冇買嘅嘢升咗，點平衡心態（二之二）—實例一堆：東京電力，花旗，KRE，3001，PTON (Patreon)

冇買嘅嘢升咗，點平衡心態（二之一）

「別人恐懼時我貪婪」，真係金句—但，可能主要適用於大市

又其實，咩叫恐懼？都有得拗

如何理解「別人恐懼時我貪婪」？　就除非真係殺估值

日本大地震，買日經，很好。你買其他股市，還好。買東京電力？冇咁好

公司唔掂狂跌，就未必真係叫「恐懼」

世界末日乜股都跌，先係真恐懼

補充返埋個「乘虛而入」理論

3月前我冇聽過KRE，冇聽過 3001。所以大跌我都唔會買

哲學講完一大堆，睇實例，KRE。我不覺得冇買可惜

我當你真係最低位買，又如何？

好啦，我當你最低位買，最高位沽，ok you win．但，得唔得？買到幾多？

順手講埋，3001。

再極端嘅例子：PTON

咁垃圾嘅嘢，今年都有四次低位彈兩成啦，唔通又話可惜？

你最後要留意：有好多股票係我唔識嘅。同埋，唔好用結果去判斷決定

男朋友拎咗你買樓舊首期去澳門賭，200萬變400萬，唔通又係好決定？

1. 上次篇文都係「虛」啲，但主要就係講，「冇買嘅嘢，升咗，點平衡心理」嘅問題。主要都真係「本來無一物，何處惹塵埃」。我亦講咗alternative path嘅概念，講咗survivorship bias，講咗你望住啲升咗嘅嘢去眼紅人地，你冇買嘅嘢唔會令你輸錢，以及「事後畫靶」嘅問題　—　見到冇？上面呢啲嘢，我可以幾句講完，但唔寫一篇文，你係唔會領悟到嘅

2. 篇文居然幾受歡迎，不過其實受唔受歡迎，都係會有呢篇下集。另外，上集漏咗個Excel，已補返。長期讀者知道我耐唔耐會漏attach嘢，多數第二日會補返。所以你見有嘢漏咗，可以之後上去再睇多次。

「別人恐懼時我貪婪」，真係金句—但，可能主要適用於大市

3. 最後可以重覆多啲，如果要我選一句投資金句，或者「一句講晒你咁多年嘅領悟」，句終極金句，應該一定係「別人恐懼時我貪婪」。

4. 但點去用，就睇你修為。金句係冇可能「易用」嘅，否則人人脫貧。梗係有啲嘢令你用唔到，例如心魔。又或者別人恐懼時你冇錢。又或者，幾恐懼先叫恐懼？又要幾貪婪？

又其實，咩叫恐懼？都有得拗

5. 甚至乎，再簡單啲嘅問題，咩叫「恐懼」？

6. 我嘅理解，以前都寫過（未必一定啱）：呢句嘢，應該只係應用落大市。因為最根本，一般大家，量度恐懼，一係你睇指數（例如疫情時一個月跌三成），一係你睇VIX，或者你睇啲做孖展嘅友嘅反應，甚至係媒體　—而呢啲多數都係同大市有關。

7. 所以，係有可能你隻嘢狂瀉，但大市冇恐懼。例如乜？SVB。嗰時大市好恐慌咩？其實冇。

8. 甚至乎，你隻嘢大瀉，係咪真係「恐懼」？你隻嘢如果會死嘅，咁根本唔會有仇報。所以你正確地理解，別人恐懼時你貪婪，應該係指「有啲嘢明明唔會死，盈利亦會返嚟，只係被其他嘢拖累」—例如？例如金融海嘯時中移動大跌。即使你嗰時諗，段估美國金融海嘯都唔會令中移動啲生意差咗好多啩？

9. 亦即係話，隻嘢可能唔會死之餘，盈利前景根本冇乜影響，有都肯定係股價跌幾成後過度反映。只係之前可能大家肯畀20倍市盈率，驚起上嚟乜都沽，變到10倍咁—但寫過了，估值呢啲，多數都係鐘擺，慢慢會返嚟　—　如果你啲盈利真係增長的話

