五隻香港收息股（太古領展Aeon新創建電盈）（二） - 領展823，太古19 (Patreon)

領展冇大動作，股就供完，就唔使再討論了

公司盈利同派息都穩定，盈警蝕錢都冇大減派息啦

照計嚟緊幾年派息，應該唔會點減

債息應該跌多過升，領展6厘息，照計派到。而家唔買，唔通升晒先買？

太古：從來唔係高息股，但太殘，變埋高息股

太古啲生意，大上大落，所以派息都係大上大落，只會有個派息比率

賣嘢，派特別息。賣乜？賣畀邊個？有幾多息？

一次派8蚊息，多過之前三年加埋了

但見特別息先飛入去，就梗係蚊瞓　—　之前又唔買？

重溫一次，舊年零售死晒，國泰冇機，但太古升60%。今年就跑輸大市

花邊一：美國可樂都係太古嘅，咁上市間 Coca Cola做乜？

點解母公司咁益個仔？都有原因嘅

1. 上次篇文講咗5隻香港高息股，講咗Aeon credit，陸續續講埋其他嗰幾隻，另外，上次個Excel我放返在呢篇文，雖然我覺得係唔使用個Excel嘅，睇張圖已經夠。

2. 另外，領展，電盈同太古，之前我都整過啲Excel，講佢地嘅業務。未得閒update ，但放埋上嚟，你鍾意可以自己玩，或者等我得閒入返啲數先。

領展冇大動作，股就供完，就唔使再討論了

3. 先講領展，近排係冇大動作嘅。派息歷史在呢度。股就供完，再討論供股真係浪費時間。仲有你可以留意嘅係，涉及咗供股，啲回報就好難計。認真計當然計到，但就唔好就咁只係睇個股價。

公司盈利同派息都穩定，盈警蝕錢都冇大減派息啦

4. 可以留意嘅係，公司咁多年嘅盈利，相當穩定　—　留意房託嘅「盈利」，呢度我係指「可分派」嘅核心部份，最主要即係踢走咗啲「物業重估」。咁例如，之前領展都出過盈警，但就主要因為呢啲物業重估。玩到蝕錢添呀！但冇因為咁冇派息，因為派息係睇核心嗰舊。

5. 咁你估都估到，核心盈利係相當穩定嘅，年年收租，然後扣減啲開支（包括利息）咁。盈利穩定，派息都係穩定嘅　—　我唔敢包一定永世唔會減，但即係唔會玩到匯豐咁忽然唔派（有租收嘛！而你見疫情下都冇乜減派息啦）

6. 仲有留意，上次業績，個「每股派息」係跌咗唔少嘅。但，供咗股嘛，多咗20%股票，每股梗係少咗。你睇返個「總分派」，冇減過。

7. 換個講法，你有供股嘅，咁你收嘅總股息，唔會點少咗（因為你股票多咗）。但當然了，你係嘔咗舊錢出去的，另計。

照計嚟緊幾年派息，應該唔會點減

8. 詳情可能要開篇新文講（原本都想，但又係成篇文炒咗）。但一句：固然，個利息開支係仲會升嘅。但不過，你唔計數，又只係變咗鬥大聲。另一方面你要留意兩樣嘢：首先，供股嗰堆錢，係會減咗部份債嘅。直接減，咪會減低利息開支（但大數一定係升，只係幫補少少）。即使唔係去還債，「拎去做定期都4厘幾啦」（好大舊錢喎）。呢度會幫到些少

9. 仲有，租金，普遍係加緊嘅。香港嗰啲，固然你可以以為「市道不景」—但領展啲租約一般3年，亦即係話，有唔少係之前疫情之下簽嘅，甚至減咗租。到再續時，自然會加返。其他市場嘅情況，都係差不多，特別係大陸（有啲舊年封城）

