五隻香港收息股（太古領展Aeon新創建電盈）（一）—總論。同埋Aeon credit 900 (Patreon)

高息股？派到先係

買美股嘅，覺得唔使理股息。然後有啲又信穩陣8厘息—呢篇示範真相

睇派息紀錄，呢幾間都乜減（太古除外，亦都一路預咗）

就當然唔係最高股息率最好，否則仲有人買低嗰啲啲？

幾隻高息股，今年都跑贏大市。但五年就跑輸—不過，計埋收息未？

可以分段嘅話，唔介意股價波動嘅話，買收息股都係幾so的

三年前已經寫過呢隻Aeon

社運下，疫情下，甚至金融海嘯，生意都冇乜影響！

反而金融海嘯後，09 10年，業績就受壓了。點解？

22億市值，一年4億盈利。8厘息

「加息係利息收入會升，但利息開支會跌喎」—唔該量化，否則廢話

金融公司，一般係鍾意高息多過低息環境

「唔係喎，加息淨利息收入升啫，但壞帳都會升喎，都係一半半」

如果我當年入行時買，而家會點？輸兩成。但收咗100厘息！

17年收100厘息，6厘一年，你出面做定期有冇3厘？我懷疑2厘都冇

高息？派到先係

1. 我個人幾鍾意呢兩篇（或者三篇）。之前講過買高息股/收息股/防守股（嚴格嚟講有啲唔同），但當然好多人係亂咁嚟的。咁我都講過收息股有好多種，講到尾睇個盈利，你冇盈利好難維持派息—業務冇增長都唔唔緊要，但至少不能不停倒退，否則最後頂唔住個派息的。

買美股嘅，覺得唔使理股息。然後有啲又信穩陣8厘息—呢篇示範真相

2. 以前都寫過，香港人對於「收息」有相當奇怪嘅迷戀。近年，就更得意，變咗兩極。買美股嘅，覺得根本唔使睇股息（美股只係用回購啫）。但另外有啲，就去諗埋啲咩「穩穩陣陣一年8厘息」。呢篇用啲真實例子同你討論下

3. 咁啱呢排有幾隻股票都有啲新聞，一次講過。留意，下面唔係全部都真係傳統嘅「高息股」，亦唔代表我冇寫嗰啲就唔係「高息股」。只係咁啱呢堆呢排有嘢寫。同埋，有啲例如長江基建之類，以前都寫過了。

4. 我會講嘅係新創建（659），太古（19），領展（823），電盈（8），Aeon信貸（900）。太古領展電盈我有，個個月儲緊。新創建寫過，當時又畀讀者鬧。Aeon都寫過，但應該冇乜人鬧，因為乜人買（但都有一兩個買的！）。然後我而家都想買。我覺得呢隻係咁多隻最有趣嘅。

5. 首先講少少總論，之後你揀邊隻睇都得，未必要睇晒全部，應該每隻冇乜關係。雖然你問我，幾時都係要睇晒每一隻字。

睇派息紀錄，呢幾間都乜減（太古除外，亦都一路預咗）

6. 首先，睇派息紀錄，我懶搵晒十幾廿年（其實應該要）。但至少呢堆公司，近五年啲派息大約係維持到。但當然領展供過股，另計。而當然，太古傳統上並唔係高息股防守股，因為業務波動好大（因為渣住國泰嘛！）。但近年因為估值太殘，都變埋有一定高息。我計嘅息，當然冇計特別息。

7. 邊度搵呢啲數？Google，或者aastock．我幫你入埋了。

8. 仲有，新創建6月結，所以未出「全年業績」，黃色嗰個係佢中期息（舊年12月）。其他都係最新近嘅全年派息。

就當然唔係最高股息率最好，否則仲有人買低嗰啲啲？

9. 我就用最近嘅全年息，大約計個「股息率」畀你睇。但，隨時可以減，或者唔派。有個參考，雖然呢啲公司已經往績比較好。又，再記住，唔該唔好計特別息。咩叫特別息？就係派咗一年唔會再有。

10. 咁大家當然亦知道，唔會係越高息越好，否則根本唔會有人買低息嗰隻啦。有啲高，有啲低，總有原因。例如你差不多肯定派到嗰啲，就唔會去到10厘息的，越高往往預示派唔到個風險越大，所以要再高啲，買家先肯落搭。不過，呢堆東西，我都覺得現價值得買（新創建除外，大龍鳳一壇，而家我未必會買）