如何理解「別人恐懼時我貪婪」？　就除非真係殺估值

10. 別人恐懼時我貪婪，一般講大市。頂多可能係大公司　—唔會死嘅公司。但你事前點知邊啲公司唔會死？未必咁易知。有時幾清晰，美國金融海嘯點都唔會整死中移動啩？（所以亦跌得唔係好多），你不過係驚個估值不再啫。但疫情股災時，你可能真係驚有啲公司會死。不過，大市就應該係唔會死的。

日本大地震，你買日經，很好。你買其他股市，還好。買東京電力？冇咁好

11. 實際上？又畀個例子你，呢個例子未講過。日本2011年大地震，環球股市大跌　—　你去買最大盤，例如買MSCI World ETF（URTH），十分好。你買日經指數呢，都係不錯　—　但你去買東京電力（就係核電廠嗰間），就有排你輸，3月18號950蚊，而家都係得返一半左右（咁你真係計最低位都升返啲嘅，但算吧啦，唔好事後畫靶）

12. （順手插播，之前有讀者問，我好多時嘅例子講美股，佢想知環球股市係點。好簡單，咪睇MSCI World．同時間，你亦會見到，到底港股係特例定普遍現象，股市長升係只係美股，定多數股市都係）

14. 正如金融海嘯，雷曼爆煲時，你買SPY，十分好。但你買花旗呢？仲未回家。雷曼9月15爆煲（中秋節，只有親身經歷先記得），9月19日花旗兩舊水，而家50蚊（其實當年唔係真係兩舊水，但合過股，調整返）

15. 順手講埋，花旗都係冇「死」到。只不過受政府打救，「救存戶唔救股東」，大手將原本嘅股東攤薄晒

公司唔掂狂跌，就未必真係叫「恐懼」

16. 然後仲有一樣嘢，其實你要搞清楚，到底市場係咪真係「恐懼」—之前好多發夢股狂瀉，係因為公司唔掂，冇錢賺，地心吸力跌返落地　—　而唔係「恐懼」。咁你飛入去，當然係易中伏。陣間我會用Peloton（PTON）做例子

17. 又例如，有啲股票（費事開名，但某啲科技股係咁，特別係中資），啲基金1蚊攞貨，上市升到20蚊，人地一路狂沽，沽到5蚊 – 唔好意思，人地唔係恐懼。

世界末日乜股都跌，先係真恐懼

18. 但你話事前點分？係未必分到。所以個rule of thumb就係：世界末日咁乜股都狂跌，咪真係「恐懼」—亦即係睇大市咯。除咗睇VIX，你仲可以睇有幾多成嘅股票跌呀之類，係咪一百隻九十幾隻都跌。

19. 你之前成堆咩細銀行大跌，但，市場好恐懼咩？冇噃。科技股冇耐創晒一年新高添。VIX都冇乜點大升（當然VIX唔係唯一指標）。見到冇？一堆嘢大跌，同市場恐懼，唔係同一回事。更殘忍嘅係：你堆嘢大跌，但人地冇恐慌。

補充返埋個「乘虛而入」理論

20. 最後補充，以前都寫過嘅，「乘虛而入」理論：你一路有留意嘅股票，大跌，而你又覺得真係因為恐懼，咁你飛入去，還好。例如你諗住買SPY嘅，當然好。例如麥當勞大瀉，而你又知道只係跟大市，只係殺估值，唔係麥當勞之後冇錢賺嘅，你可以買（但未必咁易事前知，諗下之前講 Facebook舊年第三季嘅例子？況且，你估得你一個知咩：正係因為啲人都知某啲公司不會死，所以佢地就係唔會跌得太多的。你睇蘋果微軟？）

3月前我冇聽過KRE，冇聽過 3001。所以大跌我都唔會買

21. 咁但，如果你之前根本唔係想買嘅，我就唔會因為佢跌咗而買咯。乜鬼KRE，3月前你有冇聽過先？十個有九個未聽過啦。咁點解因為跌咗落嚟就買？內房隻3001，都係咁情況。

22. 即係話，女神男神甩拖，你乘虛而入，很好。但有啲之前你都睇唔上眼嘅物體，忽然available，難道你又飛埋去？況且，你嘅子彈係有限的。單單人地大平賣，並唔係一個你埋位嘅理由。

