高息股之三 : 電盈賣26%黃Viu，「估下賺幾多？」。另外，之後係咪維持到派息？我就相當大疑問 (Patreon)

重溫8號仔大瀉嘅教訓

我有買，天地良心，股價唔失禮，照計冇乜可能輸錢。

當時我買就係睇好OTT，而家就有啲動作

電盈啲業務上上落落，但派息一路穩定，玩乜？

年年派廿幾三十億股息，但冇一年有賺咁多。咁有乜後果？你話呢？

會唔會減派息？會架！唔好話唔警告你

黃Viu是甚麼？有冇錢賺？你話呢？

好多人寫黃Viu勁過Netflix—你估下無啦啦做乜有人寫？

賣咗26% 黃Viu畀法國佬，有幾多收益？答案係，一個仙都冇！

黃 Viu 2億EBITDA，「但估下蝕幾錢？」

點解太古賣可樂有收益有特別息，電盈賣黃Viu乜都冇？

咁，係咪又完全冇幫助？都唔係嘅，雖然杯水車薪

電盈仲維唔維持到派息？我就好有疑問

1. 繼續落去，惡名昭彰嘅8號仔。有埋個Excel，但好耐冇update，舊年做手術，眼差。

重溫8號仔大瀉嘅教訓

2. 以前提親呢隻啲人都鬧，太後生唔知咩事嘅（件事都廿幾年前），睇呢度　—　我只係想講一樣嘢：你見當年中伏嘅人，好多唔係太貪心嘅人（當然亦有一啲炒科網熱嘅人）。但，呢個世界上，係唔存在「穩穩陣陣7厘息嘅」。有啲人誤信業務穩定，有啲人信人地老豆係李嘉誠（講真，關你乜事？又唔係你老豆），有啲人信藍籌跌極有個譜。當年你不能話佢地錯，但事後你見錯到無倫。點避免？好簡單，分散。唔好話我長氣唔警告你。

3. 但真係時而世易，而家啲小朋友就反而當咗楷仔係良心企業家了。潮流教父，娛樂大亨，對抗TVB，Oh yeah

我有買，天地良心，股價唔失禮，照計冇乜可能輸錢。

4. 但我唔講政治，甚至唔係好睇「往績」（雖然我相信人係唔會改變嘅）。講多無謂，我買咗，亦一路有同讀者講。

5. 好啦，天地良心，過去幾年買嘅，照計計埋派息，點都唔會輸錢嘅。過去五年都係4-5蚊位，一年派3毫甚至4毫息，要輸錢都幾難。除非你舊年11月二十大外資切尼港股歸零港紙爆煲3蚊去「止蝕」。

6. 我呢幾年買，主要唔係貪高息（我好少只係因為高息買一隻嘢）。主要就真係估佢會有啲動作，其次係睇好個OTT（黃Viu），最後先係甚麼Viu台好多廣告Mirror之類（而你見，嗰啲仆入去搏呢樣嘢嘅人，舊年11月好多都震走—皆因多數人信股票唔及追星咁忠實）

當時我買就係睇好OTT，而家就有啲動作

7. 而最近，亦真係OTT（黃Viu）有啲動作

電盈啲業務上上落落，但派息一路穩定，玩乜？

8. 你見電盈啲業務都係上上落落，並冇你想像中點樣咁賺錢，從來啲人話藍Viu（免費電視）「賺錢」都係一個迷思—嗰啲友以為EBITDA Positive就係賺錢—由此你可以見到，坊間啲評論有幾低智。更衰嘅係，有啲人明明係知，但為咗其他原因，都照樣去寫啲錯嘅嘢。

9. 有關電盈嘅派息，在呢度。但電盈派息，近年都幾穩定。咁都得？冇話……唔得嘅。不過，其實你可以話佢差不多係「借錢派息」，甚至係「蝕住派息」。證據？好簡單，一年佢派廿幾三十億股息，但有邊年你見佢有賺到廿幾三十億？（邊度搵呢啲？aastock咪有。其實呢啲好基本吧）

