香港收息股（最終回）—點解咁多deal？仲有邊間可以尋寶？怕唔怕領展又供股？點解Aeon唔使好似SVB咁美債減值？電盈輸錢主要因為non cash折舊攤銷，咁但係咪就可以唔計？ (Patreon)

其實我原本唔係想寫「收息股」，係想寫「deal」

點解咁多deal？

點解啲價未必好靚，但都要賣？

太古嘅例子，畀你見到有啲公司收埋好多寶藏—咁仲有邊間值得睇？

補充返Aeon：點解美債大跌價，但佢都冇減值？因為，根本冇乜買！

因為，財仔係好少「投資」嘅。

亦因為，財仔係冇得收存款嘅，所以亦好少好似SVB咁「水浸」

領展：唔怕又供股咩？—其實呢個問題都問得唔太好

其實唔信間公司，做乜要買？又，供完股先最安全！

其實一般都係供股嘅賺得多過唔供股嘅

有關電盈嘅超高負債派突息

有讀者話，因為好多時因為折舊，non cash item，唔影響現金流

派息係要盈利支持的。一間公司不停派突，會有乜後果？

寫完晒香港收息股，呢篇最後補充。之後寫返「市況」，之前半年回顧，之後展望等等。

其實我原本唔係想寫「收息股」，係想寫「deal」

1. 成個系列寫完，呢度少少補充。

2. 講返，其實真係再強調，我唔係買好多收息股的。你有冇見我買中電港燈之類？但當然，有啲港股係因為冇乜增長，或者太殘，所以「變咗」收息股。亦所以，有時收息股，防守股，公用股都唔係完全同一回事。

3. 亦都同大家講過，講嘢要清晰，特別係文字問間題。點清晰？就係唔好用「術語」，或者一啲可以主觀嘅字，多用例子。唔好用「坐咗好耐」，話我知你買咗幾耐。唔好話「收息股」，同我講係邊隻。唔好講「AI股」，話我知你講蘋果定Nvidia定 c3.ai

4. 呢個系列，其實個引發點唔係收息股，而係堆 deal—重溫一次，太古就賣可樂派息，新創建就阿婆玩私有化，電盈亦係賣嘢．至於Aeon就冇嘅，只係出咗業績，領展都冇特別嘢，只係業績後都未講　—　雖然其實傳過會賣嘢，都空穴來風未必無因。

點解咁多deal？

5. 點解咁多呢啲動作？並唔係完全因為啲嘢賣到好靚價（美國可樂彁能係嘅）—你睇息口咁高，都知好多嘢未必賣到好靚價。特別例如領展，賣物業唔慌賣到靚價，所以可能因為咁選擇供股（美國可樂就冇咁受息口影響嘅）

6. 咁點解仲要賣？係窮呀！

點解啲價未必好靚，但都要賣？

7. 正係因為高息環境，有啲公司可能想減低啲債務負債，又或者想維持住個派息之類。你見太古同新創建都係為咗減債（後者係為減新世界嘅債）。電盈就未必係。

太古嘅例子，畀你見到有啲公司收埋好多寶藏—咁仲有邊間值得睇？

8. 咁而同樣地，你會見到，原來有啲公司有啲「未發揮」出嚟嘅好嘢。例如太古嘅美國可樂，一賺執咁多錢。電盈舊藍Viu都算係，雖然一路都吹到好大，但一日未有人入股，你都係唔係好知其他人肯畀幾多錢。

9. 於是乎，又可以有尋寶遊戲。曾淵滄星期一篇文寫得幾好，佢就估長和（1）。呢隻亦係我有買，亦覺得OK嘅公司。因為唔知使唔使收費，篇文我又冒死attach埋畀你（侵權是唔啱的）。但容許我再講一次，幾舊水叫你訂一年明報你覺得唔值，食餐飯屙咗佢你就覺得好抵　—　當中係咪有乜問題呢？而你記住，你係唔使日日睇晒每一篇嘢的。

10. 順帶一提，可能都有人聽過，如果廿幾三十年前，啲上市公司嘅帳薄往往大幅低估，例如中巴之類，有啲幾廿年前買嘅地，仲係「成本入價」。不過而家大家都知，每半年要玩物業重估（領展咪見到），仲有啲股票債券亦要（SVB嘅故事咪寫過），所以就冇呢支歌仔。

11. 但，例如太古美國業務呢啲，因為唔係物業，又冇上市，就自然有機會賣出街錄得好大額收益。

補充返Aeon：點解美債大跌價，但佢都冇減值？因為，根本冇乜買！

12. 另外返Aeon。雖然「市場」好似唔記得，但大家都應該仲記得SVB爆煲之類嘅事。咪話拎住啲美債，美國加息，搞到堆美債價格跌，AFS減值（最後因為擠提被迫蝕讓）。嗰時都有講，一般銀行保險公司都有呢啲嘢（不過唔擠提就唔使蝕讓，坐到未）。

