香港收息股（五）—新創建659私有化玩乜？係咪個新世界？但又話新世界冇錢？兼且睇啲基本財技 (Patreon)

剛開Patreon時寫過新創建，照計任何位買都贏錢。

派到息嘅，坐得幾年，都係有用的

不過新創建呢，就分分鐘畀人「割禾青」。點避免？你估下

解下新創建「私有化」單嘢

順手解下周大福，新世界同新創建架構

新世界缺水就真，但唔係新創建打救，係周大福打救。

作價平過淨資產值，但唔算少見

又話新世界冇錯？咁何來有錢私有化？　—　因為唔係新世界畀錢

係阿婆救阿媽，唔係個仔救阿媽

咁新世界實袋幾多？

咁周大福又要拎幾多錢出嚟？

大股東係會拎返新創建嘅現水　—　但人地有負債的嘛！

過唔過到？都有啲疑問

可能大股東加價，但亦可能放埋一邊同你累鬥累，甚至一路再陰乾

咁但，其實邊個可能大啲？你話呢？

講到尾，咁你應該點做？

點解佢呢壇私有化，係玩收夠貨強拍？明明之前有啲唔係咁

呢篇講埋新創建。最後仲會有篇成個系列嘅補充。之後寫返「市況」，同埋上半年回顧。

剛開Patreon時寫過新創建，照計任何位買都贏錢。

1. 新創建659，在呢個Patreon初開時寫過。2020年8月寫過，10月都寫過，後來都仲有幾次。亦都有啲讀者買咗，其中一個係我幾熟嘅朋友。

2. 咁我想講嘅係：過去三年買呢，任何位，你都唔會輸錢嘅！即使你最高位買（2021年頭），收埋息，都肯定係贏錢。唔好忘記，恒指就過去三年買，絶大多數計埋收息都係輸錢收場。其實大多數港股都係。

派到息嘅，坐得幾年，都係有用的

3. 呢隻嘢我覺得算係相當好，咁你都唔滿意，我都唔知你點先滿意了。我朋友就唔係最頂買添，只計股價都有少少贏，加埋收咗三年息。所以呢，都真係要有耐性嘅。特別係呢啲有息派嘅股票，都真係有得守下，收多幾年息咪回本。係有用的。

4. 反而當時都係有啲讀者，買完，輸錢，又唔多高興，又問點算。咁如果係有股息嘅，你見，都真係，「坐多幾年」。況且，上次都講過，而家債息高嘛。之後債息低返，照計呢啲嘢股價都會再好啲。

5. 不過，就新創建呢個情況嚟，就真係有啲唔同！

不過新創建呢，就分分鐘畀人「割禾青」。點避免？你可以估下

6. 因為，最近單嘢，就可能真係「割你禾青」，其實呢啲先係最麻煩。以前有文寫過，隻嘢低位畀人收購或私有化咗，分分鐘你無仇報。

7. 點避免？其實冇乜得避免。但一樣係最老土嘅幾步曲。時間分散，股票分散。再唔係你買指數—總唔會成個指數畀人低價私有化的。

8. 呀仲有，美股相對係比較少呢啲嘢嘅

9. 新創建嘅派息，呢度，咁而你明顯睇到，個盈利同啲派息，係唔太穩定嘅。不過都仲勉強叫做係「公用事業」比較多，雖然過去都賣咗唔少業務（巴士都賣埋）

解下新創建「私有化」單嘢

10. 今次呢壇嘢？就涉及埋新創建母公司，即係新世界（17，冇錯係做地產嗰隻，亦係全系最大嗰隻），甚至係新世界嘅老母（唔係1929周大福珠寶，係「周大福企業」，你可以當即係姓鄭嗰家人嘅公司）

11. 新創建公告呢度。新聞嘅呢個，呢個。

順手解下周大福，新世界同新創建架構

12. 呢度可以講埋畀你知個關係，周大福（即係大股東姓鄭嗰班）就渣住新世界45%左右，然後新世界就渣新創建61%左右。即係，周大福係「阿婆」，新世界係「阿媽」，新創建係仔。

13. 去邊搵呢啲？年報。或者上aastock

14. 順手一個智力問題：「咁周大福渣新創建幾多？」。答案當然唔係45% X 61%，因為周大福完全控制晒新世界（雖然唔過半）。但係咪計61%？唔止喎。至少你會見到，會有人寫，周大福渣住新創建65%—其實唔難解，即係周大福或姓鄭嗰班，除咗經新世界間接持有新創建，亦都有啲直接渣住。計埋晒就65%。不過呢啲都係知識嘢，唔太影響你實際上你理解個故事

