香港收息股之四 - 雜論：有關輸錢點去接受，有關10倍股 (Patreon)

買收息股計埋息都輸錢？都係有機會嘅。冇計架喎。

經歷幾十年最急嘅加息，啲嘢都仲大約打個和，仲想點？

不過，其實我係唔多買高息股嘅。

咁但當然啦，分散嘛。冇理由只買港股

我發現好多人，係不能接受輸錢嘅。咁其實，「唔係好啱買股票咯」

最簡單避免輸錢嘅方法：坐得長，夠分散，別人恐懼時你貪婪。

你快手止蝕止賺，都可能令你唔使輸大錢—但更保證你贏唔到大錢

一係食雞糊，一係棄牌，點掂？況且，人地可以自摸。不如專心做舖大

股市係打無限番嘅：如果你冇買過升幾倍嘅嘢，肯定係功力未夠

上次講座講過，十倍股，要嘅係時間同盈利

幾倍股，冇你想像中咁難。難在乜？難在買得大，同埋坐得穩

其實，十倍股嘅先決條件，應該係你唔會止蝕止賺。否則近乎冇可能

核心價值：買得大，坐得長，然後贏嘅贏大大舊，夠冚啲輸嘅

但講到尾，係唔應該成手收息股嘅

1. 香港幾隻收息股系列，第一篇講咗少少總論，值得人人睇下。另外講咗Aeon，咁冇興趣嘅可以唔睇，唔太影響其他。第二篇講領展太古，第三篇講電盈。同樣地，你冇興趣嘅可以唔睇，唔影響其他，雖然我認為係總有得著嘅。

2. 新創建比較麻煩，留返聽日最尾一篇講。另外，之後應該會寫下市況。然後就整個上半季回顧—第一季爭少少未講完嗰啲，就一次過講吧（但第一季回顧我都寫咗十幾篇，放心，今次半年唔會寫咁多篇，有啲嘢講過唔再講，雖然成日有人問）

3. 咁今篇講乜？首先，回答少少讀者提問，講少少有關高息股有啲都要輸錢嘅問題。之後，會講下「輸錢」嘅問題。同埋「十倍股」嘅一啲基本條件。

買收息股計埋息都輸錢？都係有機會嘅。冇計架喎。

4. 有讀者提返話，我講呢幾隻，有兩隻佢都有買，仲有啲其他東西，結果收埋息都輸錢—可以從好多個角度睇。首先，過去幾年買隻900就冇乜理由收埋息都輸錢啩？至少我三年前貼，到而家，價升咗少少，息你收咗七八厘一年。正如8號仔，照計都近年任何買都唔會有得輸（計埋收息啦），新創建嘅情況亦都係。

5. 就頂多太古或者領展會有機會輸。但，冇計架喎，蘋果to蘋果，港股好多過去幾年買你都輸錢。你見今年呢堆嘢表現都不錯（除咗領展），相信計埋收息，分段，就算輸都唔會輸得多。

6. 而講真，照計冇人講過，買股票係實贏嘅。

經歷幾十年最急嘅加息，啲嘢都仲大約打個和，仲想點？

7. 仲有，都係嗰句，只要間嘢啲增長唔係太大走樣，你收得幾年息，一般都仲有得翻身啩（例如我嘅匯豐，甚至我嘅盈富基金，都係計股價應該輸，計埋息就贏）

8. 當然仲有一個問題係，而家債息高嘛，之前經歷咗近幾十年最急速嘅加息喎。好多高息股，例如長江基建之類，業務長期都係嗰啲，派息又從來唔減（上市到而家年年都加！）。但個估值就對債息好敏感了。咁我都係認為，跌嗰時唔買，唔通升到貴一貴先買？

9. 所以，真係兩睇。有啲人覺得啲嘢收埋息先打個和。但，我就覺得，你經歷咗近幾十年最急嘅加息，都仲可以打個和，仲想點？正如之前都有讀者講，嘩，買美債ETF舊年都要輸一成幾喎（一度跌兩成添），明明話好穩陣。但，呢個係好似幾十年最差嘅一年，咁係常態定特例？好多人會犯嘅錯，就係記近唔記遠。好壞都係。

