁佢？我咪好唔得閒？你都應該要明白呢點。況且，有啲自己講嘅人，根本都唔信—呢啲就仲仆街，唔係傻仔，但用心陰險。

28. 我諗，你睇投資嘅嘢之前，之前最好搞清楚。你係想改善生活，定係想求知識，定係只係想朋友認同，定係想滿足自己嘅幻想。

29. 你真係要講嘅，我都可以同你講返幾千字俄羅斯兵變。但，咩「俄羅斯再解體」「內戰」「變天」「直搗莫斯科」，隔兩日，你睇返，笑話一大個。華格納嗰兩萬人（其實得8000），錢又畀人拎晒，點直搗莫斯科？打少啲機吧。我唔係今日先講的，我在Facebook 有講—但嗰啲無聊嘢，就係畀啲唔畀錢嘅讀者睇咯。

30. 再講落去，就係茶餐廳維園阿伯講一大堆。但講到尾，其實做乜要花時間討論？

31. 呢一班錯到九彩嘅人，亦係之前同你講一人兩萬蚊提爆中銀嘅人，亦係同你講港紙爆煲嘅人。之前寫過文講media literacy，當然啲文係冇乜人鍾意睇　—　然後而家又嚟問我俄羅斯內鬥點。下星期可能問賴清德選到總統點（事實由陳水扁選到嗰時已經話陸沉，而嗰次真係射飛彈添）

財演KOL，靠乜生存？

32. 你要明白，嗰啲「財演KOL」係靠乜生存，社交媒體係靠乜生存。係喎，把口就個個識講If you are not paying for the product, then you are the product．但最後，都係會跌入呢啲販賣恐懼，操控你情緒嘅陷阱。

33. （又，放心，你個個月畀100蚊我，you are paying for the product，所以我唔使操控你情緒，唔使販賣恐懼）

金融市場上，「主流意見」錯到七彩，常有發生

34. 金融市場上「主流意見」錯到七彩，經常發生。可以睇呢篇文，我attach埋畀你，作者啲嘢我未必鍾意，但還是好過你網上睇啲垃圾（補充：七舊水食餐飯屙咗就冇，打卡都嫌唔夠high，但叫你七舊水訂個明報，好多覺得嘥錢。所以點解好多人都係睇網上嘅垃圾。不過你訂得我Patreon，照計你唔係啲咁樣因小失大嘅人，係咪？）

35. 一街估錯晒，就固然搞笑，今個星期同你講人民幣爆煲，下星期又同你講賴清德。

36. 可以再講多少少嘅係，以前都寫過，就算畀你估中，又點呢？好多人嘅誤解，以為「美國會點點點，啲嘢就會點點點，我就去點點點」—　問題係，你估到美國未加完息都好，但估唔估到Facebook 今年升130%？個世界唔係直線咁運作嘅。仲有一樣嘢，叫估值，偏偏呢樣嘢最難捉。咁以前都寫過，你可以當係「情緒」。人人都驚到七彩嘅舊年10月11月，乜都反映晒啦。

即使你「估中」，又點？估中未加完息，但估唔估到Facebook升兩個開？

37. 你估中世紀疫情，全球經濟失速，但估唔估到之後股市話咁快創新高？你估到俄羅斯打仗，但估唔估到油價跌極都有？你估到中國經濟一路增長領先全球，但估唔估到股市唔掂？

38. 個世界，就唔係靠「估到」啲政經大事而運作的。

39. 而我再講一次，你最應該感恩嘅係，俄羅斯兵變係星期六日。如果係平日嘅，更多垃圾評論，而可能市場都會有啲反應。

40. 不過現實係，根本去到星期一開市，已經冇再有人理呢啲嘢。

41. 再講落去？當然可以有排講。「是次事件雖然表面已經平息，但暴露俄羅斯內部矛盾」。不過，你掉轉頭講，一樣可以話「普京似小輸其實大贏，擺平內部矛盾，更加專心對付烏克蘭」

所謂政經大事，任你演繹

42. 根本就任Q你講，而我到而家都仲係唔明，到底呢啲嘢，同我同你有乜關係。

43. 政經大事，根本任你演繹。雷曼爆煲當然係金融大災難，但之後放水造就十年牛市。根本只係睇你拎邊一部份嚟講

聽日普京倒台，解放軍打台灣，我都係照買美股的。唔使再問

44. 我可以話埋畀你知，就算聽日解放軍打台灣，我都係照買美股的（不過就未必買港股台股A股了）。

45. Again，呢篇文好似離題，但我認為係相當值得睇嘅

46. 真係有時間嘅，真係睇多兩本書，買多份報紙，甚至去多次旅行，送下外賣，都好過你睇網上啲垃圾。

47. 因為既然大家都知「別人恐懼時我貪婪」，但亦知難實行。所以你要避免嘅，就係畀人牽住你嘅情緒。畢菲特點解唔住紐約？係有原因嘅。

48. 真的，近年個世界十分「政治化」。但你諗真啲，關你乜事？特別係你買美股嘅，烏克蘭打足一年，關我乜事？說好了的油價勁升加劇通脹呢？說好了的全球大衰退呢？說好了的美國企業要減值呢？

49. 再講一次，聽日普京倒台，我都係照買美股（或者MSCI World）。聽日解放軍攻台，我都係照買美股（或者MSCI World）。下年侵侵選到，拜登選到，都係一樣。關我乜事？關你乜事？

50. 然後我可以好肯定好定話你知，最初侵侵選到時，主流傳媒（而美國主流傳媒當然係反侵的）都係話美股玩完。正如四年後侵侵選唔到，侵粉都係話美股玩完。

51. 最後玩完嘅？當然係冇買股票嘅人。

52. 下篇講返「市況」，具體啲。但即係，「普高利津返咗俄羅斯」，好似畀人炒咗仲畀佢返公司執嘢咁。搞邊科呢可？我係唔需要研究嘅。雖然，我好早已經知佢賣熱狗開餐廳，肯定比你啲俄羅斯KOL清楚。

53. 如果你睇晒呢篇文，畀個叻自己。因為我估有唔少人，都係見到咁長就唔睇。其實呢啲都係練精學懶，因小失大。因為到賴清德選到，佢地又會嚟留言問我有乜影響，怕唔怕打仗，甚至會搵好多嘢支持自己嘅講法（希拉莉係蜥蜴人都大把「證據」支持的—　難道呢啲就唔使時間？）