新世界缺水就真，但唔係新創建打救，係周大福打救。

15. 咁實際上個故事係乜？你可能聽到有啲人講，「新世界缺水，要新創建打救」，缺水就肯定係，打救都算係，但係咪新創建打救佢，就應該唔係。

16. 新世界負債比較重（但其實只係相對，普遍香港地產商同十幾廿幾年前比，保守咗好多），大家都知架啦，咪話之前領展供股，大家都估可能新世界會供。不過當時鬍鬚鄭誓神劈願話唔會。咁而家應該唔會幾個月唔夠就供股咁核突嘅。

17. 結果，就係搞呢壇嘢。

作價平過淨資產值，但唔算少見

18. 其實就係點？就係類似想「私有化」新創建，9.15同你買。停牌前只係8蚊。雖然新創建嘅每股帳面值（又即係每股淨資產）都成10蚊。但其實更大折讓嘅股票都唔少，更大折讓地私有化都見過唔少。公唔公平？就遲少少討論，但好難有絶對答案。因為大家都知，私有化嘅，「梗係對大股東有利」，問題係同一樣嘢，在你手上，同佢手上，係唔同價值的。

又話新世界冇錯？咁何來有錢私有化？　—　因為唔係新世界畀錢

19. 睇到呢度，有冇人有疑問？個疑問可能係：又話新世界冇錢？咁仲私有化新創建？「咪更加冇錢！」

20. 所以就要解清楚，提出私有化新創建嘅，係「阿婆」周大福，唔係「阿媽」新世界。

係阿婆救阿媽，唔係個仔救阿媽

21. 實際上？即係「阿婆」周大福出錢，買起新創建嘅股票—除咗小股東嗰啲，亦包括新世界持有嘅新創建，都會賣畀周大福。咁所以，新世界咪會有一大舊錢。你亦可以理解做，即係新世界賣咗新創建畀周大福。

咁新世界實袋幾多？

22. 留意，新世界賣咗啲新創建畀周大福，就收到220億。不過，為咗「引」新世界嘅小股東都支持，所以如果事成，新世界都會派特別息！但，放心，派40億啫，所以新世界都仲有唔少錢（180億）落咗袋，改善負債情況嘅—雖然都唔係好多（負債千幾億喎）

咁周大福又要拎幾多錢出嚟？

23. 咁你亦可以留意，周大福（姓鄭嘅）係咪要拎好多錢出嚟？因為周大福差不多要買起成間新創建（包括新世界嗰啲，同埋新世界以外小股東嗰啲，而記住周大福直接渣咗嘅新創建唔多）。上面張圖話350億喎？

24. 呢度個情況有啲似太古母公司咁。答案係：都要拎啲錢，但未必好多。首先，會收返少少新世界嘅特別息—但特別息40億啫，佢地只係收20億唔夠，同成壇嘢要用嘅錢億爭好多。

大股東係會拎返新創建嘅現水　—　但人地有負債的嘛！

25. 不過仲有，新創建退市後，入面啲現水，都有成180億（睇業績咪知），就可以畀周大福「拎返」。但又唔好好似啲傻仔咁講，以為大股東空手入白刃—大佬呀，新創建唔係net cash 180億嘛，有負債的！幫你睇埋，貨款230億左右，現水180億，淨負債50億。咁淨負債比率（net debt to equity）其實低嘅，淨產資或帳面值500億，即係比率 10%左右—但到底有幾多錢真係大股東「拎走」，應該點計就任你講了，你估唔使還咩。

26. 不過一句，至少姓鄭嘅，要短期拎出嚟嘅現金，唔係非常多。求其整個過渡臨時貸款（同你借Mox差不多），頂住先，然後可以拎返特別息，同埋新創建嗰180億現水。銀行貸款就慢慢傾慢慢還

27. 所以你亦可以理解為，係周大福注資新世界。大股東出手相救

28. 況且，仲有兩樣嘢：周大福畀錢新世界，但間公司係自己架嘛，唔係去咗外人度。而仲有，佢唔係「畀錢」新世界嘛—買咗成間新創建返嚟喎。本身都仲有唔少業務，年年有現金流，甚至賣畀人都仲得，再上市亦得。