幾隻高息股，今年都跑贏大市。但五年就跑輸—不過，計埋收息未？

11. 另外你可以睇埋股價表現，領展供咗股，所以極難計，姑且唔討論。另外嗰幾隻？你見今年表現都唔錯，新創建未宣佈壇嘢之前今年都升咗兩成啦，跑贏晒恒指。太古係outlier，今年跌，跑輸恒指，但首先唔係傳統高息股，二來，舊年升咗六成！（你又唔買？拿，我就一路有買）。你睇遠少少，一年，亦都全部跑贏恒指。唔多唔少當然可能而家估息口見頂。

12. 不過，五年呢？你見好似都累鬥累，好似隻隻輸錢（雖然都多數跑贏恒指）。但提提你，首先，五年前呢堆港股都仲算在高位，恒指都係

13. 另外，十分重要：咁你當中收咗五年息嘛！講美股你見啲人唔使計呢啲，但講港股，仲要講得幾年，計埋就爭好遠。詳細你可以自己計，我已經幫你搵晒每隻嘢每年幾多息，你咪加返上去。當然實際上，睇你幾時，幾錢買。但你當收得四厘息一年嘅（多數唔止啦），咁五年都20%了，計埋落去爭好遠

14. 我甚至未同你計，股息再投資：固然你夠老嘅，會聽過咩叫「以股代息」（近年越嚟越少）。但本質上，其實你收到5000蚊中移動息，你又買返落去而唔係拎去食飯，就已經係股息再投資。一年見唔到分別，五年就會見到有一定分別，坐得十幾年嗰啲，可以爭好遠。

15. 咁而公平地講，你亦應該計返恒指一年有3厘息嘅，大約。

可以分段嘅話，唔介意股價波動嘅話，買收息股都係幾so的

16. 結論？其實啲收息股都照計有so，特別你唔太介意股價波動，特別係你可以分段。我嘅太古同電盈，未計收息都贏錢啦！（領展就難計，但我好肯定之後都係會上水面，有息嘛）

17. 當然啦下，其實你買SPY，甚至買QQQ，就贏晒以上嘅嘢。呢啲亦都唔算話太過「事後孔明」太過「狗」嘅比較。不過美股係咪打後都一路跑贏全世界，就都係有啲懷疑。所以你問我，都係分散。唔買港股都未必要全部美股。

三年前已經寫過呢隻Aeon

18. 我認為最有趣嘅係Aeon，但極少人買，我都未買，但可能買。原來3年前舊文都講過（證明我老了，不停重覆），呢隻係我返工第一日，鬼佬老細踢我去佢業績發佈會嘅。留意，公司係2月年結嘅，所以4月出全年業績，我就係2006年4月入行做分析員的。啱數

19. Aeon咪就係Aeon，但佢唔係做百貨，係做財仔同信用卡。而同百貨同一集團，所以張卡有折有得儲分之類，幫襯過就知。財仔同信用卡生意，不用我多講啦。

社運下，疫情下，甚至金融海嘯，生意都冇乜影響！

20. 公司派息歷史，呢度。仲有，盈利都係大約穩定嘅，甚至社運疫情下都叫做穩定，亦維持到派息

21. 睇遠少少，甚至金融海嘯，公司都維持到派息！盈利仲要有得升。估唔到呢？但反而去到2010年盈利要跌（雖然派息頂到）。係咪同你常識唔同？點解好似逆周期？經濟差反而生意冇事，經濟好先出事？唔係經濟差又爛帳多咩？你可以估下點解，下一段解。

反而金融海嘯後，09 10年，業績就受壓了。點解？

22. 觸發我忽然又諗起呢間公司，因為剛剛出咗第一季業績（2月結嘛，5月已經第一季）。一季賺9700萬，一年即係近4億嘢（舊年都差不多），市值就22億。咩叫夠平？呢啲就夠平。當然你永遠可以同我拗平嘅可以更平。

但，至少佢有息派。上面個表都見，8厘息，仲要似乎冇乜點減過

22億市值，一年4億盈利，8厘息

23. 可以快講下個業績，其實亦都延續埋舊年業績嘅趨勢。

24. 對於財仔嚟講，幾樣嘢啫：利息收入，利息開支，兩者相減就淨利息收入。然後有啲手續費（但財仔不太多，銀行就多，賣基金賣保險）。然後仲有乜？爛帳。當然仲有人工，交租之類。