13. 但你可以留意，Aeon近係係冇呢啲嘢。但又唔好走去武斷咁話「管理層英明避開一劫」（美債債價升嗰時又點計？）—都話唔好用結果去判斷過程。事實係因為業務性質唔同，Aeon咁多年都係好少呢啲東西。你可以睇下啲資產，好少「投資」，即係好少去買債券的。

因為，財仔係好少「投資」嘅。

14. 點解？就係因為 …… 業務唔同咯。以前寫過，SVB爆煲時嘅其中一個問題，就係因為太多存款，但冇咁多貸款。即係「水浸」，借唔到出街，咁「被迫」買美債（唔通買垃圾債？）。

亦因為，財仔係冇得收存款嘅，所以亦好少好似SVB咁「水浸」

15. 但財仔，多數唔存在呢樣嘢。原因好簡單：因為，財仔，係根本冇「存款」嘅。你幾時見你可以去Aeon開個戶口存錢入去？（關於呢點，我中學年代嘅 EPA有教過，銀行三級制，或者你睇返呢個，而家話三級變二級了）

16. 實務上，佢地嘅funding 嚟自借錢（問銀行借或母公司借），所以，唔會有「水浸」的，水浸咪借少啲錢。水緊咪借多啲錢。亦即係話，佢地嘅「資產」，差不多全部就係放數出街，就唔會好似銀行咁多「多餘錢」放落債券。

17. 再講一次，冇話呢種模式一定係「好」，唔好咁膚淺，否則間間銀行轉去做財仔啦（而你見最大嘅金融公司都多數係銀行，Visa除外）。只係畀你睇到，真係唔同。Balance Sheet係咁睇的

領展：唔怕又供股咩？—其實呢個問題都問得唔太好

18. 講到領展，未來幾年，債息照計都係跌多升少（雖然呢排又升啲）。之前寫過，領展照計個派息應該keep到的。而家6厘幾息—唔買，唔通等3厘息先買（之前100蚊嗰時就大約係咁）。當然，理論上6厘息可能變7厘，8厘（怕且唔會嘅）。

19. 最後我唔知有知有冇人會問：「陣間佢又供多次股」　—　你估下我會點答？

20. 看似比較賴皮嘅答法，我就會答你：係架，有機會架。其實你買任何股票都有機會供多次股架啦。「曲奇餅罐咯」。聽落好似玩嘢，但我到而家都唔明，做乜啲人聽到供股就驚。難聽啲講句：咁即係代表你係投機，都唔係覺得間公司好　—　你覺得領展垃圾嘅，你可以由頭到尾唔買。但買得嘅，即係信間公司啦？（不過埃汾又講過，「唔信先要買」—呢度可能之後再討論下。但不過，其實咩叫「信」？買得多同買得少，都係有分別嘅。況且，你總唔見我走去買啲乜鬼發夢股。所以唔該，思考下，唔好只係背金句）

其實唔信間公司，做乜要買？又，供完股先最安全！

21. 冇咁賴皮嘅方法，我會答你：其實呢，「供完股先最安全」。都係講真的。Btw呢個唔係賭徒謬誤，唔係話「上舖開完圍骰今舖開嘅機會細啲」，亦唔係士兵的迷信（啲士兵會走落去剛中完炮彈嘅坑，覺得又中嗰個位嘅機會細啲），更加唔係神經質飛機搭客嘅故事（有位仁兄驚架飛機會畀人放炸彈，於是自己捧一個上去：同一架機有兩個人一齊放炸彈，機會微乎其微）。

22. 上舖開大，同今舖開大，就應該independent．但，今年供股，同下年供股，明顯唔係independent 啦。記住，唔好懶醒，唔好學一半唔學一半。多思考，多睇多聽，少自滿。

23. 供咗股，水頭充足啲，下年再供嘅機會就好細。雖然，冇得保證。

其實一般都係供股嘅賺得多過唔供股嘅

24. 最後，再認真咁答你。你可以搵返2月時我寫領展供股嘅文，當時有講返匯控2009年嘅世紀供股—　咁你見到，供嘅人，都係比唔供嘅著數。而且好快已經過頭。固然因為匯控股價升返（呢點我不能保證領展好快升返），但亦因為：派息。有供股嘅人，冇錯係嘔咗舊錢出去，但佢換多咗股票　—　每年派息，佢收嘅錢都多過冇供股嘅人　—　照點都係會追上冇供股嘅人。

