第一季回顧（十二）—油價。廿年前又百幾蚊，舊年又百幾蚊。計及通脹，連1979年嘅位都未到。呢啲東西，點會係好投資？股票就係另一回事 (Patreon)

我是一個「股票膠」

股票已經係最易贏錢嘅嘢，咁你都玩唔掂，唔好諗其他了

雖然係第一季回顧，但依然值得睇。因為啲基本嘢我唔會不停講

2020年中買金。惡性通脹，中。打仗，中埋。但都仲要跑輸股票一大截

有利因素，不利因素，根本任你講。點解打仗都股票跑贏？

油價？就仲衰。打埋脹都仲要大跌。經濟差？咁股票又升？

係架，有一浸升的。你買PTON都有一浸升。六合彩都有人中

我就係搵啲易贏錢嘅嘢畀你

金價，都只係跟通脹。油價就仲衰，跟唔到通脹。

2011年金價又1900。而家又1900。

打仗油價有排升，錯到不能。

2009年油價又百幾蚊，2022年又百幾蚊

—點解股票跑贏金價跑贏油價？係有原因的。

計及通脹，油價高位係200蚊，而家70都冇，廢過恒指

實情，計及通脹。舊年油價未破2011，未破2009，甚至未破1979年

計及通脹，破唔到頂嘅嘢，點可能係好投資？

一張圖，話你知，點解要買股票

今次唔再打返對上十一篇嘅目錄啦，鍾意嘅你去上一篇搵，最開頭有講返晒我之前十篇講過乜

我是一個「股票膠」

1. 你可以話我係一個「股票膠」，對我嚟講股票必勝。有得解，亦有多年嘅往績。至於其他投貟，十居其九都唔係太好。有啲根本係騙局，亦有啲未必係「投資」（例如外匯）。

2. 對我嚟講，就只有股票。或者債（老人家用，我都就快變老）。樓就自住嘅，當然以往香港樓投資很好，後話。收藏品可能OK，但唔識玩，亦花時間。其他，其實都可以不理

股票已經係最易贏錢嘅嘢，咁你都玩唔掂，唔好諗其他了

3. 而股票有一個好重要嘅特質：就係易玩。唔只入場門檻低，況且，都真係賺錢嘅機會最大，一直有講，遲下都會再講。缺點你可以話波幅大，其實亦未必比其他「投資」大（債券除外，一般波幅細過股票）。但回報亦係夠高嘅。

4. 股票已經係最易玩嘅嘢，2008年後，我買股票近乎冇點輸過錢（成個倉計啦），頂多可能2020年2月尾潛過少少水（但計埋收息應該冇輸）。股票你都未玩得掂嘅，仲想玩其他嘢？

5. 有甚麼唔好嘅投資？上篇講咗金。今篇再講商品，主要講石油。其他更加唔多使講。

雖然係第一季回顧，但依然值得睇。因為啲基本嘢我唔會不停講

6. 雖然係叫做第一季回顧，但點解值得睇？因為都係有啲基本嘢。而你不可能預期我之後每次都講，只會得閒我又有興致先講。況且你亦冇咁多時間睇。例如總冇可能2023年中我又講一次油價基本嘢，去到年尾又講一次。「你見呢個第一季都十幾篇仲未埋尾啦」

7. 仲有，可能過兩日會講。但你真係唔使理俄羅斯係咪兵變的。Why bother？Why give a shit？網上啲垃圾，睇少啲。對於散仔嚟講，俄羅斯今次兵變，知唔知最幸運係乜？最幸運係星期六！否則可能市場震5%，你又沽晒啲嘢了。

8. 上篇個圖整得好蒙，貼返畀你，雖然你開個Excel都OK．另外，平時啲Excel，用desktop睇吧，手機唔係畀你做啲咁複雜嘅東西。

9. 上次講金價，你冇心機睇嘅，我只有一句嘢補充：

2020年中買金。惡性通脹，中。打仗，中埋。但都仲要跑輸股票一大截

10. 我2020年中買金，記住係疫情後，無限QE，股市已大反彈。之後全球近幾十年最劇烈嘅通脹，都畀我估中（當時唔多人講）。甚至2022年，全球幾十年最大嘅武裝衝突，都開埋（當然冇事先估中）。但，啲金，一路都係輸錢！而同期買美股，升咗25%！

11. 亦即係話，咩「有利因素」，印錢通脹升地緣政治衝突，金價一樣跌。而所謂咩「不利因素」，高通脹加息政治衝突，股票一樣照升。可見呢啲咩「有利」「不利」，好多都係事後講，多數都係廢話。唔廢都好，亦唔係直線思維