年年派廿幾三十億股息，但冇一年有賺咁多。咁有乜後果？你話呢？

10. 咁會有乜後果？基本上，就係負債越嚟越高。於是你心諗，仲要加息喎，會唔出事架？答案係：可能會架！爆煲唔會，蝕錢都未必會，但，會唔會減派息？

11. 會架！

會唔會減派息？會架！唔好話唔警告你

12. 再講一次，係會減派息的！

13. 再講一次，其實任何一間公司都有機會減，唔會嗰啲叫做債券（OK，債券都可以唔派，但有法律後果，會有機會畀人清盤，而股票係冇嘅）

14. 所以，唔好下年電盈甚至領展減派息，甚至唔派息，又嚟鬧，或者呻，或者話我老點你。再講一次，保證派息嘅，叫做債券。閣下而家買緊股票。OK？

15. 而其實你見佢有9厘幾息，已經反映呢樣嘢啦。市場是十分公平的，要9厘先有人買，當然係有啲問題。

16. 不過今年股價，表現就真係不錯。原因我就唔知，可能同黃Viu呢單嘢有關，可能同藍Viu有關，可能只係夠殘，唔知。

黃Viu是甚麼？有冇錢賺？你話呢？

17. 講返黃Viu單嘢，電盈公告呢度。新聞你睇呢個，呢個，呢個，或者呢個

18. 背景啦喎，慎防有人唔知乜嘢係黃Viu（都真係有人唔知）。咁好快解下8號仔入面嘅東西（其實舊文有兩篇好詳細寫過）。電訊方面，電話呀，流動數據呀，固網呀嗰啲，大家冇乜興趣，又明架啦。除此以外，仲有收費嘅Now台，免費嘅Viu台（多數叫做藍Viu），以及所謂嘅「管理藝人」業務（你可以理解做抽Mirror同Collar佣）

19. 黃Viu，就係一個……類似Netflix嘅東西。有收費，好似有免費。呢舊嘢同藍最大嘅分別係：藍Viu係免費電視，黃Viu係OTT—OTT是甚麼？Over the top，即係只經互聯網傳送嘅東西。

20. 於是乎，黃Viu，首先監管係鬆好多嘅。另外，係可以衝出海外嘅。

好多人寫黃Viu勁過Netflix—你估下無啦啦做乜有人寫？

21. 事實上，之前一路都唔少人寫黃Viu勁過Netflix之類—　聰明嘅讀者，可以估下點解咁多人寫。你話呢？

22. 咁我一路都估，呢舊嘢會賣，或者拆上市之類。畢竟，呢啲就係李澤楷（同埋李嘉誠）嘅本性，做大刁嘛。

23. 好啦，而黃Viu的確係做得唔錯嘅。賺錢當然係冇嘅（你以為有？），但至少有用戶。抄返官方講法，付費用戶1,220萬，每月活躍用6,640萬—　咁明顯話你知，唔止係香港啦，人地做東南亞（仲有日韓，但相對冇咁易入）

24. 今次呢壇刁，簡單，就係黃Viu引入新股東。亦即係，賣咗部份股權出去。引入嘅係法蘭西嘅CANAL+，甚有來頭。然後咩協同效應嗰啲例牌嘢就唔講

25. 具體少少，第一部係賣咗26.1%，唔該記住呢個數，好重要。就收咗法國佬2億美金。打後就再複雜啲，不細講，法國佬話會加到3億美金。然後甚至再有option（期權）可以買到去51%，即係過半。呢啲細節就自己睇公告，比較煩。

26. 而我想提一樣嘢：因為係OTT，呢啲收購就唔應該唔使官府批嘅。如果係免費電視或收費電視牌，就煩好多了。

27. 下一步？唔知佢會賣一半畀法國佬，定拆上市，定both．反正行唔行使個 option，決定權在法國佬。

28. 2億美金買26.1%，即係成個黃Viu估值去到60億港紙。而成間8號仔都只係300億市值，似乎都有一定嘅「價值釋放」，雖然你見股價係心乜反應嘅。原因？唔知。順手講埋，如果之後法國佬行使埋個option，個估值就應該唔止60億了，但亦好睇黃Viu之後表現點。你亦可以理解做法國佬落少少錢，睇下你係咪真係堅，真係堅先再加注。

黃 Viu 2億EBITDA，「但估下蝕幾錢？」

29. 至於呢個黃Viu？到底賺幾錢？答案，「係蝕錢架！」

30. 睇返舊年業績（我都好似唔得閒寫），OTT業務，1.78億正數EBITDA，亦同官方公告講「2022年Viu錄得2,200萬美元的首個全年EBITDA正數」一樣（梗係一樣啦，同一間公司寫嘅嘢嘛）。

31. 咁由負數EBITDA，變成正數，當然都係相當好嘅進展。不過，再講一次，仲係蝕緊錢！固然你可以估好快會轉盈，有可能，但總之，呢刻仲係蝕緊錢，搞清楚。

32. 蝕幾多？公告有寫，「除稅前綜合虧損淨額約為1.40億美元」，「未經審核除稅 後綜合虧損淨額約為1.43億美元」。

33. 用人話講？ EBITDA，未扣稅，利息，折舊攤銷前，賺1.8億港紙。扣埋利息折舊攤銷？輸11億！亦即係，扣多咗近13億嘅嘢！咁你話，EBITDA同「賺錢」爭幾咁遠？