10. 仲有，領展3月年結，而佢嗰兩件新加坡嘅商場，剛剛在3月完成。即係話，上次個業績，近乎完全冇呢兩件嘢嘅貢獻（但舊貸款就見到了，雖然上份業績亦未見到啲利息）—咁你睇個收入，一定要留意仲有呢兩楝嘢會貢獻。自己大約計到幾錢啦，130億港紙嘅嘢，自己估下新加坡嘅商場收到幾多厘息吧。

債息就應該跌多過升，領展6厘息，照計派到。而家唔買，唔通升晒先買？

11. 講到尾，好簡單：正路地，領展嘅每股派息，未來幾年，照計都大約維持到。我估唔使減，頂多減些少（少過5%）．咁亦即係話，你見個6厘幾嘅股息率，未來幾年應該都做到。然後，債息照計就跌多過升。

12. 照計，減息或者債息跌嘅環境下，穩陣地派到6厘息嘅，點都有幾大嘅支持。而家唔買，唔通等3厘股息時先買？

太古：從來唔係高息股，但太殘，變埋高息股

13. 順手講埋隻太古，派息歷史在呢度，但乜參考價值。因為，太古啲股息係唔穩定的。佢地類似有個指引，係有個「派息比率」—但亦即係話，賺100就派50，賺10就派5，蝕錢就唔派咁（有啲公司，例如中銀香港都係咁）。太古一般大約係派五六成咁咯

太古啲生意，大上大落，所以派息都係大上大落，只會有個派息比率

14. 咁而偏偏，太古嘅「本業」，盈利係相當大上大落嘅，亦因為咁，啲派息都係唔穩定嘅　—　事實上，我覺得已經比我想像中穩定好多。

15. 生意真係大起大落嘅，原因好簡單，太古嘅業務，高檔寫字樓同商場收租，同埋國泰，都係好受經濟周期影響（差不多所有公司都受，但程度有分別，你可以比較下領展啲商場）。再加上呢幾年，又社運又疫情。

16. 所以，太古從來都唔係一隻收息股。你可以話係因為啲股價太殘，變咗超級價值股，對淨資產好大折讓，搞到股息都高埋（都有唔少港股係咁）

賣嘢，派特別息。賣乜？賣畀邊個？有幾多息？

17. 不過大家都知，近期嘅故事係賣嘢，派特別息。太古原文公告你可以睇呢度，或者睇傳媒報導，呢個，呢個，呢個（貼夠幾個，費事你又話冇訂睇唔到）

18. 不過呢壇嘢，要快解就真係唔複雜。賣嘢咯，賣咗當然埋單計數，有舊一次性收益咯，好大嘅，咪派特別息。相當好。

19. 賣乜？就係賣咗美國嘅可樂業務。賣畀邊個？賣畀母公司。母公司乜水？英國嘅太古集團，冇上市，仲係姓「太古」（Swire）家人渣住。

20. 賣幾錢？賣300億（美國可樂喎），但當然唔係賺300億，有「成本」嘛。淨賺，就230億港紙。然後就拎120億左右出嚟派特別息。剩返嘅？咪內部用途，再投資，同埋，啲負債比率會跌好多。

21. 好啦，有幾大舊？就真係好大舊！不過因為太古啲數好複雜，你都未必可以同佢個「盈利」比較。

一次派8蚊息，多過之前三年加埋了

22. 所以不如咁比較：太古近幾年，一般總派息都係四十幾億（留意有A股B股，唔好計錯）。但今次個交易賺230億！派特別息都派120億。呢個特別息，等於一次派幾年了

23. 又或者你用每股嘅概念，更易解。今次特別息，每股8.1 – 留意公佈之前股價五十幾蚊咋下。舊年派息就3蚊，之前2.6，再之前1.7，咁就又見到係一次派幾年了。