25. 再講白啲，即係嗰舊供股嘅現金，年年有息返嚟，時間夠長，點都返到嚟　—　甚至唔使等股價升返。

26. 所以嘛，你擔心領展供股？「你不如擔心8號仔忽然唔派仲好，甚至供次股都得」—我幾時都話有呢個可能，李澤楷喎，有乜做唔出？否則佢做乜會9厘息？有一期近10厘息添呀。大行唔知？對沖基金唔知？買美債嗰啲傻仔？10厘息，當然係反映咗佢有機會唔派嘅風險。

27. 但，亦再講一次，唔係因為電盈「有機會」唔派息你就不能買　—　問題係你真係知有咁嘅可能，仲要市場人人都知。你嗰10厘息係咁嚟的。你就唔好以為一定會收到，然後忽然佢有一年唔派甚至供股，你又去鬧人話老點你。或者鬧李澤楷做乜咁狗唔派息

28. 不如大家再跟我講多次：股息，就係隨時可以減隨時可以唔派的。冇任何後果（除咗股價）。有後果嘅叫做債券。

29. 講到尾，我覺得問「唔怕領展再供股」嘅，係有啲奇怪的—明顯只係睇到剛剛發生嘅嘢。正如上星期，就個個都問俄羅斯兵變（我寫咗，都未貼），早幾日，就個個都問人民幣跌，呢兩日，就個個都問美國債息。

30. 你見，啲人真係短視到不得了１。

31. 我自己覺得，未供嗰啲公司先最危險。「正如領展供之前都唔係太多人估到」。仲有，領展供完，都好多人估新世界供股，但結果鬍鬚仔誓神劈願話唔會供　—　又似乎真係喎，於是就搞咗新創建呢壇嘢。

有關電盈嘅超高負債派突息

32. 真係最最最後。我講電盈嘅超高負債派突息，有讀者回話，可能因為係佢啲「開支」係non cash（好大折舊），唔影響現金流，所以一路都派到。

33. 呢個答案啱唔啱？答案：其實一半半，唔好執著於「啱」同「唔啱」。但我會同大家討論下。

34. 電盈輸錢，好多時係因為好大嘅折舊，係事實。呢啲的確唔係現水開支，都係事實。你見好多時啲人睇業績，都會講有啲non cash item．

有讀者話，因為好多時因為折舊，non cash item，唔影響現金流

35. 但係咪就可以「唔計」？就深少少。我就認為，梗係唔係！

36. 因為大家應該再諗下，咩係折舊。唔熟會計嘅，我都可以話你知，買部機器返嚟，10億，但我唔會一年打晒落去「開支」—而係例如部機預用10年，我咪每年折舊1億。呢個亦係合理嘅，你部機係10年入面不停幫你嘛，唔係一年就收工（我亦在其他地方寫過球員嘅轉會費，都係咁入帳。唔會你2億買個尼馬返嚟一年就入晒去，咪睇佢答幾多年約。順手一講，呢個亦係車路士之前買啲友簽七八年約嘅原因！）

37. 之但係，呢啲雖然係non-cash．但都係影響你盈利的嘛！仲有，你都係一開始拎咗舊錢出去嘛！好似買機同租機嘅分別之嘛。你不能話租機就年年係開支，但我買機，每年折舊嗰啲就唔係開支。

38. 就算你話non cash都好—亦只係因為你第一年已經畀晒錢嘛！

39. 一個好肯定嘅事實就係，「你不能拎EBITDA交租，或者派息」。

派息係要盈利支持的。一間公司不停派突，會有乜後果？

40. 一間公司，當然可以派突息，你借錢嚟派咪得。或者你年年賣嘢去派都得，蝕讓都可以拎到現金的嘛。

41. 問題係，始終派息，係要嚟自盈利。一年派突冇所謂，但年年都派突？你個book value咪會越縮越細，即係「股東」權益越嚟越細—背後就係反映你一係負債越嚟越多，一係資產越嚟越少（派晒出街）。

42. 咁你間公司嘅淨產資一路縮，亦即係槓杆越嚟越大，分分鐘會搞到資不抵債，很危險的。

43. 固然個大股東叫李澤楷，銀行當然知佢還得到。但，都總係不能一路持續的。你睇下佢幾時會賣資產，或者注資（例如供次股都仲得），或者減派息吧。

44. 當然啦，冇話一定，派突都幾年，唔爭在。但，加息喎。

45. 最後畀你睇下，電盈呢幾年嘅淨資產值，都縮得快。點解？因為派突息。咁仲係咪覺得因為non cash，所以冇所謂，可以一路玩落去？就應該唔係的。