冇買嘅嘢升咗，點平衡心態（二之一）　—　其實好簡單，冇得平衡。冇買嘅嘢唔會令你輸錢，除非你長期乜都唔買。況且，只望住升嘅嘢，人都癲。而講到尾，冇買就係冇買，講乜都假。 (Patreon)

KRE我話唔好買，結果升咗。咁點算　—　有乜點算？

叫你唔好買，咁佢升咗，條友係咪阻你發達？係咪燈神？

Alternative path：你玩俄羅斯輪盤冇事，贏1000萬。但其他人唔知點嚟

即係火燎森碌卡買中石油。亦即係話，輸死嘅你唔知啫。

你賭錢拎到嘅1000萬，係冇做牙醫搵嘅咁值錢。

年頭你做10倍槓杆借孖展買TQQQ，一定贏好多倍。但我都係會阻止

「你冇買嘅嘢，唔會令你輸錢」—　雖然，不投資係向下流

其實，乜嘢先叫「想買」？有買，冇買，好易分。但咩叫「想」？

買Gamestop啦 ！仲買QQQ？傻仔

不能事後畫靶，唔通年頭你話all in 尼日利亞股票，我又話好？

講白啲，你只要大約跟得上大盤指數，就已經夠當然仲有難度，同埋你可以買幾多

呢篇其實係哲學文，除咗講「冇買嘅嘢升咗，點平衡心理外」，我仲會講alternative path呢個好重要嘅概念。唔止投資，做其他嘢，做人都係（投資其實咪就係做人）。但好似從來冇認真咁講過呢個概念。仲會有埋good read畀你

1. 又係因為讀者提問，先有呢篇文。今日又係講少少「心法」，不過應該同以前寫嘅唔多同。

KRE我話唔好買，結果升咗。咁點算　—　有乜點算？

2. 有個讀者問關於KRE，咁佢話係真心求教，唔係challenge 我（我係識分的）。不過話，嗰時我話唔好買，然後隻嘢結果都升咗成12-13%啦（然後加多幾個表情—又，最好唔好用表情，因為未必明你想表達乜）。佢問，應該用乜嘢心態睇呢啲情況。下次又應該點處理。

3. 大家覺得呢？

4. 我畀個短答案，就係：升咗十幾%，so what？（其實唔止）。

5. 中等長度嘅答案：冇乜用咩點心態去睇，有乜要睇？下次？下次都係一樣。

6. 長答案，就係呢兩篇文啦。正如之前有個讀者問隻內房隻ETF（3001），佢問「政策築底已見」，問我點睇—其實我經常唔明讀者問「點睇」即係問乜，但我理解，即係問應唔應該買啦。咁我當然係答咗佢，唔好買（你見星期二人民幣反彈，堆內房股大反彈，呢隻嘢都仲要跌，明顯唔係咁簡單嘅邏輯）

叫你唔好買，咁佢升咗，條友係咪阻你發達？係咪燈神？

7. 於是乎，其實你大約估到，我地討論兩個問題，甚至係同一個問題。首先，想買而冇買嘅嘢升咗，點平衡心態。第二，咁有人（例如我）叫你唔好買，隻嘢升咗，佢係咪阻你發達，係咪燈神，係咪唔識嘢。之類。

8. 長篇大論之前，畀三個key word你：第一，你冇買嘅嘢，係唔會令你輸錢嘅。第二，you can’t kiss all the girls．第三，最重要嘅，alternative path．

9. 先講哲學，第二篇再講實際例子（又，你可以話我知，到底講邊樣先好啲）。

Alternative path：你玩俄羅斯輪盤冇事，贏1000萬。但其他人唔知點嚟

10. Alternative path，係一個好重要，而好多人忽視嘅概念。順便畀埋兩篇Good Read你．第一篇係「我真係恭喜你」，第二篇係「牙醫」（睇部份得了），兩篇都同Nassim Nicholas Taleb Fooled By Randomness呢本書有關。如果你一年睇一本書，就睇 Fooled By Randomness吧，由頭到尾睇晒佢。好過你睇幾百篇垃圾。投資講到尾係你自己嘅思想。

即係火燎森碌卡買中石油。亦即係話，輸死嘅你唔知啫。

11. Alternative Path呢個概念，同survivorship bias有啲似。用好簡單嘅例子講，就係「贏咗你咪天才，但如果輸呢？」。再講白啲，即係火燎森碌卡買中石油。亦即係話，輸死嘅你唔知啫。

12. 「我真係恭喜你」嘅故事，好簡單，大約係咁：講條友去賭俄羅斯輸盤，冇事就拎1000萬美金，有事……咪死咗。結果佢冇事，拎咗錢，住豪宅。然後個律師，日做夜做，儲廿年錢，先儲到1000萬美金，做咗佢鄰居。好啦，記者嚟訪問，當然會覺得呢兩個人都「成功」，而甚至律師就冇玩輪盤嗰個咁成功。但，真係咩？