但見特別息先飛入去，就梗係蚊瞓　—　之前又唔買？

24. 不過，當然唔係因為叫你因為個特別息飛入去！係冇意思的，邊有咁著數嘅嘢。唔好忘記，要除淨架嘛！

25. 你真係「賺」嘅，其實係賺佢宣佈之後股價升嗰浸（好似升咗5%？）（又，你睇例如呢篇文，啲分析就完全錯的。點會拎個股價升幅同派嘅特別息相比？要除淨嘛。況且，根本派唔到嘅風險極低。所以都話網上多垃圾，而呢篇已經唔算好垃圾了）

26. 好簡單一樣嘢：你等佢宣佈咗先追，梗係蚊瞓啦。你係應該在未宣佈前買嘛！但未宣佈前點知？唔知的。但隻嘢大值讓，管理良好，派到息，你就一早知啦。

27. 之但係，「之前你又唔買」？

重溫一次，舊年零售死晒，國泰冇機，但太古升60%。今年就跑輸大市

28. 太古嘅情況，極之經典，值得你一諗再諗。時間返返去舊年，我都唔同你再講咩「二十大權鬥」「外資全部撤出」「有排加息」之類。就講「基本因素」，舊年情況係點？高檔零售死晒，國泰又冇機，寫字樓啲租都死晒，通關遙遙無期。係咪？

29. 但，舊年太古股價，升咗60%！你冇睇錯，係60%。我順手提提你，舊年港股同美股都係大趺嘅。

30. 下次你再諗咩「壞消息未過」嗰時，不妨諗下呢個例子。拿，到今年復常，股價就唔掂啦，跑輸大市添呀。見到股市點運作未？或者至少，你留意下，股市「唔係點運作」。

31. 記住，幾個原則：炒預期，永遠唔會等「確認」，估值夠殘就乜都免疫，人人都知就沒戲唱。

花邊一：美國可樂都係太古嘅，咁上市間 Coca Cola做乜？

32. 最後講多兩樣花邊嘢你知。第一，原來可樂美國係太古嘅？「咁美國間Coca Cola（KO）做乜」？呢個故事就有啲長篇。但簡單嚟講，其實，知唔知KO做咩生意？

33. 簡單嚟講，好似啲「特許經營」咁（但唔同七十一或者珍珠奶茶），我總部，做marketing，做brand building，做研發，睇下啲啲咩新產品．仲有，供應啲原材料（糖漿）畀你。你就問我攞貨，兼且另外每年有「授權費」之類。

34. 咁其他嘅粗重嘢，入樽呀（全世界度度都唔同字樣啦），起廠呀，送貨呀，同啲飯堂士多阿嬸理論呢啲粗重嘢，就唔係美國佬做了，留返在地去做。

35. 咁玩法，其實啲「入樽權」可以玩到好散。正如美國，都唔係太古一間玩晒。然後語音版助手話我知，大陸都係南北唔同，有中糧，有太古（你可以試下係咪唔同味）。而太古，亦都有做埋東南亞。

點解母公司咁益個仔？都有原因嘅

36. 至於，點解母公司同你買，好似咁著數？亦係好多原因。首先固然係幫太古減下債。但實際上，因為太古會派返特別息畀母公司，即係姓太古嗰班，所以佢地實際上唔使拎非常之多錢出嚟。

37. 仲有個講法，可能都同啲政治有關，我都信信地。美國啲業務，就阿媽拎住，非上市公司，冇咁煩。再講白啲，同一間香港上市公司，又渣大陸嘢又渣美國嘢，比較麻煩。即係陣間成間太古畀人收歸國有，姓太古嘅都仲有美國業務在手。掉轉亦都差不多，陣間美國又話你拎晒啲秘密返大陸。

38. 呀仲有，其實之前有啲完全唔起眼嘅新聞，太古第六代上場了，咁檢討下不同業務，都十分正路。

39. 下一步？好多人估賣國泰，都估咗好多年，好難估，話會賣固然有會賣嘅理由，唔賣亦有唔賣嘅理由。

40. 不過我會估，之後太古應該會更加多投資東南亞。其實你睇可樂業務已經知，之前已經有，應該陸續有嚟。