34. 好啦，然後就真係IQ題：咁電盈收咗法國佬2億美金，賣咗26.1%嘅黃Viu出去。就好似太古賣美國可樂咁啦。咁請問，你估下，電盈可以獲得幾多一次性盈利？

35. 估下？

36. 可能你會估，即係好似太古咁，減走個成本先咯。咁2億美金賣嘢，你可能估執億幾美金，或者幾千萬美金？

37. 不過，我講太古，係特登誤導你嘅。

賣咗26% 黃Viu畀法國佬，有幾多收益？答案係，一個仙都冇！

38. 開估：答案係，冇！一個仙都有。得益係零！冇呃你，你睇份公告（其實一定要寫呢啲）。所以亦唔會有特別息

39. 冇收益。佢寫住話（行使期權前）：將不會導致於本集團的綜合損益表中確認任何增益或虧損！

40. 點解？你一定好多問號。賣咗嘢，收咗人2億美金，你話冇任何得益？點解太古又有？玩乜？

點解太古賣可樂有收益有特別息，電盈賣黃Viu乜都冇？

41. 呢度就涉及頭先叫你記得嘅數字，26.1%。電盈原本拎住黃Viu 100%，之後會拎住74%．

42. 問題嚟啦喎，渣住74%嘅公司，係點入帳嘅呢？呢個係一個有啲深嘅問題，我年代A Level會計先教，而我只讀到會考。

43. 不過，其實學校都冇教我食奶，冇教我洞房，我都識嘅！

44. 其實寫8號仔同佢個仔6823嘅舊文，有好詳細解過。簡單嚟講，即使係拎住74%嘅公司，在8號仔盤數，都係照樣計晒100%。即係乜？即係黃Viu原本係

45. 近20億港紙收入，入晒去電盈（母公司嘛）盤數。賣咗26%後呢？電盈一樣係入20億！而唔係20億嘅74%！

46. 「咁狗？」—其實呢個全世界都係咁，consolidation 是也，舊文解過。不過放心，去到個Income statement 最尾，係會勾返條數出嚟，勾返個「電盈唔渣晒100%嘅附屬公司」出嚟。

47. 呢舊勾出嚟嘅東西，就係好多時你在啲表度見到，但又唔明係乜嘅：Minorites，少數股東權益，非控股股東權益之類。

48. 換句話講，原本係100%附屬公司，之後係74%附屬公司，一樣會consolidate 晒所有嘢入去。

49. 補充一點，留意上面我引佢原公告，話冇收益，段嘢係話「行使期權前」—於是你心諗，「咁行使期權後呢？」（我諗起呢個故事，原本在老夫子睇，睇相條友個表情好正）

50. 呀，行使期權後，就真係有嘢入帳了！「會計增益約2.38億美元」。點解？頭先咪話，行使期權後，法國佬51%，就變咗大份。電盈就細份，就不能再consolidate黃 Viu成盤數入去了。會變咗「聯營公司」，就會有個一次性收益。

51. 補充：太古就係因為全部賣晒美國可樂，先有一大舊收益同埋特別息。如果只係賣26%，照計情況同電盈都會一樣。

咁，係咪又完全冇幫助？都唔係嘅，雖然杯水車薪

52. 不過，係咪成件事把托？就梗係唔係。因為你可以用最簡單嘅諗法去諗：喂，咁畢竟收咗法國佬2億美金喎！

53. 係！咁你估下個會計影響係乜？

54. 答案好簡單：在個Balance Sheet嘅「左邊」（英式講法），資產，咪會多咗呢2億現金。右邊呢？右邊係「負債同股東權益」。負債冇理由多咗丫。但你又話冇收益。咁所以，多咗舊乜？就係多咗舊「minorities！」

55. 換言之，左邊多2億美金現金，右邊多2億美金minorities！

56. 咁會點？「其實對舒緩個負債比較有少少幫助」。但，唔講數字，又只係變咗廢話。真係講數字呢？「杯水車薪」，電盈爭銀行都幾百億港紙啦！

57. 所以我估，都係等上市，或者大半舊沽畀法國佬，先係主菜

電盈仲維唔維持到派息？我就好有疑問

58. 所以呢？有可能我會估錯，但我真係有啲懷疑，佢個派息仲可以維持幾耐。咁冇話唔買得嘅，但唔該你唔好有個錯誤期望，以為佢之後年年實派到。

59. 講咗好多次了，你要睇個業務持唔持續到。而上面都講咗，電盈係派突嘅。總有一日會有啲問題。

60. 咁點解我又買？因為我唔係靠嗰9厘息開飯嘛！我仲要係分段買。即係，我甚至可以想像（唔代表好大機會發生）呢個情景：可能佢會忽然減，甚至停派息。然後股價跌返兩三成？又如何？

61. 之後就個個鬧，話李澤楷昆人，搵小股東笨，死心，死性不改，歷史重演—然後可能做大刁分拆了！

62. 而所以我再講一次，就算電盈忽然停派息，跌兩三成，我都冇驚過。反正，「其實我都賺咗兩三成（計埋派息）」。

63. 同埋，我買得唔多，所以唔會怕呢啲東西。其實，冇任何一隻股票聽日變零，對我會極大影響。

64. 再講一次，要穩陣派到嘅，買領展。又話驚供股嘅，咁買中移動。又話怕人民幣嘅，咁買長江基建。又話怕英鎊跌嘅。咁你想點？

65. 下篇先講埋新創建，照計半篇講完。