哲學講完一大堆，睇實例，KRE。我不覺得冇買可惜

23. 好啦，哲學講完一大堆，睇實例吧。KRE，我不覺得我買好可惜，亦不覺得錯失咗機會。所以根本唔使點平衡心態。

24. 當然仲有一個幾有趣嘅問題：我根本唔會有好多錢買呢啲嘢。固然，會係有新錢嘅，否則讀者話提，長期100% invested又點會有錢買嘢。但即使係嗰時嘅新錢，我都冇諗住去買　—　如果你係嗰時拎住一大舊錢嘅，我就更唔明。「咁點解唔買第啲嘢？」。

25. 我想講：升好多咩？如果KRE你都要懷疑人生，真係小心人都癲。講真，Bitcoin低位升咗幾十萬倍添。冇買嘅係咪全部懷疑人生？咁真係人都癲喎

26. 睇圖，亦都睇埋我個Excel（有用的）

27. KRE，我都唔好同你計年頭到而家輸幾多。咁to be fair，應該冇乜人年頭去買。但即使3月初，SVB之類出事時你去買，到而家，都必然係輸唔少。

28. 我就當你捉到3月個中個底位（雖然我唔明你點解可以肯定自己捉到，點解唔會早咗幾日）。到而家，你都仲係要輸11%！我甚至唔計3月中後跌到低位（5月頭）都跌兩成，我當你冇「止蝕」，當你冇嚇走，當你冇去問人做乜點你買

29. 其實真係把托喎。特別係，我上面問，做乜唔買第啲嘢？由3月中到而家，標普指數升咗13%，納指100升咗25%　—你隻KRE跑輸幾多？仲要大市一路升。你買咗，呢啲位就真係問返點平衡心態啦！大市升少少有隻嘢升多啲你冇買易平衡，定大市狂升你隻嘢要跌易平衡？應該前者吧

30. 所以我真係唔明，做乜錯失KRE，會係一個問題。其實錯失咗啲乜？

我當你真係最低位買，又如何？

31. 好啦，我當你5月4號嘅低位買（留意，由3月中嗰個低位已經再插兩成，我唔知有幾多人坐得到），都只係彈10%。標普指數都彈7%，納指彈15%　—況且，我都唔知你點樣可以事先知呢個係低位。你夠膽買幾多，又係一個問題

好啦，我當你最低位買，最高位沽，ok you win．但，得唔得？買到幾多？

32. 好啦，我當你由5月4號嘅低位買，去到6月7號嘅高位，（亦好似係讀者問我問題嘅時間），咁就真係有兩成幾啦。呢個時間，就真係跑贏標指同納指。

33. 不過，咁樣擺明係事後畫圖吧。你在隻嘢嗰時反彈一大輪，到咗高位（當然你6月頭末知之後又跌嘅），然後望返之前個低位，然後話升咗好多，做乜我叫人唔好買　—　會唔會太過玩嘢？

34. 你拎個恒指圖嚟睇，其實差不多每年，你低位買，高位沽，都執兩三成　—　但做乜一街都話港股廢？因為你不能咁樣用啲低位買高位沽去講嘛！除非你年年做到，仲買得大大舊啦。

35. 如果你真係拎最低位去到最高比，就應該大家都由低位到高位比。標指低位彈咗三成，納指低位彈咗四成幾。其實最差嘅IWD EMXC之類，低位都有彈25%

36. 固然，你可以話KRE呢排回返我先寫。但即使你係最低位買最高位沽，都只係25%—成件事都係唔make sense．何況，alternative path呢？如果爆多幾間呢？當然你可以拗，「咁如果標普指數歸零呢」—但你心知肚明，邊樣機會大啲？

37. 年頭買就固然輸死（而大市做得好好），3月低位買一樣輸。即使5月低位買到而家，都唔見得特別好過大市。唯獨你要最低位買最高位沽，先叫做好少少　—　一隻嘢，你要去到咁樣去框個frame嘅，其實你錯失咗啲乜？根本冇。

順手講埋，3001。

38. 至於3001，情況更不堪。冇錯，你真係畫圖嘅，係呀，低位都升過兩成的。五月尾去到六月中呢浸，Excel入面有。但，讀者係四月中問嘅，咁可以好肯定會係輸錢。甚至未計中間跌過三成。