過唔過到？都有啲疑問

29. 問題係，呢單嘢，過唔過到，都係有啲疑問。可以睇呢單報導，係有可能小股東反對過唔到的，而佢地之前，撻Q嘅例子亦都唔少（可以睇下之前啲前科）

30. 今次呢壇，就更加複雜，我本人就唔係太睇好即時過得到。因為首先要新世界啲股東投票話OK賣咗新世界啲新創建畀周大福—但第二關仲要新創建啲小股東又贊成私有化，要收夠貨—會唔會過到第一關，過唔到第二關？會的！咁會點？咁可能隻新創建就繼續係上市公司，但母公司變咗係周大福（直接渣），唔係新世界（最尾會詳解）

可能大股東加價，但亦可能放埋一邊同你累鬥累，甚至一路再陰乾

31. 亦即係話，係有機會撻Q，之後有機會再加價嘅，以前亦都試過。但亦有可能係大股東放埋一邊，鬥長命，可能之後仲殘，「玩到1蚊然後1.1同你私有化」。講真，同大股東鬥長命，差唔多係必輸。鬍鬚仔先43歲，後生過我—況且仲要有個仔。你見到問題了？人地鄭裕彤之後又有鄭家純（唔係雞排妹），鄭家純之後有鬍鬚仔，之後佢仲有個仔。你估你長命定佢個仔長命？

咁但，其實邊個可能大啲？你話呢？

32. 不過，又係老規矩：你只講「可能」，就兩個都「可能」。但邊個機會大啲？其實我估踢埋一邊有得佢發臭嘅機會，唔係太大。即係，過唔到，可能就諗下短期內加價。真係唔成嘅，我亦估新創建未必會一路越跌越殘。

33. 點解咁估？兩個原因。首先，講到尾，邊個心急。雖然姓鄭嘅可以永續，但成個故事嘅開端係乜？係新世界想減債嘛。當然唔會話過唔到佢就跳樓（發夢冇咁早），但，大股東都相當想呢件事搞掂的。

34. 第二，新創建本身唔算重債，估值又低，息又還好。即使單嘢撻Q，我估都唔會即係一路跌跌跌到1蚊咁大件事嘅。「會唔會大股東玩嘢一拍兩散搞死間公司或者唔派息」？怕且唔會咁衰嘅。大家都知鬍鬚仔呢幾年係咁洗錢做形象工程，既為自己又為公司，唔會做得咁核突。況且，新世界同周大福自己都要收新創建嘅息嘛。

講到尾，咁你應該點做？

35. 咁講到尾，「即係點做」？首先，最應該參考嘅，當然係埃汾點做，講乜都假，身體最誠實。但不過，我係冇呢隻嘢嘅，從來冇買過，亦冇新世界。反而好似N年前買過周大福珠寶（1929嗰隻），當然係低位打靶。

36. 咁你應該點做？未買嘅，我又唔會特別建議人買。

37. 不過買咗嘅？都真係睇你性格。急用錢嘅，或者坐咗好多年先回家嘅，咁回家的感覺真好，沽咗佢亦無壞。不過講真，如果我係你，我照計唔會沽，或者頂多沽一半。

點解佢呢壇私有化，係玩收夠貨強拍？明明之前有啲唔係咁

38. 呀最後，同你講埋。如果我冇理解錯（唔100%肯定），去到新創建股東嘅層面呢，就唔止係你舉手畀唔畀佢私有化咁簡單。照計到時你會收到個通知，即係周大福9.15同你買，到時你肯畀佢咪say yes，現金就到手。唔制嘅咪唔理佢，暫時奈你唔何。但然後如果佢收夠貨，就會好似啲舊樓強拍咁，強制私有化，之前唔 say yes嗰啲，都強制收埋你啲股票，畀返9.15你。但如果收唔夠呢？就會變咗繼續上市—say咗yes嘅錢己收，唔會問你追返。但未say yes嘅就冇得再9.15質畀佢了（當然到時股價應該會跌啲，但亦不排除過多幾年再升多啲）

39. 點解有啲私有化就只係舉手，掂就收錢唔掂就收檔。但有啲好似今次呢單咁，就係要收飛，佢放個offer畀你，你肯畀貨佢佢畀錢你，夠貨就強拍，唔夠就繼續上市？就因為有兩種唔同嘅私有化，睇呢篇（大公報，但算解得清楚）

40. 當然你等唔切，或者驚有機會過唔到（呢個係真係有可能的），亦可以現價沽咗佢。

41. 呀不過最最最後，你見隻嘢而家都8.97。同個offer價9.15只係爭好少。所以，可能我係錯嘅，可能好多人覺得會過到　—　當然了，市況差，又會令呢啲嘢易過啲。個個驚死過唔到之後要「補跌」