有利因素，不利因素，根本任你講。點解打仗都股票跑贏？

12. 唔明？「咁你睇多次上次篇文啦，一句講完又話唔明，睇幾千字又話長」

13. 咁油價嘅情況，同金價亦都係差不多。「惡性通脹加埋俄羅斯打仗」，油價？跌極都有。我敢講，過去幾年你買嘅，十個有九個都輸錢。

油價？就仲衰。打埋脹都仲要大跌。經濟差？咁股票又升？

14. 而你見第一季，金價都翻生（所以我都回家，唔使輸）。但油價仲要跌。

15. 咁事後你當然又可以解，呢啲解釋都係正路嘅：經濟差嘛（但點解股票係咁升呢？）。仲有，金價你可以話受惠估息口見頂，油價向來冇呢種論述。仲有你可以話咩俄油封頂之嘛。任你講。

16. 但其實，一句，買油，真係shitty idea。甚至所有商品都係。頂多得金同埋比特幣冇咁shitty。

係架，有一浸升的。你買PTON都有一浸升。六合彩都有人中

17. 當然你要講嘅，係架，油價有一浸升的。由咩「負油價」開始，你計到2022年開始打仗，升好多

18. 但，呢啲心態又係相當有問題。我之後都會講。你求其搵隻垃圾股，都會有一浸咁嘅嘢。我預告定，你鍾意睇Peloton（PTON）都得，畀埋個Excel你．之前有人問KRE（地區銀行喎），甚至隻內房債ETF（3001 HK），都係咁上下。你梗搵到啲位係升嘅，但整體嚟講，嘥氣（而個嘥氣程度嚟講，KRE算係冇咁嘥氣，3001再差啲，PTON更加不知所謂—但PTON一樣中途好多次升三四成）

19. 你去投注站，日日有人中幾十倍波膽添。又如何？你不能見到有人買咗，升咗，又自己去睇埋一份。你有幾多人買油可以賺到錢？就算你出嚟同我講話你有，你買咗幾多咁大把？

我就係搵啲易贏錢嘅嘢畀你

20. 而「股票膠」嘅我做嘅嘢，十分簡單。我搵啲近乎唔使點用腦，易贏錢嘅方法。唔係搵啲幾十年原地踏步甚至跌嘅嘢，然後圈中間有幾個升浪出嚟話你買到就得。我係搵啲長升嘅嘢畀你，即係股票。

21. 蘋果歷史新高，即係你過去幾十年，任！何！位！買！都！贏！錢！到底呢句嘢有幾難明？OK，唔係隻隻係蘋果，但，相信美股都會創歷史新高。未必今年，可能三年後，五年後。但記住，都係嗰句，歷史新高，即係任何位你都贏錢。

22. 我知，你會講港股嘛。但反駁過多次，上面個圖，係MSCI 環球指數。當然MSCI呢個環球指數只包已發展市場，計埋新興市場又差啲。而且，當然入面美股為主（咁但全世界最大嘅公司都在美股嘛！）。但，德國法國英國股市都創歷史新高啦。

23. （BTW，MSCI環球指數，有ETF的，URTH．其實真係唔使搞咁多嘢，0.24%管理費一年，你見平均回報都10%。當然仲有其他類似嘅嘢，有AWCI，有VT，遲下開篇文講）

24. 好有趣，啲人都仲係會質疑，「過去唔代表將來」。但，百幾年嘅trend，有埋解釋，佢地就唔信　—　然後同你執住啲一年，甚至幾個星期嘅trend嚟講。相當精神分裂。

25. 總之，就係升咗，你咪仆埋去。特別係有其他人買咗，在你面前也文也武，更加影響判斷。特別係嗰啲係啲你睇唔起嘅人，份外礙眼。講真，搞清呢啲心態，好過你每日不停問我紹伊古係咪收得皮，胡錦濤係咪畀人軟禁，圓山飯店係咪有異象。

26. 講咗咁多虛嘢，畀啲實嘢你。

金價，都只係跟通脹。油價就仲衰，跟唔到通脹。

27. 上篇貼咗個，經通脹調整嘅金價圖。見到金價，都只係跟通脹升。

28. 睇唔明嘅？都可以講下，係用返「今日」嘅價去計。

29. 仲唔明嘅？咁睇呢個圖，一般你見到嘅「金價」。Nominal．

30. 十分簡單嘅講法：2011年，金價係當年嘅新高，1900蚊。而家，又係1900蚊左右（早排見過2000）。咁你計返通脹，就知根本未「破頂」。你唔使真係計數，但明白個概念啦？