39. 話說回頭，你見隻嘢彈得最勁當然係舊年第四季。低位升咗近兩倍。不過，唔使我重覆啦？舊年第四季你地諗乜講乜？

40. 亦都見到個定律：當時，就係「你覺得好可能爆煲」，就最平，買落去先最好。到大家都知「應該過咗最壞情況」，今年，隻嘢就係咁跌啦。況且，間公司過咗最壞情況，同啲債過咗最壞情況，又係兩回事（可以債務重組喎，公司冇事但你隻債返一折）。

41. 呢個例子，咁肯定我叫讀者唔好買，係幫咗佢啦。但難道中間彈過兩成，你又嚟話我阻你發達，覺得我燈？唔該，戒絶呢啲心態。同埋，唔好事後畫靶。

再極端嘅例子：PTON

42. 再極端嘅例子？冇人問過，但我地睇呢隻，PTON

43. 呢隻咁嘅「疫情受惠股」（啲人在家健身喎），復常後當然死晒。正式嚟講，係開始估到會復常，已經死晒。

44. 你睇股價圖，都會見到，照計任何位買，到而家你都輸錢　—　我完全唔明點解啲人要買，甚至要討論呢啲咁嘅嘢！而唔去搵啲任何位買都贏錢嘅嘢（蘋果剛剛又歷史新高，有冇人唔明咩叫歷史新高？）

45. 不過，你可以睇Excel，就只係今年，隻嘢都有四段升浪，係升超過20%—講緊往往係五六日之間嘅事。剛係六月，已經有兩次。年頭嗰次，直頭低位升四成。

咁垃圾嘅嘢，今年都有四次低位彈兩成啦，唔通又話可惜？

46. 不過啦喎，任何位你問我，我都係叫你唔好買。而你睇隻嘢，差不多任何位買，你都係輸錢。我唔明做乜要捨難取易，唔買啲「差不多乜位買都贏錢嘅嘢」

47. 有冇人奇怪，「差不多乜位買都贏錢嘅嘢」，有咁神奇咩？有！大把！我手上都兩隻。蘋果同微軟咯！歷史新高咼！即係所有位買都贏錢啦。

48. 不過：之前你又唔買？

49. 你望隻PTON，今年好似都唔係好差，都係跌一成多啲　—　但標指升咗13%，納指升咗近四成。一來一回，爭幾咁遠？

50. 我想表達嘅係：即使呢啲你任何位買都輸錢嘅嘢，中間一樣可以有N咁多次反彈20%以上。唔通你又話要平衡下？

51. 根本就冇發生任何事，你冇買嘅股票，升再多都好，唔會令你輸錢。更何況，呢隻，買咗你就真係輸錢

你最後要留意：有好多股票係我唔識嘅。同埋，唔好用結果去判斷決定

52. 最後補多兩樣哲學嘢，我都冇時間詳細解，但又唔想又整多篇（第一季回顧都仲未完！），遲下再解

53. 首先，唔好只係用結果去判斷返個決定，至少結果唔係唯一判斷因素。特別係因為投資涉及好多運氣成份（特別係你地買得短期嘅，更加係），記住Alternative path．你話碌卡買中石油，我一定話唔好。你年頭話借十倍孖展買尼日利亞股市，我當然話唔好。但唔通因為升咗，你啲行為就變得合理？你男朋友拎你買樓份錢去澳門賭咗舖大細，中咗，200萬變400萬，但，你係咪真係會讚佢？況且，如果係好決定，「咁賭多次丫」，你又唔會叫佢咁做嘛。所以，根本你都明，呢個係壞決定　—　唔會因為佢贏咗而改變（當然佢輸咗你就更加嬲—然後你發現，同佢一齊先係壞決定？）

54. 第二，我都已經買咗好多隻美股，計埋有留意嘅更多。但都仲係有好多公司，我係完全唔熟嘅。所以你問我呢隻嗰隻，或者問我尼日利亞哥倫比亞，好可能我都未必鼓勵你買　—　而亦都好可能啲嘢之後有啲會升嘅。但總不能你冇買，佢升咗，然後你就覺得錯失咗機會。

55. 但，如果你係坐住一大堆現金，冇去買嘢，就真係錯失機會啦。因為我係好肯定有叫你去買的。