13. 然後推而廣之，在第二篇文（其實本書都有講），Taleb就話，你個牙醫，好有錢，好有錢。有錢過啲咩full time trader

14. 呢度值得諗嘅嘢有幾個。第一，如果條友開槍死咗嘅，你根本見唔到佢。第二，同樣係1000萬美金，你點拎返嚟？Taleb講，係要有luck adjusted．大意就係：賭錢返嚟嘅1000萬，係冇做律師搵嘅咁值錢。當然仲有，人地玩輪盤致富，你係咪應該照學？人地碌卡買中石油搵到錢，咁你係咪照學？—你唔見佢試多次？（所以火生當然係叻仔　—　正如俄羅斯輪盤故事條友，拎咗1000萬美金，唔通再去玩多次？）

你賭錢拎到嘅1000萬，係冇做牙醫搵嘅咁值錢。

15. 我在Facebook寫醫生好搵時亦寫過類似。你一個二個講做藝人都好好搵，踢波都好好搵，做炒家都好好搵，全錯。你不能只睇upside，唔睇downside。最差嘅醫生都五六皮嘢個月，但最差嘅炒家可以乞食。而呢啲已經係visible嘅path，更多時，alternative path你根本睇唔到。因為你只會見到成功嘅例子，失敗嘅，可能死咗，或者唔敢見人。

16. 呢類偏差，無處不在。正如你地買基金，都係睇佢之前嗰幾年嘅回報—但反正唔掂嘅基金，早就摺埋。啲財經KOL亦都可以開兩個倉，一個睇好，一個睇淡，做盡槓杆，總有一個會贏大錢。然後拎去昆你落搭。

年頭你做10倍槓杆借孖展買TQQQ，一定贏好多倍。但我都係會阻止

17. 呢啲，就係alternative path嘅概念。其實亦係risk and return，雖然現實上啲情況唔會好似俄羅斯輪盤咁明顯。但即係，你去做10倍槓杆買QQQ，我當然叫你唔好—係呀，你年頭做嘅，而家贏咗幾倍。但，如果個市唔係升，係跌呢？咁難道你又話我阻你發達？

18. 然後，好多人，就係用個「結果」去justify返個「決策」—呢個係人性，但亦係謬誤。難道因為我買拜仁慕尼黑後上拎德甲，一晚執五倍，我就個個星期去買？甚至，唔通最初你訓身家買，我唔阻止你？我一定阻止你。但最後中咗，唔通你又話我阻你發達？

19. Alternative Path呀！

「你冇買嘅嘢，唔會令你輸錢」—　雖然，不投資係向下流

20. 然後，第二樣要講嘅，就當然係「你冇買嘅嘢，唔會令你輸錢」。

21. 「唔係喎，你又話唔投資即係輸錢」「矛盾喎」。冇錯，你可以當個世界係每年幫你扣血咁，因為有通脹。所以唔投資就係輸錢，長淡必輸，長cash亦必輸。不過我地講嘅係另一樣嘢。

22. 另一角度講，個市長升，你冇買，就真係「機會成本」。但，你見到做10倍槓杆買TQQQ可以贏幾倍，你冇做，呢啲唔係叫「機會成本」。你可以諗下有乜分別。

23. 實際上即係點？啲嘢升咗，你用咩心態去面對？我覺得根本唔使面對，我唔明有乜去面對。

其實，乜嘢先叫「想買」？有買，冇買，好易分。但咩叫「想」？

24. 當然實際上未必咁易。首先，如果係你曾經「想買」嘅，而冇買，升咗，個心就更加唔舒服（不過，你諗真啲咩叫「想買」，我都「想」減肥，大把人都「想」追李佳芯，其實，只要冇做，有幾想，好似都冇乜分別）。然後如果，真係去到買啦，真係盤都落埋喎，問人（例如我），佢叫你唔好，然後你取消咗。咁就真係可以叫「想」—點知隻嘢升咗，個心理又唔多平衡喎

25. 不過，alternative path，如果佢跌呢？如果佢跌，我就唔係阻人發達，係救你一命。但實則你問我，呢啲都只係自己諗得太多。我根本冇阻你發達，亦冇救你一命。

買Gamestop啦 ！仲買QQQ？傻仔

26. 然然然後，FOMO，fear of missing out。唔記得畢菲特定邊個講，見到你身邊嘅人賺大錢，保證改變晒你所有對市場嘅認知。係好肯定的，特別係一啲你睇唔起嘅人。買Gamestop啦 ！仲買QQQ？傻仔。做10倍槓杆買TQQQ啦！仲買正股？傻仔。