2011年金價又1900。而家又1900。

31. 咁同樣地，你可以睇下，2011年標指幾多點，而家幾多點。OK，港股。但港股中間都派咗唔少息，黃金肯定冇。

32. 油價嘅情況，就應該比金價更加惡劣。所以我覺得，真係唔使點討論。

打仗油價有排升，錯到不能。

33. 首先，「打仗油價有排升」，明顯係錯到不能。直線思維丫拿，關心時局丫拿。你頂多話2月尾至3月頭升咗幾日—但之後，任何位買，你到而家都係輸錢。而當然絶大多數人都係3月先走去買。但其實邊一浸升得最勁？明顯係之前嗰兩年，疫情後復常，負油價開始反彈。你可以話之前跌多咗。

2009年油價又百幾蚊，2022年又百幾蚊

34. 呢個，略為睇長少少嘅油價，己經更加唔使討論。唔好話而家六十幾蚊。我就當之前，舊年3月頭百幾蚊。好高咩？你望下2009年幾多錢？Nominal個價都未到2009，何況 real price？你見仲差過金價　—　而我呢度仲係同你講百幾蚊，唔係而家六十幾蚊。

35. 呢啲，我就唔係馬後炮啦，一早預咗，叫咗唔好買。

36. 因為，你睇兩日，就可能只係睇傻仔多唔多。但你睇得長線少少，必定係同啲資產嘅本質有關。

37. 就請大家留意呢啲嘢，深層嘅嘢，乜嘢令資產價格升。而唔係日日睇垃圾，不停咁自相矛盾，一時又「過去唔代表將來」，一時就望住啲嘢升咗三日問我做乜叫你唔好買。你要識嘅，係「乜嘢過去會代表將來」

點解股票跑贏金價跑贏油價？係有原因的。

38. 股票點解長升？因為經濟一路增長，人類文明一路進步，企業越賺越多錢，汰弱留強。油價，何來有呢啲嘢？

39. 咁金價呢？你見好似都係好過油價。因為金價就真係好大程度上只係睇有冇人貴有關，冇乜實際用途。長遠嚟講，你見真係大約跟通脹，睇印幾多錢。

40. 油就唔同啦，因為「有用」。問題係，其實開極都有。同好多資源一樣，夠貴，就大把供應。所以啲價好難長期高企。仲有，夠貴，啲人就轉用其他嘢。

41. 所以商品嘅嘢，十居其九，都係cyclical，頂多係跟到通脹（亦即係real terms cyclical, nominal terms secular）

計及通脹，油價高位係200蚊，而家70都冇，廢過恒指

42. 唔信？咁再睇圖。具體啲。按通脹調整的話，當年嘅油價高位係近200蚊，而家70唔夠，跌剩三份一。港股都只係30000點跌到20000，OK，你可以扣埋通脹，但恒指中間派咗好多息，夠冚通脹。

實情，計及通脹。舊年油價未破2011，未破2009，甚至未破1979年

43. 最後，呢個終極嘅圖。慢慢細味。黑色係nominal，紅色係real（計及通脹）。即使係俄烏戰爭剛開頭，嗰個油價。計及通脹，唔好話未及2011年，亦未及2008年—甚至係遠低過1979年！

計及通脹，破唔到頂嘅嘢，點可能係好投資？

44. 計及通脹，破唔到頂嘅東西，點會係好投資？（甚至，點會係投資？）

45. 你見股票嘅情況，絶對唔同。呢個係標普指數扣除通脹後嘅表現。

一張圖，話你知，點解要買股票

46. 呢個圖，一個圖話畀你知，點解要投資—因為現金貶值。同埋點解應該買股票—因為跑贏通脹。仲有，你啲油價金價放落去，明顯唔係咁嘅一個圖。

47. 但你話，唔係喎，中途有啲日子，坐十年都未回家　—　係架！邊有包生仔。你最好快啲接受現實。不過，你嘅人生唔止十年嘅。仲有，分段買嘛。你2000年摸頂買美股，就十年返唔到家。但分段嘅，就早好多。

48. 最後補充：商品，唔同「收藏品」—你買幅梵高，就可能跑得贏通脹的。但平時大家講嘅「大宗商品」，要幾多有幾多，冇獨特性，好難可以長期有real return—因為佢地真係不能創造任何嘢