不過，其實我係唔多買高息股嘅。

10. 不過要講返，肯定嘅係：其實我係唔多買高息股嘅。唔係玩嘢，但我買乜一向都有公開。雖然太古領展電盈我都有，但唔會算好多。我可以話你知，夾埋，都應該未夠一隻蘋果多。

11. 咁但當然啦，分散嘛。冇理由只買港股

12. 咁亦帶到最後一個問題：咁你買港股，就過去幾年好多都輸錢。我相信呢堆嘢唔係輸得「特別多」。但，老原則，分散，分散，同埋分散。唔應該只係買港股嘅。咁如果唔係只係買港股，有買美股嘅，肯定夠冚啦。咁我就唔認為有乜問題。

13. 當然你話，「扯咁我一早買晒美股好過啦」，呢啲就好難拗了。雖然，我相信唔係好似「早知一早買晒Nvidia」咁屈機，照計有人做得到嘅。

我發現好多人，係不能接受輸錢嘅。咁其實，「唔係好啱買股票咯」

14. 同好多人嘅想法相反，我到而家都唔認為股票輸錢係乜問題。當然，如果你好介意輸錢嘅，最簡單盡量避免輸錢嘅方法，當然係坐得耐，同埋分散。再叻啲嘅就係做到人地驚時你先買。但唔好話最尾呢樣，只係頭兩樣，同大家講，一般都係當我廢話嘅。但有數字畀你睇（唔再貼圖了），美股坐一日，輸錢機會四成幾。坐得幾年，就細好多。

最簡單避免輸錢嘅方法：坐得長，夠分散，別人恐懼時你貪婪。

15. 又重覆，要唔輸錢嘅，放曲奇餅罐啦。只要贏到七隻嘅，輸三隻有乜問題？更重要嘅係，就算你贏得四隻，輸六隻，但贏嘅係幾倍股，一樣夠抵消有突。

16. 你快手止蝕止賺，都可能令你唔使輸大錢—但更保證你贏唔到大錢

17. 而唔好忘記，世上並無免費午餐。有啲人好介意輸錢。咁除咗放曲奇餅罐外，仲有一啲做法嘅。例如跌少少咪「止蝕」咯（但，止蝕就唔係輸錢？不過你可以話唔會輸得大）。又或者，升一兩成，即時走人，保持個「清白之身」—因為怕佢會跌返落去。

一係食雞糊，一係棄牌，點成大事？況且，人地有機會自摸。不如專心做舖大

18. 呢啲想法都係正常嘅，但你諗真啲，我成日嗰句：贏嘅，贏得一兩成。咁其實冇乜用，況且，大家都知，你總係會輸嘅。你食親都雞糊，一係就棄牌搏摸和（但，都係有機會出銃的，況且人地可以自摸）。我食幾舖十三么嘅（即係咁講），出幾次銃有乜所謂？

股市係打無限番嘅：如果你冇買過升幾倍嘅嘢，肯定係功力未夠

19. Oh , by the way，股市係打無限番嘅，唔會有「爆棚」。一隻股票只能跌100%，但可以升100萬倍。固然你會話呢啲係理論，但，讀者隻Nvidia升足10倍啦，坐到喎。我隻安踏都升足10倍。咁你都應該有啲升足幾倍嘅嘢　—　如果未試過嘅，明顯係功夫未到。

20. 上次華泰講座，真係精彩，唔嚟嘅真係走寶（你可以問返有嚟嘅）。佢地仲未放返段片上網，冇計。我呢度畀個Powerpoint你，不過冇我講解可能都係爭啲。但嗰日其中一個主題，就係「尋找十倍股」。

21. 入面我有講，十倍股，一般要兩樣嘢。首先係盈利，第二係時間。

上次講座講過，十倍股，要嘅係時間同盈利

22. 咁但，呢大半年嘅情況，你見連「時間」都唔係點使。Nvidia 今年已經升咗200%！如果你夠膽或夠好彩，舊年低位買嘅，半年執300%。固然應該冇人在低位買到，但年頭買就唔難啦。