25. 舊年同今年，你估都估到最重要係乜：係加息！

「加息係利息收入會升，但利息開支會跌喎」—唔該量化，否則廢話

26. 咁但，嚟啦喎，心法時間：唔該，量化。否則一切只係鬥大聲。或者變成你啲無聊辯論嘅pros and cons，但現實世界唔係咁運作的。而你見網上啲所謂分析，多數就係呢啲講故事唔講數字嘅垃圾。

27. 即係乜？加息，我當然話你知對利息收入好。但你又可以拗：「唔係喎，利息開支都會升啫，都係一半半」—　唔該，唔好用啲咁膚淺嘅思維。「即係好似話多1000萬你都會有多啲痛若咁」。

28. 頭先講乜？量化！其實你一睇就知，甚至唔睇都估到：冇錯利息收入同利息開支，同時會升，但梗係前者升得多啲啦！所以，個淨利息收入，係大升嘅！你入去兩份業績望下啲數自然明。唔好再聽啲人只係紙上談兵，冇數字嘅，就只係廢話。

29. 你睇最新季度業績，利息收入升8400萬，但利息開支只係升1300萬。所以個淨利息收入，升咗成7000萬！見到冇？講數字，唔好講「論點」。

金融公司，一般係鍾意高息多過低息環境

30. 於是乎亦答咗你，點解2010年，公司反而盈利受壓？聰明嘅你估唔估到？

31. 因為，2008年後，金融海嘯後，全球低息嘛。咁，利息收入又低，開支又低，但個net effect，當然係負面的。

32. 亦都所以，寫過幾十次，一般嚟講，金融公司（銀行保險財仔都係），係鍾意高息環境多過低息嘅。

33. 於是你問：咁之前低息環境，公司咪麻麻地？係的。但而家啲息口上返去了。雖然我都已經好後知後覺。不過that said，隻嘢由舊年10月低位，都只係升咗十幾巴仙啫（其實而家差不多一年高位）

「唔係喎，加息淨利息收入升啫，但壞帳都會升喎，都係一半半」

34. 然後，係咪有人想講：唔係喎，雖然淨利息收入升啫，但經濟唔好，壞帳都會升嘛。

35. 一樣，講數字。咁你會見到，撥備之類，多咗3000幾萬咯。但淨利息收入嘅上升，已經夠冚晒有突。

36. 然後係咪想講，唔係喎，人工貴咗喎　—　唔使我再解啦可？

37. 其實，係一間都OK悶嘅公司，你甚至可以懷疑咩Mox之類嘅新嘢會搶咗生意（但成堆virtual bank 都蝕錢，Aeon就賺錢，VB有幾多錢燒？）。不過真係算穩定，夠殘，派到息。

如果我當年入行時買，而家會點？輸兩成。但收咗100厘息！

38. 拿，半玩嘢。就計我當年入行時買。你估幾錢？當年6個幾，而家5個幾。你覺得，搵笨喎，坐17年（！）仲要輸錢。但不過，中間你收咗N咁多息喎。我好粗略大約計過，夾埋，收咗6個幾息，應該係拎返晒個本有突。

39. 好粗略咁計，即係100厘息啦，雖然17年。一年近6厘咯。當然呢刻你覺得6厘息好似唔係好多，但，唔好咁短視。你唔好忘記，過去呢17年，應該我估至少10年係極低息嘅。拉勻晒，你出面做定期之類，17年夾埋，我估3厘息都冇，甚至2厘都未必有

17年收100厘息，6厘一年，你出面做定期有冇3厘？我懷疑2厘都冇

40. 講到尾，正如3年前講，價值股，「雪茄屁股」，肯定小眾嘢。不過你想收息嘅，可以諗下（但當然了，股價會波動，雖然呢隻嘢已經好細波幅，咪話舊年11月低位到而家一年高位都未夠兩成）

41. 順手講埋，唔貼圖了，3年前我寫，5.1。而家，5.3，唔使輸。仲有，你收咗1.28息。3年25厘息喎老細。但當然，當中係有股價波動（但唔算多了）

42. 而講到尾，最重要係乜？最重要係，我估我會買。冇乜點解，但志在參與下。可能部份港股沽少少調過嚟，反正都收咗唔少息（太古仲要又有特別息）。買返幾萬，甚至十萬八萬港紙，應該都OK嘅。

43. 不過最後一句：唔該，分散。你唔好同我講你2000萬退休金放落去諗住一年收8厘息，點知忽然有一年佢減，甚至唔派，甚至間嘢爆咗煲，你唔知點算　—　呢啲當然係閣下嘅問題啦。

44. 寫到咁長，下篇解決埋另外嗰四隻。