27. 不過，如果跌呢？其實只要你自己經歷過，自然明白。所以真係投資趁後生。

28. 有關 you cant kiss all the girls，可以有好多具體嘅例子。

29. 例如，每日你去投注站，都搵到好多贏咗幾倍嘅人。甚至幾十倍都唔奇。六合彩都成日有人中。

30. 但，你問我講，你拎100萬去買，我當然係叫你唔好。係喎，有人中喎，梗係有人中。不過，如果輸呢？仲有，你見到，成班人夾埋，點都係輸錢嘅。

31. 股票其實一樣。你大可以搵返每日升得最多嘅股票出嚟，多數都係啲怪雞細價股。然後假設你早兩日問我，我九成都係叫你唔好買　—　咁但，難道你又話心理唔平衡？唔通又覺得我老點你？覺得我唔識？即係，不妨問自己一句：「咁你又唔買？」

32. 買咗，坐咗落去，你咪知味道。輸錢嘅，固然你就開始明白。贏錢嘅？其實都係把托。咪俄羅斯輪盤。況且，人地一次拎1000萬美金，你唔係。

不能事後畫靶，唔通年頭你話all in 尼日利亞股票，我又話好？

33. 再講白啲啦喎，你不能事後去畫返個靶。

34. 我有個Excel（呢度畀埋你），monitor住四十幾個股市ETF．今年表現最好嘅，尼日利亞，阿根廷，希臘。但年頭你問我，你想all in買落去，好唔好？我當然叫你唔好。難道因為升咗，你就覺得你呢個決定係啱？係唔會的。

35. 你每日可以見到好多升咗嘅股票，每年總有啲資產類別跑出，總有啲國家跑出，日日投注站有人贏幾十倍。你做槓杆做期權嘅，一定有人可以贏幾倍架喎　—股市，唔係升就跌架啦，你做埋槓杆，一定勁。

36. 不過，如果你輸呢？況且以前都寫過，輸50萬嘅痛苦，一定多過贏50萬嘅快樂

講白啲，你只要大約跟得上大盤指數，就已經夠

37. 心態冇得平衡，我唔明點解要平衡。應該話，如果你不停咁望住啲嘢升，然後又後悔自己冇買，咁真係人都癲。

38. 不過，如果嗰個係大盤指數，例如美股，情況就唔同啦。即係，你睇住啲嘢升咗你冇買，係應該要檢討。有乜分別？有兩個。首先，多唔多人買。好不幸嘅係，人都係一種同人比較嘅動物。固然買咗meme股嘅人會大大聲，但大家都知，啲人嘅財富，都係集中在大盤股指數。

39. 講白啲？標普指數升十倍，肯定唔少人會富足，你冇份，就好大件事了。但一隻網紅股升十倍，你冇買，其實關你乜事。

40. 而當然仲有，alternative path—雖然你可以質疑「過去唔代表將來」。但即係，買標普指數，一般係唔會輸死你嘅。其實一年輸一半都好似近乎冇試過

當然仲有難度，同埋你可以買幾多

41. 亦即係仲要講埋，成件事嘅難度。你幾千隻股票，幾十個國家，揀一個表現最好嘅出嚟，然後事後講　—　事先你買中嘅機會，有幾多？就算你中，其實都係運氣啫。

42. 但，叫你去有錢就買標普指數，應該係輕易而舉嘅事。事實上，本Patreon一路都係教一啲「普通人都做到」嘅方法，而唔係教你向內翻騰三周半轉體720抱膝—何況，投資係冇難度分嘅。1000萬就係1000萬，我買SPY得到嘅1000萬，同你貼中隻神奇股嘅1000萬，拎去洗係一樣嘅（如果用Taleb嘅講法，買SPY嘅1000萬仲值錢添）

43. 況且，好多人都係忽略咗一個最重要嘅問題：你買得幾多？

44. 你年頭「睇好」尼日利亞股市，Fine，有民主有common law內需市場大人口年青（好似係）—但你會買得幾多？我阻唔阻止你都好，你都唔會買得多。咁即係，你拎十萬港紙買尼日利亞ETF執三成，我拎五十萬買SPY執15%—邊個贏得多啲？

45. 寫risk and return時我都寫過，看似低回報嘅嘢，風險細，就可以買得大。到頭嚟金錢回報，高過所謂「高回報」嘅嘢添（但其實買標普指數唔係低回報啦，頂多你話相對於個股，佢唔會一年升幾倍咁咯）

46. 都仲係唔明嘅，畀個最後例子你：你可以諗下，畢菲特點做首富嘅？固然佢嘅表現好過指數一截。但，佢都只係買大公司　—　佢唔係買尼日利亞股，或者買細公司發達的。點解？其實，你有冇聽過有人買尼日利亞股發達？