幾倍股，冇你想像中咁難。難在乜？難在買得大，同埋坐得穩

23. 所以，幾倍股，真係冇你想像中咁難。其實你問我，難在乜？難在你買得夠大，但中間又唔好「驚」。你想像下，幾年前，Nvidia 50蚊美金，你買200股，8萬港紙，唔算多啦（呢度啲讀者好富貴）。然後佢升到300蚊，你8萬變48萬，5倍股

24. 難在乜？難在之後發生嘅事。佢300蚊跌到100蚊，你48萬變16萬，高位輸咗30萬　—　好大機會未去到呢個位你已經快手斬，可能200？150？唔知你。

25. 咁當然，之後彈返上400蚊。你話，你點知會彈返上去？唔知架。有冇人想講，alternative path？「如果升你就咁講啫」—問題就係，佢升得夠多。一隻8倍股，夠我輸好多隻領展啦啩（咪最多輸兩三成，況且，其實如果有供股，收多幾年息好快就回家，嗰時寫過）。

26. 你話以上呢個係神話故事？咁就錯了。嗰10倍股Nvidia讀者，咪就係50蚊樓下買！

27. 呀預告，可能之後個股票course，我會搵佢嚟做客席嘉賓（識咗好多年的了，亦係呢度嘅忠實讀者）

28. 點解人地得？你又得唔得？

29. 「咁埃汾你又得唔得？」—我嘛，都冇佢咁叻。我係九十幾蚊買嘅。但我一樣可以坐得過升上300跌返100再上400嗰樣嘢。咁我都贏300%啦（而我從來冇話我好叻，但投資嘅嘢，你唔使去到9分，其實你有6分已經好夠）

30. 然後，仲有一樣好重要嘅嘢：十倍股唔係太難搵，但，佢升十倍，唔等於你會賺十倍。點解？因為你可能中途take profit，或者止蝕

其實，十倍股嘅先決條件，應該係你唔會止蝕止賺。否則近乎冇可能

31. 所以，我在呢度做一個幾大膽嘅猜測。唔一定啱，但我認為，你要食到十倍股，基本上個先決條件就係你又唔止蝕又唔止賺。納指又好，蘋果又好，Nvidia又好，騰訊（以前）都好　—　十倍之路，幾時都唔係直線上，實會有啲跌兩三成嘅浪。你「止蝕」嘅，其實係保證你冇可能賺到十倍。至少讀者隻Nvidia，我隻安踏，或者其他幾倍股，都肯定係冇止蝕冇止賺嘅。

核心價值：買得大，坐得長，然後贏嘅贏大大舊，夠冚啲輸嘅

32. 其實講到尾，都好睇你嘅「信念」，睇你有幾信間公司。投機短炒嘅人，係一定震走嘅。仲有，你根本唔會買得大。

33. 好似講遠咗，但都係講返，我嘅核心理念，都係買得大，坐得長，然後希望啲股票可以升幾倍。當然唔係次次成功，耐唔耐都會中伏—但照計贏家夠冚輸家。

34. 嫌煩嘅？咁買指數，一樣可以升幾倍，但時間可能又要長啲．Nvidia可以4年升10倍，但納指就難啲了。但當然買指數中大伏嘅機會又細啲，美股都好似冇試過一年跌到一半　—　risk and return trade off嘛，而我自己覺得，對於多數人嚟講，買指數已經係OK的了，反正都唔少連指數嘅波幅都受唔到。最緊要，係買得大。

35. 然後你見到，我真係唔係買太多高息股的，只係拎個平衡。我並不認為一大堆收息股係一個好嘅idea。

36. 「咁又講？」。咁首先，向來每樣都講下，講美國科企你又話嫌貴（我都覺得貴），日本股又講過（遲下再講）。咁其實一路講開，升晒買乜好。港股嘅，除咗騰訊阿里巴巴，我就係睇呢啲高息股。況且幾間近來都有動作嘛，咪寫下。

37. 下篇寫埋新創建，同埋「驚唔驚領展再供股」之類嘅問題